Mâreke 4 - Mbëtï Ndjapä: TÄFO MADƗ̈

Ndoka pâ earə̂ kə̂ gɨ ndjî rəgʉ

¹ Jezü kä sə̂ lakə̂ nyisə̂ rə tə̂ maga gbölö kpakpa ngû ndə̂ Galilë. Gbölö kpûlû azü pâlatə̂ andjê ndrotə̂ yê, käko tche â, kə̈ sə̂ lə̂ külû ndə̂ âwâ la ngû, kpûlû azü nə̈ sə̂ andə̂ andjë nə̈ ëbêche tchâtchu gbölö kpakpa ngû ndə̂ Galilë.

² Tche nyîsə̂ arə sə̈ andjê tə̂ gbölösə̂nə̈ lə̂ köbosə̂ ndoka, kə̈ tô rə̂ sə̈ andjê lə̂kə̂ nyisə̂ rə ndə̂ yê nə̈ päkëdə̂:

³ «Nyë djë rə̂! Ngâ akrə wütu kə̈ ê atə̂lə̂ kɨ̈ndɨ̈ ndə̂kə̂ gɨ ndjî rəgʉ.

⁴ Ndə̂ tche âsə̈ gɨ andjî rəgʉ nə̈, angânə̈ tû bêche ndroma köbo, anyïɛ̈nə̈ nə̂ kə̈ dê rə̂ gbɛ̂.

⁵ Angânə̈ tü lə̂ cho ndə̂ âwâ la täme, cho wâbo sə̂ tchô nə̈ lâme tə̂ gbölösə̂nə̈-a. Andjî rəgʉ nə̈ kʉ̂ kə̈ kpô wândâ wändä, bëte cho nə̈ lîâbo-a.

⁶ Praâbalë ndə̂ lo âsə̈ ta tə̂ gbölösə̂nə̈, rəgʉ nə̈ hrô-ê, bëte chëchë nə̈ lîâbo atə̂lə̂ cho-a.

⁷ Angânə̈ tû lə̂ achi, achi nə̈ kpô kə̈ vû pânə̈, käko âwâbo ndə̂kə̂ le-a.

⁸ Angânə̈ tû lə̂ tchôtchô cho, âkʉ̂, kə̈ kʉ̂che ânyë kə̈ lê: Ngânə̈ lë tə̂ akrə gbɛ̂ la lə̂ könô gbɛ̂, ngânə̈ lê tə̂ azü vötaâ, ngânə̈ lê ngbangbo balë.»

⁹ Jezü tô rə̂ sə̈ andjê päkëdə̂: «Akrə ndə̂ tche wâ la tü, äwäpä tche dje pö âtə!»

Jezü tö pö la ndoka bëte giamâ?

¹⁰ Ndə̂ Jezü gîtə̂ yê bhâchï tə̂ azü nə̈, adjisîpili ndə̂ yê lə̂ könô gbɛ̂ tchêpâ nə̈ bïchuû la azü ndə̂ andjë sə̂ ndrotə̂ yê yû tchë tə̂ dju ndoka lâme.

¹¹ Tche tô rə̂ sə̈ andjê päkëdə̂: «Andə̂ nye nə̈, Ndjapä zä rə̂ sə̈ nyê ndə̂kə̂ wunsə̂ apö ndə̂ Gbölö gö-gbïɛ̈ ndə̂ Ndjapä ndə̂ âwâ lə̂ küwû nə̈, praâbalë andə̂ azü də sûwu, andjë djë andə̂ andjë nə̈ kütû lə̂ köbosə̂ andoka,

¹² ndə̂kə̂ pa: ‹Âdə andjê âsə̈ wun tchô kə̈ wûn-âbo rə-a, andjê âsə̈ dje pö, praâbalë kə̈ djêâbo tchə̂lə̂ nə̈-a, käko ânyë andjë doabô tə̂ andjê dô pu Ndjapä ânyë tche ko pö lə̂ küma andjê-ê.›»

Dju ndoka ndə̂ earə̂ kə̂ gɨ ndjî rəgʉ

¹³ Tche kâ tô rə̂ sə̈ andjê päkëdə̂: «Nyë djêâbo tchə̂lə̂ ndoka âtə? Käko nyë âdje tchə̂lə̂ adɨ̂ andoka nə̈ atöko?

¹⁴ Earə̂ kə̂ gɨ ndjî rəgʉ nə̈ wä batə̂ earə̂ kə̂ mu pö Ndjapä.

