Matiyə̈ 7 - Mbëtï Ndjapä: TÄFO MADƗ̈

Bë la gbölö yö

¹ «Nyë wäbô ngbanga wâ lə̂ küma angâ nyê-ê, ânyë Ndjapä wabô ndjë ngbanga wâ lə̂ küma nyê-ê.

² Ndjapä âwadje ngbanga lə̂ küma nyê batə̂ rə̂ ndə̂ nyê wa ngbanga lə̂ küma azü. Rə ndə̂ nyê kʉ rə lə̂nə̈ sə̈ angâ nyê kä ndə̂ a kʉadje ndjë rə la rə̂ sə̈ nyê.

³ Bëte giamâ kä ndə̂ mo wûn kütû bë ndə̂ âwâ lə̂ la ngâ zə̈, ânyë kə̈ wûn-âbô gbölö yö ndə̂ âwâ lə̂ la zə̈ wûn-î?

⁴ Atöko kä ndə̂ mo tô rə̂ sə̈ ngâ zə̈ päkëdə̂: ‹Sə gii më tchôâkra bë ndə̂ âwâ lə̂ la zə̈ âtə›, ânyë momö ndə̂ zə̈ nə̈, mo wûn-âbô gbölö yö wûn ndə̂ âwâ lə̂ la zə̈ lâme?

⁵ Momö ndə̂ pö ma zə̈ wâ ngbî tə̂kə̂ mbo rə ndə̂ zə̈ âtə, äwäpä mo tchoakra gbölö yö lə̂ la zə̈ dokʉ̈tchê, kə̂ wun tchô la köbo nə̈ ânyë kə̂ tchoakra bë lə̂ la ngâ zə̈!

⁶ «Rə ndə̂ âwâ ngbî bëte Ndjapä, nyë zäbô rə̂ zâ sə̈ aɛ̈vrô-ê, kə̂ yiabô kɨ̂dji ndə̂ nyê yî sə̈ akoso-ê, ndə̂kə̂ pa andjë dradra tchə̂lə̂ nə̈, kə̂ dotə̂ andjê ndə̂ nyê ndə̂kə̂ lo nyê-ê.»

Kə̂ yukû rə tchânə̂ Ndjapä

⁷ «Nyë yükû rə ânyë a zadje rə̂ sə̈ nyê. Nyë pü rə ânyë kə̂ gboadje rə̂. Nyë gʉ̈gʉ manda ânyë a kroadje rə̂ sə̈ nyê.

⁸ Bëte akrə ndə̂ tche yûkû rə, a âzadje rə̂ sə̈ tchë. Akrə ndə̂ tche pû rə, tchê gboadje rə̂. Akrə ndə̂ tche gʉ̂gʉ manda, a âkroadje rə̂ sə̈ tchë.

⁹ Tchanə̈bâ lə̂ gûtə̂ nyê kä ndə̂ bechë ndə̂ yê âyukû mâpa, ânyë tche za täme sə̈ tchë?

¹⁰ Âdəndjë rə̂ ndə̂ tche yûkû giangû, tche za ɛ̈krʉ̂ sə̈ tchë?

¹¹ Käko ndjë, nyënyê ndə̂ nyë wâtə̂ angbongbo azü, nyë wünsə̂ kə̂ kʉ atchôtchô arə sə̈ abechë ndə̂ nyê. Käko Bha nyê ndə̂ tche sə̂ bhâ lafô kʉadje atchôtchô arə tə̂ gbölösə̂nə̈ sə̈ azü ndə̂ andjë yûkû nə̈ tchânə̂ yê!

¹² «Rə gbɛ̂ ndə̂ nyë nyîndə̂ nə̈ pä azü mbo rə̂ tə̂ nyê, nyë mbö ndjë rə̂ la tə̂ nyê tə̂ andjê. Rə lâme kä ndə̂ ndïɛ̈ ndə̂ Möyîze la a-Mbëtï ndə̂ a-earə̂ ndə̂ma Ndjapä yûkû nə̈.»

Pö pâ amanda bïchuû

¹³ «Äwäpä nyë li lə̂ kpîɛ̂kpîɛ̂ manda nə̈, bëte âdə akrə âli lə̂ gbölö manda nə̈, dëkë köbo kuzü kä ndə̂ tche zâ rə̂. Kpûlû azü lï lə̂ gbölö manda nə̈ lâme tə̂ gbölösə̂nə̈.

¹⁴ Manda ndə̂ akrə li tâ ânyë kə̂ wa la tchîsûwu wä kpîɛ̂kpîɛ̂ rə̂. Köbo nə̈ pötə̂ yê pö ëtâ. Azü ndə̂ andjë gbo köbo nə̈ lâme ngbâbo-a.»

