Matiyə̈ 26 - Mbëtï Ndjapä: TÄFO MADƗ̈

Agbölö azü ndə̂ ajuîfu pü köbo ndə̂kə̂ won Jezü

¹ Ndə̂ Jezü nyîsə̂ pö sə̈ andjê âkâ, tche tô rə̂ sə̈ adjisîpili ndə̂ yê päkëdə̂:

² «Nyë wûnsə̂ nə̈ nə̂ pä lə̂ lö bïchuû kpülü ndə̂ Pâke kä tâ: A âzadje Modô ndə̂ Akrə, kə̂ e la tchë ndə̂kə̂ won tchë tə̂ yö ndə̂ gba.»

³ Käko agbölö a-earə̂ kə̂ wa ngela sə̈ Ndjapä la akpôkpô azü ndə̂ ajuîfu pâlatə̂ andjê bhâlə̂ gbadja ndə̂ gbölö earə̂ kə̂ wa ngela sə̈ Ndjapä ndə̂ rə̈ yê wû pä Käyîfu.

⁴ Andjë djêtə̂ andjê ndə̂kə̂ pu köbo la ngâ känyï ndə̂kə̂ za Jezü ânyë kə̂ won tchë.

⁵ Praâbalë andjë tô rə̂ päkëdə̂: «Âfûâbo pä azə̈ za tchë lə̂ lö kpülü ndə̂ Pâke-a, ndə̂kə̂ kitə̂ köbo ânyë pö abô âlafô lə̂ gbâtə̂ azü-î.»

Ngâ ɛ̈chë sü yömbö ëpâ küma Jezü

⁶ Ndə̂ Jezü sə̂ alême bhâ Betanï bhâ tchâalê ndə̂ Chemön earə̂ broma,

⁷ ngâ ɛ̈chë nə̂ ndola tchë. Tche zä ngâ ɛ̈ ndütü-yömbö ndə̂ gbölö makətche, ndə̂ a mbô rə̂ la täme ndə̂ rə̈ nə̈ wû pä älëbâtere, kə̈ sû yömbö nə̈ ëpâ küma Jezü sə̂nə̈ ndə̂ tche sə̂ tə̂ ma kɨ̈zɨ̂ lakə̂ zɨ rə.

⁸ Ndə̂ adjisîpili âsə̈ wun rə̂ käko, su andjê kʉ̂ andjê, ânyë andjë tô rə̂ päkëdə̂: «Bëte giamâ kä ndə̂ a ndɨ̂ yömbö âtə?

⁹ Äwä âme ndə̂kə̂ pa a ka rə̂ ngbâ gbölö makətche, kə̂ kʉ makətche nə̈ sə̈ a-earə̂ yûkü.»

¹⁰ Praâbalë Jezü wûnsə̂ pö nə̈ tə̂ su andjê kə̈ tô rə̂ ndə̂nə̈ sə̈ andjê päkëdə̂: «Bëte giamâ kä ndə̂ nyê ka küma ɛ̈chë âtə ndə̂nə̈, tchôtchô rə kä ndə̂ tche mbô rə̂ tə̂ mê lâme.

¹¹ Bëte a-earə̂ yûkü kä ndrotə̂ nyê logbɛ̂, praâbalë më sə̂âbo ndrotə̂ nyê logbɛ̂-a.

¹² Yömbö ndə̂ tche sû rə̂ tə̂ mê lâme, äwä ndə̂kə̂ nyikrə mê ndə̂kə̂ krʉ bëte lö kə̂ chi mê.

¹³ Ɛn-ɛn, tə̂ lëge nə̈ më tö rə̂ sə̈ nyê: Sə̈ tchô gbɛ̂ ndə̂ a mu Tchôtchô Pö âtə pâ cho gbɛ̂, a âtoadje ndjë pö ndə̂ rə ndə̂ ɛ̈chë âtə mbô rə̂ lâme, ndə̂kə̂ pa sə̂ yê te lə̂ azü.»

Jüdâse pü köbo ndə̂kə̂ yosə̂ Jezü

¹⁴ Käko ngâ djisîpili balë lə̂ gûtə̂ andjê lə̂ könô gbɛ̂ tchêpâ nə̈ bïchuû ndə̂ rə̈ yê wû pä Jüdâse Ïsïkärïyôte ê bhândə̂ agbölö a-earə̂ kə̂ wa ngela sə̈ Ndjapä.

