Mâreke 14 - Mbëtï Ndjapä: TÄFO MADƗ̈

Amakündji ndə̂ ajuîfu pü köbo ndə̂kə̂ won Jezü

¹ Lo kpülü ndə̂ Pâke la andə̂ mâpa ndə̂ djëvö wâbô wâ lə̂nə̈ wä ngbânə̈ lö bïchuû. Agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ sə̂ lakə̂ pu köbo la ngâ känyï ndə̂kə̂ za Jezü ânyë kə̂ won tchë.

² Bëte andjë tö rə̂ päkëdə̂: «Âwâbo pä azə̈ mbo rə̂ lə̂ lö kpülü-a, ânyë azü abô lafô â la pö lə̂ gbâtə̂ azü-î.»

Ngâ ɛ̈chë sü kâdâ-yömbö lə̂ küma Jezü

³ Jezü sə̈ bhâ Betanï lə̂ nda ndə̂ Chemön earə̂ broma. Sə̂nə̈ ndə̂ tche sə̂ ma kɨ̈zɨ̂, ngâ ɛ̈chë lî la ngâ ndütü ndə̂ a mbô rə̂ la täme ndə̂ rə̈ nə̈ wû pä älëbâtere ndə̂ tchôtchô kâdâ-yömbö ndə̂ gbölö ngîrî wâ lə̂nə̈. A mbö yömbö nə̈ la ngâ yö ndə̂ rə̈ nə̈ wû pä nâre. Tche kôâ ma ndütü nə̈, kə̈ sû kâdâ-yömbö nə̈ lə̂ küma Jezü.

⁴ Tchə̂lə̂ angâ azü ndə̂ a ê andjê ndə̂ kɨ̈zɨ̂ nə̈ kʉ̂ andjê, andjë tô rə̂ lə̂ gbâtə̂ andjê päkëdə̂: «A ndɨ̈ kâdâ-yömbö âtə kâkë bëte giamâ?

⁵ Äwä âme pa a ka kâdâ-yömbö lâme ngbâ mîɛ̈-makətche ngbangbo vötaâ, kə̂ kʉ makətche nə̈ sə̈ a-earə̂ yûkü!» Andjë sə̂ lakə̂ jende tchë tə̂ gbölösə̂nə̈.

⁶ Praâbalë Jezü tô rə̂ päkëdə̂: «Nyë gbötə̂ yê gii-ï. Bëte giamâ nyê ka küma yê? Rə ndə̂ tche mbô rə̂ tə̂ mê lâme wätə̂ tchôtchô rə.

⁷ Bëte a-earə̂ yûkü kä lə̂ gbâtə̂ nyê logbɛ̂, nyë wä ndə̂kə̂ mbo dâkâ tə̂ andjê logbɛ̂ batə̂ su nyê nyîndə̂ nə̈, praâbalë mëmê, më sə̂âbo lə̂ gbâtə̂ nyê logbɛ̂-a.

⁸ Tche mbö rə ndə̂ tche wâ ndə̂kə̂ mbo rə̂: Tche sü kâdâ-yömbö tə̂ mê dokʉ̈tchê ndə̂kə̂ krʉ bëte kə̂ chi mê.

⁹ Ɛn-ɛn, tə̂ lëge nə̈ më tö rə̂ sə̈ nyê: Sə̂ tchô gbɛ̂ ndə̂ a mu Tchôtchô Pö tâ pâ cho gbɛ̂, a âtoadje ndjë pö ndə̂ rə ndə̂ ɛ̈chë âtə mbô rə̂ lâme, ndə̂kə̂ pa sə̂ yê te lə̂ azü.»

Jüdâse nyïkrə rə̂ ndə̂kə̂ yosə̂ Jezü

¹⁰ Ngâ djisîpili balë lə̂ gûtə̂ andjê lə̂ könô gbɛ̂ tchêpâ nə̈ bïchuû ndə̂ rə̈ yê wû pä Jüdâse Ïsïkärïyôte ê bhândə̂ agbölö a-earə̂ kə̂ wa ngela sə̈ Ndjapä ndə̂kə̂ yosə̂ Jezü sə̈ andjê.

