Rômo 12 - Mbëtï Ndjapä: TÄFO MADƗ̈

Täfo kə̂ sə la Krîsiti

¹ Arə̂mä ndə̂ mê, batə̂ rə̂ ndə̂ Ndjapä wûn nyonyo azə̂ lâme, më yükû nə̈ sə̈ nyê ndə̂kə̂ pa nyë zatə̂ nyê gbɛ̂ sə̈ Ndjapä batə̂ ngela ndə̂ a wâ rə̂ sə̈ Ndjapä, ngela ndə̂ âwâ ngbî, kə̈ wâtə̂ tchôtchô nə̈ ânyë kə̈ fû tə̂ yê. Lëge köbo ndə̂kə̂ pa nyë voga Ndjapä la rə̂ kä lâme.

² Äwäpä kə̂ sə ndə̂ nyê wabô wâ batə̂ andə̂ azü pâ cho âtə-ê. Praâbalë nyë gbötə̂ köbo sə̈ Ndjapä, tche mbo täfo rə lə̂kə̂ sə ndə̂ nyê, kə̂ za täfo kə̂ wunsə̂ rə sə̈ nyê. Käko nyê wun-adje sə̂ rə ndə̂ tche nyîndə̂ nə̈: Rə ndə̂ âwatə̂ tchôtchô nə̈, rə ndə̂ âfû tə̂ yê, rə ndə̂ âdâka gbɛ̂.

³ Ndjapä mbö tchôtchô su tə̂ mê. Bëte rə̂ kä ndə̂, më nyîndə̂ kə̂ to rə̂ sə̈ nyê balë balë gbɛ̂, äwäpä nyë wun-abô tə̂ nyê wûn batə̂ agbölö azü-î. Praâbalë nyë wüntə̂ nyê batə̂ ambämbä azü, gundə̂sə̂ rə ndə̂ Kpɨ̂ki Yingö za rə̂ sə̈ akrə balë balë.

⁴ Tə̂ lëge nə̈, tə̂ akrə wä kütû balë, praâbalë atchâme-tə̂ yê ngbângbä. Atchâme-tə̂ akrə nə̈ mbôâbo kua gbɛ̂ lə̂ köbo nə̈ balë-a.

⁵ Azəzə̂ ndjë gbɛ̂, azə̈ wä ndjë käko. Ndə̂ azə̈ ngbângbä lâme, azə̈ wä batə̂ tə̂ akrə balë lə̂ köbosə̂ nə̈ ndə̂ azə̈ wâ balë la Krîsiti. Azə̈ wä balë la angâ azə̂ lə̂ gbâtə̂ azə̂, ânyë akrə balë balë lə̂ kpâlâ yê, tche wä batə̂ atchâme-tə̂ akrə.

⁶ Ndjapä kʉ̈ arə ndə̂ Yingö ngbî ngbî sə̈ azə̈ lə̂ köbosə̂ tchôtchô su yê. Âdə ngâ akrə âwa la rə ndə̂ Yingö ndə̂kə̂ to pö batə̂ earə̂ ndə̂ma Ndjapä, äwäpä tche tö pö nə̈ gundə̂sə̂ kə̂ za su yê sə̈ Ndjapä.

⁷ Âdə ngâ akrə âwa la rə ndə̂ Yingö ndə̂kə̂ mbo kua, äwäpä tche mbo kua nə̈. Akrə ndə̂ tche wâ la rə ndə̂ Yingö ndə̂kə̂ nyisə̂ rə, äwäpä tche nyisə̂ rə.

⁸ Akrə ndə̂ tche wâ la rə ndə̂ Yingö ndə̂kə̂ za gbôgbô tə̂ su azü, äwäpä tche za wängö. Akrə ndə̂ tche kʉ arə sə̈ azü, äwäpä tche kʉ arə nə̈ la tchôtchô su yê. Akrə ndə̂ tche sə̂ tə̂ küma azü, äwäpä tche zä su yê gbɛ̂ tə̂ kua nə̈. Akrə ndə̂ tche wun nyonyo a-earə̂ yûkü, äwäpä tche mbo rə̂ la mômô tə̂ ma yê.

⁹ Äwäpä azə̈ nyində̂ angâ azə̂ la su azə̂ balë. Nyë kpë tə̂ ngbongbo rə, kə̂ zatə̂ nyê lə̂ rə ndə̂ âwâtə̂ tchôtchô nə̈.

