Rômo 16 - Mbëtï Ndjapä: TÄFO MADƗ̈

Pôlo pö ndə̂ azü gö ndə̂ Rômo

¹ Më yükû nə̈ sə̈ nyê pä nyë za Febë, nyînə̂ azə̂ bhândə̂ nyê. Tche wätə̂ earə̂ kua ndə̂ Ndjapä lə̂ Egilîze ndə̂ Sankerë.

² Äwäpä nyë za tchë la rə̈ Gbölö Gbïɛ̈, batə̂ rə̂ ndə̂ azü ndə̂ Ndjapä mbo tchê rə̂ logbɛ̂. Âdə tche âyu nyê tə̂ ngâ rə ndə̂ tche wabô wâ la rə̂-ê, äwäpä nyë za könô sə̈ tchë, bëte tche zä könô sə̈ azü tə̂ gbölösə̂nə̈. Mëmê ndjë gbɛ̂, tche zâ könô sə̈ mê nə̂.

³ Nyë pö ndə̂ Prïsîye la Äkïlâse sə̈ mê, angâ mê ndə̂ ârâ mbô kua ndə̂ Jezü Krîsiti la andjê.

⁴ Atchâklêtchâ, andjë tchû bëte mê lo nə̈ ndə̂ andjë nyîndə̂ kə̂ tcha mê lə̂ kuzü. Âdə̂âbo kütû mê kä ndə̂ âzâ ayîabâ sə̈ andjê-a. Praâbalë a-Egilîze gbɛ̂ ndə̂ azü nə̈ wâbô wâtə̂ ajuîfu.

⁵ Nyë pö ndə̂ azü ndə̂ Egilîze ndə̂ andjë pâlatə̂ andjê lə̂ nda ndə̂ Prïsîye la Äkïlâse sə̈ mê. Nyë pö ndə̂ Ëpäyïnête ndə̂ më nyîndə̂ yê tə̂ gbölösə̂nə̈ sə̈ mê. Tche wätə̂ dokʉ̈ akrə gö ndə̂ Azï ndə̂ tche zâ su yê sə̈ Krîsiti.

⁶ Nyë pö ndə̂ Malê sə̈ mê, ndə̂ tche mbô kua tə̂ gbölösə̂nə̈ bëte nyê.

⁷ Nyë pö ndə̂ Andörönïkûsu la Jünïâse sə̈ mê. Andjë wätə̂ azü bhândə̂ mê ndə̂ ârâ la andjê sə̂ alême lə̂ nda kânga. Andjë wätə̂ abadjângele ndə̂ Krîsiti ndə̂ azü wûnsə̂ andjê tə̂ gbölösə̂nə̈. Andjë wätə̂ azü ndə̂ andjë zâtə̂ andjê sə̈ Krîsiti dokʉ̈tchê tə̂ mê.

⁸ Nyë pö ndə̂ Äpïlïätûse sə̈ mê ndə̂ më nyîndə̂ yê tə̂ gbölösə̂nə̈ lə̂ köbosə̂ kə̂ wa balë ndə̂ ârâ wâ balë la tchë la Gbölö Gbïɛ̈.

⁹ Nyë pö ndə̂ Urubɛ̈n sə̈ mê, ngâ azə̂ ndə̂ azə̈ la tchë mbô kua ndə̂ Krîsiti, la Sätäkîse ngâ mê ndə̂ më nyîndə̂ yê tə̂ gbölösə̂nə̈.

¹⁰ Nyë pö ndə̂ Äpëlêse sə̈ mê ndə̂ tche nyîsə̂ nə̈ tə̂ lëge nə̈ pä anyë wätə̂ lëge akrə ndə̂ tche wâ balë la Krîsiti. Nyë pö ndə̂ azü nda ndə̂ Ärïsötöbûle sə̈ mê.

¹¹ Nyë pö ndə̂ Herodiön sə̈ mê, ndə̂ tche də̂ akrə bhândə̂ mê. Nyë pö ndə̂ azü nda ndə̂ Näräsîsi sə̈ mê, andjê ndə̂ andjë wâ balë la Gbölö Gbïɛ̈.

¹² Nyë pö ndə̂ Tïrïfêne la Tïrïfôso sə̈ mê, ndə̂ andjë zâ su andjê gbɛ̂ ndə̂kə̂ mbo kua bëte Gbölö Gbïɛ̈. Nyë pö ndə̂ Peresidï sə̈ mê, ndə̂ më nyîndə̂ yê tə̂ gbölösə̂nə̈. Tche zä su yê gbɛ̂ ndə̂kə̂ mbo kua bëte Gbölö Gbïɛ̈.

¹³ Nyë pö ndə̂ Rüfûse sə̈ mê, ndə̂ Gbölö Gbïɛ̈ dɨ̂ tchë. Nyë pö ndjë ndə̂ anyï nə̈ sə̈ mê, ndə̂ tche wâ ndjë batə̂ anyï mê.

¹⁴ Nyë pö ndə̂ Äsɛ̈nkrîte la Felegön la Hërëmêse la Pätröbâse la Hërëmâse la arə̂mâ gbɛ̂ ndə̂ andjë sə̂ la andjê sə̈ mê.

