Matiyə̈ 16 - Mbëtï Ndjapä: TÄFO MADƗ̈

Afarizïɛ̈n la asadusïɛ̈n yükû ngâ kpɨ̈ngbɨ̈ rə

¹ Afarizïɛ̈n la asadusïɛ̈n nə̂ ndola Jezü. Andjë nyïndə̂ kə̂ vu tchë, kə̈ yû tchë pä tche mbo ngâ kpɨ̈ngbɨ̈ rə ndə̂ ânyîsə̂ nə̈ pä Ndjapä kä ndə̂ âwân tchë.

² Praâbalë Jezü tô rə̂ ndə̂nə̈ sə̈ andjê päkëdə̂: «La tchêndə̂gölo, âdə tchêlafô âdrôdrö, nyê to rə̂ päkëdə̂: ‹Tchô âdeka ngrôô.›

³ La mbatchâ, âdə tchêlafô âdro ânyë kə̈ kä bûbü lə̂sə̂nə̈, nyê to rə̂ päkëdə̂: ‹Nyïvrö ânyi angêta.› Nyë wünsə̂ kə̂ to pö pâ arə tchêlafô, praâbalë arə ndə̂ âwutu angaâtə, nyë wûn-âbo sə̂kə̂ to pö pânə̈-a.

⁴ Azü ndə̂ tchô angêta də̈ angbongbo azü, andjë nyîâbo ndə̂kə̂ dje pö ma Ndjapä-a. Andjë yükû nə̈ pä më mbo ngâ kpɨ̈ngbɨ̈ rə. Andjê wun-abô rə̂ tee-a, kütû kpɨ̈ngbɨ̈ rə ndə̂ Ndjapä mbô rə̂ balë lə̂ köbosə̂ earə̂ ndə̂ma Ndjapä Jönâse lâme.» La tchêngbâ nə̈ Jezü gbôtə̂ andjê tchâme kə̈ ê etə̂.

Djëvö ndə̂ afarizïɛ̈n la asadusïɛ̈n

⁵ Ndə̂ adjisîpili sə̂ lakə̂ ro atə̂ kalâ gbölö kpakpa ngû, sə̂kə̂ kʉ mâpa yû tə̂ andjê.

⁶ Jezü tô rə̂ sə̈ andjë päkëdə̂: «La nyê gbö-ê, kätâ mböäbô nyê mbô pu djëvö ndə̂ afarizïɛ̈n la asadusïɛ̈n-ê.»

⁷ Adjisîpili sə̂ lakə̂ to rə̂ lə̂ gbâtə̂ andjê päkëdə̂: «Bëte rə̂ ndə̂ azə̈ kʉ̂âbô mâpa kʉ̂ lâme kä ndə̂ tche tô pö lâme.»

⁸ Jezü wûnsə̂ pö ndə̂ andjë tô rə̂ lâme, kə̈ yû andjê päkëdə̂: «Bëte giamâ kä ndə̂ nyë sə̂ lakə̂ to pö pâ mâpa ndə̂ nyë kʉ̂âbô rə̂ kʉ̂ lâme? Kə̂ za su nyê sə̈ mê wä kpîɛ̂kpîɛ̂ rə̂.

⁹ Nyë wûn-âbo sə̂nə̈ dämba? Mâpa mïndûu ndə̂ azü sâke mïndûu zɨ̂ rə̂, ânyë nyë pâla adɨ̂ nə̈ lə̂ gbasa lâme, sə̂nə̈ têâbo lə̂ nyê?

¹⁰ Mâpa mïndûu manə̈ bïchuû ndə̂ azü sâke voanə̈ zɨ̂ rə̂ alême nyë päla adɨ̂ nə̈ lə̂ gbasa atöko? Sə̂nə̈ têâbo lə̂ nyê?

¹¹ Pö ndə̂ më tô rə̂ lâme, nyë mbö atöko ânyë kə̈ djêâbô tchə̂lə̂ nə̈ djê-ê? Ndə̂ më tô rə̂ päkëdə̂: Kätâ mböäbô nyê mbô pu mâpa ndə̂ afarizïɛ̈n la asadusïɛ̈n lâme, më tôâbo pö ndə̂ mâpa-a, praâbalë më tö rə̂ pä la nyê gbo tə̂ djëvö ndə̂ afarizïɛ̈n.»

¹² Tchâme kä ndə̂ adjisîpili wûnsə̂ nə̈ pä tche tôâbo rə̂ sə̈ anyê pä anyë mbo wa djëvö ndə̂ mâpa ndə̂ afarizïɛ̈n la asadusïɛ̈n-a, praâbalë anyë mbo wa kə̂ nyisə̂ rə ndə̂ afarizïɛ̈n la asadusïɛ̈n.

Pîêre tö rə̂ pä Jezü wätə̂ Krîsiti

¹³ Jezü wûtu lə̂ agö ndə̂ Sezarë ndə̂ Fïlîpe. Tche yû adjisîpili ndə̂ yê päkëdə̂: «Azü tö rə̂ pä Modô ndə̂ Akrə də̈ tchabâ?»

