Matiyə̈ 27 - Mbëtï Ndjapä: TÄFO MADƗ̈

A ë la Jezü atə̂ tchâtchu Pïlâte

¹ La mbatchâ, agbölö a-earə̂ kə̂ wa ngela sə̈ Ndjapä gbɛ̂, la akpôkpô azü ndə̂ ajuîfu pâlatə̂ andjê ndə̂kə̂ wa ngbanga kuzü lə̂ küma Jezü.

² Pânə̈ ndə̂ andjë î tchë, andjë ê la tchë kə̈ gbôtə̂ yê ëtchânə̂ goverenëre Pïlâte.

Kuzü Jüdâse

³ Jüdâse ndə̂ tche yôsə̂ Jezü, wûn rə̂ pä a wâ ngbanga kuzü lə̂ küma Jezü nə̂, su yê kʉ̂ tchë dəngbânə̈, tche gî amîɛ̈-makətche tə̂ akrə gbɛ̂ la lə̂ könô gbɛ̂ nə̈ sə̈ agbölö a-earə̂ kə̂ wa ngela sə̈ Ndjapä la akpôkpô azü ndə̂ ajuîfu.

⁴ Tche tö rə̂ sə̈ andjê päkëdə̂: «Më mbô ngbongbo rə nə̂, më yösə̂ akrə ndə̂ tche mbôâbô ngâ ngbongbo rə mbô balë sə̈ nyê.» Praâbalë andjë tô rə̂ ndə̂nə̈ sə̈ tchë päkëdə̂: «Pö ndə̂ ârâ wâbo lə̂nə̈-a, äwün kütû mö.»

⁵ Käko Jüdâse yî mîɛ̈-makətche nə̈ bhâlə̂ gbölö nda Ndjapä kə̈ wûtu kə̈ gû etə̂, pânə̈, tchë î gɨ̈ yê la wû, ânyë kə̈ tchû-î.

⁶ Agbölö a-earə̂ kə̂ wa ngela sə̈ Ndjapä kʉ̂ amîɛ̈-makətche nə̈, kə̈ tô rə̂ päkëdə̂: «Ndïɛ̈ zâbo köbo sə̈ azə̂ ndə̂kə̂ pa azə̈ vo mîɛ̈-makətche âtə lə̂ sandûgu-makətche ndə̂ gbölö nda Ndjapä-a, bëte ädə̈ makətche-jï.»

⁷ Pânə̈ ndə̂ andjë djêtə̂ andjê, andjë kʉ̂ makətche nə̈, kə̈ yô rə̂ la ngâ kɨ̈ndɨ̈ ndə̂ earə̂ kə̂ soa lüsû, ânyë kɨ̈ndɨ̈ nə̈ wâtə̂ sə̂ tchô ndə̂ a chi kuzü azü ndə̂ agö ngbî tâ.

⁸ Bëte rə̂ kä ndə̂, a ê rə̂ tə̂ kɨ̈ndɨ̈ nə̈ pä «kɨ̈ndɨ̈-jï» zoo ëtə̂ tchô angêta.

⁹ Käko pö ndə̂ earə̂ ndə̂ma Ndjapä Jeremï tô rə̂ alême mbô gundə̂sə̂ nə̈, tche tö rə̂ alême päkëdə̂: «Andjë kʉ̈ amîɛ̈-makətche tə̂ akrə gbɛ̂ la lə̂ könô gbɛ̂ ndə̂ âwâtə̂ makətche ndə̂ azü ndə̂ Isarayële dɨ̂ rə̂ alême tə̂ pö ndə̂ yê.

¹⁰ Andjë kʉ̂ rə̂ kə̈ yô kɨ̈ndɨ̈ ndə̂ earə̂ kə̂ soa lüsû, batə̂ rə̂ ndə̂ Gbölö Gbïɛ̈ zâma alême sə̈ mê tə̂ pö ndə̂nə̈.»

Pïlâte yü Jezü la ngâ pö

¹¹ Jezü krʉ̈ tchâtchu goverenëre Pïlâte, Pïlâte yû tchë päkëdə̂: «Mo də̈ gbïɛ̈ ndə̂ ajuîfu?» Jezü tô rə̂ ndə̂nə̈ sə̈ tchë päkëdə̂: «Momö kä ndə̂ âtô rə̂.»