¹¹ Ndə̂ andjë djê pö nə̈, su andjê gbɛ̂ wâ la mômô ânyë andjë zâ bâlâ ndə̂kə̂ kʉ makətche sə̈ tchë, käko, tche pû ngâ tchôtchô köbo ndə̂kə̂ za tchë sə̈ andjê.

Jezü la adjisîpili ndə̂ yê zɨ̈ kɨ̈zɨ̂ Pâke

¹² Lə̂ dokʉ̈ lö ndə̂ kpülü ndə̂ mâpa ndə̂ djëvö wâbô wâ lə̂nə̈, ndə̂ azü wa ngela la angbavö ɛ̈bro-ngbaga bëte kpülü nə̈, adjisîpili ndə̂ Jezü tô rə̂ sə̈ tchë päkëdə̂: «Mo nyïndə̂ nə̈ pä ârâ e kə̂ nyikrə kɨ̈zɨ̂ Pâke nə̈ ndə̂kə̂ pa mo zɨ rə̂ bhâ tchêbâ?»

¹³ Tche wân angâ adjisîpili ndə̂ yê bïchuû kə̈ tô rə̂ sə̈ andjê päkëdə̂: «Nyë êë atə̂lə̂ gö nə̈; ngâ köchë ndə̂ tche zâ ngä ndə̂ ngû wâ lə̂nə̈ nəadje lə̂ köbo nyê, nyë zä tchêngbâ yê,

¹⁴ ânyë nda ndə̂ tchê liadje lə̂nə̈, nyë tö rə̂ sə̈ earə̂ nda nə̈ päkëdə̂: ‹Earə̂ kə̂ nyisə̂ rə tö rə̂ päkëdə̂: Tchə̂lə̂ darə nə̈bâ kä ndə̂ mê zɨ kɨ̈zɨ̂ Pâke tâ la adjisîpili ndə̂ mê?›

¹⁵ Tchê nyiadje sə̂ ngâ gbölö tchə̂lə̂ darə də lafô ndə̂ a nyîkrə tchə̂lə̂ nə̈ nə̂ gbɛ̂ tchêtchêtchê. Lə̂ tchô nə̈ lâme kä ndə̂ nyê nyikrə kɨ̈zɨ̂ nə̈ tâ bëte azə̂.»

¹⁶ Adjisîpili nə̈ ê atə̂lə̂ gö nə̈, kə̈ gbô rə nə̈ gbɛ̂ batə̂ rə̂ ndə̂ Jezü tô rə̂, ânyë kə̈ nyîkrə kɨ̈zɨ̂ Pâke nə̈.

¹⁷ La tchêndə̂gölo, Jezü wûtu la adjisîpili ndə̂ yê lə̂ könô gbɛ̂ tchêpâ nə̈ bïchuû.

¹⁸ Sə̂nə̈ ndə̂ andjë sə̂ ma kɨ̈zɨ̂ lakə̂ zɨ rə, Jezü tô rə̂ päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, ngânə̈ balë lə̂ gûtə̂ nyê ndə̂ mê zɨ̂ rə la tchë âtə yoadje sə̂ mê.»

¹⁹ Nyonyo mbô adjisîpili nə̈ ânyë andjë sə̂ lakə̂ yu Jezü la tchêngbâ angâ andjê päkëdə̂: «Mëmê kä?»

²⁰ Jezü tô rə̂ sə̈ andjê päkëdə̂: «Ngânə̈ balë lə̂ gûtə̂ nyê lə̂ könô gbɛ̂ tchêpâ nə̈ bïchuû ndə̂ më yî könô mê la tchë balë lə̂ kalângʉ kɨ̈zɨ̂ âtə kä.

²¹ Tə̂ lëge nə̈, Modô ndə̂ akrə tchuadje batə̂ rə̂ ndə̂ a mbô rə̂ lə̂ Mbëtï Ndjapä pâ yê. Praâbalë nyonyo kä tə̂ akrə ndə̂ tche yôsə̂ Modô ndə̂ Akrə! Äkʉ̈sə̂ nə̈ pä akrə käko, a zɨabô tchë zɨ̂-î.»