¹⁵ Nyë pö ndə̂ Fïlölôge la Julï la Nerë la nyînə̂ nə̈ sə̈ mê. Nyë pö ndjë ndə̂ Ölɛ̈npâse la azü ndə̂ Ndjapä gbɛ̂ ndə̂ andjë sə̂ la andjê.

¹⁶ Nyë pö ndə̂ tə̂ nyê lə̂ gbâtə̂ nyê lə̂ köbosə̂ kə̂ a ma angâ nyê ndə̂ âdâka lə̂ la Ndjapä. A-Egilîze ndə̂ Krîsiti gbɛ̂ pô ndə̂ nyê nə̂.

Adɨ̂ wängö ndə̂ Pôlo

¹⁷ Arə̂mä, rə ndə̂ mê yûkû nə̈ sə̈ nyê kä âtə: La nyê gbö tə̂ azü ndə̂ andjë nə la apö ndə̂ âkrʉ tchə̂lə̂ azü la apö ndə̂ âmbo rə̂ pä azü te lə̂ ngbongbo rə. Azü nə̈ gbôtə̂ köbo pö ndə̂ ârâ nyîsə̂ nə̈ sə̈ andjê lâme nə̂. Nyë gïtə̂ nyê tə̂ azü lâme bhâchï.

¹⁸ Bëte azü nə̈ lâme mbôâbo kua ndə̂ Krîsiti Gbölö Gbïɛ̈ ndə̂ azə̂-a. Praâbalë andjë pü kütû kɨ̈zɨ̂ tchə̂lə̂ andjê. Atchôtchô pö la apö ndə̂ âfû wütu lə̂ ma andjê ndə̂kə̂ bolo azü ndə̂ tchə̂lə̂ la andjê krâbô krâ-ê.

¹⁹ Arə̂mä, andə̂ nye nə̈, azü gbɛ̂ wûnsə̂ nə̈ nə̂ pä nyë wätə̂ azü ndə̂kə̂ dje pö. Bëte rə̂ kä ndə̂, su mê fû la nyê. Praâbalë më nyïndə̂ nə̈ pä nyë watə̂ azü ndə̂ küma andjê wâ lanə̈ ndə̂kə̂ mbo tchôtchô rə batə̂ rə̂ ndə̂ su nyê grô lakə̂ kosə̂ ngbongbo rə.

²⁰ Ndjapä ndə̂ tche za zɨtɨ su sə̈ akrə, tche ndô tə̂kə̂ nunu Satäa tchâtchâ da nyê nə̂. Äfü pä Gbölö Gbïɛ̈ ndə̂ azə̂ Jezü mbo tchôtchô su tə̂ nyê!

²¹ Timotë, ngâ mê ndə̂ ârâ mbo kua la tchë pô ndə̂ nyê nə̂. Lüsïûse la Jasön la Sösïpätêre ndə̂ andjë wâtə̂ azü bhândə̂ mê, andjë pô ndjë ndə̂ nyê nə̂.

²² Mëmê, Tërëtïûse kä ndə̂ âmbô mbëtï âtə. Më pö ndə̂ nyê la rə̈ Gbölö Gbïɛ̈ ndə̂ tche pâla azə̂.

²³ Gäyïwûse pô ndə̂ nyê nə̂. Më lö bhândə̂ yê ânyë azü ndə̂ Egilîze gbɛ̂ pâlatə̂ andjê lə̂ nda ndə̂ yê. Ërâsete, earə̂ kə̂ bata makətche ndə̂ gö nə̈ la Kärätûse ngâ azə̂ pô ndə̂ nyê nə̂. [

²⁴ Äwäpä Gbölö Gbïɛ̈ ndə̂ azə̂ Jezü mbo tchôtchô su tə̂ nyê gbɛ̂! Amin.]

Pôlo vöga Ndjapä

²⁵ Äwäpä azə̈ voga Ndjapä! Tche wä la gbôgbô ndə̂kə̂ mbo rə̂ pä nyë kpokpo lə̂ köbosə̂ kə̂ za su nyê sə̈ Ndjapä, gundə̂sə̂ Tchôtchô Pö ndə̂ Jezü Krîsiti ndə̂ më mû rə̂. Tchôtchô Pö nə̈ wätə̂ rə ndə̂ tche nyîkrə rə̂ dokʉ̈tchê bhâlə̂ su yê, ndə̂ ândə̂po lə̂ küwû nə̈ logbɛ̂, ânyë tche nyîsə̂ nə̈ sə̈ azə̂ angêta.

²⁶ Angaâtə, a mü pö nə̈ kraâ lə̂ Mbëtï ndə̂ a-earə̂ ndə̂ma Ndjapä mbô rə̂. Ndjapä wä logbɛ̂ logbɛ̂, tche zäma ndə̂kə̂ pa a mu pö nə̈ lâme sə̈ azü pâ cho gbɛ̂ ndə̂kə̂ pa andjë za su andjê sə̈ tchë ânyë kə̂ dje ma yê.

²⁷ Ndjapä balë kä ndə̂ küma yê wâ lanə̈. Äfü pä Ndjapä gbo voga tə̂ logbɛ̂ logbɛ̂ lə̂ köbosə̂ Jezü Krîsiti! Amin.