Rômo 3 - Mbëtï Ndjapä: TÄFO MADƗ̈

¹ Käko rə giamâ kä ndə̂ ajuîfu rô adɨ̂ azü la rə̂? Tchôtchô rə giamâ kä ndə̂ ajuîfu gbo rə̂ lə̂ köbosə̂ kə̂ wa gasa?

² Tchôtchô rə nə̈ wä gbölö lə̂ angbängbä rə. Dokʉ̈ rə nə̈ də̈ rə̂ ndə̂ Ndjapä zâ apö ndə̂ yê sə̈ ajuîfu.

³ Giamâ kä? Ndə̂ angâ ajuîfu kôsə̂ kə̂ mbo rə gundə̂sə̂ pö ma Ndjapä lâme, ârə̂ kä âkə̈ kîtə̂ köbo tə̂ Ndjapä ndə̂kə̂ pa tche mboabô rə mbô gundə̂sə̂ pö ma yê?

⁴ Âdə̂âbo käko-a! Äwäpä azü wunsə̂ nə̈ pä Ndjapä mbö rə gundə̂sə̂ lëge pö, ânyë azü gbɛ̂ wätə̂ a-earə̂ yepa. Ädə̈ käko ânyë Mbëtï Ndjapä tô rə̂ päkëdə̂: «Äwäpä azü wunsə̂ nə̈ pä mo wä djîrə̂, lə̂ köbosə̂ kə̂ to pö ndə̂ zə̈ ânyë âdə azü âza pö lə̂ küma zə̈, mo wutu lə̂nə̈-ê.»

⁵ Praâbalë âdə kə̂ mbo ngbongbo rə ndə̂ azə̂ ânyisə̂ kə̂ wa djîrə̂ ndə̂ Ndjapä lə̂ la azü gbɛ̂ ësûwu, azə̂ âto rə̂ atöko? Azə̈ âtoadje rə̂ pä, Ndjapä wâbo djîrə̂ bëte mêrâ ndə̂ yê ndə̂ âtê pâ azə̂ lâme? (Më tö pö lâme batə̂ rə̂ ndə̂ azü to rə̂.)

⁶ Âdə̂âbo käko-a! Âdə rə nə̈ âwa käko, atöko kä ndə̂ Ndjapä wa ngbanga lə̂ küma azü?

⁷ Praâbalë âdə më âmo yepa ndə̂kə̂ pa lëge pö ndə̂ Ndjapä wutu kraâ, ânyë azü voga tchë, bëte giamâ kä ndə̂ a wâ ngbanga lə̂ küma mê batə̂ earə̂ ngbongbo rə?

⁸ Käko bëte giamâ azə̈ toabô rə̂ tô päkëdə̂: «Äwäpä azə̈ mbo ngbongbo rə ânyë tchôtchô rə wutu lə̂nə̈?» Angâ azü ndə̂ andjë drô mê tö rə̂ pä, mëmê kä ndə̂ âtô apö nə̈ lâme. Azü nə̈ lâme, ngbanga ndə̂ Ndjapä wadje rə̂ lə̂ küma andjê lâme wä lə̂ köbo nə̈.

Ngâ djîrə̂ akrə tchâtchu Ndjapä wâbo-a

⁹ Giamâ kä? Ârâ ndə̂ ajuîfu, ârâ rö adɨ̂ azü gbɛ̂? Âdə̂âbo käko balë-a! Më tô pö lâme dokʉ̈tchê alême nə̂ pä, ajuîfu la azü ndə̂ andjê wâbô wâtə̂ ajuîfu wä gbɛ̂ tchâtchâ kümändëmä ndə̂ ngbongbo rə.

¹⁰ Batə̂ rə̂ ndə̂ Mbëtï Ndjapä tô rə̂ päkëdə̂: «Ngâ akrə ndə̂ tche wâ djîrə̂ lə̂ la Ndjapä wâbo-a, balë wâbo ndjë-a.

¹¹ Akrə ndə̂ tche wûnsə̂ rə wâbo-a. Akrə ndə̂ tche pû köbo Ndjapä wâbo-a.

¹² Azü gbɛ̂ gbôtə̂ tchôtchô köbo nə̈ nə̂, köbo andjê yû nə̂ gbɛ̂. Akrə ndə̂ tche mbô tchôtchô rə wâbo-a, balë wâbo ndjë-a.

¹³ Pö ma andjê wä batə̂ cho akuzü ndə̂ manə̈ wa hue-ë. Pö ma andjê wä kütû ndə̂kə̂ bolo azü. Pö ma andjê mbö ngbongbo rə batə̂ ndôngâ ɛ̈krʉ̂.

¹⁴ Apö ma andjê sɨ̂sɨ̈ la apö ndə̂kə̂ dra ndə̂ azü, ndjë la apö ndə̂ âkʉ azü.

¹⁵ Da andjê rɨ̈ ndə̂kə̂ e ndə̂kə̂ won azü.

¹⁶ Tchô gbɛ̂ ndə̂ andjê ro tâ, andjë ndɨ̈ arə ndə̂ azü, andjë gbötə̂ azü lə̂ nyonyo.

¹⁷ Andjë wûn-âbo sə̂ kə̂ sə la zɨtɨ su la azü-a.

¹⁸ Andjë kpêâbo wa Ndjapä balë-a.»

