Matiyə̈ 21 - Mbëtï Ndjapä: TÄFO MADƗ̈

Jezü lï atə̂ Jerûzalêmo

¹ Ndə̂ andjë ndô la Jerûzalêmo, andjë wûtu ndola gö ndə̂ Betefajë lə̂ küma aga ndə̂ a-Olivï. Jezü wân adjisîpili bïchuû;

² kə̈ tô rə̂ sə̈ andjê päkëdə̂: «Nyë ë âtə̂lə̂ yɛ̈yɛ̈ gö ndə̂ âwâ tchâtchu nyê lâme. Nyë âsə̈ li âtə̂lə̂ yɛ̈yɛ̈ gö nə̈, kə̂ gboadje ngâ kûndiɛ ndə̂ a tchô tchë, yɛ̈yɛ̈ nə̈ kä ndrotə̂ yê. Nyë zü tchë kə̂ ka la andjê sə̈ mê.

³ Âdə ngâ akrə âto pö sə̈ nyê, nyë tö rə̂ ndə̂nə̈ sə̈ tchë päkëdə̂: ‹Gbölö Gbïɛ̈ kä ndə̂ ânyîndə̂ yê.› Akrə nə̈ âgboadje tə̂ köbo sə̈ nyê ndə̂kə̂ pa nyë ka la andjê.»

⁴ Rə nə̈ wütu käko ndə̂kə̂ pa pö ndə̂ earə̂ ndə̂ma Ndjapä tô rə̂ mbo gundə̂sə̂ nə̈; tche tö rə̂ päkëdə̂:

⁵ «Nyë tö rə̂ sə̈ azü gö ndə̂ Siyön päkëdə̂: Wunsa, gbïɛ̈ ndə̂ zə̈ âka pu mö! Tche mbötə̂ yê batə̂ ngâ mbämbä akrə. Tche sə̈ pâ yû kûndiɛ, pâ yɛ̈yɛ̈ nə̈, yɛ̈yɛ̈ gia ndə̂ tche kʉ akʉ̂ngbô.»

⁶ Adjisîpili nə̈ ê kə̈ mbô rə̂ batə̂ rə̂ ndə̂ Jezü tô rə̂.

⁷ Andjë kâ la ɛ̈nə̈ kûndiɛ nə̈ la anyï nə̈. Andjë kʉ̈ alə̂ba ndə̂ andjê ëpâ kûndiɛ nə̈ ânyë Jezü sə̂ pânə̈.

⁸ Kpûlû azü vrö alə̂ba ndə̂ andjê ëbêche pâ köbo. Angânə̈ kʉ̈ amatö yö kə̈ nyîkrə rə̂ pâ köbo.

⁹ Azü ndə̂ andjë nə tchâtchu Jezü la andjanə̈ ndə̂ andjë nə dəngbâ yê sə̂ lakə̂ on päkëdə̂: «Ârâ vöga mö, Modô ndə̂ Davîdi! Äwäpä Ndjapä e tchôtchô pö pâ akrə ndə̂ tche nə̂ la rə̈ Gbölö Gbïɛ̈! Voga sə̈ Ndjapä bhâ lafô!»

¹⁰ Sə̂nə̈ ndə̂ Jezü âsə̈ li atə̂ Jerûzalêmo, gö gbɛ̂ trô-ê. Azü yû tchô päkëdə̂: «Tchabâ kä ndə̂ âdə̂ köchë âtə?»

¹¹ Kpûlû azü nə̈ tô rə̂ ndə̂nə̈ sə̈ andjê päkëdə̂: «Jezü kä, ndə̂ tche wâtə̂ earə̂ ndə̂ma Ndjapä, ndə̂ tche tô bhâ Näzärête gö ndə̂ Galilë.»

Jezü lï atə̂lə̂ gbölö nda Ndjapä

¹² Pânə̈ Jezü lî bhâlə̂ gbölö nda Ndjapä, kə̈ sə̂ lakə̂ gro azü gbɛ̂ ndə̂ andjë ka rə la andjanə̈ ndə̂ andjë yo arə. Tche gôâ agbalâka ndə̂ andjë chandje makətche pânə̈, la ambätä ndə̂ a-earə̂ kə̂ ka apuli.

¹³ Tche tö rə̂ sə̈ andjê päkëdə̂: «A mbö rə̂ lə̂ Mbëtï Ndjapä päkëdə̂: ‹A â-eadje rə̂ tə̂ nda ndə̂ mê pä nda kə̂ to pö sə̈ Ndjapä.› Praâbalë nyënyê, nyë mbô rə̂ tə̂ ngâ kudû ndə̂ a-earə̂ ngbä zatə̂ andjê wü lə̂nə̈.»