¹² Agbölö a-earə̂ kə̂ wa ngela sə̈ Ndjapä la akpôkpô azü ndə̂ ajuîfu zâ pö lə̂ küma yê, praâbalë tche tôâbo pö ndə̂nə̈ balë-a.

¹³ Käko Pïlâte tô rə̂ sə̈ tchë päkëdə̂: «Mo djêâbo apö gbɛ̂ ndə̂ andjë tô rə̂ tə̂ zə̈ âtə?»

¹⁴ Praâbalë Jezü tôâbo ngâ pö balë ndə̂nə̈ sə̈ tchë-a. Käko tchə̂lə̂ küma goverenëre nə̈ djîngɨli-î.

Pïlâte wä ngbanga kuzü lə̂ küma Jezü

¹⁵ Lə̂ alö kpülü ndə̂ Pâke balë balë, goverenëre jï tchê ngâ earə̂ kânga balë sə̈ azü, tchanə̈ ndə̂ su azü gö nə̈ nyîndə̂ nə̈.

¹⁶ Dëkë ngâ earə̂ kânga alême kä tâ ndə̂ azü gö nə̈ wûnsə̂ yê tə̂ gbölösə̂nə̈, ndə̂ rə̈ yê wû päkëdə̂: Jezü Bäräbâse.

¹⁷ Pïlâte yû kpûlû azü nə̈ ndə̂ andjë pâlatə̂ andjê päkëdə̂: «Tchabâ kä ndə̂ nyë nyîndə̂ nə̈ pä më ji tchë sə̈ nyê? Jezü Bäräbâse, âdəndjë Jezü ndə̂ a ê rə̂ tə̂ yê pä Krîsiti?»

¹⁸ Bëte Pïlâte wûnsə̂ nə̈ nə̂ pä andjë gbötə̂ Mesï ëtchânə̂ yê lə̂ köbosə̂ gbölö su.

¹⁹ Sə̂nə̈ ndə̂ Pïlâte sə̂ bhâlə̂ nda ngbanga, ɛ̈chë ndə̂ yê wân tchô sə̈ tchë päkëdə̂: «Amö yiabô tə̂ zə̈ yî lə̂ pö ndə̂ djîrə̂ akrə lâme-ê, bëte më wün küma mê lə̂ bütchî âtə, tchə̂lə̂ küma mê djîngɨli tə̂ pö ndə̂ yê.»

²⁰ Agbölö a-earə̂ kə̂ wa ngela sə̈ Ndjapä la akpôkpô azü nə̈ mbô rə̂ gbɛ̂ ndə̂kə̂ pa andjë yukû nə̈ pä a ji Bäräbâse kə̂ won Jezü.

²¹ Goverenëre nə̈ kä zâ pö kə̈ yû andjê päkëdə̂: «Tchanə̈bâ kä ndə̂ nyë nyîndə̂ nə̈ pä më ji tchë sə̈ nyê lə̂ gûtə̂ azü bïchuû âtə?» Andjë tô rə̂ ndə̂nə̈ päkëdə̂: «Bäräbâse!»

²² Pïlâte kä yû andjê päkëdə̂: «Giamâ kä ndə̂ mê mbo rə̂ tə̂ Jezü ndə̂ a ê rə̂ tə̂ yê pä Krîsiti âtə?» Andjë tô rə̂ ndə̂nə̈ gbɛ̂ päkëdə̂: «Amö won tchë tə̂ yö ndə̂ gba!»

²³ Pïlâte kä yû andjê päkëdə̂: «Ngbongbo rə giamâ kä ndə̂ tche mbô rə̂.» Praâbalë andjë sə̂ lakə̂ ta wârə̂ päkëdə̂: «Amö won tchë tə̂ yö ndə̂ gba!»

²⁴ Ndə̂ Pïlâte âsə̈ wun rə̂ pä anyë mbô rə̂ nə̂ tʉrʉ-ê, ânyë azü nə̈ âlafô la pö tə̂ gbölösə̂nə̈, tche zâ ngû kə̈ djûtu könô yê tchâtchu kpûlû azü nə̈ lakə̂ to rə̂ päkëdə̂: «Pö ndə̂ jï köchë âtə wâbo lə̂ küma mê-a, äwün kütû nyê.»

²⁵ Azü nə̈ gbɛ̂ tô rə̂ päkëdə̂: «Ngbanga jï yê wä lə̂ küma ârâ la abechë ndə̂ ârâ!»