Kɨ̈zɨ̂ ndə̂ Gbölö Gbïɛ̈

²² Ndə̂ andjë sə̂ lakə̂ zɨ kɨ̈zɨ̂, Jezü zâ mâpa kə̈ ê tchôtchô pö pânə̈, kə̂ tchô tchə̂lə̂ nə̈ ânyë kə̈ zä rə̂ sə̈ andjê, lakə̂ to rə̂ päkëdə̂: «Nyë zä rə̂, mâpa âtə də̈ tə̂ mê.»

²³ Pânə̈ tche zâ kangûchi vɛ̂n-ɛn, kə̈ zâ ayîabâ sə̈ Ndjapä, kə̈ zâ rə̂ sə̈ andjê ânyë andjë gbɛ̂ ndjô rə̂.

²⁴ Käko tche tô rə̂ sə̈ andjê päkëdə̂: «Kangûchi vɛ̂n-ɛn âtə də̈ jï mê, jï madɨ̈ ndə̂ âtû bëte angbängbä azü.

²⁵ Ɛn-ɛn, tə̂ lëge nə̈ më tö rə̂ sə̈ nyê, mê kä ndjo bata vɛ̂n-ɛn balë tee-a, ndjoa tə̂ lo nə̈ ndə̂ mê kä ndjo rə̂ tə̂ täfo nə̈ bhâlə̂ Gbölö gö-gbïɛ̈ ndə̂ Ndjapä.»

Jezü tö rə̂ pä Pîêre vuadje sə̂ anyê

²⁶ Pânə̈ ndə̂ andjë pâ düwü ndə̂kə̂ voga Ndjapä, andjë ê âtə̂lə̂ küma aga ndə̂ a-Olivï.

²⁷ Jezü tô rə̂ sə̈ adjisîpili ndə̂ yê päkëdə̂: «Nyê gboadje tə̂ mê gbɛ̂, bëte Mbëtï Ndjapä tö rə̂ päkëdə̂: ‹Mê won-adje earə̂ kə̂ bata aɛ̈bro-ngbaga, ânyë aɛ̈bro-ngbaga nə̈ wrʉrʉadje tchə̂lə̂ tə̂ andjê katchôgbɛ̂›.

²⁸ Praâbalë âdə më âjo lə̂ kuzü nə̂, mê eadje dokʉ̈tchê tə̂ nyê atə̂ Galilë.»

²⁹ Pîêre tô rə̂ sə̈ tchë päkëdə̂: «Âdə azü gbɛ̂ âgbotə̂ zə̈, praâbalë âdəabô mê-a.»

³⁰ Jezü tô rə̂ ndə̂nə̈ sə̈ tchë päkëdə̂: «Ɛn-ɛn, tə̂ lëge nə̈ më tö rə̂ sə̈ mö, angêta, lə̂ bütchî âtə, dokʉ̈tchê ndə̂kə̂ pa kö ngötö kɨ sûsunə̈ bïchuû mô vuadje sə̂ mê sûsunə̈ vötaâ.»

³¹ Praâbalë Pîêre dâcho pâ pö lâme ânyë kə̈ tô rə̂ päkëdə̂: «Âdə ârə̂ âwa ndə̂kə̂ pa më tchu la mö, mê vuabô sə̂ zə̈ balë tee-a.» Adɨ̂ nə̈ gbɛ̂ tô ndjë rə̂ käko.

Jezü tö pö sə̈ Ndjapä bhâ Jetesemanë

³² Pânə̈ andjë wûtu bhâsə̂ ngâ tchô ndə̂ rə̈ nə̈ wû pä Jetesemanë, ânyë Jezü tô rə̂ sə̈ adjisîpili ndə̂ yê päkëdə̂: «Nyë sə̈ tchâtə, mê âe ndə̂kə̂ to pö sə̈ Ndjapä.»

³³ Tche zâ Pîêre la Jâke la Jâan potə̂ yê. Wawa la nyonyo jêtə̂ kə̂ mbo tchë.

³⁴ Tche tô rə̂ sə̈ andjê päkëdə̂: «Su mê kä la nyonyo ëtə̂ kuzü. Nyë sə̈ tchâtə, kə̂ loabô lô-ê.»

