Matiyə̈ 10 - Mbëtï Ndjapä: TÄFO MADƗ̈

Abadjângele lə̂ könô gbɛ̂ tchə̂pânə̈ bïchuû

¹ La tchêngbâ nə̈ Jezü ê adjisîpili ndə̂ yê lə̂ könô gbɛ̂ tchêpâ nə̈ bïchuû. Tche zâ gbôgbô sə̈ andjê ndə̂kə̂ gro angbongbo atchozö, ndə̂kə̂ tcha a-earə̂ tə̂kömbô, la azü ndə̂ andjë ngêwele.

² Rə̈ abadjângele lə̂ könô gbɛ̂ tchêpâ nə̈ bïchuû lâme wä kâkë: Dokʉ̈ nə̈ də̈ Chemön, ndə̂ a ê rə̂ tə̂ yê pä Pîêre, la yîngâ yê Anderë; Jâke la yîngâ yê Jâan amodô ndə̂ Zebede;

³ Fïlîpe la Bartelemï; Tomä la Matiyə̈ ndə̂ tche wâtə̂ earə̂ kə̂ pala makətche-lapöo; Jâke modô ndə̂ Alefë la Tadë;

⁴ Chemön akrə gö ndə̂ Kanän, la Jüdâse Ïsïkärïyôte earə̂ kə̂ yosə̂ Jezü.

Jezü wän adjisîpili ndə̂ yê lə̂ könô gbɛ̂ tchə̂pânə̈ bïchuû

⁵ Jezü wän adjisîpili ndə̂ yê lə̂ könô gbɛ̂ tchə̂pânə̈ bïchuû lə̂ gö nə̈. Tche zâma sə̈ andjê päkëdə̂: «Nyë ëäbô ê bhândə̂ azü ndə̂ andjë wâbô wâtə̂ ajuîfu-î. Nyë lïäbô lî lə̂ ngâ gö ndə̂ Samarï-ê.

⁶ Äwäpä nyë e pu azü ndə̂ Isarayële ndə̂ andjë wâ batə̂ aɛ̈bro-ngbaga ndə̂ andjë yû.

⁷ Nyë âsə̈ e, nyë mü Tchôtchô Pö sə̈ azü päkëdə̂: ‹Kə̂ mbo kümändëmä ndə̂ Ndjapä pâ nyê ndô nə̂.›

⁸ Nyë tchä a-earə̂ tə̂kömbô, kə̂ jo akuzü, kə̂ tcha a-earə̂ broma, kə̂ gro angbongbo atchozö. Ndjapä kʉ̈ rə̂ sə̈ nyê ämbämbänə̈, nyë kʉ̈ rə̂ sə̈ azü ämbämbänə̈.

⁹ Nyë zäbô lôlo zâ, âdəndjë wɛ̂n ndə̂ a mbo rə̂ la makətche, âdəndjë mîɛ̈-makətche lə̂ kədjâ tə̂ nyê-ê.

¹⁰ Nyë zäbô kədjâ zâ ndə̂kə̂ nə la rə̂-ê, âdəndjë lə̂ba bïchuû, âdəndjë dakpo âdəndjë tchongbôlô, bëte earə̂ kua wä ndə̂kə̂ gbo kɨ̈zɨ̂ ma yê.

¹¹ «Âdə nyë âli lə̂ gö âdəndjë yɛ̈yɛ̈ gö, nyë yü tchô ndə̂kə̂ wunsə̂ nə̈ pä tchabâ kä ndə̂ a to tchê tchôtchô pö ndə̂ yê ndə̂kə̂ pa tche kʉ nyê bhândə̂ yê, ânyë nyê sə tchâalê ndə̂ yê nə̈ zoo tə̂ lo kə̂ ro ndə̂ nyê.

¹² Âdə nyë âli lə̂ ngâ nda, nyë tö rə̂ sə̈ azü nda nə̈ päkëdə̂: ‹Zɨtɨ su wä pâ nyê.›

¹³ Âdə azü nda nə̈ âkʉ nyê, äwäpä zɨtɨ su ndə̂ nyë nə̂ la rə̂ wa pâ andjê. Âdə rə̂ ndə̂ azü nda nə̈ kôsə̂ kə̂ kʉ nyê, zɨtɨ su ndə̂ nyë nə̂ la rə̂ lâme, âdotə̂ yê pu nyê.

¹⁴ Âdə nyë âwutu lə̂ ngâ nda, âdəndjë lə̂ ngâ gö ânyë a kôsə̂ kə̂ kʉ nyê, âdəndjë rə̂ ndə̂ andjë kôsə̂ kə̂ dje pö ma nyê, äwäpä nyë gbo tchâme kə̂ ro etə̂. Nyë âsə̈ ro, nyë gʉ̈gʉ cho tchâda nyê.

