Matiyə̈ 14 - Mbëtï Ndjapä: TÄFO MADƗ̈

Kuzü Jâan-Batîse

¹ Tə̂ lo nə̈ lâme, Hërôde Äntïpâse ndə̂ tche wâtə̂ goverenëre pâ Galilë djê apö ndə̂ âkɨ̂ la rə̈ Jezü,

² tche tô rə̂ sə̈ a-earə̂ kə̂ mbo kua tchâtchâ yê päkëdə̂: «Jâan-Batîse kä; tche jô lə̂ kuzü nə̂! Djusə̂nə̈ kä ndə̂ tche wâ la gbôgbô ndə̂kə̂ mbo akpɨ̈ngbɨ̈ rə lâme.»

³ Dëkë Hërôde zäma alême sə̈ azü ndə̂kə̂ pa andjë za Jâan-Batîse kə̈ î tchë la djingîli kə̈ yî tchë bhâlə̂ nda kânga. Hërôde känga tchë bëte Hërödîâde ndə̂ tche wâtə̂ ɛ̈chë ndə̂ yîngâ yê Fïlîpe.

⁴ Tche känga Jâan-Batîse bëte rə̂ ndə̂ tche tô rə̂ sə̈ tchë päkëdə̂: «Ndïɛ̈ zâbo köbo sə̈ mö ndə̂kə̂ pa mo to Hërödîâde tə̂ ɛ̈chë ndə̂ zə̈-a.»

⁵ Hërôde nyîndə̂ kə̂ won tchë, praâbalë tche mbö wa ajuîfu bëte andjë wün Jâan batə̂ earə̂ ndə̂ma Ndjapä.

⁶ Dëkë lə̂ köbosə̂ kpülü ndə̂ lö kə̂ zɨ Hërôde, ɛ̈wünrə ndə̂ Hërödîâde dâ ɛ̈ngbä tchâtchu azü ndə̂ Hërôde ê andjê ndə̂ kpülü nə̈. Ɛ̈ngbä ndə̂ yê nə̈ fü tə̂ Hërôde tə̂ gbölösə̂nə̈.

⁷ Käko tche dêba ndə̂kə̂ kʉ rə gbɛ̂ ndə̂ bechë-ɛ̈chë nə̈ yuadje kû nə̈ sə̈ tchë.

⁸ Pâ pö ndə̂ anyï bechë-ɛ̈chë nə̈ tô rə̂ sə̈ tchë, tche tô rə̂ sə̈ Hërôde päkëdə̂: «Amö za küma Jâan-Batîse sə̈ mê lə̂ kpângbâlâ chembë tchâtə!»

⁹ Nyonyo mbô gbïɛ̈ nə̈, praâbalë tə̂ pö ndə̂nə̈ ndə̂ tche dêba tchâtchu azü gbɛ̂ ndə̂ tche ê andjê ndə̂ kpülü nə̈, tche zâma ndə̂kə̂ za küma Jâan sə̈ tchë.

¹⁰ Tche wân ngâ akrə bhâlə̂ nda kânga ânyë akrə nə̈ ê kə̈ kû küma Jâan-Batîse,

¹¹ tche zâ rə̂ lə̂ kpângbâlâ chembë, kə̈ nə̂ la rə̂ ânyë kə̈ zâ rə̂ sə̈ bechë-ɛ̈chë nə̈. Bechë-ɛ̈chë nə̈ ê la rə̂ sə̈ anyï nə̈.

¹² Adjisîpili ndə̂ Jâan nə̂ kə̈ zâ krʉkrʉ yê ânyë kə̈ chî rə̂. Pânə̈ andjë ê kə̈ tô pö ndə̂nə̈ sə̈ Jezü.

Jezü kʉ̈ kɨ̈zɨ̂ sə̈ kpûlû azü sâke mïndûu

¹³ Ndə̂ Jezü djê pö lâme, tche âlafô la kütû yê kə̈ â lə̂ külû ndə̂kə̂ e bhâsə̂ ngâ tchô ndə̂ âwâtə̂ kpaɛ̈gâ. Kpûlû azü âsə̈ dje rə̂ pä tche rô nə̂ etə̂, andjë wûtu lə̂ agö ngbî ngbî ânyë kə̈ zâ tchêngbâ yê la da andjê.

¹⁴ Ndə̂ Jezü wûtu lə̂ külû nə̈, tche wûn kpûlû azü nə̈. Nyonyo andjê mbô tchë ânyë tche tchâ tə̂kömbô ndə̂ andjê.

¹⁵ Ndə̂ lo zɨ̂, adjisîpili ndə̂ Jezü nə̂ ndola tchë ânyë kə̈ tô rə̂ sə̈ tchë päkëdə̂: «Lo zɨ̂ nə̂, ânyë tchô âtə, azü mbôâbo gö tâ-a. Amö gro azü nə̈ andjë gû atə̂lə̂ ayɛ̈yɛ̈ gö, kə̂ yo kɨ̈zɨ̂ ndə̂kə̂ zɨ rə̂ bhâye.»

¹⁶ Jezü tô rə̂ sə̈ andjê päkëdə̂: «Âwâbo pä andjë gu-a. Nyënyê la tə̂ nyê kä ndə̂ âkʉ kɨ̈zɨ̂ sə̈ andjê.»

¹⁷ Andjë tô rə̂ ndə̂nə̈ sə̈ tchë päkëdə̂: «Ârâ wä kütû la mâpa mïndûu la agiangû bïchuû tchâtə.»

¹⁸ Jezü tô rə̂ sə̈ andjê päkëdə̂: «Nyë kä la rə̂ sə̈ mê.»