¹⁵ Andjanə̈ ndə̂ andjë wâ batə̂ ndjî nə̈ ndə̂ âtû ndroma köbo, də̈ andjanə̈ ndə̂ a lû pö nə̈ lə̂ su andjê, praâbalë ndə̂ andjë djê pö nə̈, Satäa nə̂ kə̈ krʉ̂a pö nə̈ ndə̂ a lû rə̂ lə̂ su andjê.

¹⁶ Âdə andə̂ angâ azü nə̈, andjë wä batə̂ andjî nə̈ ndə̂ âtû lə̂ cho ndə̂ âwâ la täme, ndə̂ andjê âsə̈ dje pö nə̈, kə̈ gâmba rə̂ gasa la mômô,

¹⁷ praâbalë pö nə̈ mbôâbo chëchë yê lə̂ andjê-a, andjë kpôkpoabô tə̂ andjê-a, âdə arə nyonyo la yûkü âgbo andjê bëte pö Ndjapä, andjë gbotə̂ köbo nə̈-ê.

¹⁸ Angâ azü nə̈ wä batə̂ andjî nə̈ ndə̂ âtû lə̂ cho ndə̂ âwâ lə̂ achi: Andjë də̈ azü ndə̂ andjë djê pö nə̈,

¹⁹ praâbalë kə̂ dɨ su andjê tə̂ arə tchêbêche, kə̂ gbo rə ndə̂ âbolo azü, la agʉ arə gbɛ̂ ndə̂ âlî lə̂ su andjê, âkîtə̂ köbo pö nə̈ tə̂ su andjê ndə̂kə̂ le.

²⁰ Angânə̈ wä batə̂ andjî nə̈ ndə̂ âtû lə̂ tchôtchô cho: Andjë də̈ andjanə̈ ndə̂ andjë djê pö nə̈ kə̈ gâmba rə̂ la su andjê ânyë kə̈ lê. Ngânə̈ lë tə̂ akrə gbɛ̂ la lə̂ könô gbɛ̂, ngânə̈ lê tə̂ azü vötaâ, ngânə̈ lê ngbangbo balë.»

Ndoka pâ lâmba

²¹ Jezü kâ tô rə̂ sə̈ andjê päkëdə̂: «Akrə tö wo lə̂ lâmba ndə̂kə̂ za rə̂ tchâtchâ lüsû âdəndjë kʉ̈ngrʉ? Tchê zabô ndjë rə̂ tee pâ ngâ rə lafô?

²² Bëte rə gbɛ̂ ndə̂ âwâ lə̂ küwû nə̈, âwutuadje tchâtchu azü ësûwu, rə gbɛ̂ ndə̂ a zâ rə̂ wü, âwutuadje lə̂ ngbänga.

²³ Âdə ngâ akrə âwa la tü ndə̂kə̂ dje pö la rə̂, äwäpä tche dje pö âtə!»

²⁴ Tche kä tô rə̂ sə̈ andjê päkëdə̂: «Nyë djë pö âtə djîrə̂! Rə ndə̂ nyê kʉ rə lə̂nə̈ sə̈ angâ nyê kä ndə̂ a kʉadje ndjë rə la rə̂ sə̈ nyê, a âkä kʉadje ngânə̈ ëpânə̈ sə̈ nyê.

²⁵ Bëte akrə ndə̂ tche wâ la ngâ rə, a âzadje ngânə̈ pânə̈ sə̈ tchë. Praâbalë akrə ndə̂ tche wâbô wâ la ngâ rə, a âkrʉadje ndjë kpîɛ̂kpîɛ̂ nə̈ ndə̂ tche wâ la rə̂.»

Ndoka pâ ndjî rəgʉ ndə̂ âkʉ̂ la tə̂ yê

²⁶ Jezü kâ tô rə̂ päkëdə̂: «Gbölö gö-gbïɛ̈ ndə̂ Ndjapä wä batə̂ ngâ akrə ndə̂ tche gɨ̂ ndjî rəgʉ:

²⁷ Ndə̂ tche lô âdəndjë rə̂ ndə̂ tche lôâbô lô-ê, tchêdalo la tchə̂lə̂ bütchî, ndjî rəgʉ nə̈ kʉ̂, ânyë kə̈ kʉ̂che, tche wûn-âbo sə̂ köbo ndə̂ ndjî rəgʉ nə̈ kʉ̂che la rə̂-a.

