Rômo 2 - Mbëtï Ndjapä: TÄFO MADƗ̈

Kə̂ wa ngbanga ndə̂ Ndjapä wä lə̂ köbo nə̈

¹ Bëte rə̂ kä ndə̂, momö ndə̂ mo wa ngbanga lə̂ küma angâ zə̈ âtə, mo âdəndjë tchabâ gbɛ̂, mo wâbo la ngâ pö balë ndə̂kə̂ to rə̂-a. Mo âsə̈ wa ngbanga lə̂ küma angâ zə̈ ânyë kə̂ mbo ndjë rə batə̂ andjê dëkë mo kä lakə̂ wa ngbanga lə̂ küma zə̈ la tə̂ zə̈.

² Azə̈ wûnsə̂ nə̂ nə̈ pä Ndjapä wä ngbanga lə̂ köbosə̂ lëge pö lə̂ küma azü ndə̂ andjë mbo arə käko-ë.

³ Momö ndə̂ mo wa ngbanga lə̂ küma azü bëte ngbongbo rə ndə̂ andjë mbô rə̂ ânyë momö ndjë gbɛ̂ mo mbo ndjë arə nə̈ lâme, mo tö rə̂ pä ngbanga ndə̂ Ndjapä teabô tee lə̂ küma zə̈?

⁴ Ndjapä mbö tchôtchô rə tə̂ zə̈ tə̂ gbölösə̂nə̈, tche wâbo ngbanga lə̂ küma zə̈ gasa-a, tche rʉ̈ätə̂ su yê ndə̂kə̂ krʉ bëte mö; mo wün rə̂ lə̂ la zə̈ ämbänə̈? Tche mbö tchôtchô rə tə̂ zə̈ ndə̂kə̂ pa mo gbotə̂ bəndɨ kə̂ mbo rə ndə̂ zə̈;

⁵ lə̂ köbosə̂ gbôgbô su zə̈, mo nyîâbo ndə̂kə̂ gbotə̂ bəndɨ kə̂ mbo rə ndə̂ zə̈-a. Käko mo kpülu mêrâ ndə̂ Ndjapä pâ zə̈ ndə̂kə̂ krʉ bëte lö mêrâ ndə̂ yê lo nə̈ ndə̂ tche nyisə̂ nə̈ pä kə̂ wa ngbanga ndə̂ anyê wä djîrə̂.

⁶ Ndjapä âzadje rə sə̈ akrə balë balë gundə̂sə̂ rə ndə̂ tche mbô rə̂.

⁷ Angâ azü rʉ̈ätə̂ su andjê lə̂ agbôgbô arə ndə̂kə̂ mbo tchôtchô rə ndə̂kə̂ pa Ndjapä voga andjê ânyë kə̂ lusə̂ andjê. Andjë pü tchîsûwu ndə̂ ândɨ̂âbô ndɨ̂-î. Ndjapä âzadje tchîsûwu ndə̂ logbɛ̂ logbɛ̂ sə̈ andjê.

⁸ Praâbalë angâ azü kösə̂ kə̂ dje ma Ndjapä, kə̈ kôsə̂ lëge pö, kə̂ mbo kütû mbə̈lï. Andə̂ andjë nə̈, su Ndjapä âkʉadje tchë tə̂ andjê ânyë tchê wadje ngbanga lə̂ küma andjê.

⁹ Azü gbɛ̂ ndə̂ andjë mbo angbongbo rə, agbôgbô arə la arə nyonyo kä ndə̂ âgbo andjê. Ajuîfu dokʉ̈tchê, la tchêngbâ nə̈ azü ndə̂ andjë wâbô wâtə̂ ajuîfu.

¹⁰ Andə̂ azü gbɛ̂ ndə̂ andjë mbo tchôtchô rə, Ndjapä âvogadje andjê, kə̂ luadje sə̂ andjê ânyë kə̂ za zɨtɨ su sə̈ andjê. Ajuîfu dokʉ̈tchê, la tchêngbâ nə̈, azü ndə̂ andjë wâbô wâtə̂ ajuîfu.

¹¹ Tə̂ lëge nə̈, lə̂ la Ndjapä azü gbɛ̂ wä balë.

