Rômo 10 - Mbëtï Ndjapä: TÄFO MADƗ̈

¹ Arə̂mä, rə ndə̂ më nyîndə̂ nə̈ la su mê gbɛ̂ ânyë kə̂ to pö sə̈ Ndjapä tə̂ pö ndə̂nə̈, wä ndə̂kə̂ pa ajuîfu tcha lə̂ kuzü.

² Bëte rə ndə̂ më wûnsə̂ nə̈ ânyë kə̂ to pö ndə̂nə̈ də̈ anə̈ ndə̂ ajuîfu wä la gʉ ndə̂kə̂ mbo kua Ndjapä tə̂ gbölösə̂nə̈. Praâbalë andjë wûn-âbo sə̂ lëge köbo ndə̂kə̂ mbo rə̂ sə̈ tchë-a.

³ Köbo ndə̂ Ndjapä nyîkrə rə̂ ndə̂kə̂ pa akrə za rə̂ ânyë kə̂ wa djîrə̂ lə̂ la yê, ajuîfu wûn-âbo sə̂nə̈-a. Andjë nyïkrə andə̂ andjê köbo nə̈, ânyë kə̈ kôsə̂ köbo ndə̂ Ndjapä nyîkrə rə̂ ndə̂kə̂ pa akrə za rə̂ ânyë kə̂ wa djîrə̂.

⁴ Krîsiti mbö rə̂ ânyë ndïɛ̈ ndə̂ Möyîze wûtu tə̂ manə̈. Käko azü gbɛ̂ ndə̂ andjë zâ su andjê sə̈ Ndjapä wä djîrə̂ lə̂ la yê.

Ndjapä nyïndə̂ kə̂ tcha azü gbɛ̂ lə̂ kuzü

⁵ Möyîze la tə̂ yê mbö mbëtï pâ köbo ndə̂kə̂ wa djîrə̂ lə̂ la Ndjapä päkëdə̂: «Akrə ndə̂ tche mbô rə gundə̂sə̂ ndïɛ̈, tchê wadje la tchîsûwu lə̂ köbosə̂ nə̈.»

⁶ Praâbalë köbo ndə̂kə̂ wa djîrə̂ lə̂ köbosə̂ kə̂ za su sə̈ Ndjapä wä kâkë: «Amö toabô rə̂ tô bhâtə̂ su zə̈ päkëdə̂: Tchabâ kä ndə̂ âkengadje atə̂ lafô?» Âdə mo âtö rə̂ käko, dëkë mo nyïndə̂ kə̂ jre la Krîsiti atə̂ bêche.

⁷ Amö toabô ndjë rə̂ tô päkëdə̂: «Tchabâ kä ndə̂ âli atə̂lə̂ dju cho?» Âdə mo âto rə̂ käko, dëkë mo nyïndə̂ kə̂ za Krîsiti lə̂ gbâtə̂ akuzü ndə̂kə̂ wutu la tchë ësûwu.

⁸ Pö nə̈ tö rə̂ päkëdə̂: «Pö nə̈ wä ndola mö, kə̈ wâ lə̂ ma zə̈ ânyë kə̈ wâ lə̂ su zə̈.» Pö nə̈ lâme wätə̂ pö ndə̂kə̂ za su sə̈ Ndjapä, ârə̂ kä ndə̂ ârâ mu rə̂.

⁹ Âdə mo âto rə̂ la ma zə̈ päkëdə̂: «Jezü wätə̂ Gbölö Gbïɛ̈», ânyë kə̂ gâmba rə̂ la su zə̈ ndə̂ Ndjapä jô tchë lə̂ kuzü, mô tchadje lə̂ kuzü.

¹⁰ Âdə akrə âza su yê gbɛ̂ sə̈ Jezü, tche wâ nə̂ tə̂ djîrə̂ akrə lə̂ la Ndjapä. Âdə tche âto pö ndə̂ ngbongbo rə ndə̂ yê la ma yê, tchê tchadje lə̂ kuzü.

¹¹ Mbëtï Ndjapä tö rə̂ päkëdə̂: «Akrə balë balë ndə̂ tche zâ su yê sə̈ tchë, ganô mboabô tchë tee-a.»