¹⁵ Tche tô rə̂ sə̈ andjê päkëdə̂: «Âdə mê âza Jezü sə̈ nyê, giamâ kä ndə̂ nyê za rə̂ sə̈ mê?» Andjë dɨ̂ amîɛ̈-makətche tə̂ akrə gbɛ̂ la lə̂ könô gbɛ̂ kə̈ kʉ̂ rə̂ sə̈ tchë.

¹⁶ Ätö tə̂ lo nə̈ lâme, Jüdâse sə̂ lakə̂ pu köbo ndə̂kə̂ gbotə̂ Jezü sə̈ andjê.

Jezü wän adjisîpili ndə̂ yê ndə̂kə̂ nyikrə kɨ̈zɨ̂ Pâke

¹⁷ Lə̂ dokʉ̈ lö ndə̂ kpülü ndə̂ mâpa ndə̂ djëvö wâbô wâ lə̂nə̈, adjisîpili nə̂ ndola Jezü kə̈ yû tchë päkëdə̂: «Mo nyïndə̂ nə̈ pä ârâ nyikrə kɨ̈zɨ̂ Pâke nə̈ bhâ tchêbâ?»

¹⁸ Jezü tô rə̂ päkëdə̂: «Nyë ë âtə̂lə̂ gö nə̈, bhândə̂ ngâ akrə, kə̂ to rə̂ sə̈ tchë päkëdə̂: ‹Gbölö Akrə tö rə̂ päkëdə̂: Lö mê wûtu nə̂, bhândə̂ zə̈ kä ndə̂ mê zɨ kɨ̈zɨ̂ Pâke la adjisîpili ndə̂ mê.›»

¹⁹ Adjisîpili ê kə̈ mbô rə nə̈ gundə̂sə̂ kə̂ zama ndə̂ Jezü, ânyë kə̈ nyîkrə kɨ̈zɨ̂ Pâke.

²⁰ La tchêndə̂gölo Jezü la adjisîpili ndə̂ yê lə̂ könô gbɛ̂ tchêpâ nə̈ bïchuû sə̂ tə̂ ma kɨ̈zɨ̂.

²¹ Sə̂nə̈ ndə̂ andjë sə̂ lakə̂ zɨ rə, Jezü tô rə̂ päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, ngânə̈ balë lə̂ gbâtə̂ nyê yoadje sə̂ mê.»

²² Nyonyo mbô adjisîpili nə̈ tə̂ gbölösə̂nə̈ andjë jêtə̂ kə̂ yu tchë balë balë päkëdə̂: «Gbölö Gbïɛ̈, mëmê kä?»

²³ Jezü tô rə̂ ndə̂nə̈ sə̈ andjê päkëdə̂: «Akrə ndə̂ më yî könô mê la tchë lə̂ kalângʉ kɨ̈zɨ̂ âtə kä ndə̂ âyoadje sə̂ mê.

²⁴ Modô ndə̂ akrə âtchuadje batə̂ rə̂ ndə̂ a mbô rə̂ lə̂ Mbëtï Ndjapä pâ yê. Praâbalë nyonyo kä tə̂ akrə ndə̂ tche yosə̂ Modô ndə̂ Akrə! Äkʉ̈sə̂ nə̈ pä akrə käko, a zɨabô tchë zɨ̂-î.»

²⁵ Jüdâse ndə̂ tche wâ ndə̂kə̂ yosə̂ Jezü tô rə̂ päkëdə̂: «Earə̂ kə̂ nyisə̂ rə, mëmê kä?» Jezü tô rə̂ ndə̂nə̈ sə̈ tchë päkëdə̂: «Mo tô rə̂ nə̂.»

Kɨ̈zɨ̂ ndə̂ Gbölö Gbïɛ̈

²⁶ Sə̂nə̈ ndə̂ andjë sə̂ lakə̂ zɨ kɨ̈zɨ̂, Jezü zâ mâpa kə̈ ê tchôtchô pö pânə̈, kə̈ tchô tchə̂lə̂ nə̈, kə̈ krʉ̂ tchə̂lə̂ nə̈ tə̂ adjisîpili ndə̂ yê, kə̈ tô rə̂ päkëdə̂: «Nyë zä rə̂, kə̈ zɨ̂ rə̂, rə âtə də̈ tə̂ mê.»