¹⁰ Nyë nyïndə̂ angâ nyê lə̂ gbâtə̂ nyê la su nyê gbɛ̂. Äwäpä akrə balë balë pu köbo ndə̂kə̂ lusə̂ ngâ yê.

¹¹ Nyë mböäbô gbɨgbɨ mbô, nyë zä gbôgbô ndə̂ nyê gbɛ̂ ndə̂kə̂ mbo rə̂ la kua ndə̂ Gbölö Gbïɛ̈, nyë mbö kua nə̈ la su nyê gbɛ̂.

¹² Nyë wä la mômô bëte rə ndə̂ nyë zâ su nyê ndə̂kə̂ krʉ bëte rə̂. Nyë rʉ̈ätə̂ su nyê lə̂ arə nyonyo. Nyë gböäbô gbôtə̂ kə̂ to pö sə̈ Ndjapä logbɛ̂.

¹³ Nyë mbö rə̂ la azü ndə̂ Ndjapä ndə̂ andjë wâbô wâ la rə-ê. Äwäpä gbô nyê ndəpo lakə̂ mbo rə̂ la azü ndə̂ andjë nə pu nyê.

¹⁴ Nyë yü Ndjapä ndə̂kə̂ pa tche e tchôtchô pö pâ azü ndə̂ andjë mbo nyê la yûkü, nyë yükû nə̈ sə̈ Ndjapä pä tche e tchôtchô pö pâ andjê âdə̂âbo pä tche dra ndə̂ andjê-a.

¹⁵ Nyë wä la mômô la azü ndə̂ andjë wâ la mômô, nyë kɨ̈ la azü ndə̂ andjê kɨ.

¹⁶ Nyê djëtə̂ nyê lə̂ gbâtə̂ nyê la angâ nyê. Nyë wäbô wâ la gʉ agbölö rə-ê, praâbalë nyë zä su nyê pâ arə ndə̂ azü luabô sə̂nə̈ lû-î. Nyë wün-äbô tə̂ nyê wün batə̂ azü ndə̂ küma andjê wâ lanə̈-ê.

¹⁷ Nyë mböäbô ngbongbo rə mbô tə̂ ngâ akrə bëte rə̂ ndə̂ tche mbô ngbongbo rə tə̂ nyê-ê. Nyë zä su nyê ndə̂kə̂ mbo tchôtchô rə tchâtchu azü gbɛ̂.

¹⁸ Âdə köbo âwa tâ, lə̂ köbosə̂ gbôgbô ndə̂ nyë wâ la rə̂, äwäpä nyë wa la zɨtɨ su la azü gbɛ̂.

¹⁹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, âdə ngâ akrə âmbo ngbongbo rə tə̂ nyê, nyënyê la tə̂ nyê nyë gïäbô tchêngbâ ngbongbo rə nə̈ gî sə̈ tchë-ê. Praâbalë nyë gbötə̂ köbo tə̂ mêrâ ndə̂ Ndjapä ndə̂kə̂ mbo rə tə̂ azü nə̈, bëte lə̂ Mbëtï Ndjapä, Gbölö Gbïɛ̈ tö rə̂ päkëdə̂: «Mëmê kä ndə̂ âsə lə̂ kpâlâ akrə ndə̂ a mbô ngbongbo rə tə̂ yê, ânyë kə̂ gi ndjë ngbongbo rə sə̈ akrə nə̈ lâme, mëmê kä ndə̂ âmbo ngbongbo rə tə̂ akrə, gundə̂sə̂ ngbongbo rə ndə̂ yê.»

²⁰ Mbëtï nə̈ kä tö rə̂ päkëdə̂: «Âdə gʉ ânyu earə̂ kə̂ kosə̂ zə̈, amö za kɨ̈zɨ̂ sə̈ tchë, tche zɨ̂ rə̂. Âdə gʉ ngû ânyu tchë, tu ngû sə̈ tchë, tche ndjô rə̂. Âdə mo âmbo tâ käko, rə nə̈ âwa batə̂ jïwo kä ndə̂ mo hra rə̂ atə̂pâ küma yê.»

²¹ Âwâbo pä ngbongbo rə ropâ zə̈-a, praâbalë amö watə̂ akrə ndə̂ tche rôpâ ngbongbo rə lə̂ köbosə̂ tchôtchô rə ndə̂ mo mbo rə̂.