²⁶ Käko Pïlâte jî Bäräbâse sə̈ andjê. Andə̂ Jezü, tche zâma ndə̂kə̂ pa a bhi tchë la föröngbö, ânyë tche gbôtə̂ yê sə̈ andjê ndə̂kə̂ pa andjë won tchë tə̂ yö ndə̂ gba.

Aturûgu mö Jezü

²⁷ Aturûgu ndə̂ goverenëre ê la Jezü bhâlə̂ gbadja ndə̂ goverenëre nə̈, ânyë gbölö kpûlû ndə̂ aturûgu gbɛ̂ pâlatə̂ andjê ndrotə̂ yê.

²⁸ Andjë zû lə̂ba ndə̂ yê, kə̈ yû ngbêngbê gbölö lə̂ba ëtə̂ yê.

²⁹ Andjë kʉ̂ awû ndə̂ âwâ la chi tâ, kə̈ nyîkrə rə̂ batə̂ kpoto-gbïɛ̈, kə̈ zâ rə̂ ëtə̂ küma yê, kə̈ zâ wärə̈ ëtchânə̂ yê də ndôkö. Andjë gʉ̂te ëtchâtchâ yê, kə̈ sə̂ lakə̂ mo tchë lakə̂ to rə̂ päkëdə̂: «Ârâ pô ndə̂ zə̈ nə̂ gbïɛ̈ ndə̂ ajuîfu!»

³⁰ Andjë kû ngrʉ̂srö ëtə̂ yê, kə̈ zâ wärə̈ nə̈, kə̈ bhî küma yê la rə̂.

³¹ Pânə̈ ndə̂ andjë mô tchë âkâ, andjë zû gbölö ngbêngbê lə̂ba nə̈, kə̈ yû lə̂ba ndə̂ yê ëtə̂ yê gbânə̈, ânyë kə̈ ê la tchë ndə̂kə̂ won tchë tə̂ yö ndə̂ gba.

A bhï Jezü tə̂ yö ndə̂ gba

³² Ndə̂ andjë wûtu lə̂ gö nə̈, andjë tâkpa la ngâ köchë ndə̂ gö ndə̂ Sïrêne ndə̂ rə̈ yê wû pä Chemön, andjë zâ tchë la gbôgbô ndə̂kə̂ pa tche za yö ndə̂ gba ndə̂ Jezü.

³³ Ndə̂ andjë wûtu bhâ sə̂nə̈ ndə̂ a ê rə̂ tâ pä Gologotä ndə̂ ânyîndə̂ kə̂ to rə̂ päkëdə̂: «Tchô ndə̂ Kpökrô küma».

³⁴ Andjë zâ vɛ̂n-ɛn ndə̂ a zâ ngâ chüchü ngâ rə ëlə̂nə̈, kə̈ zâ rə̂ ëma yê ndə̂kə̂ pa tche ndjo rə̂. Ndə̂ âgrʉ̂ tïmï yê kpîɛ̂kpîɛ̂ rə̂, Jezü kôsə̂ kə̂ ndjo rə̂-ê.

³⁵ Ndə̂ andjë bhî tchë tə̂ yö ndə̂ gba, andjë tâ kʉ̂kâ ndə̂kə̂ krʉ tchə̂lə̂ lə̂ba ndə̂ yê tə̂ andjê.

³⁶ Pânə̈ andjë sə̂ bêche tchâme ndə̂kə̂ bata tchë.

³⁷ Dəpâ küma yê, tə̂ yö ndə̂ gba ndə̂ yê nə̈, andjë bhî ngâ mbëtï ndə̂ ânyîsə̂ dju kə̂ wa ngbanga pâ yê nə̈, ndə̂ âtô rə̂ päkëdə̂: «Tchanə̈ âtə də̈ Jezü, gbïɛ̈ ndə̂ ajuîfu.»

³⁸ Andjë bhï ndjë angâ angbongbo azü bïchuû pâ ayö ndə̂ gba la tchë, ngânə̈ balë də ndôkö, ânyë ngânə̈ balë də gele.