²⁷ Pânə̈ tche zâ kangûchi vɛ̂n-ɛn, kə̈ zâ ayîabâ sə̈ Ndjapä, kə̈ zâ rə̂ sə̈ andjê lakə̂ to rə̂ päkëdə̂: «Nyënyê gbɛ̂ nyë ndjö rə̂,

²⁸ bëte rə âtə də̈ jï mê, jï madɨ̈ ndə̂ âtû bëte kə̂ ko pö lə̂ küma angbängbä azü.

²⁹ Më tö rə̂ sə̈ nyê, mê kä ndjo bata vɛ̂n-ɛn balë tee-a, ndjoa ëtə̂ lo nə̈ ndə̂ mê kä ndjoadje rə̂ tə̂ täfo nə̈ la nyê bhâlə̂ Gbölö gö-gbïɛ̈ ndə̂ Bha mê.»

³⁰ Pânə̈ ndə̂ andjë pâ düwü ndə̂kə̂ voga Ndjapä, andjë ê âtə̂lə̂ küma aga ndə̂ a-Olivï.

Pîêre vuadje sə̂ Jezü

³¹ Käko Jezü tô rə̂ sə̈ adjisîpili ndə̂ yê päkëdə̂: «Lə̂ bütchî âtə nyê gboadje tə̂ mê gbɛ̂ ndə̂kə̂ ro etə̂, bëte a mbö rə̂ lə̂ Mbëtï Ndjapä päkëdə̂: ‹Mê won-adje earə̂ kə̂ bata aɛ̈bro-ngbaga, ânyë tchə̂lə̂ aɛ̈bro-ngbaga nə̈ hrʉʉ katchôgbɛ̂.›

³² Praâbalë âdə më âjo lə̂ kuzü nə̂, mê eadje dokʉ̈tchê tə̂ nyê atə̂ Galilë.»

³³ Pîêre zâ pö kə̈ tô rə̂ sə̈ tchë päkëdə̂: «Âdə azü gbɛ̂ âgbotə̂ zə̈, mëmê ndə̂ me nə̈, mê gboabô tə̂ zə̈ balë tee-a.»

³⁴ Jezü tô rə̂ sə̈ tchë päkëdə̂: «Ɛn-ɛn, tə̂ lëge nə̈ më tö rə̂ sə̈ mö, dokʉ̈tchê ndə̂kə̂ pa kö ngötö kɨ lə̂ bütchî âtə, mo âvusə̂ mê sûsunə̈ vötaâ.»

³⁵ Pîêre tô rə̂ sə̈ tchë päkëdə̂: «Âdə ârə̂ âwa ndə̂kə̂ pa më tchu la mö, mê vuabô sə̂ zə̈ tee-a.» Adɨ̂ adjisîpili nə̈ gbɛ̂ tô ndjë rə̂ käko.

Jezü tö pö sə̈ Ndjapä bhâ Jetesemanë

³⁶ Käko Jezü la adjisîpili ndə̂ yê wûtu bhâsə̂ ngâ tchô ndə̂ rə̈ nə̈ wû pä Jetesemanë, tche tô rə̂ sə̈ andjê päkëdə̂: «Nyë sə̈ tchâtə, më âe təbhâ ndə̂kə̂ to pö sə̈ Ndjapä.»

³⁷ Tche zâ Pîêre potə̂ yê la amodô bïchuû ndə̂ Zebede. Nyonyo la wawa jêtə̂ kə̂ mbo tchë tə̂ gbölösə̂nə̈.

³⁸ Tche tô rə̂ sə̈ andjê päkëdə̂: «Su mê kä la nyonyo ëtə̂ kuzü. Nyë sə̈ tchâtə mëmê la nyê, azə̈ löäbô lô-ê.»

³⁹ Pânə̈ tche gîtə̂ yê kpro kə̈ tê bêche la tchâtchu yê, kə̈ tô pö sə̈ Ndjapä päkëdə̂: «Bha mê, âdə köbo âwa, amö gi kangûchi yûkü âtə tə̂ mê bhâchï! Praâbalë amö mboabô rə̂ mbô batə̂ su mê nyîndə̂ nə̈, amö mbo rə̂ batə̂ su zə̈ nyîndə̂ nə̈.»

