Mâreke 7 - Mbëtï Ndjapä: TÄFO MADƗ̈Kə̂ mbo rə gundə̂sə̂ ndïɛ̈ ndə̂ araâta ( Mat 15.1-9 ) 1 Afarizïɛ̈n la angâ a-earə̂ kə̂ nyisə̂ ndïɛ̈ ndə̂ andjë tô bhâ Jerûzalêmo ânyë kə̈ nə̂, andjë pâlatə̂ andjê ndrotə̂ Jezü. 2 Andjë yû Jezü päkëdə̂: Bëte giamâ kä ndə̂ adjisîpili ndə̂ zə̈ mbôâbô rə mbô gundə̂sə̂ ndïɛ̈ ndə̂ araâta ânyë kə̂ djûtuabô könô andjê djûtu dokʉ̈tchê âkə̂ zɨ rə? 3 Bëte afarizïɛ̈n la ajuîfu gbɛ̂ kä lakə̂ bata ndïɛ̈ ndə̂ araâta andjê. Dokʉ̈tchê ndə̂kə̂ pa andjë zɨ rə, andjë djütu könô andjê djîrə̂ ânyë. 4 Âdə andjê âto bhâlə̂ kâpä ndə̂kə̂ gu atə̂lə̂ manda, andjë djütu kʉ̂tê andjê dokʉ̈tchê ânyë kə̂ zɨ rə. Andjë bäta angâ andïɛ̈ tə̂ gbölösə̂nə̈: Andïɛ̈ lə̂ köbosə̂ kə̂ djutu akangûchi, alüsû la akalângʉ [la akʉ̈ngrʉ]. 5 Afarizïɛ̈n la a-earə̂ kə̂ nyisə̂ ndïɛ̈ yû Jezü päkëdə̂: «Bëte giamâ kä ndə̂ adjisîpili ndə̂ zə̈ mbôâbô rə mbô gundə̂sə̂ ndïɛ̈ ndə̂ araâta ânyë kə̂ zɨ rə la kâkpö könô andjê âtə?» 6 Jezü tô rə̂ ndə̂nə̈ sə̈ andjê päkëdə̂: «Nyënyê ndə̂ pö ma nyê wâ ngbî tə̂kə̂ mbo rə ndə̂ nyê âtə, ndə̂ma Ndjapä ndə̂ Ezayï tô rə̂ pâ nyê alême âmbô gundə̂sə̂ nə̈ nə̂, a mbö rə̂ lə̂ mbëtï päkëdə̂: ‹Azü gö âtə lüsə̂ mê kütû lə̂ ma andjê, praâbalë su andjê wätə̂ mê ngrɨ̈. 7 Voga ndə̂ andjë voga mê la rə̂, wä ämbänə̈, bëte andïɛ̈ ndə̂ andjë nyisə̂ nə̈, də̈ kütû andïɛ̈ ndə̂ azü mbô rə̂.›» 8 Jezü kä tô rə̂ sə̈ andjê päkëdə̂: «Nyë gbötə̂ ndïɛ̈ ndə̂ Ndjapä ndə̂kə̂ mbo rə gundə̂sə̂ ndïɛ̈ ndə̂ araâta nyê.» 9 Tche kä tô rə̂ sə̈ andjê päkëdə̂: «Nyë rɨ̈ ndə̂kə̂ kosə̂ ndïɛ̈ ndə̂ Ndjapä ndə̂kə̂ mbo rə lə̂ köbosə̂ ndïɛ̈ ndə̂ araâta nyê! 10 Bëte Möyîze tö rə̂ päkëdə̂: ‹Amö lusə̂ bha la anyï zə̈!› Tche kâ tô rə̂ sə̈ andjê päkëdə̂: ‹Akrə ndə̂ tche tô ngbongbo pö tə̂ bha la anyï nə̈, äwäpä a won tchë-ê.