Matiyə̈ 28 - Mbëtï Ndjapä: TÄFO MADƗ̈

Jezü jö lə̂ kuzü

¹ Pâ lö sabäa, la mbatchâ lə̂ dɨmâche, Malê akrə gö ndə̂ Magadalä la ngâ Malê nə̂ ndə̂kə̂ wun cho kuzü nə̈.

² Kpro kâkë, cho trô tə̂ gbölösə̂nə̈, ngâ ânje ndə̂ Gbölö Gbïɛ̈ tô bhâ lafô kə̈ jrê, kə̈ rô gbölö täme tə̂ ma cho kuzü nə̈ chï, kə̈ sə̂ ëpânə̈.

³ Tə̂ yê tchö kpôlə̂nyä batə̂ nyïvrö ndə̂ âsrô, ânyë lə̂ba ndə̂ yê grô kpɨ̂ki.

⁴ Wawa mbô aturûgu nə̈ gbɛ̂, andjë sə̂ lakə̂ gugu tə̂ gbölösə̂nə̈ batə̂ akuzü.

⁵ Praâbalë ânje nə̈ tô rə̂ sə̈ aɛ̈chë nə̈ päkëdə̂: «Wawa mböäbô nyê mbô-ê, më wünsə̂ nə̈ pä nyë nə̈ ndə̂kə̂ pu Jezü ndə̂ a wôn tchë bhâtə̂ yö ndə̂ gba lâme.

⁶ Tche sə̂âbo tchâtə-a, tchë jô lə̂ kuzü nə̂, batə̂ rə̂ ndə̂ tche tô rə̂ alême, nyë nə̈ kə̈ wûn tchô ndə̂ tche lô tâ.

⁷ Nyë ë wândâ wändä kə̈ tô rə̂ sə̈ adjisîpili ndə̂ yê päkëdə̂: ‹Tche jô lə̂ kuzü nə̂ kə̈ ê dokʉ̈tchê tə̂ nyê nə̂ bhâ Galilë. Bhâye kä ndə̂ nyê wun-adje tchë.› Pö nə̈ kä ndə̂ më tô rə̂ sə̈ nyê lâme.»

⁸ Aɛ̈chë nə̈ âlafô gasa tə̂ ma cho kuzü nə̈, andjë wa la wawa ndjë la gbölö mômô ânyë kə̈ kpê la rö kə̈ tô pö ndə̂nə̈ sə̈ adjisîpili ndə̂ yê.

⁹ Kpro kâkë, Jezü nə̂ kə̈ tâkpa la andjê ânyë kə̈ tô rə̂ sə̈ andjê päkëdə̂: «Më pô ndə̂ nyê nə̂!» Andjë nə̂ ndola tchë, kə̈ zâ da yê, ânyë kə̈ gʉ̂te ëtchâtchâ yê.

¹⁰ Käko Jezü tô rə̂ sə̈ andjê päkëdə̂: «Wawa mböäbô nyê mbô-ê! Nyë gü kə̈ tô rə̂ sə̈ arə̂mâ ndə̂ mê ndə̂kə̂ pa andjë e atə̂ Galilë, andjê wun-adje mê bhâye.»

Pö ndə̂ aturûgu tô rə̂

¹¹ Ndə̂ gbô aɛ̈chë nə̈ ndə̂po lə̂ köbo, angâ aturûgu ndə̂ andjë sə̂ lakə̂ bata cho kuzü nə̈, dôtə̂ andjê âtə̂lə̂ gö nə̈, kə̈ tô pö ndə̂ arə gbɛ̂ ndə̂ âmbô lâme sə̈ agbölö a-earə̂ kə̂ wa ngela sə̈ Ndjapä.

¹² Agbölö a-earə̂ kə̂ wa ngela sə̈ Ndjapä la akpôkpô azü pâlatə̂ andjê, kə̈ djêtə̂ andjê ndə̂kə̂ kʉ gbölö makətche sə̈ aturûgu nə̈.

¹³ Andjë zâma sə̈ andjê kə̈ tô rə̂ päkëdə̂: «Nyë tö rə̂ kâkë: ‹Adjisîpili ndə̂ yê nə̈, kə̈ zɨ̂ ngbä krʉkrʉ yê lə̂ bütchî, kə̈ rô la rə̂ etə̂ dëkë ârâ lô nə̂.›

¹⁴ Âdə pö lâme âte lə̂ tü goverenëre, ârâ âmboadje rə̂ gbɛ̂ ndə̂kə̂ pa su yê zɨ, ânyë kə̂ mboadje ndjë rə̂ ndə̂kə̂ pa su nyê dɨ̈äbô nyê dɨ̂-î.»

¹⁵ Aturûgu nə̈ kʉ̂ makətche nə̈, kə̈ mbô rə̂ gundə̂sə̂ pö ndə̂ andjë tô rə̂ sə̈ andjê. Bëte rə̂ kä ndə̂ pö lâme wâ lə̂ gbâtə̂ ajuîfu zoo ëtə̂ tchô angêta.

Jezü wän adjisîpili ndə̂ yê

¹⁶ Adjisîpili lə̂ könô gbɛ̂ tchêpâ nə̈ balë ê atə̂ Galilë bhâlə̂ küma aga ndə̂ Jezü zâma sə̈ andjê alême ndə̂kə̂ e bhâye.

¹⁷ Ndə̂ andjë wûn Jezü, andjë gʉ̂te tchâtchâ yê, praâbalë angânə̈ gâmbabô rə̂ la su andjê gbɛ̂-a.

¹⁸ Jezü gîtə̂ yê ndola andjê kə̈ tô rə̂ sə̈ andjê päkëdə̂: «Ndjapä zä gbôgbô sə̈ mê pâ tchêlafô la tchêbêche.

¹⁹ Nyë êë pu azü pâ cho gbɛ̂, kə̂ mbo andjê tə̂ adjisîpili, nyë zä batɛ̂me sə̈ andjê la rə̈ Bha, la rə̈ Modô, la rə̈ Kpɨ̂ki Yingö.

²⁰ Nyë nyïsə̂ nə̈ sə̈ andjê ndə̂kə̂ bata arə gbɛ̂ ndə̂ më tô pö ndə̂nə̈ sə̈ nyê. Äwäpä nyë wunsə̂ nə̈ pä, më kä la nyê logbɛ̂, ndjoa ësə̂nə̈ ndə̂ tchêbêche krʉ tâ.»