¹² Käko ajuîfu la azü ndə̂ andjë wâbô wâtə̂ ajuîfu wä balë. Gbölö Gbïɛ̈ ndə̂ andjê wä balë. Tche kʉ̈ atchôtchô arə sə̈ azü ndə̂ andjë e tchë.

¹³ Bëte Mbëtï Ndjapä tö rə̂ päkëdə̂: «Azü gbɛ̂ ndə̂ andjê eadje rə̈ Gbölö Gbïɛ̈, andjê tchadje lə̂ kuzü.»

¹⁴ Atöko kä ânyë azü e Gbölö Gbïɛ̈ ndə̂ andjë zâbô su andjê zâ sə̈ tchë? Atöko kä ânyë andjë za su andjê sə̈ Gbölö Gbïɛ̈ ndə̂ andjë djêâbô pö ndə̂ yê djê? Atöko kä ânyë andjë dje pö ndə̂ yê ndə̂ akrə ndə̂kə̂ mu pö nə̈ wâbô wâ?

¹⁵ Atöko kä ânyë azü mu pö nə̈ ndə̂ a wân-âbô andjê wân? Mbëtï Ndjapä tö rə̂ päkëdə̂: «Äwätə̂ tchôtchô rə ndə̂kə̂ wun kə̂ nə ndə̂ a-earə̂ kə̂ mu Tchôtchô Pö.»

¹⁶ Praâbalë âdə̂âbô azü gbɛ̂ kä ndə̂ âgamba Tchôtchô Pö nə̈-a. Bëte rə̂ kä Ezayï tô rə̂ päkëdə̂: «Gbölö Gbïɛ̈, tchabâ kä ndə̂ âgâmba pö ndə̂ ârâ mû rə̂?»

¹⁷ Käko lə̂ köbosə̂ kə̂ mu pö kä ndə̂ azü za su andjê sə̈ Ndjapä. Kə̂ mu pö nə̈ wätə̂ kə̂ mu pö ndə̂ Krîsiti sə̈ azü.

¹⁸ Käko më yü tchô päkëdə̂: Azü ndə̂ Isarayële djêâbo pö ndə̂ a mû rə̂ lâme? Tə̂ lëge nə̈, andjë djê rə̂ nə̂ gbɛ̂. Mbëtï Ndjapä tö rə̂ päkëdə̂: «Azü djë tchə̂lə̂ gɨ̈ azü kə̂ mu pö pâ cho âtə gbɛ̂. Azü ndə̂ andjë sə̂ bhâtə̂ ma tchêpâ cho djë ndjë pö ndə̂ a mû rə̂.»

¹⁹ Më kä yû tchô päkëdə̂: Azü ndə̂ Isarayële djêâbo tchə̂lə̂ pö âtə dämba nə̂? Ndjapä tô rə̂ alême nə̂ lə̂ ma Möyîze päkëdə̂: «Mê mboadje rə̂ ânyë nyê wa la gbölö su tə̂ azü ndə̂ andjë wâbô wâtə̂ alëge azü pâ mawo ndə̂ andjê. Mê mboadje rə̂ pä su nyê kʉ nyê tə̂ azü pâ mawo ndə̂ andjë wûn-âbô sə̂ rə wûn-î.»

²⁰ Ezayï wâbo la wa-a, kə̈ tô rə̂ päkëdə̂: «Azü ndə̂ andjë pûâbô köbo mê pû-î, andjë kä ndə̂ âgbô mê. Azü ndə̂ andjë yûâbo kû pö ndə̂ mê yû-î, andjë kä ndə̂ mê nyisə̂ tə̂ mê sə̈ andjê.»

²¹ Praâbalë pâ pö ndə̂ azü gö ndə̂ Isarayële, Ndjapä tö rə̂ päkëdə̂: «Logbɛ̂, më yï könô mê sə̈ azü gö ndə̂kə̂ pa andjë nə, praâbalë azü nə̈ wätə̂ a-earə̂ kə̂ kosə̂ pö, kə̈ wâ ndjë tə̂ azü ndə̂ küma andjê kpô.»