³⁹ Azü ndə̂ andjë ro pâ köbo sə̂ lakə̂ nyoanyoa küma andjê,

⁴⁰ lakə̂ dro tchë päkëdə̂: «Momö ndə̂ mo nyîndə̂ kə̂ ndjondjo tchə̂lə̂ gbölö nda Ndjapä alême ânyë kə̂ kä nyikrə rə̂ ëngbânə̈ lə̂ lö vötaâ âtə, âdə mo âwatə̂ Modô ndə̂ Ndjapä, amö tcha tə̂ zə̈ la tə̂ zə̈, kə̈ jrê tə̂ yö ndə̂ gba atə̂ ëbêche!»

⁴¹ Agbölö a-earə̂ kə̂ wa ngela sə̈ Ndjapä, la a-earə̂ kə̂ nyisə̂ ndïɛ̈, la akpôkpô azü nə̈ mô ndjë tchë, kə̈ tô rə̂ päkëdə̂:

⁴² «Tche tchä angâ azü, tchê tchabô tə̂ yê la tə̂ yê? Tche də̈ gbïɛ̈ ndə̂ Isarayële, äwäpä tche jre angaâtə tə̂ yö ndə̂ gba nə̈ ânyë azə̈ za su azə̂ sə̈ tchë.

⁴³ Tche zä su yê gbɛ̂ sə̈ Ndjapä kə̈ tô rə̂ päkëdə̂: ‹Më də̈ Modô ndə̂ Ndjapä.› Âdə Ndjapä nə̈ ânyində̂ yê, tche tchä sa tchë angangaâtə!»

⁴⁴ Angbongbo azü ndə̂ a bhî andjê la tchë tə̂ yö ndə̂ gba âme drô ndjë tchë.

Kə̂ tchu ndə̂ Jezü

⁴⁵ Ndə̂ lo wûtu lə̂ gûgû tchə̂lə̂ɛtchô, tchô bû zoo ëtə̂ dalo vötaâ ndə̂ tchêndə̂gölo.

⁴⁶ Tə̂ dalo vötaâ nə̈, Jezü tâ wârə̂ päkëdə̂: «Elïe, Elïe, lemâ sabâketanï?» Ndə̂ ânyîndə̂ kə̂ to rə̂ päkëdə̂: «Ndjapä ndə̂ mê, Ndjapä ndə̂ mê, bëte giamâ mo gbôtə̂ mê?»

⁴⁷ Angânə̈ lə̂ gûtə̂ andjê ndə̂ andjë sə̂ sə̂nə̈ djê tchë, kə̈ tô rə̂ päkëdə̂: «Tche kä lakə̂ e Elïe.»

⁴⁸ Posə̂nə̈ ngânə̈ balë lə̂ gûtə̂ andjê kpê la rö kə̈ zâ ndakôro, kə̈ yî rə̂ lə̂ kpïkpï vɛ̂n-ɛn, kə̈ î rə̂ ëtə̂ küma wärə̈, kə̈ zâ rə̂ sə̈ tchë ndə̂kə̂ pa tche ndjo rə̂.

⁴⁹ Praâbalë angânə̈ tô rə̂ päkëdə̂: «Amö sə gii-ï, azə̂ wun-adje rə̂ ndə̂ Elïe nə ndə̂kə̂ tcha tchë.»

⁵⁰ Jezü kä tâ wârə̂ kə̈ tchû-î.

⁵¹ Käko tchə̂lə̂ gbölö kʉ̈kʉ̂-lə̂ba ndə̂ a wâ tchə̂lə̂ gbölö nda Ndjapä la rə̂ srô kpôlə̂ gûgû nə̈ bïchuû, ätö də lafô ndjoa atə̂ bêche. Cho trô, tchə̂lə̂ agbölö atäme ndjôndjo-ê.

⁵² Ma cho kudû akuzü krô-ê, krʉkrʉ azü ndə̂ Ndjapä ndə̂ andjë tchû alême, andjë jô lə̂ kuzü-ê.

⁵³ Pânə̈ ndə̂ Jezü jô, andjë wûtu lə̂ acho akuzü nə̈, kə̈ lî bhâ Jerûzalêmo gö ndə̂ âwâ ngbî bëte Ndjapä, ânyë kə̈ mâtə̂ andjê sə̈ angbängbä azü bhâye.