⁴⁰ Tche dôtə̂ yê pu adjisîpili nə̈, kə̈ gbô andjê lə̂ lö, tche tô rə̂ sə̈ Pîêre päkëdə̂: «Käko nyë wâbo la gbôgbô ndə̂kə̂ sə la lala nyê lə̂ dalo balë la mê?

⁴¹ Nyë löäbô lô-ê! Nyë tö pö sə̈ Ndjapä ndə̂kə̂ pa nyë teabô tê lə̂ rə ndə̂ âvu azü-î. Yingö kä la gbôgbô ndə̂kə̂ mbo rə̂, praâbalë tə̂ akrə wâbo la gbôgbô-a.»

⁴² Tche kä gîtə̂ yê tə̂ bïchuû nə̈ kə̈ tô pö sə̈ Ndjapä, kə̈ tô rə̂ päkëdə̂: «Bha mê, âdə köbo ndə̂kə̂ pa kangûchi lâme ro tə̂ mê âwabô wâ, ânyë mo nyîndə̂ nə̈ pä më ndjo rə̂, äwäpä mo mbo rə̂ batə̂ su zə̈ nyîndə̂ nə̈.»

⁴³ Tche kä dôtə̂ yê kə̈ gbô adjisîpili nə̈ ndə̂ andjë sə̂ lakə̂ lo, bëte lö rôpâ andjê nə̂.

⁴⁴ Tche gbôtə̂ andjê kə̈ kä gîtə̂ yê bhâchï, tə̂ vötaâ nə̈ tche kä tô pö sə̈ Ndjapä kütû la apö ndə̂ tche tô rə̂ dokʉ̈tchê âme.

⁴⁵ Pânə̈ tche kâ pu adjisîpili nə̈, kə̈ tô rə̂ sə̈ andjê päkëdə̂: «Gbô nyë kä lə̂ lö? Gbô nyê kä lakə̂ yatə̂ nyê-ê? Dalo nə̈ ndô nə̂ ndə̂kə̂ pa a gbotə̂ Modô ndə̂ Akrə ëtchânə̂ a-earə̂ ngbongbo rə.

⁴⁶ Nyë älafô, azə̈ êë! Akrə ndə̂ tche yôsə̂ mê wûtu nə̂.»

Agbölö azü ndə̂ ajuîfu zä Jezü

⁴⁷ Ndə̂ gbô pö nə̈ ndə̂po lə̂ ma yê, Jüdâse, ngâ djisîpili balë lə̂ gbâtə̂ andjê lə̂ könô gbɛ̂ tchêpâ nə̈ bïchuû wûtu la akpûlû azü ndrotə̂ yê. Andjë kʉ̈ abesala la agoto tchânə̂ andjê. Agbölö a-earə̂ kə̂ wa ngela sə̈ Ndjapä la akpôkpô azü ndə̂ ajuîfu kä âkə̈ wân andjê.

⁴⁸ Jüdâse, earə̂ kə̂ yosə̂ Jezü nyîsə̂ rə ndə̂ tche mbo rə̂ ndə̂kə̂ za tchë sə̈ andjê, kə̈ tô rə̂ päkëdə̂: «Akrə ndə̂ më â ma yê, dëkë tchetchë kä nyë zä tchë-ê!»

⁴⁹ Kpro kâkë, Jüdâse gîtə̂ yê ndola Jezü, kə̈ tô rə̂ sə̈ tchë päkëdə̂: «Earə̂ kə̂ nyisə̂ rə, më pô ndə̂ zə̈ nə̂!» Pânə̈ tche â ma yê.

⁵⁰ Jezü tô rə̂ sə̈ tchë päkëdə̂: «Agü mê, mbo rə ndə̂ mo nə̂ ndə̂kə̂ mbo rə̂ lâme.» Käko andjë gîtə̂ andjê ndola Jezü, kə̈ zâ tchë-ê.

⁵¹ Ngânə̈ balë lə̂ gûtə̂ azü ndə̂ andjë sə̂ alême la Jezü gbɨ̂tɨ besala ndə̂ yê lə̂ kʉ̂kâ nə̈, kə̈ bhî earə̂ kua ndə̂ gbölö earə̂ kə̂ wa ngela sə̈ Ndjapä, ânyë kə̈ ngâla tü yê ndjrâ.