³⁵ Tche ê tʉ̂rʉ kpîɛ̂kpîɛ̂ rə̂, kə̈ tê bêche ânyë kə̈ tô pö sə̈ Ndjapä ndə̂kə̂ pa, âdə köbo âwa, tche gi dalo ndə̂ yûkü lâme tə̂ yê ngrɨ̈.

³⁶ Tche tô rə̂ päkëdə̂: «Bha mê, mo wä ndə̂kə̂ mbo rə gbɛ̂, amö gi kangûtchi yûkü âtə tə̂ mê. Mboabô rə̂ mbô batə̂ su mê nyîndə̂ nə̈-ê, praâbalë amö mbo rə̂ batə̂ rə̂ ndə̂ mo nyîndə̂ nə̈.»

³⁷ Jezü kâ pu adjisîpili ndə̂ yê vötaâ lâme kə̈ gbô andjê lə̂ lö. Tche tô rə̂ sə̈ Pîêre päkëdə̂: «Chemön, mo lôlö? Mo wâbo la gbôgbô ndə̂kə̂ sə la lala zə̈ dalo balë?

³⁸ Nyë löäbô lô-ê! Nyë tö pö sə̈ Ndjapä ndə̂kə̂ pa nyë teabô tê lə̂ rə ndə̂ âvu azü-î. Yingö kä la gbôgbô ndə̂kə̂ mbo rə̂, praâbalë tə̂ akrə wâbo la gbôgbô-a.»

³⁹ Tche kâ ê tʉ̂rʉ, kə̈ tô kütû apö ndə̂ tche tô rə̂ âme sə̈ Ndjapä.

⁴⁰ Pânə̈ tche dôtə̂ yê, kə̈ gbô adjisîpili ndə̂ yê nə̈ lə̂ lö, dëkë lö rôpâ andjê nə̂. Andjë wûn-âbo sə̂ pö ndə̂ andjë to rə̂-a.

⁴¹ Tə̂ vötaâ nə̈ tche kâ tô rə̂ sə̈ andjê päkëdə̂: «Gbô nyë kä lə̂ lö? Gbô nyê kä lakə̂ yatə̂ nyê-ê? Âkâ nə̂! Dalo nə̈ wûtu nə̂, a âgboadje tə̂ Modô ndə̂ Akrə tchânə̂ a-earə̂ ngbongbo rə.

⁴² Nyë älafô, azə̈ êë! Akrə ndə̂ tche yôsə̂ mê wûtu nə̂.»

A zä Jezü

⁴³ Ndə̂ gbô Jezü ndə̂po lakə̂ to pö, kpro kâkë, Jüdâse, ngânə̈ balë lə̂ gûtə̂ adjisîpili lə̂ könô gbɛ̂ tchêpâ nə̈ bïchuû nə̂ la angbängbä aturûgu ndə̂ andjë nə̂ la besala la ayö tchânə̂ andjê. Agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ la akpôkpô azü kä ndə̂ âwân andjê.

⁴⁴ Jüdâse earə̂ kə̂ yosə̂ Jezü nyîsə̂ rə ndə̂ tche mbo rə̂ ndə̂kə̂ za tchë sə̈ andjê, kə̈ tô rə̂ päkëdə̂: «Akrə ndə̂ mê a ma yê, dëkë tchetchë kä, nyë zä tchë kə̈ gû la tchë etə̂.»

⁴⁵ Kpro kâkë ndə̂ Jüdâse wûtu, tche gîtə̂ yê ndola Jezü kə̈ ê tchë päkëdə̂: «Earə̂ kə̂ nyisə̂ rə!» Pânə̈ tche â ma yê.

⁴⁶ Adɨ̂ azü nə̈ tchû tchë kproô, ânyë kə̈ zâ tchë.

⁴⁷ Ngânə̈ balë lə̂ gûtə̂ andjê ndə̂ tche sə̂ tâ, wûtu la besala kə̈ bhî earə̂ kua ndə̂ gbölö earə̂ kə̂ wa ngela sə̈ Ndjapä, ânyë kə̈ ngâla tü yê ndjrâ.

