Rômo 11 - Mbëtï Ndjapä: TÄFO MADƗ̈

Ndjapä gbôâbo tə̂ azü ndə̂ Isarayële-a

¹ Käko më yü tchô päkëdə̂: Ndjapä gbôtə̂ azü gö ndə̂ yê nə̂? Âdə̂âbo käko-a! Bëte mëmê la tə̂ mê, më wätə̂ akrə ndə̂ Isarayële lə̂ bûngrɨ̂ ndə̂ Abrahâmo, pâ mawo ndə̂ Bejamɛ̈n.

² Ndjapä gbôâbo tə̂ azü ndə̂ yê ndə̂ tche dɨ̂ andjê dokʉ̈tchê alême-a. Nyë wûn-âbo sə̂ pö ndə̂ Mbëtï Ndjapä tô rə̂ päkëdə̂: Elïe sə̈ lakə̂ dɨ tchə̂lə̂ ma yê sə̈ Ndjapä, tə̂ pö ndə̂ kə̂ mbo rə ndə̂ azü ndə̂ Isarayële?

³ «Gbölö Gbïɛ̈, andjë wön a-earə̂ ndə̂ma zə̈, kə̈ ndɨ̂ndrɨ ndjë tchə̂lə̂ agbalâka ndə̂ zə̈ nə̂. Mëmê balë kä ndə̂ âsə̂ ngbânə̈ ânyë andjë nyîndə̂ kə̂ won mê.»

⁴ Praâbalë Ndjapä tö rə̂ ndə̂nə̈ sə̈ tchë atöko? Tche tö rə̂ päkëdə̂: «Më bäta azü sâke mïndûu manə̈ bïchuû (7 000) bëte mê la tə̂ mê, andjanə̈ ndə̂ andjë gʉ̂teabô gʉ̂te tchâtchâ ndjapä ndə̂ Bââl.»

⁵ Angêta âtə, rə nə̈ wä ndjë käko-ë. Adɨ̂ angâ azü ndə̂ Isarayële kä tâ ndə̂ Ndjapä dɨ̂ andjê lə̂ köbosə̂ tchôtchô su yê.

⁶ Ndjapä dɨ̈ andjê lə̂ köbosə̂ tchôtchô su yê, âdə̂âbo bëte arə ndə̂ andjë mbô rə̂-a. Âdə rə nə̈ âwabô wâ käko-ë, dëkë tchôtchô su ndə̂ Ndjapä nə̈ wâbo tə̂ tchôtchô su-a.

⁷ Pö âtə nyïndə̂ kə̂ to rə̂ atöko? Rə ndə̂ azü ndə̂ Isarayële pû rə̂, andjë gbôâbo rə̂-a. Kütû andjanə̈ ndə̂ Ndjapä dɨ̂ andjê kä ndə̂ âgbô rə̂. Andə̂ adɨ̂ nə̈, andjë wâbo la gbôgbô ndə̂kə̂ dje tchə̂lə̂ pö nə̈-a.

⁸ Batə̂ rə̂ ndə̂ Mbëtï Ndjapä tô rə̂ päkëdə̂: «Ndjapä kïtə̂ köbo tə̂ kə̂ wunsə̂ rə ndə̂ andjê. La andjê wâbo ndə̂kə̂ wun tchô la rə̂-a. Tü andjê wâbo ndə̂kə̂ dje pö la rə̂-a. Ndjapä gbötə̂ andjê käko zoo angêta âtə.»

⁹ Davîdi tö ndjë rə̂ päkëdə̂: «Äwäpä kɨ̈zɨ̂ ndə̂ andjê watə̂ kû ndə̂kə̂ kʉ andjê, âdəndjë gbânda ndə̂kə̂ kʉ andjê, âdəndjë ngâ rə ndə̂ âmbo rə̂ pä andjë te, rə ndə̂ andjë gbo rə̂ ngbâ ngbongbo rə ndə̂ andjê kä lâme.