¹⁴ A-earə̂ föla la azü ndə̂ da andjê ndɨ̂, nə̂ ndola Jezü bhâlə̂ gbölö nda Ndjapä ânyë tche tchâ andjê.

¹⁵ Agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ âsə̈ wun kpɨ̈ngbɨ̈ rə lâme, la rə̂ ndə̂ abechë sə̂ lakə̂ on lə̂ gbölö nda Ndjapä, su andjê kʉ̂ andjê. Andjë tô rə̂ päkëdə̂: «Voga sə̈ Modô ndə̂ Davîdi.»

¹⁶ Andjë tô rə̂ sə̈ Jezü päkëdə̂: «Mo djê pö ndə̂ andjë tô rə̂ lâme nə̂?» Jezü tô rə̂ ndə̂nə̈ sə̈ andjê päkëdə̂: «Më djê rə̂ nə̂! Nyë dɨ̂âbo pö lâme balë lə̂ Mbëtï Ndjapä? Mbëtï Ndjapä tö rə̂ päkëdə̂: ‹Mo mbö rə̂ pä düwü ndə̂kə̂ voga mö wutu lə̂ ma ayɛ̈yɛ̈ abechë la angbelɛ̂-abechë.›»

¹⁷ La tchêngbâ nə̈ Jezü gbôtə̂ andjê tchâme, kə̈ wûtu lə̂ gö nə̈ ndə̂kə̂ e atə̂ Betanï, kə̈ lô bhâye.

Yö ndə̂ fîge ndə̂ âlêâbô lê-ê

¹⁸ Ndə̂ Jezü kângbâ yê po mbatchâ atə̂lə̂ gö nə̈, gʉ sə̂ lakə̂ nyu tchë.

¹⁹ Tche wûn ngâ yö fîge ndroma köbo ânyë kə̈ gîtə̂ yê ndola rə̂, praâbalë tche gbö kütû akʉ̈kʉ̂ nə̈. Tche tô rə̂ sə̈ yö nə̈ päkëdə̂: «Mô kä le bata tee-a.» Po la tchêngbâ nə̈ yö nə̈ hrô-ê.

²⁰ Adjisîpili âsə̈ wun rə̂ käko, tchə̂lə̂ küma andjê gbɛ̂ djîngɨli, andjë yû Jezü päkëdə̂: «Ämbö atöko ânyë yö ndə̂ fîge âtə hrô gasa-ê?»

²¹ Jezü tô rə̂ ndə̂nə̈ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Tə̂ngâlo, âdə nyë âza su nyê sə̈ Ndjapä ânyë kə̈ dôdoabô su nyê dôdo-ê, nyê âmbo rə batə̂ rə̂ ndə̂ më mbô rə̂ tə̂ yö ndə̂ fîge lâme, kə̂ mbo rə̂ âro anə̈ lâme. Âdə nyë âto rə̂ sə̈ aga âtə päkëdə̂: ‹Alafô tchâme, kə̈ tê bhâlə̂ gbölö ngû ngbro›, rə nə̈ âmbo batə̂ rə̂.

²² Âdə nyë âza su nyê sə̈ Ndjapä, rə gbɛ̂ ndə̂ nyê yukû nə̈ lə̂ köbosə̂ kə̂ to pö sə̈ Ndjapä, nyê gboadje rə̂.»

Jezü mbö rə la rə̈ tchabâ?

²³ Jezü lï bhâlə̂ gbölö nda Ndjapä, ânyë kə̈ sə̂ lakə̂ nyisə̂ rə. Agbölö a-earə̂ kə̂ wa ngela sə̈ Ndjapä la akpôkpô azü ndə̂ ajuîfu, nə̂ ndola Jezü ânyë kə̈ yû tchë päkëdə̂: «Mo sə̈ lakə̂ mbo rə âtə la rə̈ tchabâ? Tchabâ kä ndə̂ âzâ köbo sə̈ mo ndə̂kə̂ mbo rə̂?»

²⁴ Jezü tô rə̂ ndə̂nə̈ sə̈ andjê päkëdə̂: «Mëmê ndjë gbɛ̂ më âyu nyê la ngâ pö balë, kütû balë: Âdə nyë âto pö ndə̂nə̈ sə̈ mê, mê nyiadje sə̂ köbo gbôgbô ndə̂ mê mbo rə la rə̂ lâme sə̈ nyê.

