Matiyə̈ 9 - Mbëtï Ndjapä: TÄFO MADƗ̈

Jezü tchä ngâ köchë ndə̂ da yê ngêwele

¹ Jezü ä lə̂ ngâ külû kə̈ zû dəkalâ ngû nə̈, kə̈ gû âtə̂lə̂ gö ndə̂ yê.

² Angâ azü zâ ngâ akrə ndə̂ da yê ngêwele ânyë tche lô pâ kʉ̈ngrʉ, kə̈ nə̂ la tchë sə̈ Jezü. Ndə̂ Jezü wûn rə̂ ndə̂ andjë zâ su andjê gbɛ̂ sə̈ tchë, kə̈ tô rə̂ sə̈ köchë ndə̂ da yê ngêwele lâme päkëdə̂: «Bechë ndə̂ mê, tə̂ zə̈ krä-ê! A kô pö lə̂ küma zə̈ nə̂!»

³ Dëkë, angâ a-earə̂ kə̂ nyisə̂ ndïɛ̈ sə̂ lakə̂ to rə̂ lə̂ gbâtə̂ andjê päkëdə̂: «Köchë âtə kä lakə̂ dro Ndjapä.»

⁴ Jezü wûnsə̂ pö bhâlə̂ su andjê, kə̈ tô rə̂ sə̈ andjê päkëdə̂: «Nyë rɨ̈ tchə̂lə̂ nyê tə̂ ngbongbo nə̈ käko bëte giamâ?

⁵ Ndə̂kə̂ to rə̂ päkëdə̂: ‹A kô pö lə̂ küma zə̈ nə̂›, la anə̈ ndə̂kə̂ to rə̂ päkëdə̂: ‹Alafô kə̈ nə̂›, anə̈bâ kä ndə̂ âwâtə̂ mömö nə̈?

⁶ Më nyïndə̂ nə̈ pä nyë wunsə̂ nə̈ pä Modô ndə̂ Akrə kä la gbôgbô pâ cho âtə ndə̂kə̂ ko pö lə̂ küma azü.» Jezü tô rə̂ sə̈ köchë ndə̂ tche ngêwele lâme päkëdə̂: «Amö alafô, kə̈ zâ kʉ̈ngrʉ ndə̂ zə̈, kə̈ gû atə̂ndə̂ zə̈!»

⁷ Köchë nə̈ âlafô, kə̈ gû atə̂ndə̂ yê.

⁸ Ndə̂ kpûlû azü nə̈ wûn rə̂ käko, wawa mbô andjê. Andjë vôga Ndjapä bëte rə̂ ndə̂ tche zâ gbôgbô käko sə̈ azü ndə̂kə̂ mbo arə.

Jezü ë Matiyə̈ ndə̂kə̂ nə ngbâ yê

⁹ Ndə̂ Jezü âlafô sə̂ tchô nə̈ lâme ndə̂kə̂ ro etə̂, tche wûn ngâ köchë ndə̂ rə̈ yê wü pä Matiyə̈. Tche sə̈ bhâ sə̂nə̈ ndə̂ a pala makətche-lapöo tâ. Jezü tô rə̂ sə̈ tchë päkëdə̂: «Nə ngbâ mê!» Matiyə̈ âlafô kə̈ nə̂ ngbâ Jezü.

¹⁰ Ndə̂ Jezü sə̂ lakə̂ zɨ rə bhâ tchâalê ndə̂ Matiyə̈, angbängbä a-earə̂ kə̂ pala makətche-lapöo la a-earə̂ ngbongbo rə nə̂ ndə̂kə̂ zɨ rə la Jezü la adjisîpili ndə̂ yê.

¹¹ Afarizïɛ̈n wûn rə̂ käko kə̈ tô rə̂ sə̈ adjisîpili ndə̂ Jezü päkëdə̂: «Bëte giamâ earə̂ kə̂ nyisə̂ rə sə̈ nyê zɨ rə la a-earə̂ kə̂ pala makətche-lapöo la a-earə̂ ngbongbo rə?»

¹² Ndə̂ Jezü djê andjê, tche tô rə̂ päkëdə̂: «Âdə̂âbo azü ndə̂ tə̂ andjê wâ la sə̂nə̈ kä âkə̂ e ndə̂kə̂ wun dokotöro-a, praâbalë kütû a-earə̂ tə̂kömbô kä ndə̂ âe ndə̂kə̂ wun tchë.