¹⁰ Äwäpä andjë watə̂ a-earə̂ föla, andjë ka wun bata tchô wûn balë-ê; amö mbo rə̂ ndə̂kə̂ pa vro andjê dro tchê drö logbɛ̂.»

¹¹ Më yû tchô päkëdə̂: Ndə̂ ajuîfu gʉ̂te da andjê ânyë kə̈ tê lâme, andjë tê nə̂ tratralë? Âdə̂âbo käko-a! Praâbalë lə̂ köbosə̂ kə̂ mbo ngbongbo rə ndə̂ ajuîfu, azü ndə̂ andjë wâbô wâtə̂ ajuîfu tchâ lə̂ kuzü. Ndjapä mbö rə̂ käko ndə̂kə̂ pa ajuîfu mbo gbölö su tə̂ andjê.

¹² Bëte rə̂ ndə̂ ajuîfu kôsə̂ kə̂ dje pö ma Ndjapä, azü pâ cho âtə gbö atchôtchô rə tə̂ gbölösə̂nə̈. Lə̂ köbosə̂ kə̂ te ndə̂ andjê, azü ndə̂ andjë wâbô wâtə̂ ajuîfu gbö ndjë atchôtchô arə tə̂ gbölösə̂nə̈. Âdə rə nə̈ âwa käko, lo nə̈ ndə̂ ajuîfu ka gbɛ̂ pu Ndjapä, atchôtchô arə nə̈ kä roabô masə̂nə̈ tee?

Azü ndə̂ andjë wâbô wâtə̂ ajuîfu tchä lə̂ kuzü

¹³ Angaâtə, nyënyê ndə̂ nyë wâbô wâtə̂ ajuîfu, nyënyê kä ndə̂ mê to pö sə̈ nyê âtə. Më wätə̂ badjângele ndə̂ andjanə̈ ndə̂ andjë wâbô wâtə̂ ajuîfu. Bëte rə̂ kä ndə̂ mê lusə̂ kua ndə̂ mê,

¹⁴ ndə̂kə̂ mbo rə̂ pä azü pâ mawo ndə̂ mê ajuîfu wa la gbölö su ânyë mê tcha angânə̈ lə̂ gbâtə̂ andjê lə̂ kuzü.

¹⁵ Ndə̂ Ndjapä gî ajuîfu bhâchï lâme, ârə̂ kä ndə̂ âmbô rə̂ pä tchôtchô kə̂ sə kangbâ yê lə̂ gbâtə̂ azü pâ cho âtə la Ndjapä. Âdə Ndjapä âka la ajuîfu ndrotə̂ yê, rə nə̈ âwa atöko? Rə nə̈ âwa batə̂ andə̂ azü ndə̂ andjë tchû ânyë kə̈ jô!

¹⁶ Âdə a âkʉ adokʉ̈ mâpa ngbî bëte Ndjapä, adɨ̂ mâpa nə̈ gbɛ̂ watə̂ andə̂ ye nə̈. Âdə akrə âza chëchë da yö sə̈ Ndjapä, amatö yö nə̈ gbɛ̂ wä ndjë tə̂ andə̂ ye nə̈.

¹⁷ Azü ndə̂ Isarayële wä batə̂ yö ndə̂ olivï lə̂ kɨ̈ndɨ̈, ndə̂ a kû angâ amatö yö nə̈. Praâbalë momö, mö wä batə̂ matö yö ndə̂ olivï ndə̂ güsü, a zä mö ânyë kə̈ pî mö lə̂ gbâtə̂ adɨ̂ amatö yö ndə̂ âwâtə̂ yö lə̂ kɨ̈ndɨ̈ nə̈. Angaâtə, mo wä ndjë ndə̂kə̂ gbo tchôtchô rə batə̂ amatö yö lə̂ kɨ̈ndɨ̈ nə̈, bëte ngû ndə̂ âtô ânyë kə̈ kênga lə̂ chëchë da yö nə̈.