¹² Azü ndə̂ andjë wûn-âbô sə̂ ndïɛ̈ ndə̂ Möyîze wûn ânyë kə̂ mbo angbongbo rə, andjê âtchu me tchü âdəndjë rə̂ ndə̂ andjë wûn-âbô sə̂ ndïɛ̈ nə̈ wûn. Andə̂ ajuîfu ndə̂ andjë wûnsə̂ ndïɛ̈ ndə̂ Möyîze ânyë kə̂ mbo angbongbo rə, Ndjapä âwadje ngbanga ndə̂ andjê lə̂ köbosə̂ ndïɛ̈ nə̈ lâme.

¹³ Tə̂ lëge nə̈, azü ndə̂ andjë dje kütû ndïɛ̈ nə̈ djë la tü andjê, andjë wâbo djîrə̂ lə̂ la Ndjapä-a. Azü ndə̂ andjë mbo rə gundə̂sə̂ ndïɛ̈ nə̈ kä ndə̂ âwâtə̂ adjîrə̂ azü lə̂ la Ndjapä.

¹⁴ Azü ndə̂ andjë wâbô wâtə̂ ajuîfu wûn-âbo sə̂ ndïɛ̈ ndə̂ Möyîze-a. Batə̂ rə̂ ndə̂ su andjê nyisə̂ nə̈ sə̈ andjê, andjë mbö rə gundə̂sə̂ ndïɛ̈ nə̈. Rə lâme nyïndə̂ kə̂ nyisə̂ nə̈ pä ndïɛ̈ ndə̂ andjê wä bhâlə̂ su andjê la tə̂ andjê, ndə̂kə̂ wun rə̂ djîrə̂ andjë wâbo la ndïɛ̈ nə̈-a.

¹⁵ Kə̂ mbo rə ndə̂ andjê nyïsə̂ nə̈ pä arə ndə̂ ndïɛ̈ ndə̂ Möyîze yûkû nə̈ wä bhâlə̂ su andjê. Kə̂ rɨ tchə̂lə̂ su andjê nyïsə̂ nə̈ pä rə nə̈ wä käko-ë. Köbo kə̂ za küma andjê nyïsə̂ nə̈ pä rə nə̈ wä ndjë käko-ë. Köbo kə̂ za küma andjê nə̈ nyïsə̂ nə̈ sə̈ andjê pä andjë mbö ngbongbo rə, ndjë a kä lakə̂ za kokô andjê pâ rə ndə̂ andjë mbô rə̂.

¹⁶ Rə ndə̂ âwutu kraâ lə̂ la azü lo ngbanga nə̈ kä. Äwä gundə̂sə̂ Tchôtchô Pö ndə̂ mê mu rə̂ ndə̂ âtô rə̂ pä Ndjapä âwa ngbanga lə̂ köbosə̂ Jezü Krîsiti pâ arə gbɛ̂ ndə̂ azü mbo rə̂ lə̂ küwû nə̈.

Ajuîfu la ndïɛ̈ ndə̂ andjê

¹⁷ Praâbalë momö ndə̂ mo tô rə̂ pä mo wätə̂ juîfu âtə, mo zä su zə̈ pâ ndïɛ̈ ânyë kə̂ bhi gogo zə̈ sə̈ Ndjapä ndə̂ zə̈.

¹⁸ Mo wünsə̂ rə ndə̂ su Ndjapä nyîndə̂ nə̈ ânyë ndïɛ̈ nyîsə̂ köbo kə̂ wunsə̂ rə ndə̂ âwâtə̂ tchôtchô nə̈ sə̈ mö.

¹⁹ Mo tö rə̂ bhâtə̂ su zə̈ pä mo wätə̂ earə̂ kə̂ nyisə̂ köbo sə̂ a-earə̂ föla ânyë lə̂ köbosə̂ zə̈, azü ndə̂ andjë sə̂ lə̂ bübü tchô wun tchô ngrôô.