¹⁴ Andjë tô rə̂ ndə̂nə̈ päkëdə̂: «Angâ azü tö rə̂ pä mo də̈ Jâan-Batîse, angânə̈ tô rə̂ pä mo də̈ Elïe, angânə̈ tô ndjë rə̂ pä mo də̈ Jeremï âdəndjë ngâ earə̂ ndə̂ma Ndjapä.»

¹⁵ Jezü tô rə̂ sə̈ andjê päkëdə̂: «Â nyënyê, nyë tö andə̂ nye nə̈ pä më də̈ tchabâ?»

¹⁶ Chemôn-Pîêre tô rə̂ päkëdə̂: «Mo də̈ Krîsiti, Modô ndə̂ Ndjapä ndə̂ tche wâ la tʉ̈rʉ̂ la yê.»

¹⁷ Jezü tô rə̂ ndə̂nə̈ sə̈ tchë päkëdə̂: «Mômô kä tə̂ zə̈ Chemön, modô ndə̂ Jönâse! Bëte pö ndə̂ mo tô rə̂ lâme âtôâbo bhândə̂ azü-a, praâbalë ätö bhândə̂ Bha ndə̂ tche sə̂ bhâ lafô.

¹⁸ Mëmê, më tö rə̂ sə̈ mö: Rə̈ zə̈ wü pä Pîêre. Mê mboadje Egilîze ndə̂ mê pâ täme lâme. Manda tchô ndə̂ akuzü wâbo la gbôgbô ndə̂kə̂ ropâ Egilîze ndə̂ mê-a.

¹⁹ Mê kʉadje akûlïɛ̈ manda ndə̂ Gbölö gö-gbïɛ̈ ndə̂ tchêlafô sə̈ mö. Rə ndə̂ mô iadje rə̂ bêche âtə, Ndjapä iadje rə̂ bhâ lafô. Rə ndə̂ mô zuadje rə̂ bêche âtə, Ndjapä zuadje rə̂ bhâ lafô.»

²⁰ La tchêngbâ nə̈ Jezü zâma sə̈ adjisîpili ndə̂ yê pä andjë toabô rə̂ tô sə̈ ngâ akrə balë pä anyë də̈ Krîsiti-î.

Jezü tö pö ndə̂kə̂ tchu lakə̂ jo ndə̂ yê

²¹ Tə̂ lo nə̈ lâme, Jezü jêtə̂ kə̂ to rə̂ kraâ sə̈ adjisîpili ndə̂ yê päkëdə̂: «Äwäpä më e atə̂ Jerûzalêmo ndə̂kə̂ wun yûkü tə̂ gbölösə̂nə̈ tchânə̂ akpôkpô azü la agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈. Andjê won-adje mê, lə̂ lö vötaâ la tchêngbâ nə̈, mê joadje.»

²² Pîêre zâ Jezü kə̈ gîtə̂ yê la tchë bhâchï ânyë kə̈ sə̂ lakə̂ hro la tchë päkëdə̂: «Ndjapä mbö rə̂ la mö, Gbölö Gbïɛ̈, rə käko gboabô mö tee-a.»

²³ Praâbalë Jezü djêtə̂ yê kə̈ tô rə̂ sə̈ Pîêre päkëdə̂: «Gitə̂ zə̈ tə̂ mê bhâchï Satäa! Mo wä batə̂ ngâ täme lə̂ köbo mê, bëte kə̂ wun tchô ndə̂ zə̈ wâbo batə̂ andə̂ Ndjapä-a, praâbalë äwä batə̂ andə̂ azü.»

²⁴ Käko Jezü tô rə̂ sə̈ adjisîpili ndə̂ yê päkëdə̂: «Âdə ngâ akrə ânyində̂ kə̂ nə ngbâ mê, äwäpä tche kosə̂ tə̂ yê la tə̂ yê, kə̂ za yö ndə̂ gba ndə̂ yê, ânyë kə̂ nə ngbâ mê.

²⁵ Bëte akrə ndə̂ tche nyîndə̂ kə̂ tcha tchîsûwu ndə̂ yê, ârə̂ âyuadje tə̂ yê. Praâbalë akrə ndə̂ tchîsûwu ndə̂ yê yû bëte mê, tchê gboadje rə̂.

²⁶ Âdə akrə âgbo rə tchêbêche âtə gbɛ̂, ânyë tchîsûwu ndə̂ yê yû, giamâ kä ndə̂ tche gbo rə̂ ngbânə̈? Giamâ kä ndə̂ akrə kʉ rə̂ ânyë kə̂ yo rə̂ la tchîsûwu ndə̂ yê?

²⁷ Bëte Modô ndə̂ Akrə âkadje ngbâ yê la aânje ndə̂ yê lə̂ gbôgbô ndə̂ Bha nə̈. Tchê kʉadje rə ndə̂ akrə balë balë sə̈ tchë gundə̂sə̂ rə ndə̂ tche mbô rə̂.

²⁸ Ɛn-ɛn, tə̂ lëge nə̈ më tö rə̂ sə̈ nyê: Angâ azü lə̂ gbâtə̂ nyê tchâtə tchuabô tee-a zoo, kə̂ wun Modô ndə̂ Akrə ndə̂ tche ka batə̂ Gbïɛ̈.»