¹⁸ Bëte rə̂ kä ndə̂, momö ndə̂ mo wâbô wâtə̂ juîfu, amö bhiabô gogo zə̈ bhî päkëdə̂ momö kä ndə̂ ârô amatö yö ndə̂ a wâ rə̂ lâme-ê. Mo nyïndə̂ kə̂ bhi gogo zə̈? Äwäpä mo wunsə̂ nə̈ pä mo wä kütû tə̂ mbämbä matö yö. Âdə̂âbo momö kä ndə̂ âzâ chëchë da yö nə̈-a, praâbalë chëchë da yö nə̈ kä âkə̈ zâ mö.

¹⁹ Mô toadje rə̂ sə̈ mê päkëdə̂: «A wä amatö yö nə̈ ndə̂kə̂ pa a pi mê lə̂ kpâlâ nə̈.»

²⁰ Äwätə̂ lëge nə̈. A wä amatö yö nə̈ bëte rə̂ ndə̂ andjë zâbô su andjê zâ sə̈ Ndjapä-ê. Andə̂ zə nə̈, gbô mö kä po tə̂ yö nə̈ bëte mo zâ su zə̈ sə̈ Ndjapä nə̂. Käko âwâbo pä mo bhi gogo zə̈-a, praâbalë äwäpä la zə̈ gbo-ê.

²¹ Tə̂ lëge nə̈, ndə̂ Ndjapä wâ alëge matö yö nə̈ lâme, momö ndə̂ zə nə̈ kä ndə̂ Ndjapä batadje mö?

²² Wunsaâ, Ndjapä nyïsə̂ dâkâ ndə̂ yê, kə̈ wâ ndjë tə̂ Ndjapä ndə̂ tche wa ngbanga. Tche wä ndjë ngbanga pâ azü ndə̂ andjë tê, praâbalë tche mbö dâkâ bëte mö ndə̂ gbô mö ndə̂po lə̂ dâkâ nə̈. Ârə̂ âdəabô də̂ käko, momö ndjë, a âwa mö batə̂ ngâ matö yö.

²³ Andə̂ ajuîfu, âdə andjê âgbotə̂ gbôgbô su andjê, tchê piadje andjê pâ yö nə̈ bëte Ndjapä wä la gbôgbô ndə̂kə̂ kä pi andjê ëngbânə̈.

²⁴ Momö ndə̂ mo wâbô wâtə̂ juîfu lâme, mo wä batə̂ matö yö ndə̂ olivï ndə̂ güsü, ndə̂ Ndjapä wâ rə̂ ânyë kə̈ pî rə̂ ëtə̂ yö ndə̂ olivï ndə̂ kɨ̈ndɨ̈, dëkë köbo ndə̂kə̂ mbo rə̂ də̂âbo rə̂ lâme-a. Ajuîfu wä batə̂ lëge matö yö ndə̂ olivï ndə̂ kɨ̈ndɨ̈. Ndə̂ Ndjapä wâ ndə̂kə̂ za matö yö ndə̂ kɨ̈ndɨ̈ ndə̂kə̂ pi rə̂ pâ yö ndə̂ yê la tə̂ yê, âwâbo tə̂ mömö rə bhândə̂ yê?

Azü ndə̂ Isarayële kadje pu Ndjapä

²⁵ Arə̂mä, më nyïndə̂ nə̈ pä nyë wunsə̂ apö ndə̂ Ndjapä ndə̂ âwâ lə̂ küwû nə̈, ânyë kə̂ wun-abô tə̂ nyê wûn batə̂ a-earə̂ kə̂ wunsə̂ rə-ê. Angâ azü ndə̂ Isarayële âkoadje sə̂kə̂ dje tchə̂lə̂ pö zoo lo nə̈ ndə̂ adɨ̂ azü ndə̂ andjë wâbô wâtə̂ ajuîfu ka pu Ndjapä.