⁵² Jezü tô rə̂ päkëdə̂: «Ka la besala ndə̂ zə̈ ëlə̂ kʉ̂kâ nə̈ ëngbânə̈, bëte azü gbɛ̂ ndə̂ andjë won azü la besala, andjê tchuadje kuzü besala.

⁵³ Mo wûn-âbo sə̂nə̈ pä âdə më âe Bha mê ndə̂kə̂ za könô sə̈ mê, tchê wan-abô gbölö kpûlû aânje lə̂ könô gbɛ̂ tchêpâ nə̈ bïchuû sə̈ mê angangaâtə?

⁵⁴ Praâbalë âdə mê âe aânje nə̈, pö ndə̂ Mbëtï Ndjapä âwatə̂ lëge nə̈ atöko? Mbëtï Ndjapä tö rə̂ pä, rə nə̈ âmboadje käko-ë.»

⁵⁵ Pânə̈ Jezü tô rə̂ sə̈ akpûlû azü nə̈ päkëdə̂: «Nyë nə̈ la besala, la agoto ndə̂kə̂ za mê batə̂ earə̂ ngbä? Logbɛ̂ më sə̈ bechë lə̂ gûtə̂ nyê lə̂ gbölö nda Ndjapä lakə̂ nyisə̂ rə, nyë zâbo mê-a.

⁵⁶ Praâbalë arə lâme wütu käko ndə̂kə̂ pa pö ndə̂ a-earə̂ ndə̂ma Ndjapä tô rə̂ alême mbo gundə̂sə̂ nə̈.» Käko adjisîpili nə̈ gbɛ̂ gbôtə̂ yê ânyë kə̈ kpê etə̂.

Jezü krʉ̈ tchâtchâ gbölö kpûlû ndə̂ ngbanga ndə̂ ajuîfu

⁵⁷ Azü ndə̂ andjë zâ Jezü lâme, andjë ê la tchë bhâ tchâalê ndə̂ Käyîfu, gbölö earə̂ kə̂ wa ngela sə̈ Ndjapä. Dëkë a-earə̂ kə̂ nyisə̂ ndïɛ̈ la akpôkpô azü ndə̂ ajuîfu pâlatə̂ andjê nə̂ gbɛ̂ bhâye.

⁵⁸ Pîêre sə̂ tʉ̂rʉ lakə̂ nə ngbâ andjê, zoo kə̈ wûtu bhâlə̂ gbadja ndə̂ gbölö earə̂ kə̂ wa ngela sə̈ Ndjapä, tche lî kə̈ sə̂ ëbêche la a-earə̂ kua ndə̂kə̂ wun köbo ndə̂ rə nə̈ ka la rə̂.

⁵⁹ Agbölö a-earə̂ kə̂ wa ngela sə̈ Ndjapä la azü lə̂ gbölö kpûlû ngbanga ndə̂ ajuîfu pû ngâ pö ndə̂kə̂ yi rə̂ lə̂ küma Jezü ânyë kə̂ wa ngbanga kuzü pâ yê.

⁶⁰ Andjë gbôâbo ngâ pö-a, praâbalë angbängbä azü nə̂ la pö yepa tə̂ yê. Ndə̂kə̂ ka ndə̂nə̈, angâ aköchë bïchuû wûtu kə̈ mâtə̂ andjê,

⁶¹ kə̈ tô rə̂ päkëdə̂: «Köchë âtə tö rə̂ alême pä anyê ândɨ tchə̂lə̂ gbölö nda Ndjapä âtə, kə̂ kä nyikrə tchêndə̂ nə̈ lə̂ lö vötaâ.»

⁶² Gbölö earə̂ kə̂ wa ngela sə̈ Ndjapä âlafô kə̈ tô rə̂ sə̈ Jezü päkëdə̂: «Mo ôn-âbo ma zə̈ ndə̂ pö âtə? Pö giamâ kä ndə̂ azü âtə tô rə̂ tə̂ zə̈ lâme?»

⁶³ Praâbalë Jezü tôâbo pö balë-a. Gbölö earə̂ kə̂ wa ngela sə̈ Ndjapä tô rə̂ sə̈ tchë päkëdə̂: «La rə̈ Ndjapä ndə̂ tche wâ la tchîsûwu më yü mö, to rə̂ sə̈ ârâ pä mo də̈ Krîsiti, Modô ndə̂ Ndjapä?»