²⁸ Kütû cho la tə̂ yê kä âkə̂ mbo rə̂ pä rə nə̈ kʉche. Dokʉ̈tchê, da nə̈ kʉ̈che, la tchêngbâ nə̈ alêlê nə̈ wutu tâ, ânyë alêlê nə̈ gbro.

²⁹ Âdə ndjî rəgʉ nə̈ âdro nə̂, a gra rə̂ la kamba, bëte lo kə̂ gra rə̂ tâ tâ nə̂.»

Ndoka pâ ndjî yö ndə̂ a ê rə̂ tâ pä mütârede

³⁰ Jezü kä tô rə̂ päkëdə̂: «Giamâ kä âkə̈ kʉ̂tə̂ yê la Gbölö gö-gbïɛ̈ ndə̂ Ndjapä? Ndoka nə̈bâ kä ndə̂ azə̈ nyisə̂ nə̈ ta rə̂?

³¹ Gbölö gö-gbïɛ̈ ndə̂ Ndjapä wä batə̂ ngâ ndjî yö ndə̂ rə̈ nə̈ wû pä mütârede, ndə̂ a gɨ̂ rə̂ lə̂ cho, tche wätə̂ kpîɛ̂kpîɛ̂ ndjî rəgʉ tə̂ adɨ̂ andjî rəgʉ gbɛ̂.

³² Praâbalë ndə̂ a gɨ̂ rə̂, âkʉ̂che batə̂ gbölö yö kə̈ rô akʉ̈kʉ̂-gûsû gbɛ̂, amatö nə̈ gë tə̂ gbölösə̂nə̈, käko anyïɛ̈nə̈ tchêlafô mbô kʉmâ andjê tchâkrʉzrö nə̈.»

Kə̂ nyisə̂ rə la ndoka

³³ Lə̂ köbosə̂ angbängbä andoka käko kä ndə̂ tche nyisə̂ pö Ndjapä sə̈ andjê, ndə̂kə̂ pa andjë gbo köbo ndə̂kə̂ dje tchə̂lə̂ nə̈.

³⁴ Tche tö pö sə̈ andjê kütû la ndoka, praâbalë âdə tche âsə la kütû yê la adjisîpili ndə̂ yê, kə̂ nyisə̂ dju nə̈ gbɛ̂ sə̈ andjê.

Jezü hrö la gbölö yi

³⁵ La tchêndə̂gölo tə̂ lö nə̈ lâme, Jezü tô rə̂ sə̈ adjisîpili ndə̂ yê päkëdə̂: «Azə̈ zûzü atə̂ kalâ ngû.»

³⁶ Käko andjë gbô lə̂ kpûlû azü nə̈, kə̈ â lə̂ külû la Jezü ânyë kə̈ rô etə̂. Angâ akülû kä lakə̂ ro ndjë ndrotə̂ andjê.

³⁷ Ngâ gbölö yi âlafô lakə̂ mbo tə̂ gbölösə̂nə̈. Akpabe âlafô ânyë ngû sə̂ lakə̂ tu atə̂lə̂ külû nə̈ ânyë külû nə̈ ndô tə̂kə̂ sɨ-ê.

³⁸ Jezü sə̂ dəndə̂ dju külû nə̈ lakə̂ lo. Tche zä küma yê pâ ngâ kuali. Adjisîpili ndə̂ yê jô tchë, kə̈ tô rə̂ sə̈ tchë päkëdə̂: «Earə̂ kə̂ nyisə̂ rə, kuzü ndə̂ azə̈ tchu rə̂ âtə wä lə̂ la zə̈ ämbänə̈?»

³⁹ Jezü âlafô, kə̈ hrô la yi nə̈ la gbôgbô, kə̈ tô rə̂ sə̈ ngû nə̈ päkëdə̂: «Sə gii-ï! Kə̈ gbôtə̂ kə̂ mbo-ê!» Yi nə̈ krʉ̂-ê, tchô zɨ̂ tɨɨ.

⁴⁰ La tchêngbâ nə̈ Jezü tô rə̂ sə̈ adjisîpili ndə̂ yê päkëdə̂: «Wa mbö nyê bëte giamâ? Nyë zâbo su nyê sə̈ mê dämba?»

⁴¹ Praâbalë andjë gbɛ̂ sə̂ lakə̂ gugu la gbölö wa, ânyë kə̈ sə̂ lakə̂ to rə̂ lə̂ gbâtə̂ andjê päkëdə̂: «Köchë âtə də̈ tchabâ ânyë yi la gbölö ngû ngbro gbɛ̂ djê ndjë tchë âtə?»