Mâreke 13 - Mbëtï Ndjapä: TÄFO MADƗ̈

Jezü tö pö ndə̂kə̂ ndɨ ndə̂ gbölö nda Ndjapä

¹ Käko Jezü sə̂ lakə̂ wutu lə̂ gbölö nda Ndjapä, ngâ djisîpili ndə̂ yê tô rə̂ sə̈ tchë päkëdə̂: «Earə̂ kə̂ nyisə̂ rə, wunsaâ! Atäme giamâ âfû kâkë! Nda giamâ âfû kâkë!»

² Jezü tô rə̂ sə̈ tchë päkëdə̂: «Mo wûn agbölö anda âtə nə̂? Ngâ täme balë kä wa bata pâ ngâ yê tee-a, ârə̂ ândjo me ndjö gbɛ̂ ëbêche.»

Arə nyonyo la arə gbôgbô

³ Jezü sə̈ ëbêche lə̂ küma aga ndə̂ a-Olivï ndə̂ âwûntə̂ yê la gbölö nda Ndjapä. Pîêre la Jâke la Jâan la Anderë ndə̂ andjë sə̂ la kütû andjê la Jezü, andjë yû tchë päkëdə̂:

⁴ «Amö to rə̂ sə̈ ârâ, rə nə̈ âwutu dalatchêbâ? Sɨ̂nyî rə giamâ kä ndə̂ ânyisə̂ kə̂ krʉ ndə̂ arə nə̈ lâme gbɛ̂?»

⁵ Käko Jezü sə̂ lakə̂ to rə̂ sə̈ andjê päkëdə̂: «La nyê gbö-ê, ânyë ngâ akrə boloabô nyê bôlo-ê!

⁶ Angbängbä azü ânəadje la rə̈ mê kə̂ toadje rə̂ päkëdə̂: ‹Më də̈ Mesï!› Andjê boloadje azü tə̂ gbölösə̂nə̈.

⁷ Âdə nyë âdje pö ndə̂ akʉ̈ʉ̈ ndrotə̂ nyê la apö ndə̂ akʉ̈ʉ̈ ngrɨ̈, wawa mböäbô nyê mbô-ê. Äwäpä rə nə̈ lâme wutu dokʉ̈tchê. Praâbalë tchîsûwu nə̈ wâbo ndə̂kə̂ ka angangaâtə-a.

⁸ Bëte angâ azü gö adjelafô ndə̂kə̂ mbo kʉ̈ʉ̈ la angâ azü gö. Ngâ gbölö gö-gbïɛ̈ adjelafô ndə̂kə̂ mbo kʉ̈ʉ̈ la ngâ gbölö gö-gbïɛ̈, kulə̂ angâ agö, gʉ âmboadje azü tə̂ gbölösə̂nə̈, acho âtroadje katchôgbɛ̂, arə nə̈ lâme wadje batə̂ dokʉ̈ kə̂ ka tchə̂lə̂ ɛ̈chë ndə̂ tche wâ ndə̂kə̂ zɨ.

⁹ Âdə andə̂ nye nə̈, la nyê gbö pâ nyê la tə̂ nyê. Azü â-eadje la nyê atə̂lə̂ ngbanga, a âbhiadje nyê lə̂ anda kə̂ voga Ndjapä ndə̂ ajuîfu. Nyê eadje ndə̂kə̂ krʉ tchâtchu agoverenëre la agbïɛ̈ bëte mê, ndə̂kə̂ pa nyë to pö ndə̂ arə ndə̂ nyë wûnsə̂ nə̈ pâ mê tchâtchu andjê.

¹⁰ Äwäpä a mu Tchôtchô Pö sə̈ azü gö gbɛ̂ dokʉ̈tchê.

¹¹ Sə̂nə̈ ndə̂ a kʉ nyê ndə̂kə̂ e la nyê atə̂lə̂ ngbanga, nyë dɨ̈äbô su nyê dɨ̂ dokʉ̈tchê pâ pö ndə̂ nyê toadje rə̂, praâbalë pö ndə̂ nyê toadje rə̂, a âzadje rə̂ sə̈ nyê kpôtə̂ lo nə̈ lâme, bëte âdə̂âbo nyënyê kä ndə̂ âtoadje pö nə̈-a, praâbalë ârə̂ âto bhândə̂ Kpɨ̂ki Yingö.