²⁶ Käko ânyë azü ndə̂ Isarayële gbɛ̂ tcha lə̂ kuzü, batə̂ rə̂ ndə̂ Mbëtï Ndjapä tô rə̂ päkëdə̂: «Earə̂ kə̂ ji azü lə̂ yûkü toadje bhâ Siyön ânyë kə̂ nə, tchê jiadje angbongbo rə gbɛ̂ lə̂ gbâtə̂ azü pâ mawo ndə̂ Jakôbo.

²⁷ Wunsa madɨ̈ ndə̂ ârâ drô rə̂ la andjê kä âtə, âdə mê âji angbongbo rə ndə̂ andjê.»

²⁸ Ajuîfu kösə̂ Tchôtchô Pö nə̈ ânyë kə̈ wâtə̂ azü ndə̂ su andjê kôsə̂ Ndjapä. Rə nə̈ wä käko ndə̂kə̂ pa Ndjapä mbo dâkâ tə̂ nyê ndə̂ nyë wâbô wâtə̂ ajuîfu. Praâbalë Ndjapä dɨ̈ ajuîfu ndə̂kə̂ pa andjë watə̂ azü ndə̂ yê, ânyë kə̈ nyîndə̂ andjê bëte araâta andjê.

²⁹ Tə̂ lëge nə̈, âdə Ndjapä âza ngâ rə sə̈ akrə nə̂, tchê kä ka bata ndə̂kə̂ za rə nə̈ tchânə̂ akrə nə̈ tee-a. Âdə Ndjapä âe ngâ akrə nə̂, tchê kä ka bata ndə̂kə̂ kosə̂ akrə nə̈ tee-a.

³⁰ Dokʉ̈tchê alême, azü ndə̂ andjë wâbô wâtə̂ ajuîfu djêâbo pö ma Ndjapä-a. Angaâtə, Ndjapä wün nyonyo nyê bëte ajuîfu djêâbo pö ma yê-a.

³¹ Andə̂ ajuîfu, rə nə̈ âwadje ndjë käko-ë. Angaâtə, andjë djêâbo pö ma Ndjapä-a, käko kä ndə̂ Ndjapä wûn nyonyo nyê. Käko andə̂ tchô angêta, Ndjapä wä ndjë ndə̂kə̂ wun nyonyo andjê.

³² Tə̂ lëge nə̈, Ndjapä mbö rə̂ ânyë azü gbɛ̂ wâ batə̂ a-earə̂ kânga bëte rə̂ ndə̂ andjë kôsə̂ kə̂ dje pö ma yê. Tche mbö rə̂ käko ndə̂kə̂ wun nyonyo azü gbɛ̂.

Ndjapä wä gbölö

³³ Tə̂ lëge nə̈ Ndjapä wä gbölö! Küma yê kä lanə̈, ânyë tche wunsə̂ rə tə̂ gbölösə̂nə̈. Tchabâ âwâ ndə̂kə̂ wunsə̂ köbo kə̂ wa ngbanga ndə̂ yê? Tchabâ âwâ ndə̂kə̂ wunsə̂ pö bhâtə̂ su yê?

³⁴ Mbëtï Ndjapä tö rə̂ päkëdə̂: «Tchabâ kä ndə̂ âwûnsə̂ pö bhâtə̂ su Gbölö Gbïɛ̈? Tchabâ âwâ ndə̂kə̂ za wängö sə̈ tchë?

³⁵ Tchabâ âzâ rə dokʉ̈tchê sə̈ Ndjapä ndə̂kə̂ pa tche ka la rə̂ sə̈ tchë ngbânə̈?»

³⁶ Rə gbɛ̂ tö bhândə̂ Ndjapä, rə gbɛ̂ wä lə̂ köbosə̂ yê, rə gbɛ̂ wä bëte tchë. Azə̈ vöga tchë logbɛ̂ logbɛ̂! Amin.