²⁰ Mo tö rə̂ bhâtə̂ su zə̈ pä mo wätə̂ earə̂ kə̂ nyisə̂ rə sə̈ azü ndə̂ andjë wûn-âbô sə̂ rə wûn-î, earə̂ kə̂ nyisə̂ rə sə̈ abechë. Mo wûnsə̂ nə̈ nə̂ pä kə̂ wunsə̂ rə la lëge pö kä lə̂ ndïɛ̈.

²¹ Ndə̂ âdə̂ käko, momö ndə̂ mo nyisə̂ rə sə̈ azü, bëte giamâ kä ndə̂ mo nyîâbô sə̂ rə nyî sə̈ mö la tə̂ zə̈-ê? Momö ndə̂ mo mu pö sə̈ azü pä andjë zɨabô ngbä zɨ̂-î, bëte giamâ kä ndə̂ mo zɨ ngbä?

²² Mo kösə̂ nə̈ sə̈ azü ndə̂kə̂ pa akrə puabô ɛ̈chë âdəndjë köchë ndə̂ ngâ yê pû-î, bëte giamâ kä ndə̂ mo pu ɛ̈chë âdəndjë köchë ndə̂ angâ zə̈? Mo kösə̂ kə̂ voga angakʉ̈lä, bëte giamâ kä ndə̂ mo zɨ ngbä arə ndə̂ âwa lə̂ anda ndə̂ angakʉ̈lä nə̈ lâme?

²³ Mo bhï gogo zə̈ pâ ndïɛ̈, bëte giamâ kä ndə̂ kə̂ mbo rə ndə̂ zə̈ wabô wâ gundə̂sə̂ pö ndə̂ ndïɛ̈ nə̈-ê? Bëte giamâ kä ndə̂ mo lûâbô sə̂ Ndjapä lû-î?

²⁴ Bëte rə̂ kä ndə̂, a mbô rə̂ lə̂ Mbëtï Ndjapä päkëdə̂: «Bëte nyënyê ajuîfu, azü ndə̂ andjë wâbô wâtə̂ ajuîfu drö rə̈ Ndjapä.»

²⁵ Âdə mo âmbo rə ndə̂ ndïɛ̈ yûkû nə̈, gasa ndə̂ mo wâ rə̂ âmbo tchôtchô rə tə̂ zə̈. Praâbalë âdə mo âkosə̂ kə̂ mbo rə ndə̂ ndïɛ̈ yûkû nə̈, mo wä batə̂ akrə ndə̂ tche wâbô gasa wâ-ê.

²⁶ Akrə ndə̂ tche wâbô gasa wâ, ânyë kə̂ mbo rə ndə̂ ndïɛ̈ yukû nə̈, lə̂ la Ndjapä tche wâ nə̂ batə̂ akrə ndə̂ tche wâ gasa.

²⁷ Akrə ndə̂ tche wâbô wâtə̂ juîfu, ânyë kə̈ wâbô gasa wâ, ânyë kə̂ mbo rə ndə̂ ndïɛ̈ yûkû nə̈, tchê wadje ngbanga lə̂ küma zə̈ ndə̂ mo wâtə̂ juîfu, kə̂ wa la ndïɛ̈ ânyë kə̂ wa gasa bëte kə̂ mbo rə ndə̂ zə̈ wâbo gundə̂sə̂ rə ndə̂ ndïɛ̈ yûkû nə̈-a.

²⁸ Tə̂ lëge nə̈, âdə̂âbo rə ndə̂ azü wun rə̂ kä ndə̂ âmbo rə̂ pä akrə watə̂ juîfu-a, âdə̂âbo ndjë ku gasa ndə̂ âwatə̂ akrə kä ndə̂ âmbo rə̂ pä akrə watə̂ juîfu-a.

²⁹ Praâbalë rə ndə̂ azü wûn-âbô rə̂ wûn-î, mbö rə̂ pä akrə watə̂ lëge juîfu. Lëge kə̂ wa gasa wätə̂ kua ndə̂ Ndjapä mbo rə̂ lə̂ köbosə̂ Yingö ndə̂ yê lə̂ su akrə, âdə̂âbo lə̂ köbosə̂ ndïɛ̈-a. Âdə̂âbo azü kä ndə̂ âvoga lëge juîfu-a, Ndjapä kä ndə̂ a voga tchë.