Mâreke 16 - Mbëtï Ndjapä: TÄFO MADƗ̈

Kə̂ jo ndə̂ Jezü lə̂ kuzü

¹ Pâ lö sabäa, Malê, akrə gö ndə̂ Magadalä la Malê, anyï Jâke la Salomë, andjë yô akâdâ-yömbö, kə̈ ê la rə̂ ndə̂kə̂ mu rə̂ tə̂ krʉkrʉ Jezü.

² Gbô tchô po la mbatchâ lə̂ dɨmâche, aɛ̈chë nə̈ ê atə̂pâ cho Jezü.

³ Andjë sə̂ lakə̂ dɨ tchə̂lə̂ ma andjê päkëdə̂: «Tchabâ kä âkə̂ ro täme tə̂ ma kudû nə̈ sə̈ azə̂?»

⁴ Ndə̂ andjë âsə̈ wun tchô, andjë wûnsə̂ nə̈ pä täme ndə̂ âgê tə̂ gbölösə̂nə̈ lâme, a rô rə̂ nə̂ bhâchï.

⁵ Andjë lî bhâlə̂ kudû nə̈, kə̈ wûn ngâ bechë-ɛ̈köchë ndə̂ tche yû grôgrô lə̂ba ânyë kə̈ sə̂ də ndôkö, wawa mbô andjê gbɛ̂.

⁶ Bechë-ɛ̈köchë nə̈ tô rə̂ sə̈ andjê päkëdə̂: «Wawa mböäbô nyê mbô-ê, nyë pü Jezü akrə gö ndə̂ Näzärête, ndə̂ andjë wôn tchë tə̂ yö ndə̂ gba; tche jô lə̂ kuzü nə̂, tche sə̂âbo tchâtə-a, nyë wünsa tchô ndə̂ a zâ tchë tâ alême kä âtə.

⁷ Praâbalë nyë ë wândâ wändä kə̈ tô rə̂ sə̈ Pîêre la adjisîpili ndə̂ yê päkëdə̂: ‹Jezü rô dokʉ̈tchê tə̂ nyê nə̂, nyê wun-adje tchë bhâ Galilë batə̂ rə̂ ndə̂ tche tô rə̂ sə̈ nyê alême.›»

⁸ Andjë wûtu lə̂ cho kuzü nə̈, kə̈ kpê etə̂, bëte andjë sə̈ lakə̂ gûgû gügu, tchə̂lə̂ küma andjê gbɛ̂ djîngɨli. Andjë tôâbo pö ndə̂nə̈ sə̈ ngâ akrə balë-a, bëte andjë wä la wawa. [

Jezü mätə̂ yê sə̈ Malê akrə gö ndə̂ Magadalä

⁹ La tchêngbâ nə̈ ndə̂ Jezü jô lə̂ kuzü po mbatchâ lə̂ dɨmâche, tche wûtu dokʉ̈tchê ëtə̂ Malê ndə̂ gö ndə̂ Magadalä. Ɛ̈chë lâme kä ndə̂ tche grô angbongbo atchozö mïndûu manə̈ bïchuû lə̂ yê alême.

¹⁰ Malê ê kə̈ tô pö ndə̂nə̈ sə̈ azü ndə̂ andjë sə̂ ndrotə̂ yê alême, andjë sə̈ alême lə̂ nyonyo la kɨ̈.

¹¹ Praâbalë ndə̂ andjë djê rə̂ pä Jezü kä la tʉ̈rʉ̂ la yê, ânyë Malê wûn tchë, andjë gâmbabô rə̂-a.

Jezü mâtə̂ yê sə̈ adjisîpili bïchuû

¹² La tchêngbâ nə̈ Jezü dô tchə̂lə̂ tə̂ yê ngbî ânyë kə̈ mâtə̂ yê sə̈ angâ adjisîpili bïchuû ndə̂ andjë sə̂ pâ köbo ndə̂kə̂ e atə̂lə̂ yɛ̈yɛ̈ gö.

¹³ Andjë kâ kə̈ tô rə̂ sə̈ adɨ̂ adjisîpili nə̈, praâbalë andjë kä kôsə̂ kə̂ gamba pö ndə̂ adjisîpili lâme-ê.

Jezü mätə̂ yê sə̈ adɨ̂ adjisîpili ndə̂ yê

¹⁴ Pânə̈ gbɛ̂, Jezü mâtə̂ yê sə̈ adjisîpili lə̂ könô gbɛ̂ tchêpâ nə̈ balë, sə̂nə̈ ndə̂ andjë sə̂ lakə̂ zɨ kɨ̈zɨ̂. Jezü hrô la andjê päkëdə̂: «Nyë wä la gbôgbô su, kə̈ nyîâbo ndə̂kə̂ za su nyê sə̈ Ndjapä-a! Nyë gâmbabô pö ndə̂ andjanə̈ ndə̂ andjë wûn mê la tʉ̈rʉ̂ la mê ânyë kə̈ tô rə̂ sə̈ nyê-a.»

¹⁵ Pânə̈ Jezü tô rə̂ sə̈ adjisîpili ndə̂ yê päkëdə̂: «Nyë êë kupâ cho gbɛ̂, kə̈ mu Tchôtchô Pö ndə̂ mê sə̈ azü gbɛ̂.

¹⁶ Akrə ndə̂ tche zâ su yê sə̈ mê, ânyë kə̈ gbô batɛ̂me, tchê tchadje lə̂ kuzü. Praâbalë akrə ndə̂ tche kôsə̂ kə̂ za su yê sə̈ mê, a âwadje ngbanga kuzü lə̂ küma yê.

¹⁷ Asɨ̂nyî rə ndə̂ âzadje tchêngbâ andjanə̈ ndə̂ andjê zadje su andjê sə̈ mê wä kâkë: Andjê groadje angbongbo atchozö la rə̈ mê, kə̂ toadje pö la angâ atäfo ama gö.

¹⁸ Andjê kʉadje aɛ̈krʉ̂ la könô andjê, âdə andjê ândjo ngâ rə ndə̂ yö kə̂ won tchô wâ lə̂nə̈, âmboabô ngâ ngbongbo rə tə̂ andjê balë tee-a. Andjê toadje könô andjê pâ a-earə̂ tə̂kömbô ânyë andjê tchadje.»

Jezü kä atə̂ lafô

¹⁹ Pânə̈ ndə̂ Gbölö Gbïɛ̈ Jezü tô pö sə̈ andjê, a zâ tchë kə̈ kênga la tchë bhâ lafô ânyë tche sə̂ də ndôkö könô Ndjapä.

²⁰ Âdə andə̂ adjisîpili nə̈, andjê âe katchôgbɛ̂ lakə̂ mu Tchôtchô Pö. Gbölö Gbïɛ̈ zâ gbôgbô sə̈ andjê ndə̂kə̂ mbo rə̂ pä pö Ndjapä watə̂ lëge pö, lə̂ köbosə̂ akpɨ̈ngbɨ̈ rə ndə̂ âza tchêngbâ akua ndə̂ andjê.]