¹³ Nyë gûgü kə̂ pu dju apö ndə̂ Ndjapä tô rə̂ âtə: ‹Më nyïndə̂ nə̈ pä azü wun nyonyo angâ andjê, praâbalë më kösə̂ ngela ndə̂ agia!› Më nə̂âbo ndə̂kə̂ e adjîrə̂ azü-a, praâbalë më nə̈ bëte a-earə̂ ngbongbo rə.»

Pö pâ kə̂ kosə̂ kɨ̈zɨ̂ lakə̂ to pö sə̈ Ndjapä

¹⁴ Adjisîpili ndə̂ Jâan-Batîse nə̂ ndola Jezü kə̈ yû tchë päkëdə̂: «Ârâ la afarizïɛ̈n kä lakə̂ kosə̂ kɨ̈zɨ̂ logbɛ̂ ndə̂kə̂ to pö sə̈ Ndjapä. Bëte giamâ ânyë adjisîpili ndə̂ zə̈ kôâbô sə̂ kɨ̈zɨ̂ kô ndə̂kə̂ to pö sə̈ Ndjapä?»

¹⁵ Jezü tô rə̂ ndə̂nə̈ sə̈ andjê päkëdə̂: «Lə̂ kpülü ndə̂kə̂ totə̂ ndə̂ köchë la ɛ̈chë; gbô köchë ndə̂ ɛ̈chë nə̈ âsə tâ, azü ndə̂ a ê andjê ndə̂ kpülü nə̈, andjê âwa la ngûla lə̂ la andjê? Praâbalë lo nə̈ âtadje tâ ndə̂ a zadje tchë tə̂ andjê. Tchâme kä ndə̂ andjë kosə̂ kɨ̈zɨ̂ lakə̂ to pö sə̈ Ndjapä.

¹⁶ «Akrə sɨ̂âbo täfo lə̂ba sə̂ ku bəndɨ nə̈-a. Âdə tche âmbo tâ käko, täfo lə̂ba nə̈ sro tchə̂lə̂ bəndɨ nə̈, ânyë ku nə̈ ge tə̂ gbölösə̂nə̈.

¹⁷ A wâbo ndə̂kə̂ su täfo pî lə̂ abəndɨ akədjâ-pî-a, ârə̂ âdəabô də̂ käko, tchə̂lə̂ kədjâ-pî nə̈ soadje, ânyë pî nə̈ tu gbɛ̂ bêche. Praâbalë akrə wä kütû ndə̂kə̂ su täfo pî lə̂ atäfo akədjâ-pî.»

Jezü tchä ngâ ɛ̈chë kə̈ jô ngâ bechë-ɛ̈chë lə̂ kuzü

¹⁸ Ndə̂ gbô Jezü sə̂ lakə̂ to pö sə̈ andjê, ngâ makündji ndə̂ ajuîfu nə̂ ndola tchë, kə̈ gʉ̂te ëtchâtchâ yê, kə̈ tô rə̂ sə̈ tchë päkëdə̂: «Ɛ̈wünrə ndə̂ mê tchü angangaâtə. Praâbalë amö nə kə̈ tô könô zə̈ pâ yê ânyë tchê kä wadje la tchîsûwu.»

¹⁹ Jezü la adjisîpili ndə̂ yê âlafô kə̈ za tchêngbâ köchë nə̈.

²⁰ Dëkë ngâ ɛ̈chë kä tâ ndə̂ jï sə̂ lakə̂ tu tə̂ yê lə̂ ngû lə̂ könô gbɛ̂ tchêpâ nə̈ bïchuû. Tche nə̂ dəngbâ Jezü, kə̈ grʉ̂ ma lə̂ba ndə̂ yê.

²¹ Bëte tche tö rə̂ päkëdə̂: «Âdə mê âgrʉ kütû ma lə̂ba ndə̂ yê, kə̂ tchadje.»

²² Jezü djêtə̂ yê kə̈ wûn ɛ̈chë nə̈, kə̈ tô rə̂ sə̈ tchë päkëdə̂: «Ɛ̈wünrə ndə̂ mê, su zə̈ zɨ̈ tɨ-ë! Kə̂ za su zə̈ sə̈ mê tchâ mö nə̂.» Posə̂nə̈, tə̂ ɛ̈chë nə̈ dâka-ê.

²³ Ndə̂ Jezü wûtu bhâlə̂ manda ndə̂ makündji nə̈, tche wûn a-earə̂ kə̂ hrʉ küdambala la kpûlû azü ndə̂ andjë sə̂ lakə̂ mbo rə la kɨ̈ tə̂ kuzü nə̈.

²⁴ Tche tô rə̂ sə̈ andjê päkëdə̂: «Nyë wütu gbɛ̂ atə̂ sûwu! Ɛ̈wünrə nə̈ tchûâbo tchü-a, praâbalë tche lôlö!» Azü nə̈ gbɛ̂ sə̂ lakə̂ mo tchë.