¹² Ngâ yîngâ yoadje sə̂ yîngâ yê ndə̂kə̂ pa a won tchë, bha mboadje ndjë tâ käko tə̂ bechë ndə̂ yê. Abechë adjelafô tə̂ arabha andjê la araanyï andjê, kə̂ mbo rə̂ ndə̂kə̂ pa a wa ngbanga kuzü lə̂ küma andjê.

¹³ Azü gbɛ̂ koadje sə̂ nyê bëte rə̈ mê. Praâbalë akrə ndə̂ tche rʉatə̂ su yê ndjoa ëtə̂ manə̈, tchê tchadje lə̂ kuzü.»

Agbölö angbongbo rə

¹⁴ «Nyê wun-adje tchanə̈ ndə̂ a ê rə̂ tə̂ yê päkëdə̂: ‹Gbölö ngbongbo rə ndə̂ ândɨ tchô gbɛ̂›, ndə̂ a zadje tchë ësə̂nə̈ ndə̂ tche wâbô âme wâ ndə̂kə̂ sə tâ. (Äwäpä akrə ndə̂ tche dɨ rə̂ dje tchə̂lə̂ nə̈ djîrə̂!) Käko äwäpä azü ndə̂ andjë sə̂ bhâ Judë kpe atə̂lə̂ aküma aga.

¹⁵ Âwâbo pä akrə ndə̂ tchê səadje dəpâ küma nda jre ndə̂kə̂ za rə bhâ tchâalê ndə̂ yê-a.

¹⁶ Âwâbo pä akrə ndə̂ tche sə̂ bhâlə̂ kɨ̈ndɨ̈ ka atə̂ lakpô ndə̂kə̂ za lə̂ba ndə̂ yê-a.

¹⁷ Lə̂ alö nə̈ lâme, nyonyo kä tə̂ aɛ̈chë ndə̂ andjë wâ la güzu la andjanə̈ ndə̂ andjê zadje ngo ma bechë!

¹⁸ Nyë tö pö sə̈ Ndjapä ndə̂kə̂ pa arə nə̈ lâme wutuabô wûtu tə̂ ma ngbɨ̂gɨ̂-ê.

¹⁹ Bëte lə̂ alö nə̈ lâme, yûkü âmbo azü tə̂ gbölösə̂nə̈ kə̂ ro yûkü gbɛ̂ ndə̂ âmbô azü, sə̂nə̈ ndə̂ tchîsûwu âlafô tâ ndə̂ Ndjapä mbô arə gbɛ̂ ndjoa ëtə̂ tchô angêta. La tchêngbâ nə̈ ngâ yûkü käko kä wa bata balë tee-a.

²⁰ Âdə̂âbô bëte rə̂ ndə̂ Gbölö Gbïɛ̈ jî angâ alö nə̈ nyɛ̂-ɛn, dëkë ngâ akrə balë ndə̂ tche tcha lə̂ kuzü sə̂âbo-a. Praâbalë tche jï angâ alö nə̈ bëte azü ndə̂ tche dɨ̂ andjê ânyë andjë wâtə̂ azü ndə̂ yê.

²¹ Âdə ngâ akrə âto rə̂ sə̈ nyê päkëdə̂: ‹Krîsiti kä tchâtə!› âdəndjë ‹təbhâ!›, nyë gämbabô pö ndə̂ yê gâmba-ê.

²² Bëte angâ amesï ndə̂ yepa la a-earə̂ ndə̂ma Ndjapä ndə̂ yepa ânəadje, kə̂ mbo asɨ̂nyî rə la arə ndə̂ âropâ küma azü, ndə̂kə̂ bolo azü. Âdə köbo âwa, andjê bolo ndjë azü ndə̂ Ndjapä dɨ̂ andjê.

²³ Âdə andə̂ nye nə̈, la nyê gbö-ê! Më tô rə̂ sə̈ nyê dokʉ̈tchê nə̂ gbɛ̂.»