Angbongbo a-earə̂ ndə̂ma Ndjapä

¹⁵ «La nyê gbö tə̂ angbongbo a-earə̂ ndə̂ma Ndjapä. Andjë yü kpoto ɛ̈bro-ngbaga ânyë kə̂ nə pu nyê, dëkë andjë wätə̂ angbongbo azâgôâ.

¹⁶ Nyê wun-adje sə̈ azü nə̈ lâme lə̂ köbosə̂ kə̂ le ndə̂ andjê. Akrə kʉ̂loabô lêlê vînye pâ abë ndə̂ âwâ la chi-a, âdəndjë rə̂ ndə̂ akrə kʉlo ndjë fîge pâ ayö-chi tee-a.

¹⁷ Tchôtchô yö lë tchôtchô lêlê nə̈, ânyë ngbongbo yö le ngbongbo lêlê nə̈.

¹⁸ Tchôtchô yö wâbo ndə̂kə̂ le ngbongbo lêlê yö-a, âdəndjë ngâ ngbongbo yö wâbo ndə̂kə̂ le tchôtchô lêlê yö-a.

¹⁹ Ayö gbɛ̂ ndə̂ âlêâbô lê tə̂ tchôtchô nə̈, a kuadje rə̂ kə̂ yi rə̂ âtə̂lə̂ wo.

²⁰ Ârə̂ kä, nyê wun-adje sə̈ azü nə̈ lâme lə̂ köbosə̂ kə̂ le ndə̂ andjê.»

Adjîrə̂ adjisîpili

²¹ «Âdə̂âbo azü gbɛ̂ ndə̂ andjë to rə̂ sə̈ mê päkëdə̂: ‹Gbölö Gbïɛ̈, Gbölö Gbïɛ̈›, kä ndə̂ âli lə̂ Gbölö gö-gbïɛ̈ ndə̂ tchêlafô-a. Praâbalë kütû andjanə̈ ndə̂ andjë mbô rə ndə̂ âfû tə̂ su Bha mê ndə̂ tche sə̂ bhâ lafô.

²² Angbängbä azü toadje rə̂ sə̈ mê tə̂ lo nə̈ lâme päkëdə̂: ‹Gbölö Gbïɛ̈, Gbölö Gbïɛ̈, ârâ tö ndə̂ma Ndjapä la rə̈ zə̈, kə̈ grô angbongbo atchozö la rə̈ zə̈, kə̈ mbô angbängbä akpɨ̈ngbɨ̈ rə la rə̈ zə̈.›

²³ Käko mê toadje rə̂ sə̈ andjê päkëdə̂: ‹Më wûn-âbo sə̂ nyê balë-a, nyë gïtə̂ nyê chï, nyënyê ndə̂ a-earə̂ ngbongbo rə!›»

Pö pâ anda bïchuû

²⁴ «Ârə̂ kä, akrə ndə̂ tche djê pö ndə̂ mê to rə̂ âtə, ânyë kə̈ mbô rə gundə̂sə̂ apö lâme, tche wä batə̂ ngâ köchë ndə̂ küma yê wâ lanə̈, ânyë kə̈ mbô nda ndə̂ yê pâ täme.

²⁵ Nyïvrö nyî, angû vô katchôgbɛ̂, yi mbô tə̂ gbölösə̂nə̈ pâ nda nə̈, praâbalë nda nə̈ tûâbo-a, bëte da nda nə̈ wä pâ täme.

²⁶ Akrə ndə̂ tche djê pö ndə̂ mê to rə̂ âtə, ânyë kə̈ mbôâbô rə mbô gundə̂sə̂ apö lâme, tche wä batə̂ ngâ ngbɨ̈lə̈ köchë ndə̂ tche mbô nda ndə̂ yê pâ woye.

²⁷ Nyïvrö nyî, angû vô katchôgbɛ̂, yi mbô tə̂ gbölösə̂nə̈ pâ nda nə̈. Nda nə̈ tû kə̈ ndrɨ̂ndrɨ gbɛ̂.»

Jezü nyïsə̂ rə la gbôgbô

²⁸ Ndə̂ Jezü tô pö lâme gbɛ̂, tchə̂lə̂ küma azü gbɛ̂ djîngɨli tə̂kə̂ nyisə̂ rə ndə̂ yê.

²⁹ Bëte tche nyïsə̂ rə sə̈ azü batə̂ akrə ndə̂ tche wâ la gbôgbô. Tche nyîâbo sə̂ rə sə̈ azü batə̂ a-earə̂ kə̂ nyisə̂ ndïɛ̈ ndə̂ ajuîfu-a.