¹⁵ Ɛn-ɛn, tə̂ lëge nə̈ më tö rə̂ sə̈ nyê: Lo nə̈ ndə̂ Ndjapä wa ngbanga pâ azü, ngbanga ndə̂ a wadje rə̂ pâ azü gö ndə̂ Sodômo la Gomôro âwatə̂ mömö nə̈ tə̂ andə̂ azü gö lâme.»

Yûkü ndə̂ adjisîpili wun-adje rə̂

¹⁶ «Nyë djë mê! Më wän nyê batə̂ aɛ̈bro-ngbaga lə̂ gûtə̂ amûrûndjâ. Äwäpä la nyê gbo batə̂ andə̂ aɛ̈krʉ̂, nyë wä batə̂ apuli ndə̂ andjë mboabô gbôgbô mbô tə̂ azü-î.

¹⁷ Äwäpä la nyê gbo-ê, bëte azü â-eadje la nyê tchâtchu agbölö a-earə̂ kə̂ wa ngbanga, andjê bhiadje nyê la föröngbö lə̂ anda kə̂ voga Ndjapä ndə̂ andjê.

¹⁸ A â-eadje la nyê ku tchâtchu akömändâ la agbïɛ̈ bëte mê, ndə̂kə̂ pa nyë to pö ndə̂ rə ndə̂ nyë wûnsə̂ nə̈ pâ mê sə̈ andjê, ndjë la azü ndə̂ andjë wâbô wâtə̂ ajuîfu-î.

¹⁹ Âdə andjê âe la nyê atə̂lə̂ ngbanga, nyë dɨ̈äbô su nyê dɨ̂ pâ känyï ndə̂kə̂ to pö ndə̂ nyê, âdəndjë pö ndə̂ nyë wâ ndə̂kə̂ to rə̂-ê. Apö ndə̂ nyë wâ ndə̂kə̂ to rə̂, a âzadje rə̂ sə̈ nyê kpôtə̂ lo nə̈ lâme.

²⁰ Bëte âdə̂âbo nyënyê kä ndə̂ âtoadje pö nə̈-a. Yingö ndə̂ Bha nyê Ndjapä kä ndə̂ âpoadje lə̂ nyê.

²¹ Ngâ yîngâ yoadje sə̂ yîngâ yê ndə̂kə̂ pa a won tchë, bha mboadje ndjë tâ käko tə̂ bechë ndə̂ yê. Abechë âadje lafô tə̂ arabha andjê la araanyï andjê, kə̂ mbo rə̂ ndə̂kə̂ pa a wa ngbanga kuzü lə̂ küma andjê.

²² Azü gbɛ̂ koadje sə̂ nyê bëte rə̈ mê. Praâbalë akrə ndə̂ tche rʉ̂âtə̂ su yê ndjoa ëtə̂ manə̈ tchê tchadje lə̂ kuzü.

²³ Âdə azü âmbo nyê la gbôgbô lə̂ ngâ gö, äwäpä nyë kpe atə̂lə̂ ngâ gö ngbî. Ɛn-ɛn, tə̂ lëge nə̈ më tö rə̂ sə̈ nyê: Dokʉ̈tchê ndə̂kə̂ pa Modô ndə̂ Akrə kangbâ yê, nyê kabô ndjë kua ndə̂ nyê lə̂ gö ndə̂ Isarayële gbɛ̂ tee-a.

²⁴ «Djisîpili rôâbo earə̂ kə̂ nyisə̂ rə sə̈ tchë-a, ânyë earə̂ kua rôâbo ndjë gbölö akrə ndə̂ yê-a.

²⁵ Äwäpä djisîpili wa batə̂ earə̂ kə̂ nyisə̂ rə sə̈ tchë, ânyë earə̂ kua wa ndjë batə̂ gbölö akrə ndə̂ yê. Batə̂ rə̂ ndə̂ andjë e earə̂ nda pä Bëlëzëbûlu, andjê âto angbongbo pö tə̂ gbölösə̂nə̈ tə̂ azü tchâalê ndə̂ yê nə̈ atöko!»

Nyë kpë wa Ndjapä

²⁶ «Nyë mböäbô wa azü mbô-ê. Rə gbɛ̂ ndə̂ âwâ lə̂ küwû nə̈, ârə̂ âwutuadje ësûwu. Rə ndə̂ a wûn-âbô sə̂nə̈ wûn-î, a âwun-adje sə̂nə̈.

²⁷ Pö ndə̂ më tô rə̂ sə̈ nyê lə̂ bübü tchô, äwäpä nyë to rə̂ la tchêdalo. Pö ndə̂ a tô kütû rə̂ bhâlə̂ tü nyê, nyë mü rə̂ bhâlə̂ küma ginda.

²⁸ Nyë mböäbô wa azü ndə̂ andjë won tə̂ azü lâme mbô-ê, praâbalë andjë wâbo ndə̂kə̂ won vrö-a, nyë kpë wa Ndjapä ndə̂ tche wâ ndə̂kə̂ won vrö la tə̂ nyê bhâlə̂ wo ndə̂ âju pïï etə̂.