⁴⁸ Jezü tô rə̂ sə̈ andjê päkëdə̂: «Nyë nə̈ la abesala la agoto ndə̂kə̂ za mê batə̂ earə̂ ngbä!

⁴⁹ Logbɛ̂ më kä lə̂ gûtə̂ nyê bhâlə̂ gbölö nda Ndjapä lakə̂ nyisə̂ rə, nyë zâbo mê-a. Praâbalë arə lâme wütu käko ndə̂kə̂ pa pö ndə̂ Mbëtï Ndjapä mbo gundə̂sə̂ nə̈.»

⁵⁰ Tchâme, adjisîpili ndə̂ yê gbɛ̂ gbôtə̂ yê kə̈ kpê-ê.

⁵¹ Ngâ bechë-ɛ̈köchë sə̂ lakə̂ za tchêngbâ Jezü, tche gʉ̂âtə̂ yê kütû la lə̂ba ndə̂ a vro rə̂ pâ andjê. Andjë zâ tchë,

⁵² praâbalë tche zû lə̂ba ndə̂ a vro rə̂ pâ andjê nə̈ lâme yï tə̂ andjê, ânyë kə̈ kpê la wünwün tə̂ yê.

Jezü krʉ̈ lə̂ ngbanga ndə̂ ajuîfu

⁵³ Andjë ê la Jezü bhândə̂ gbölö earə̂ kə̂ wa ngela sə̈ Ndjapä. Agbölö a-earə̂ kə̂ wa ngela sə̈ Ndjapä la akpôkpô azü la a-earə̂ kə̂ nyisə̂ ndïɛ̈ ngbôtə̂ andjê dokʉ̈tchê gbɛ̂ bhâye.

⁵⁴ Pîêre sə̂ tʉ̂rʉ lakə̂ za tchêngbâ Jezü zoo kə̈ lî bhâlə̂ gbadja ndə̂ gbölö earə̂ kə̂ wa ngela sə̈ Ndjapä. Pîêre la a-earə̂ kua sə̂ ndro wo.

⁵⁵ Agbölö a-earə̂ kə̂ wa ngela sə̈ Ndjapä la azü lə̂ gbölö kpûlû ngbanga ndə̂ ajuîfu pû ngâ pö ndə̂kə̂ yi rə̂ lə̂ küma Jezü ânyë kə̂ wa ngbanga kuzü lə̂ küma yê. Praâbalë andjë gbôâbo rə̂-a.

⁵⁶ Bëte angbängbä azü tö apö yepa lə̂ küma yê, praâbalë apö nə̈ wâbo pâ mawû nə̈ balë-a.

⁵⁷ Angâ azü nə̈ âlafô ndə̂kə̂ to pö yepa lə̂ küma yê kə̈ tô rə̂ päkëdə̂:

⁵⁸ «Ârâ djë rə̂ lə̂ ma yê päkëdə̂: ‹Mê ndjondjoadje tchə̂lə̂ gbölö nda Ndjapä âtə ndə̂ a mbô rə̂ la könô andjê, ânyë lə̂ lö vötaâ mê kä mboadje ngâ täfo nə̈ ndə̂, âdə̂âbo azü kä ndə̂ âmbô rə̂ la könô andjê-a.›»

⁵⁹ Praâbalë pâ apö lâme gbɛ̂, apö ndə̂ andjê wâbo pâ mawû nə̈ balë-a.

⁶⁰ Käko Gbölö earə̂ kə̂ wa ngela sə̈ Ndjapä âlafô lə̂ la azü gbɛ̂ ânyë kə̈ yû Jezü päkëdə̂: «Mo ôn-âbo ma zə̈ ndə̂ pö âtə? Mo âto rə̂ atöko ndə̂ pö ndə̂ azü yî rə̂ lə̂ küma zə̈ âtə?»

⁶¹ Praâbalë Jezü sə̂ lə̂ wûtû nə̈, kə̈ ôn-âbo ma yê balë-a. Gbölö earə̂ kə̂ wa ngela sə̈ Ndjapä kâ yû tchë päkëdə̂: «Mo də̈ Krîsiti, Modô ndə̂ Ndjapä ndə̂ azü voga tchë lâme?»