²⁵ Tchabâ kä ndə̂ âwân Jâan-Batîse ndə̂kə̂ za batɛ̂me ndə̂ ngû sə̈ azü? Ndjapä kä? Âdəndjë azü?» Andjë sə̂ lakə̂ to rə̂ lə̂ gbâtə̂ andjê päkëdə̂: «Âdə azə̂ âto rə̂ päkëdə̂: ‹Ndjapä kä âkə̈ wân Jâan›, tchê yuadje azə̂ päkëdə̂: ‹Bëte giamâ kä ndə̂ azə̈ gâmbabô pö ndə̂ yê gâmba?›

²⁶ Âdə azə̈ âto rə̂ päkëdə̂: ‹Azü kä ndə̂ âwân tchë›, azə̈ mbö wa kpûlû azü âtə, bëte kpûlû azü nə̈ gbɛ̂ wün Jâan batə̂ earə̂ ndə̂ma Ndjapä.»

²⁷ Käko andjë tô rə̂ ndə̂nə̈ sə̈ Jezü päkëdə̂: «Ârâ wûn-âbo sə̂nə̈-a.» Tche tô ndjë rə̂ sə̈ andjê päkëdə̂: «Mëmê ndjë gbɛ̂ mê nyiabô sə̂ akrə ndə̂ mê mbo rə lâme la rə̈ yê sə̈ nyê tee-a.»

Ndoka pâ abechë bïchuû

²⁸ Jezü kâ tô rə̂ päkëdə̂: «Nyë wün pö âtə atöko? Ngâ köchë kä la amodô bïchuû. Tche tô rə̂ sə̈ dokʉ̈ modô nə̈ päkëdə̂: ‹Modô ndə̂ mê, mo âe angêta kə̂ mbo kua bhâlə̂ kɨ̈ndɨ̈ vînye ndə̂ mê.›

²⁹ Tche tô rə̂ ndə̂nə̈ sə̈ bha nə̈ päkëdə̂: ‹Më nyîâbo ndə̂nə̈-a.› La tchêngbâ nə̈ tche nyîkrə su yê, kə̈ ê âtə̂lə̂ kɨ̈ndɨ̈ nə̈.

³⁰ Pânə̈ bha nə̈ ê ndola bïchuû modô nə̈, kə̈ tô gbôgbô pö lâme sə̈ tchë. Bïchuû modô nə̈ tô rə̂ sə̈ tchë päkëdə̂: ‹Bha mê, mê eadje.› Praâbalë tche êâbo âtə̂lə̂ kɨ̈ndɨ̈ nə̈-a.»

³¹ Jezü yû andjê päkëdə̂: «Tchabâ lə̂ gbâtə̂ amodô bïchuû lâme kä ndə̂ âmbô rə ndə̂ bha nə̈ nyîndə̂ nə̈?» Andjë tô rə̂ ndə̂nə̈ sə̈ tchë päkëdə̂: «Dokʉ̈ modô nə̈.» Jezü tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, a-earə̂ kə̂ pala makətche-lapöo, la aɛ̈chë ndə̂ kua ndə̂ andjê wâ ndə̂kə̂ pu aköchë lâme, andjê wutuadje dokʉ̈tchê tə̂ nyê bhâlə̂ Gbölö gö-gbïɛ̈ ndə̂ Ndjapä.

³² Bëte Jâan nə̈ alême pu nyê, kə̈ nyîsə̂ köbo ndə̂kə̂ mbo djîrə̂ rə sə̈ nyê, praâbalë nyë gâmbabô pö ndə̂ yê-a. Kütû a-earə̂ kə̂ pala makətche-lapöo la aɛ̈chë ndə̂ kua ndə̂ andjê wâ kütû ndə̂kə̂ pu aköchë lâme kä ndə̂ âgâmba pö ndə̂ yê. Nyë wûn rə lâme nə̂ gbɛ̂, praâbalë kə̈ nyîkrəabô su nyê ndə̂kə̂ gamba pö ndə̂ yê-a.»

Ndoka pâ angbongbo a-earə̂ kua kɨ̈ndɨ̈ vînye

³³ «Nyë kä djê ngâ ndoka nə̈: Ngâ köchë nda mbö kɨ̈ndɨ̈ vînye, kə̈ mbô gbadja âtâkpa ndə̂nə̈, kə̈ djî kudû lə̂ täme ndə̂kə̂ pa a po ndjî vînye nə̈ lə̂nə̈, kə̈ nyîkrə ngâ tchô də lafô ndə̂kə̂ pä akrə krʉ tâ, ânyë kə̂ wun tchô pâ kɨ̈ndɨ̈ nə̈. Pânə̈ tche gbôtə̂ kɨ̈ndɨ̈ nə̈ ëtchânə̂ angâ a-earə̂ kə̂ djo kɨ̈ndɨ̈ vînye ânyë kə̈ ê atə̂lə̂ ngâ gö ngbî.