› 11 Praâbalë andə̂ nye nə̈, nyë tö rə̂ päkëdə̂: Âdə ngâ akrə âto rə̂ sə̈ bha nə̈ âdəndjë anyï nə̈ päkëdə̂: ‹Më nyï âme ndə̂kə̂ za rə sə̈ mö, praâbalë rə nə̈ lâme wâtə̂ Korobän nə̂› ndə̂ ânyîndə̂ kə̂ to rə̂ pä ‹rə lâme a zä rə̂ ngbî bëte Ndjapä›, 12 käko nyë zä köbo sə̈ tchë ndə̂kə̂ mbo bata ngâ rə mbô balë tə̂ bha âdəndjë anyï nə̈-ê. 13 Nyë wrʉ̈ pö Ndjapä lə̂ köbosə̂ andïɛ̈ ndə̂ nyê nyisə̂ nə̈ lə̂ gbâtə̂ nyê. Angbängbä kə̂ mbo rə ndə̂ nyê wä ndjë batə̂ anə̈ âtə.» Arə ndə̂ âmbo rə̂ pä akrə wa la kâkpö ( Mat 15.10-20 ) 14 La tchêngbâ nə̈ Jezü kä ê kpûlû azü nə̈ kə̈ tô rə̂ sə̈ andjê päkëdə̂: «Nyënyê gbɛ̂ nyë djê mê, kə̂ dje tchə̂lə̂ pö ndə̂ mê to rə̂ âtə djîrə̂. 15 Rə ndə̂ âto də sûwu ânyë kə̂ li atə̂lə̂ akrə mbôâbo rə̂ pä tche wa la kâkpö-a, praâbalë rə ndə̂ âto bhâlə̂ akrə ânyë kə̂ wutu kä âkə̂ mbo rə̂ pä tche wa la kâkpö. [ 16 Âdə ngâ akrə âwa la tü ndə̂kə̂ dje pö, äwäpä tche dje rə̂!]» 17 Ndə̂ Jezü gbôtə̂ kpûlû azü nə̈ ânyë kə̈ kâ atə̂lə̂ manda, adjisîpili ndə̂ yê yû tchë tə̂ dju ndoka lâme. 18 Tche tô rə̂ sə̈ andjê päkëdə̂: «Nyënyê ndjë gbɛ̂ nyë wûn-âbo sə̂ rə? Nyë wûn-âbo sə̂nə̈ pä ngâ rə balë ndə̂ âto də sûwu ânyë kə̂ li atə̂lə̂ akrə mbôâbo rə̂ pä akrə nə̈ wa la kâkpö-a. 19 Bëte rə nə̈ lâme lîâbo atə̂lə̂ su yê-a, praâbalë älï atə̂lə̂ yê dokʉ̈tchê, pânə̈ âwutu kə̂ e atə̂lə̂ güsü.» Jezü tö pö lâme käko ndə̂kə̂ nyisə̂ nə̈ pä akɨ̈zɨ̂ gbɛ̂ wätə̂ tchôtchô nə̈. 20 Tche kä tô rə̂ päkëdə̂: «Rə ndə̂ âwutu lə̂ akrə kä ndə̂ âmbo rə̂ pä tche wa la kâkpö. 21 Bëte angbongbo kə̂ rɨ tchə̂lə̂ tö dələ̂ su azü ânyë kə̂ mbo rə̂ pä andjë pu aɛ̈chë âdəndjë aköchë katchôgbɛ̂, kə̂ zɨ ngbä, kə̂ won akrə, 22 kə̂ pu ɛ̈chë âdəndjë köchë ndə̂ ngâ akrə, kə̂ mbo gʉ arə tə̂ gbölösə̂nə̈, ngbongbo su, kə̂ bolo akrə, kə̂ mbo rə ndə̂ âwâbô wâ lə̂ köbo nə̈, kə̂ wa la gbölö su, kə̂ to ngbongbo pö tə̂ akrə, kə̂ bhi gogo, kə̂ wa ngbɨ̈lə̈. 23 Angbongbo rə lâme gbɛ̂ tö bhâlə̂ akrə ânyë kə̂ mbo rə̂ pä tche wa la kâkpö.» Ngâ ɛ̈chë ndə̂ tche wâbô wâtə̂ juîfu zä su yê sə̈ Jezü 24 La tchêngbâ nə̈ Jezü alafô tchâme kə̈ rô atə̂pâ cho ndə̂ Tîre. Tche lî bhâlə̂ ngâ nda ânyë kə̈ nyîndə̂ nə̈ pä azü wun-abô sə̂ anyê wûn-î, praâbalë tche zâtə̂ yê wü tʉrʉ-ê. 25 Ngâ ɛ̈chë ndə̂ ɛ̈wünrə ndə̂ yê wâ la ngbongbo tchozö djê pö ndə̂ Jezü, tche nə̂ gasa kə̈ gʉ̂te tchâtchâ yê. 26 Dëkë ɛ̈chë lâme wâbo tə̂ juîfu-a; a zɨ̈ tchë bhâ Fenisï pâ cho ndə̂ Sirï. Tche yûkû nə̈ sə̈ Jezü ndə̂kə̂ gro ngbongbo tchozö nə̈ ngrɨ̈ tə̂ ɛ̈wünrə ndə̂ yê. 27 Praâbalë Jezü tô rə̂ sə̈ tchë päkëdə̂: «Gbotə̂ abechë andjë zɨ kɨ̈zɨ̂ tchə̂lə̂ andjê sɨ dokʉ̈tchê ânyë, bëte âwâbo la köbo nə̈ ndə̂kə̂ za kɨ̈zɨ̂ ndə̂ abechë kə̂ yi rə̂ sə̈ akûtchïɛ̈ ɛ̈vrô-a.» 28 Ɛ̈chë nə̈ tô rə̂ ndə̂nə̈ sə̈ tchë päkëdə̂: «Lëge pö kä, Gbölö Gbïɛ̈! Praâbalë akûtchïɛ̈ ɛ̈vrô ndə̂ andjë sə tchâtchâ azü tə̂ ma kɨ̈zɨ̂, andjë zɨ̈ akʉzro kɨ̈zɨ̂ ndə̂ âtu tchânə̂ abechë.» 29 Jezü tô rə̂ sə̈ tchë päkëdə̂: «Lə̂ köbosə̂ pö ndə̂ mo tô rə̂ lâme, ngbongbo tchozö nə̈ wûtu lə̂ bechë ndə̂ zə̈ nə̈ nə̂, amö gûgü.» 30 Ndə̂ tche wûtu bhâ tchâalê ndə̂ yê, kə̈ gbô bechë nə̈ ndə̂ tche lô pâ kʉ̈ngrʉ, dëkë ngbongbo tchozö nə̈ wûtu lə̂ yê nə̂. Jezü tchä ngâ mangbɨ̈lə̈ 31 Jezü âlafô pâ cho ndə̂ Tîre, kə̈ rô lə̂ gö ndə̂ Sidön, kə̈ kâ pu gbölö kpakpa ngû ndə̂ Galilë. Tche rô lə̂ agö lə̂ könô gbɛ̂. 32 Angâ azü zâ ngâ köchë ndə̂ tü yê bê, ndə̂ tche pôâbô pô djîrə̂, kə̈ nə̂ la tchë sə̈ Jezü. Andjë dɨ̂ tchə̂lə̂ ma andjê sə̈ tchë ndə̂kə̂ pa tche to könô yê pâ küma yê. 33 Käko Jezü zâ tchë la kütû yê, kə̈ rô la tchë ngrɨ̈ tə̂ azü nə̈. Tche yî aɛ̈nə̈ könô yê lə̂ atü köchë nə̈, kə̈ kû ngrʉ̂srö ânyë kə̂ grʉ̂ tïmï köchë nə̈ la rə̂. 34 La tchêngbâ nə̈, tche kênga la yê atə̂ lafô, kə̈ wû foo, kə̈ tô rə̂ sə̈ köchë nə̈ päkëdə̂: «Efata», ndə̂ ânyîndə̂ kə̂ to rə̂ päkëdə̂: «Amö kro-ê!» 35 Kpro kâkë, atü yê krô-ê, rə ndə̂ âgʉ̂â tïmï yê mbrô-ê, ânyë tche sə̂ lakə̂ to pö la köbo nə̈. 36 Jezü zâma sə̈ andjê ndə̂kə̂ pa andjë toabô pö ndə̂nə̈ tô sə̂ ngâ akrə balë-ê. Praâbalë ndə̂ tche kôsə̂ nə̈ sə̈ andjê, andjë kä sə̂ lakə̂ mu rə̂ tə̂ gbölösə̂nə̈. 37 Tchə̂lə̂ küma andjê gbɛ̂ djîngɨli tə̂ gbölösə̂nə̈, ânyë andjë tô rə̂ päkëdə̂: «Arə gbɛ̂ ndə̂ tche mbô rə̂ wä kütû tə̂ tchôtchô nə̈! Tche mbö ndjë rə̂ pä azü ndə̂ tü andjê bê, andjë djê pö, ndjë amangbɨ̈lə̈ pô!» |
© Wycliffe Bible Translators, Inc.
Wycliffe Bible Translators, Inc.