²⁵ Ndə̂ a grô kpûlû azü nə̈ gbɛ̂ bhâ sûwu, Jezü lî atə̂ tchâalê nə̈, kə̈ zâ könô bechë-ɛ̈chë nə̈ ânyë tche jô-ê.

²⁶ Pö nə̈ zâ tchô lə̂ gö nə̈ gbɛ̂.

Jezü tchä a-earə̂ föla bïchuû

²⁷ Ndə̂ Jezü âlafô lə̂ gö nə̈ lâme ndə̂kə̂ ro etə̂, angâ a-earə̂ föla bïchuû zâ tchêngbâ yê lakə̂ ta wârə̂ päkëdə̂: «Modô ndə̂ Davîdi, wun nyonyo ârâ!»

²⁸ Ndə̂ Jezü lî atə̂ tchâalê nə̈, a-earə̂ föla lâme nə̂ ndola tchë. Jezü tô rə̂ sə̈ andjê päkëdə̂: «Nyë gâmba rə̂ nə̂ pä më wä ndə̂kə̂ mbo rə nə̈ lâme?» Andjë tô rə̂ ndə̂nə̈ sə̈ tchë päkëdə̂: «Ɛn-ɛn, Gbölö Gbïɛ̈.»

²⁹ Käko Jezü grʉ̂ la andjê lakə̂ to rə̂ päkëdə̂: «Rə nə̈ mbö tə̂ nyê gundə̂sə̂ kə̂ za su nyê sə̈ mê!»

³⁰ La andjê vrô-ê ânyë Jezü gbɨ̂tɨ tü andjê päkëdə̂: «Nyë töäbô pö ndə̂nə̈ tô sə̈ ngâ akrə balë-ê»

³¹ Ndə̂ andjê âsə̈ wutu, kə̈ sə̂ lakə̂ to pö ndə̂ yê katchôgbɛ̂ lə̂ gö nə̈.

Jezü tchä ngâ mangbɨ̈lə̈

³² Ndə̂ azü bïchuû lâme âsə̈ ro etə̂, angâ azü nə̂ la ngâ köchë sə̈ Jezü. Tche pôâbo-a, bëte ngâ ngbongbo tchozö kä lə̂ yê.

³³ Jezü grô ngbongbo tchozö nə̈, mangbɨ̈lə̈ nə̈ jêtə̂ kə̂ po-ê. Tchə̂lə̂ küma kpûlû azü nə̈ djîngɨli ânyë andjë tô rə̂ päkëdə̂: «Ârâ wûn-âbo ngâ rə käko lo balë lə̂ gö ndə̂ Isarayële-a.»

³⁴ Praâbalë afarizïɛ̈n tô andə̂ andjë nə̈ päkëdə̂: «Tche grö angbongbo atchozö lâme lə̂ köbosə̂ gbôgbô ndə̂ makündji ndə̂ angbongbo atchozö zâ rə̂ sə̈ tchë!»

Jezü wün nyonyo azü

³⁵ Jezü nə̈ kulə̂ agbölö gö la ayɛ̈yɛ̈ gö. Tche nyïsə̂ rə sə̈ azü lə̂ anda kə̂ voga Ndjapä ndə̂ ajuîfu. Tche mü Tchôtchô Pö ndə̂ Gbölö gö-gbïɛ̈ sə̈ azü. Tche tchä azü ndə̂ andjë wâ la tə̂kömbô la azü ndə̂ andjë ngêwele.

³⁶ Ndə̂ Jezü wûn kpûlû azü nə̈, nyonyo andjê mbô tchë bëte gbâdâ kâ tə̂ andjê nə̂ gbɛ̂, ânyë andjë mômo gbɛ̂ batə̂ aɛ̈bro-ngbaga ndə̂ earə̂ kə̂ bata andjê wâbô wâ tâ-ê.

³⁷ Käko tche tô rə̂ sə̈ adjisîpili ndə̂ yê päkëdə̂: «Kɨ̈ndɨ̈ nə̈ lë tə̂ gbölösə̂nə̈, praâbalë a-earə̂ kə̂ mbo kua lə̂ kɨ̈ndɨ̈ nə̈ ngbâbo-a.

³⁸ Käko nyë tö pö sə̈ earə̂ kɨ̈ndɨ̈ nə̈ ndə̂kə̂ pa tche ka wân angâ a-earə̂ kua kɨ̈ndɨ̈ nə̈ ndə̂kə̂ soa rəgʉ nə̈.»