Rômo 14 - Mbëtï Ndjapä: TÄFO MADƗ̈

Nyë jëndeabô angâ nyê jênde-ê

¹ Akrə ndə̂ tche zâ su yê sə̈ Ndjapä ânyë kə̈ kpôkpoabô tə̂ yê kpôkpo-ê, äwäpä nyë za tchë. Nyë jëndeabô tchë jênde-ê, bëte apö ndə̂ tche rɨ sə̂nə̈ bhâtə̂ su yê ânyë kə̈ wûn andə̂ ye pä äkä lə̂ köbo nə̈ lâme.

² Ngâ akrə ndə̂ tche zâ su yê sə̈ Ndjapä wün andə̂ ye nə̈ päkëdə̂ anyë wä ndə̂kə̂ zɨ arə gbɛ̂. Praâbalë ngâ akrə ndə̂ tche zâ su yê sə̈ Ndjapä ânyë kə̈ kpôkpoabô tə̂ yê kpôkpo zɨ̈ andə̂ ye nə̈ kütû akʉ̈kʉ̂-gûsû.

³ Akrə ndə̂ tche zɨ arə gbɛ̂, âwâbo pä tche wun akrə ndə̂ tche zɨ kütû angâ rə batə̂ ngâ akrə ndə̂ tche wâbô wâtə̂ ngâ rə-a. Akrə ndə̂ tche zɨ kütû angâ rə, âwâbo pä tche jende akrə ndə̂ tche zɨ arə gbɛ̂-a, bëte Ndjapä zä ndjë akrə ndə̂ tche zɨ arə gbɛ̂ batə̂ akrə ndə̂ yê.

⁴ Mo də̈ andə̂ zə̈ nə̈ tchabâ ânyë kə̂ jende earə̂ kua ndə̂ ngâ akrə ngbî? Âdə gbô tche âwa lafô âdəndjë rə̂ ndə̂ tche tê, äwün kütû gbölö akrə ndə̂ yê. Gbô tchë səadje lakə̂ krʉ lafô bëte Gbölö Gbïɛ̈ wä la gbôgbô ndə̂kə̂ mbo rə̂ pä tche krʉ po lafô.

⁵ Ngâ akrə wün ngâ lö batə̂ gbölö lö ndə̂ ârô adɨ̂ nə̈. Ngânə̈ wün andə̂ ye nə̈ alö nə̈ gbɛ̂ kütû balë lə̂ köbo nə̈. Äwäpä akrə balë balë wunsə̂ nə̈ tə̂ lëge nə̈ pä pö bhâtə̂ su yê lâme wä lə̂ köbo nə̈.

⁶ Akrə ndə̂ tche wûn ngâ lö batə̂ gbölö lö ndə̂ ârô adɨ̂ nə̈, tche mbö rə̂ käko ndə̂kə̂ lusə̂ Gbölö Gbïɛ̈. Akrə ndə̂ tche zɨ arə gbɛ̂, tche zɨ̈ rə̂ ndə̂kə̂ lusə̂ Gbölö Gbïɛ̈, bëte tche zä ayîabâ sə̈ Ndjapä. Akrə ndə̂ tche zɨ angâ rə, tche mbö rə̂ käko ndə̂kə̂ lusə̂ Gbölö Gbïɛ̈, bëte tchetchë ndjë gbɛ̂ tche zä ayîabâ sə̈ Ndjapä.

⁷ Bëte ngâ akrə balë lə̂ gûtə̂ azə̂ sə̂âbo la tʉ̈rʉ̂ la bëte tə̂ yê la tə̂ yê-a, ânyë ngâ akrə balë tchûâbo bëte tə̂ yê la tə̂ yê-a.

⁸ Bëte âdə azə̂ ândəpo la tʉ̈rʉ̂ la azə̂, azə̈ sə̈ bëte Gbölö Gbïɛ̈. Âdə azə̈ âtchu, azə̈ tchü bëte Gbölö Gbïɛ̈. Bëte rə̂ kä, âdə azə̈ sə̈ pâ cho âtə âdəndjë rə̂ ndə̂ azə̈ tchû, azə̈ wätə̂ azü ndə̂ Gbölö Gbïɛ̈.

⁹ Krîsiti tchü, la tchêngbâ nə̈ tche jô ndə̂kə̂ watə̂ Gbölö Gbïɛ̈ ndə̂ azü ndə̂ andjë tchû la azü ndə̂ andjë sə̂ la tʉ̈rʉ̂ la andjê.

¹⁰ Praâbalë momö, bëte giamâ kä ndə̂ mo jende ngâ zə̈? Bëte giamâ kä ndə̂ mo wun angâ zə̈ batə̂ azü ndə̂ andjë wâbô wâtə̂ ngâ rə-ê? Azəzə̂ balë balë gbɛ̂, azə̂ krʉadje tchâtchu Ndjapä ndə̂kə̂ pa tche wa ngbanga ndə̂ azə̂.

¹¹ Mbëtï Ndjapä tö rə̂ päkëdə̂: «Mëmê, Gbölö Gbïɛ̈ ndə̂ më wâ la tʉ̈rʉ̂ la, më dëba päkëdə̂: Azü tchêbêche gbɛ̂ gʉteadje tchâtchâ mê, ânyë azü gbɛ̂ vogadje mëmê Ndjapä.»