²⁹ A kâbo ayɛ̈yɛ̈ anyïɛ̈nə̈ bïchuû bëte mîɛ̈-makətche balë? Âdə Ndjapä Bha nyê ânyiabô nyîndə̂ nə̈, ngâ nyïɛ̈nə̈ balë lə̂ gûtə̂ andjê wâbo ndə̂kə̂ te bêche-a.

³⁰ Andə̂ nye nə̈, Ndjapä dɨ̂ su küma nyê nə̂ gbɛ̂.

³¹ Nyë mböäbô wa mbô-ê; nyë rö ayɛ̈yɛ̈ anyïɛ̈nə̈ lâme tə̂ gbölösə̂nə̈.»

Kə̂ gamba pö ndə̂ Jezü lə̂ la azü gbɛ̂

³² «Akrə ndə̂ tchê toadje rə̂ tchâtchu azü gbɛ̂ pä anyë wätə̂ tchandə̂ me nə̈, mê toadje ndjë rə̂ tchâtchu Bha mê bhâ lafô pä tche wätə̂ tchandə̂ me nə̈.

³³ Praâbalë akrə ndə̂ tche vûsə̂ mê tchâtchu azü gbɛ̂, mëmê ndjë gbɛ̂, mê vuadje ndjë sə̂ yê tchâtchu Bha mê ndə̂ tche sə̂ bhâ lafô.»

Jezü nə̂âbo la zɨtɨ su-a, praâbalë tchë nə̈ la kʉ̈ʉ̈

³⁴ «Nyë wüntî pä më nə̈ la zɨtɨ su pâ cho âtə? Âdə̂âbo käko-a. Më nə̂âbo la zɨtɨ su-a, praâbalë më nə̈ la kʉ̈ʉ̈.

³⁵ Më nə̈ ndə̂kə̂ krʉ tchə̂lə̂ bechë-ɛ̈köchë la bha nə̈, ndə̂kə̂ krʉ tchə̂lə̂ bechë-ɛ̈chë la anyï nə̈, ndə̂kə̂ krʉ tchə̂lə̂ nyinə̂ la anyï köchë nə̈.

³⁶ Kütû azü nda ndə̂ ngâ akrə kä ndə̂ âwatə̂ a-earə̂ kə̂ kosə̂ yê.

³⁷ Akrə ndə̂ tche nyîndə̂ bha nə̈ âdəndjë anyï nə̈ ârô mê, tche wâbo ndə̂kə̂ watə̂ djisîpili ndə̂ mê-a. Akrə ndə̂ tche nyîndə̂ modô ndə̂ yê âdəndjë ɛ̈wünrə ndə̂ yê ârô mê, tche wâbo ndə̂kə̂ watə̂ djisîpili ndə̂ mê-a.

³⁸ Akrə balë balë gbɛ̂ ndə̂ tche zâbô yö ndə̂ gba ndə̂ yê zâ, ânyë kə̈ nə̂âbô nə̂ ngbâ mê-ê, tchê wabô tə̂ djisîpili ndə̂ mê tee-a.

³⁹ Akrə ndə̂ tche nyîndə̂ kə̂ tcha tchîsûwu ndə̂ yê la tə̂ yê, âyuadje tə̂ yê. Akrə ndə̂ tchîsûwu ndə̂ yê yû bëte mê, tchê gboadje rə̂.»

Akrə ndə̂ tche mbô rə̂ la nyê, dëkë tche mbö rə̂ la mê

⁴⁰ «Akrə ndə̂ tche mbô rə̂ la nyê, dëkë tche mbö rə̂ la mê. Akrə ndə̂ tche mbô rə̂ la mê dëkë tche mbö rə̂ la akrə ndə̂ tche wân mê.

⁴¹ Akrə ndə̂ tche mbô rə̂ la ngâ earə̂ ndə̂ma Ndjapä bëte rə̂ ndə̂ tche wâtə̂ earə̂ ndə̂ma Ndjapä, tchê gboadje tchôtchô rə ndə̂ earə̂ ndə̂ma Ndjapä gbo rə̂. Akrə ndə̂ tche mbô rə̂ la ngâ djîrə̂ akrə bëte rə̂ ndə̂ tche wâtə̂ djîrə̂ akrə, tchê gboadje tchôtchô rə ndə̂ djîrə̂ akrə gbo rə̂.

⁴² Ɛn-ɛn, tə̂ lëge nə̈ më tö rə̂ sə̈ nyê: Akrə ndə̂ tche zâ ngâ kangûchi zɨtɨ ngû ndə̂kə̂ ndjo rə̂ sə̈ ngâ mbämbä akrə balë bëte rə̂ ndə̂ tche wâtə̂ djisîpili ndə̂ mê, tchê gboadje tchôtchô rə ngbânə̈.»