³⁴ Lo kə̂ soa lêlê vînye nə̈ âsə̈ ndo, tche wân azü kua ndə̂ yê sə̈ a-earə̂ kə̂ mbo kɨ̈ndɨ̈ nə̈ ndə̂kə̂ pa andjë wan andə̂ anyê lêlê vînye nə̈.

³⁵ Praâbalë a-earə̂ kə̂ mbo kɨ̈ndɨ̈ nə̈ kʉ̂ azü kua ndə̂ yê lâme, kə̈ bhî ngânə̈ balë, kə̈ wôn ngânə̈, kə̈ nyê vötaâ nə̈ la täme.

³⁶ Earə̂ kɨ̈ndɨ̈ nə̈ kä wân angâ azü kua ndə̂ yê, andjë ngbä kə̈ rô adokʉ̈ nə̈ lâme. Praâbalë a-earə̂ kə̂ mbo kɨ̈ndɨ̈ lâme kä mbô ndjë rə̂ tə̂ andjê käko.

³⁷ Ndə̂kə̂ ka ndə̂nə̈, köchë lâme wân modô ndə̂ yê sə̈ andjê. Tche tô rə̂ bhâtə̂ su yê päkëdə̂: ‹Andjê mboadje wa modô ndə̂ mê.›

³⁸ Praâbalë ndə̂ a-earə̂ kə̂ mbo kɨ̈ndɨ̈ nə̈ âsə̈ wun modô nə̈ lâme, andjë tô rə̂ lə̂ gbâtə̂ andjê päkëdə̂: ‹Earə̂ kə̂ za kɨ̈ndɨ̈ nə̈ ngbâ bha nə̈ kä âtə. Azə̈ êë kə̈ wôn tchë ânyë kɨ̈ndɨ̈ nə̈ wadje tə̂ andə̂ azə̈ nə̈.›

³⁹ Andjë zâ tchë, kə̈ gbô la tchë lə̂ kɨ̈ndɨ̈ vînye nə̈ bhâchï, ânyë kə̈ wôn tchë.»

⁴⁰ Jezü yû andjê päkëdə̂: «Âdə earə̂ kɨ̈ndɨ̈ vînye nə̈ âkangbâ yê, tche âmbo tə̂ a-earə̂ kə̂ mbo kua kɨ̈ndɨ̈ lâme atöko?»

⁴¹ Azü nə̈ tô rə̂ ndə̂nə̈ sə̈ tchë päkëdə̂: «Tchê won-adje angbongbo azü lâme la ngbongbo kə̂ won tchô, kə̂ zadje kɨ̈ndɨ̈ nə̈ sə̈ angâ a-earə̂ kə̂ mbo kua kɨ̈ndɨ̈ vînye ngbî, ndə̂kə̂ pa lo nə̈ ndə̂ andjë soa lêlê vînye nə̈, andjë kʉ andə̂ ye nə̈ sə̈ tchë.»

⁴² Jezü tô rə̂ sə̈ andjê päkëdə̂: «Nyë dɨ̂âbo pö lâme balë lə̂ Mbëtï Ndjapä? ‹Täme ndə̂ a-earə̂ kə̂ mbo nda gbôtâ, ârə̂ kä âkə̈ mbôtə̂ yê tə̂ gbôgbô täme da nda nə̈. Rə lâme tö bhândə̂ Gbölö Gbïɛ̈. Rə nə̈ wätə̂ ngâ gbölö rə lə̂ la azə̂.›

⁴³ «Bëte rə̂ kä ndə̂ më tô rə̂ sə̈ nyê päkëdə̂: A âjiadje Gbölö gö-gbïɛ̈ ndə̂ Ndjapä tchânə̂ nyê, kə̂ zadje rə̂ sə̈ azü ndə̂ andjë mboadje rə gundə̂sə̂ nə̈. [

⁴⁴ Akrə ndə̂ tche tê pâ täme lâme, tchə̂lə̂ yê ândjo. Âdə täme nə̈ âte pâ ngâ akrə, kə̂ nunu tchë bhilakata-ê.]»

⁴⁵ Agbölö a-earə̂ kə̂ wa ngela sə̈ Ndjapä la afarizïɛ̈n âsə̈ dje ndoka lâme, kə̈ djê tchə̂lə̂ nə̈ pä pö lâme wätə̂ anyê.

⁴⁶ Andjë pû köbo ndə̂kə̂ za tchë, praâbalë wawa kpûlû azü nə̈ mbô andjê bëte andjë wün Jezü batə̂ ngâ earə̂ ndə̂ma Ndjapä.