⁵⁴ Kabïta ndə̂ aturûgu ndə̂ Rômo la aturûgu ndə̂ andjë sə̂ lakə̂ bata Jezü la tchë wûn cho ndə̂ âtrô, ndjë la arə ndə̂ âmbô lâme, wawa mbô andjê tə̂ gbölösə̂nə̈ ânyë andjë tô rə̂ päkëdə̂: «Tə̂ lëge nə̈ Akrə âtə wä alêe tə̂ Modô ndə̂ Ndjapä!»

⁵⁵ Angbängbä aɛ̈chë kä alême tâ, andjë sə̈ bhâchï ânyë kə̈ sə̂ lakə̂ wun tchô. Andjë də̈ aɛ̈chë ndə̂ andjë zâ tchêngbâ Jezü alême lakə̂ mbo rə̂ la tchë, ätö bhâ Galilë.

⁵⁶ Lə̂ gûtə̂ andjê, a gbö Malê akrə gö ndə̂ Magadalä, la Malê anyï Jâke la Jozêfu, la anyï abechë ndə̂ Zebede.

Jozêfu chï krʉkrʉ Jezü

⁵⁷ La tchêndə̂gölo, ngâ earə̂ rə ndə̂ tche də̂ akrə gö ndə̂ Arimatë ndə̂ rə̈ yê wû pä Jozêfu wûtu. Tche wä ndjë alême tə̂ ngâ djisîpili ndə̂ Jezü.

⁵⁸ Köchë lâme ê kə̈ gbô Pïlâte, kə̈ yû tchë ndə̂kə̂ za krʉkrʉ Jezü. Käko Pïlâte zâma ndə̂kə̂ pa a za rə̂ sə̈ tchë.

⁵⁹ Tche zâ krʉkrʉ nə̈ kə̈ gʉ̂â rə̂ la täfo gbölö lə̂ba ndə̂ âfû, ndə̂ rə̈ nə̈ wû pä «lɛ̂n-ɛn»,

⁶⁰ kə̈ zâ tchë lə̂ täfo cho akuzü ndə̂ tche djî rə̂ alême lə̂ täme. Pânə̈ tche zâ ngâ gbölö täme kə̈ bê ma cho kuzü nə̈ la rə̂, kə̈ gû etə̂.

⁶¹ Malê akrə gö ndə̂ Magadalä la ngâ Malê kä sə̂nə̈, andjë sə̂ ëbêche kpô tchâtchu cho kuzü nə̈.

Aturûgu bäta cho kuzü Jezü

⁶² Lö balë la tchêngbâ nə̈, ndə̂ ânyîndə̂ kə̂ to rə̂ pä lö ndə̂ ânə la tchêngbâ lö kə̂ nyikrətə̂ bëte sabäa, agbölö a-earə̂ kə̂ wa ngela sə̈ Ndjapä la afarizïɛ̈n pâlatə̂ andjê kə̈ ê bhândə̂ Pïlâte.

⁶³ Andjë tô rə̂ sə̈ tchë päkëdə̂: «Gbölö akrə, sə̂ ngâ pö ndə̂ earə̂ yepa lâme tê lə̂ ârâ nə̂, ndə̂ gbô tchë sə̂ la tʉ̈rʉ̂ la yê alême, tche tö rə̂ päkëdə̂: ‹La tchêngbâ lö vötaâ, mê joadje lə̂ kuzü.›

⁶⁴ Amö zama sə̈ aturûgu ndə̂kə̂ bata cho kuzü nə̈ zoo ëtə̂ lö vötaâ, ânyë adjisîpili ndə̂ yê nəabô nə̂ kə̂ zɨ ngbä yê, kə̂ to rə̂ sə̈ azü gö päkëdə̂: ‹Tche jô lə̂ gbâtə̂ akuzü nə̂.› Pö yepa dəngbânə̈ lâme, ârə̂ âkä wa ngbo kə̂ ro anə̈ dokʉ̈tchê lâme.»

⁶⁵ Pïlâte tô rə̂ sə̈ andjê päkëdə̂: «Aturûgu nə̈ kä âtə! Nyë êë kə̂ bata cho kuzü yê nə̈ batə̂ rə̂ ndə̂ su nyê nyîndə̂ nə̈.»

⁶⁶ Andjë ê kə̈ bê ma cho nə̈ la ngâ gbölö täme, kə̈ mbô ngâ sɨ̂nyî pânə̈, ânyë kə̈ kʉ̂ aturûgu ndə̂kə̂ bata cho kuzü nə̈.