¹⁹ Azə̈ wûnsə̂ nə̈ nə̂ pä rə gbɛ̂ ndə̂ ndïɛ̈ tô pö ndə̂nə̈, tche tö rə̂ bëte azü ndə̂ andjë wâ tchâtchâ ndïɛ̈ nə̈. Ânyë akrə balë wabô tee la ngâ pö balë ndə̂kə̂ to rə̂ ndə̂nə̈-a, ânyë azü gbɛ̂ wunsə̂ nə̈ pä lə̂ la Ndjapä pö kä lə̂ küma anyê.

²⁰ Bëte rə̂ kä ndə̂, akrə balë wâbo djîrə̂ lə̂ la Ndjapä lə̂ köbosə̂ kə̂ mbo rə gundə̂sə̂ ndïɛ̈-a. Bëte ndïɛ̈ zä kütû köbo sə̈ akrə ndə̂kə̂ wunsə̂ nə̈ pä tche mbô ngbongbo rə nə̂.

Köbo kə̂ wa djîrə̂ lə̂ la Ndjapä

²¹ Angaâtə, Ndjapä nyîsə̂ köbo sə̂ azü nə̂ ndə̂kə̂ pa andjë watə̂ adjîrə̂ azü lə̂ la yê. Köbo nə̈ lâme wâbo lə̂ köbosə̂ kə̂ mbo rə gundə̂sə̂ ndïɛ̈-a. Ndïɛ̈ ndə̂ Möyîze la pö ndə̂ a-earə̂ ndə̂ma Ndjapä tô rə̂ alême wätə̂ lëge nə̈.

²² Ndjapä mbö rə̂ ndə̂kə̂ pa azü wa djîrə̂ lə̂ la yê lə̂ köbosə̂ nə̈ ndə̂ andjë zâ su andjê sə̈ Jezü Krîsiti. Tche mbö rə nə̈ lâme sə̈ azü gbɛ̂ ndə̂ andjë zâ su andjê sə̈ Krîsiti, bëte tche krʉ̂âbo tchə̂lə̂ azü-a.

²³ Azü gbɛ̂ mbô ngbongbo rə nə̂, andjë wâbo ndə̂kə̂ wun golowäre ndə̂ Ndjapä-a.

²⁴ Praâbalë Ndjapä mbö tchôtchô su tə̂ andjê ämbänə̈, tche mbö rə̂ ânyë andjë wâtə̂ adjîrə̂ azü lə̂ la yê. Tche mbö rə̂ käko lə̂ köbosə̂ Jezü Krîsiti ndə̂ tche jî andjê lə̂ ngbongbo rə.

²⁵ Ndjapä zä Jezü Krîsiti batə̂ ngela ânyë lə̂ köbosə̂ jï yê, Krîsiti jî ngbongbo rə ndə̂ azü ndə̂ andjë zâ su andjê sə̈ tchë. Ndjapä mbö rə̂ käko ndə̂kə̂ nyisə̂ nə̈ pä tche wä djîrə̂: Angbongbo rə ndə̂ azü mbo rə̂ alême, tche gʉ̈ä la yê pânə̈,

²⁶ lo nə̈ lâme tche rʉ̈ätə̂ su yê ndə̂kə̂ sə bëte andjê. Angêta âtə, tche nyïsə̂ nə̈ pä tche wä djîrə̂ bëte tche nyïndə̂ kə̂ wa djîrə̂ kə̈ nyî ndjë ndə̂nə̈ pä azü ndə̂ andjë zâ su andjê sə̈ Jezü wa djîrə̂ lə̂ la yê.

²⁷ Ngâ rə ndə̂kə̂ pa azə̈ bhi gogo azə̈ pânə̈ kä tâ? Âdə̂âbo käko balë-a! Azə̈ bhï gogo azə̈ bëte giamâ? Bëte rə̂ ndə̂ azə̈ mbo rə gundə̂sə̂ ndïɛ̈? Âdə̂âbo käko-a! Praâbalë bëte rə̂ ndə̂ azə̈ zâ su azə̂ sə̈ Jezü.

²⁸ Käko pö ndə̂ azə̈ to rə̂ wä kâkë: Akrə wä djîrə̂ lə̂ la Ndjapä bëte rə̂ ndə̂ tche zâ su yê sə̈ Jezü, âdə̂âbo kə̂ mbo rə gundə̂sə̂ ndïɛ̈-a.

²⁹ Âdəndjë rə̂, Ndjapä wä kütû tə̂ Ndjapä ndə̂ ajuîfu? Tche wâbo ndjë tə̂ Ndjapä ndə̂ azü ndə̂ andjë wâbô wâtə̂ ajuîfu? Tə̂ lëge nə̈, tche wä ndjë tə̂ Ndjapä ndə̂ azü ndə̂ andjë wâbô wâtə̂ ajuîfu,

³⁰ bëte Ndjapä wä kütû balë. Tchetchë kä ndə̂ âmbo rə̂ pä ajuîfu la azü ndə̂ andjê wâbô wâtə̂ ajuîfu wa djîrə̂ lə̂ la yê lə̂ köbosə̂ kə̂ za su andjê sə̈ Jezü Krîsiti.

³¹ Käko azə̈ wün ndïɛ̈ batə̂ mbämbä rə? Ndə̂ azə̈ zâ su azə̂ sə̈ Jezü Krîsiti âtə? Âdə̂âbo käko-a! Azə̈ mbö rə̂ ndə̂kə̂ pa ndïɛ̈ nə̈ lu lə̂ la azü.