¹² Käko akrə balë balë âtoadje rə̂ la ma yê sə̈ Ndjapä pö ndə̂ arə gbɛ̂ ndə̂ tche mbô rə̂.

Amö mboabô rə̂ mbô pä ngâ zə̈ te-ê

¹³ Azə̈ gbötə̂ kə̂ jende tə̂ azə̂ lə̂ gbâtə̂ azə̂-ê. Praâbalë rə ndə̂ nyë wâ ndə̂kə̂ nyïkrə rə̂ tə̂ su nyê kä âtə: Nyë kösə̂ kə̂ za täme lə̂ köbo ngâ nyê âdəndjë rə̂ ndə̂kə̂ mbo rə̂ pä tche te lə̂ ngbongbo rə-ê.

¹⁴ Lə̂ köbo ndə̂kə̂ wa balë la Gbölö Gbïɛ̈, ndə̂ më wâ balë la tchë lâme, më wûnsə̂ nə̈ nə̂ tə̂ lëge nə̈ pä ngâ rə balë ndə̂ âwâ la tə̂ yê tə̂ rə kâkpö balë wâbo-a. Praâbalë âdə ngâ akrə âwun ngâ rə batə̂ ngbongbo rə, rə nə̈ lâme wätə̂ ngbongbo rə kütû lə̂ la akrə nə̈ lâme.

¹⁵ Âdə ngâ kɨ̈zɨ̂ ndə̂ mo zɨ̂ rə̂ lə̂ la ngâ zə̈ ânyë âzâ nyonyo tə̂ su yê, änyïsə̂ nə̈ pä mo mbôâbo rə lə̂ köbosə̂ kə̂ nyində̂ ngâ-a. Akrə ndə̂ Krîsiti tchû bëte tchë, âwâbo pä mo ndɨ köbo yê bëte pö ndə̂ kɨ̈zɨ̂-a.

¹⁶ Rə ndə̂ nyë wûn rə̂ batə̂ tchôtchô rə lə̂ la nyê, âwâbo pä nyë mbo rə̂ pä rə nə̈ lâme za köbo sə̂ angâ azü ndə̂kə̂ wun rə̂ tə̂ ngbongbo rə-a.

¹⁷ Gbölö gö-gbïɛ̈ ndə̂ Ndjapä wâbo ndə̂kə̂ zɨ kɨ̈zɨ̂ âdəndjë ndə̂kə̂ ndjo rə-a, praâbalë äwä ndə̂kə̂ mbo rə djîrə̂, ndə̂kə̂ sə la zɨtɨ su la mômô ndə̂ Kpɨ̂ki Yingö za rə̂ sə̈ akrə.

¹⁸ Akrə ndə̂ tche mbô kua la Krîsiti käko, tche däka tchâtchu Ndjapä ânyë azü nyïndə̂ pö ndə̂ yê.

¹⁹ Käko äwäpä azə̈ pü köbo rə ndə̂ ânə la zɨtɨ su la rə ndə̂ âmbo rə̂ pä azə̈ kpokpo tə̂ azə̂ lə̂ gbâtə̂ azə̂ lə̂ köbosə̂ kə̂ za su azə̂ sə̈ Ndjapä.

²⁰ Amö ndɨabô kua Ndjapä ndɨ̂ bëte pö ndə̂kə̂ zɨ rə-ê. Tə̂ lëge nə̈, akɨ̈zɨ̂ gbɛ̂ wätə̂ tchôtchô nə̈. Praâbalë âdə köbo âyu tə̂ ngâ akrə bëte kɨ̈zɨ̂ ndə̂ mo zɨ rə̂, dëkë kə̂ zɨ kɨ̈zɨ̂ ndə̂ zə̈ nə̈ wâtə̂ ngbongbo rə nə̂.

²¹ Rə ndə̂ âfû wä pä mo zɨabô gûsû zɨ̂-ê, kə̂ ndjoabô pî ndjô-ê, kə̂ gbotə̂ köbo ndə̂kə̂ mbo angâ arə gbɛ̂ ndə̂ âmbo rə̂ pä köbo yu tə̂ ngâ zə̈.

²² Rə ndə̂ mo wûnsə̂ nə̈ tə̂ lëge nə̈ bhâtə̂ su zə̈ pâ arə nə̈ lâme, äwäpä pö nə̈ wä lə̂ gbâtə̂ zə̈ la Ndjapä. Mômô kä tə̂ akrə ndə̂ tche nyîndə̂ kə̂ mbo ngâ rə ânyë su yê wâ la zɨtɨ su.

²³ Praâbalë akrə ndə̂ tche zɨ̂ ngâ rə ânyë kə̈ wâ la su bïbïchuû pâ kə̂ zɨ rə nə̈ lâme, akrə lâme Ndjapä wâ ngbanga lə̂ küma yê nə̂. Tə̂ lëge nə̈, tche mbôâbo rə gundə̂sə̂ kə̂ za su yê sə̈ Ndjapä-a. Rə gbɛ̂ ndə̂ akrə mbô rə̂ ânyë su yê wâ bïbïchuû pânə̈, äwätə̂ ngbongbo rə.