⁶⁴ Jezü tô rə̂ ndə̂nə̈ sə̈ tchë päkëdə̂: «Mo tô rə̂ la ma zə̈ nə̂. Praâbalë më tö rə̂ sə̈ nyê, ndə̂kə̂ to tə̂ tchô angêta, nyê wun-adje Modô ndə̂ Akrə ndə̂ tche sə̂ də ndôkö könô Ndjapä ndə̂ tche wâ la gbôgbô gbɛ̂, ânyë kə̂ kadje lə̂ ndrö ndə̂ tchêlafô.»

⁶⁵ Käko gbölö earə̂ kə̂ wa ngela sə̈ Ndjapä srô tchə̂lə̂ lə̂ba ndə̂ yê kə̈ tô rə̂ päkëdə̂: «Tche drô Ndjapä nə̂, azə̈ kä wâbo ndə̂kə̂ sə bëte pö lə̂ ma angâ azü-a, nyë djê rə̂ ndə̂ tche drô Ndjapä lâme nə̂.

⁶⁶ Nyë wün rə̂ atöko?» Andjë tô rə̂ ndə̂nə̈ päkëdə̂: «Tche wä ndə̂kə̂ tchu.»

⁶⁷ La tchêngbâ nə̈ andjë kû ngʉ̂srö lə̂ la yê, kə̈ dû tchë, angânə̈ rʉ̂â ngälâ yê,

⁶⁸ lakə̂ to rə̂ päkëdə̂: «Momö ndə̂ mo də̂ Krîsiti, to ndə̂ma Ndjapä, to rə̂ sə̈ ârâ: Tchabâ kä âkə̈ bhî mö?»

Pîêre vüsə̂ Jezü

⁶⁹ Pîêre sə̂ ëbêche bhâ sûwu lə̂ gûgû tchêlakpô nə̈. Ngâ ɛ̈chë ndə̂ tchê mbo kua bhâye nə̂ ndola Pîêre lakə̂ to rə̂ sə̈ tchë päkëdə̂: «Momö ndjë gbɛ̂ mo wä alême ngâ akrə ndrotə̂ Jezü akrə gö ndə̂ Galilë lâme.»

⁷⁰ Praâbalë Pîêre kôsə̂ nə̈ tchâtchu azü gbɛ̂ päkëdə̂: «Më wûn-âbo sə̂ pö ndə̂ mo to rə̂ âtə-a.»

⁷¹ Ndə̂ Pîêre zâ köbo ndə̂kə̂ e pu manda gbadja nə̈, ngâ ɛ̈chë kua nə̈ ngbî wûn tchë, kə̈ tô rə̂ sə̈ azü ndə̂ andjë sə̂ tâ päkëdə̂: «Tchanə̈ âtə sə̈ ndjë alême la Jezü akrə gö ndə̂ Näzärête.»

⁷² Pîêre kä vûsə̂ nə̈ lakə̂ deba päkëdə̂: «Më wûn-âbo sə̂ köchë lâme-a!»

⁷³ Kpro la tchêngbâ nə̈, andjanə̈ ndə̂ andjë sə̂ tâ, nə̂ ndola Pîêre kə̈ tô rə̂ sə̈ tchë päkëdə̂: «Lëge pö kä, momö ndjë gbɛ̂ mo də̈ ngâ djisîpili ndə̂ yê, bëte kə̂ to pö ndə̂ zə̈ mâ mö nə̂ ësûwu.»

⁷⁴ Käko Pîêre sə̂ lakə̂ deba tə̂ kïkï nə̈ lakə̂ to rə̂ päkëdə̂: «Âdə më âmo yepa, äwäpä Ndjapä wa ngbanga pâ mê, më wûn-âbo sə̂ köchë âtə-a!» Kpro la tchêngbâ nə̈, kö ngötö kɨ̂.

⁷⁵ Su Pîêre tê pâ pö ndə̂ Jezü tô rə̂ alême sə̈ tchë päkëdə̂: «Dokʉ̈tchê ndə̂kə̂ pa kö ngötö kɨ, mô vuadje sə̂ mê sûsunə̈ vötaâ.» Pîêre wûtu kə̈ kɨ̂ tə̂ gbölösə̂nə̈.