⁶² Jezü tô rə̂ ndə̂nə̈ sə̈ tchë päkëdə̂: «Mëmê kä. Nyê wun-adje Modô ndə̂ Akrə ndə̂ tche sə̂ də ndôkö könô Ndjapä ndə̂ tche wâ la gbôgbô gbɛ̂. Tchê kadje lə̂ ndrö ndə̂ tchêlafô.»

⁶³ Käko gbölö earə̂ kə̂ wa ngela sə̈ Ndjapä srô tchə̂lə̂ lə̂ba ndə̂ yê ânyë kə̈ tô rə̂ päkëdə̂: «Azə̈ kä wâbo ndə̂kə̂ sə bëte pö ndə̂ ngâ akrə-a!

⁶⁴ Nyë djê rə̂ ndə̂ tche drô Ndjapä lâme nə̂. Nyë wün rə̂ atöko?» Azü gbɛ̂ wä ngbanga lə̂ küma yê pä tche wä ndə̂kə̂ tchu.

⁶⁵ Angâ azü sə̂ lakə̂ ku ngrʉ̂srö tə̂ yê, lakə̂ gʉa la yê, lakə̂ du tchë lakə̂ to rə̂ sə̈ tchë päkëdə̂: «To ndə̂ma Ndjapä sə̈ ârâ! Tchabâ kä âkə̈ bhî mö?» A-earə̂ kua nə̈ zâ Jezü, kə̈ rʉ̂â ngälâ yê tə̂ gbölösə̂nə̈.

Pîêre vüsə̂ Jezü

⁶⁶ Ndə̂ gbô Pîêre sə̂ də bêche bhâlə̂ gbadja nə̈, ngâ ɛ̈chë kua ndə̂ gbölö earə̂ kə̂ wa ngela sə̈ Ndjapä nə̂.

⁶⁷ Tche wûn Pîêre ndə̂ tche sə̂ ndro wo, kə̈ chêko tchë, kə̈ tô rə̂ sə̈ tchë päkëdə̂: «Momö ndjë gbɛ̂ mo sə̈ alême ndrotə̂ Jezü ndə̂ Näzärête.»

⁶⁸ Praâbalë tche vûsə̂ nə̈ lakə̂ to rə̂ päkëdə̂: «Më wûn-âbo sə̂nə̈-a, më djêâbo tchə̂lə̂ pö ndə̂ mo nyîndə̂ kə̂ to rə̂ âtə-a.» Pânə̈ tche wûtu kə̈ ê bhâlə̂ manda gbadja nə̈, tchâme kö ngötö kɨ̂.

⁶⁹ Ɛ̈chë kua nə̈ wûn tchë kə̈ kâ tô rə̂ sə̈ azü ndə̂ andjë sə̂ tâ päkëdə̂: «Köchë âtə də̈ ndjë ngâ akrə ndə̂ andjê!»

⁷⁰ Pîêre kâ vûsə̂ nə̈, kpro pânə̈, azü ndə̂ andjë sə̂ tâ kâ tô rə̂ sə̈ Pîêre päkëdə̂: «Tə̂ lëge nə̈ mo də̈ ngâ akrə ndə̂ andjê, bëte mo də̈ ndjë akrə gö ndə̂ Galilë.»

⁷¹ Praâbalë Pîêre sə̂ lakə̂ deba tə̂ kïkï nə̈ lakə̂ to rə̂ päkëdə̂: «Më wûn-âbo sə̂ köchë ndə̂ nyê to pö ndə̂ yê lâme-a!»

⁷² Kpro pânə̈, kö ngötö kɨ̂ tə̂ bïchuû nə̈. Sə̂ pö ndə̂ Jezü tô rə̂ sə̈ Pîêre âme tê lə̂ yê, tche tö rə̂ âme päkëdə̂: «Mô vuadje sə̂ mê sûsunə̈ vötaâ dokʉ̈tchê ndə̂kə̂ pa kö ngötö kɨ sûsunə̈ bïchuû.» Tche wôto tə̂ yê atə̂ sûwu kə̈ sə̂ lakə̂ kɨ.