Kə̂ ka ndə̂ Modô ndə̂ Akrə

²⁴ «Praâbalë lə̂ alö nə̈ lâme, la tchêngbâ arə nyonyo nə̈, tchêla lo âbuadje, nyîpï kä ta bata tee-a,

²⁵ akêkêrə̂ toadje bhâ lafô kə̂ sə lakə̂ tu atə̂ bêche, arə gbôgbô ndə̂ tchêlafô âtroadje katchôgbɛ̂.

²⁶ Käko azü âwun-adje Modô ndə̂ akrə ndə̂ tche ka lə̂ ndrö la gbôgbô ndə̂ yê, lə̂ golowäre ndə̂ yê gbɛ̂.

²⁷ Käko tchê wan-adje aânje, andjê paladje azü ndə̂ tche dɨ̂ andjê lə̂ angongo tchêbêche voanə̈ gbɛ̂, ndə̂kə̂ to tə̂ ngâ ma tchêbêche ndjoa etə̂ ma ngânə̈.»

Kə̂ nyisə̂ rə lə̂ köbosə̂ yö fîge

²⁸ «Äwäpä nyë dje tchə̂lə̂ ndoka pâ kə̂ nyisə̂ rə pâ yö ndə̂ fîge: Âdə nyê âwun amatö yö ndə̂ âmbôtə̂ yê tə̂ bhiɛbhiɛ nə̈, ânyë akʉ̈kʉ̂ nə̈ sə̂ lakə̂ ta tâ, nyê wunsə̂ nə̈ pä lo kə̂ lu andjî rəgʉ ndô nə̂.

²⁹ Käko ndjë nyënyê gbɛ̂, âdə nyê âsə̈ wun arə lâme ndə̂ âwutu, äwäpä nyë wunsə̂ nə̈ pä Modô ndə̂ Akrə kä tchêtchêtchê, tche kä pâ manda ndə̂ nyê.

³⁰ Ɛn-ɛn, tə̂ lëge nə̈ më tö rə̂ sə̈ nyê: Azü ndə̂ tchô angêta tchuabô gbɛ̂ tee-a, dokʉ̈tchê ndə̂kə̂ pa rə lâme gbɛ̂ wutu.

³¹ Tchêlafô la tchêbêche âroadje, praâbalë apö ndə̂ mê roabô tee-a.»

Ndjapä balë kä ndə̂ âwûnsə̂ lö nə̈

³² «Âdə andə̂ pö ndə̂ lö nə̈ âdəndjë dalo nə̈, ngâ akrə balë wûn-âbo sə̂nə̈-a. Âdə̂âbo ndjë aânje ndə̂ tchêlafô-a, âdə̂âbo ndjë Modô-a, praâbalë kütû Ndjapä balë.

³³ La nyê gbö-ê, nyë löäbô lô-ê, bëte nyë wûn-âbo sə̂ lö nə̈-a.

³⁴ Rə nə̈ âwa me batə̂ rə̂ ndə̂ ngâ köchë nda gbôtə̂ nda ndə̂ yê, dokʉ̈tchê ndə̂kə̂ pa tche ro atə̂sə̂ ngâ tchô ngbî, tche krʉ̂ tchə̂lə̂ kua tə̂ a-earə̂ kua ndə̂ yê balë balë, kə̈ zâma sə̈ akrə ndə̂ tche bata manda ndə̂kə̂ pâ tche loabô lô-ê.

³⁵ Nyë löäbô lô-ê, bëte nyë wûn-âbo sə̂ lö nə̈ ndə̂ earə̂ nda nə̈ ka la rə̂-a: La tchêndə̂gölo, âdəndjë lə̂ agrʉ̂mi, âdəndjë la kɨ̈ kö ngötö, âdəndjë la mbatchâ.

³⁶ Ndə̂kə̂ pa tche kabô kâ kə̂ tro nyê-ê, ânyë kə̂ gbo nyê lə̂ lö-ê.

³⁷ Pö ndə̂ më tô rə̂ sə̈ nyê âtə, më tö rə̂ sə̈ azü gbɛ̂: Nyë löäbô lô-ê!»