¹⁹ Pânə̈ tche zâma sə̈ azü nə̈ ndə̂kə̂ pa andjë sə bêche pâ abë. Tche kʉ̂ mâpa mïndûu la agiangû bïchuû nə̈, kə̈ kênga la yê atə̂ lafô, kə̈ ê tchôtchô pö pânə̈. La tchêngbâ nə̈ tche tchô tchə̂lə̂ mâpa nə̈, tche kʉ̂ rə̂ sə̈ adjisîpili, ânyë andjë krʉ̂ tchə̂lə̂ nə̈ tə̂ azü nə̈ gbɛ̂.

²⁰ Azü gbɛ̂ zɨ̂ rə tchə̂lə̂ andjê sɨ̂-î. Adjisîpili rʉ̂â adɨ̂ andöma nə̈ âsɨ̂ gbasa lə̂ könô gbɛ̂ tchêpâ nə̈ bïchuû.

²¹ Azü gbɛ̂ ndə̂ andjë zɨ̂ kɨ̈zɨ̂ nə̈, andjë wä gbɛ̂ azü ndola sâke mïndûu. A dɨ̂âbo aɛ̈chë la abechë-a.

Jezü nə̈ pâ gbölö kpakpa ngû

²² Kpro la tchêngbâ nə̈, Jezü zâma sə̈ adjisîpili ndə̂ yê pä andjë a lə̂ külû kə̈ zû dokʉ̈tchê tə̂ yê dəkalâ gbölö kpakpa ngû nə̈. Tche sə̂ andə̂ yê nə̈ ndə̂kə̂ mbo rə̂ pä kpûlû azü nə̈ gu atə̂ndə̂ andjê.

²³ Pânə̈ ndə̂ tche mbô rə̂ pä kpûlû azü nə̈ gu, tche kênga atə̂lə̂ küma aga ndə̂kə̂ to pö sə̈ Ndjapä. Ndə̂ tchô bû, Jezü sə̂ tchâme la kütû yê.

²⁴ Külû nə̈ rô nə̂ tʉ̂rʉ tə̂ maga gbölö kpakpa ngû nə̈. Yi sə̂ lakə̂ ka la andjê kä atə̂ ngbânə̈ ânyë kpabe nə̈ sə̂ lakə̂ bhi ma külû nə̈.

²⁵ Ndə̂ tchə̂lə̂ bütchî ndô tə̂kə̂ ro, Jezü ê pu adjisîpili ndə̂ yê lakə̂ nə la da yê pa ngû nə̈.

²⁶ Ndə̂ andjë wûn tchë ndə̂ tche sə̂ lakə̂ nə pâ ngû nə̈, tchə̂lə̂ küma adjisîpili djîngɨli, ânyë andjë tô rə̂ päkëdə̂: «Ngâ tchozö kä!» Wawa mbô andjê ânyë andjë tâ wârə̂.

²⁷ Kpro la tchêngbâ nə̈, Jezü tô rə̂ sə̈ andjê päkëdə̂: «Su nyê zɨ̈ tɨ-ë, mëmê kä! Wawa mböäbô nyê mbô-ê.»

²⁸ Pîêre tô rə̂ sə̈ tchë päkëdə̂: «Gbölö Gbïɛ̈, âdə momö kä tə̂ lëge nə̈, amö zama ndə̂kə̂ pa më nə pâ ngû nə̈ ndə̂kə̂ e pu mö.»

²⁹ Jezü tô rə̂ ndə̂nə̈ sə̈ tchë päkëdə̂: «Nə atâ!» Pîêre wûtu lə̂ külû nə̈ kə̈ sə̂ lakə̂ nə pâ ngû nə̈ ndə̂kə̂ e pu Jezü.

³⁰ Ndə̂ tche wûn yi ndə̂ âsə̂ lakə̂ mbo tə̂ gbölösə̂nə̈, wawa mbô tchë ânyë tche sə̂ lakə̂ mindi. Tche tâ wârə̂ päkëdə̂: «Gbölö Gbïɛ̈, tcha mê lə̂ kuzü!»

³¹ Tchâme, Jezü yî könô yê sə̈ Pîêre, kə̈ zâ tchë ânyë kə̈ tô rə̂ sə̈ tchë päkëdə̂: «Momö, kə̂ za su zə̈ sə̈ mê wä kpîɛ̂kpîɛ̂ rə̂! Bëte giamâ kä ndə̂ su zə̈ wâ bïbïchuû pâ mê?»

³² Ndə̂ andjê bïchuû gbɛ̂ â lə̂ külû nə̈, yi nə̈ krʉ̂-ê.

³³ Pânə̈ adjisîpili ndə̂ andjë sə̂ lə̂ külû nə̈ gʉ̂te tchâtchâ yê ânyë kə̈ tô rə̂ sə̈ tchë päkëdə̂: «Tə̂ lëge nə̈, mo wätə̂ Modô ndə̂ Ndjapä!»

Jezü tchä a-earə̂ tə̂kömbô lə̂ gö ndə̂ Jënëzärête

³⁴ Pânə̈ andjë zû dəkalâ gbölö kpakpa ngû nə̈ kə̈ wûtu bhâlə̂ agö ndə̂ Jënëzärête.

³⁵ Azü ndə̂ tchô nə̈ lâme wûnsə̂ Jezü nə̂. Andjë ê lakə̂ to pö ndə̂ yê kulə̂ agö nə̈ pä Jezü kä tchâtə, ânyë a nə̂ la a-earə̂ tə̂kömbô sə̈ tchë.

³⁶ Andjë dɨ̂ tchə̂lə̂ ma andjê sə̈ tchë ndə̂kə̂ pa tche gbotə̂ andjê, andjë grʉ̂ kütû mbämbä ma lə̂ba ndə̂ yê! Azü gbɛ̂ ndə̂ andjë grʉ̂ rə̂, andjë tchâ-ê.