Mâreke 12 - Mbëtï Ndjapä: TÄFO MADƗ̈

Ndoka pâ angbongbo a-earə̂ kə̂ djo kɨ̈ndɨ̈ vînye

¹ La tchêngbâ nə̈ Jezü sə̂ lakə̂ to pö sə̈ andjê la ndoka päkëdə̂: «Ngâ köchë mbö kɨ̈ndɨ̈ vînye, kə̈ mbô gbadja âtâkpa ndə̂nə̈, kə̈ djî kudû lə̂ täme ndə̂kə̂ pa a po ndjî vînye nə̈ lə̂nə̈, kə̈ nyîkrə ngâ tchô də lafô ndə̂kə̂ pä akrə krʉ pânə̈ ânyë kə̂ wun tchô pâ kɨ̈ndɨ̈ nə̈. Pânə̈ tche gbôtə̂ kɨ̈ndɨ̈ nə̈ ëtchânə̂ angâ a-earə̂ kə̂ djo kɨ̈ndɨ̈ vînye ânyë kə̈ ê atə̂lə̂ ngâ gö ngbî.

² Ndə̂ lö ndə̂kə̂ kʉlo lêlê vînye nə̈ wûtu, tche wân ngâ earə̂ kua ndə̂ yê sə̈ a-earə̂ kə̂ djo kɨ̈ndɨ̈ vînye nə̈ ndə̂kə̂ pa andjë kʉ andə̂ yê ndjî vînye nə̈ sə̈ tchë.

³ Praâbalë a-earə̂ kə̂ djo kɨ̈ndɨ̈ vînye nə̈ zâ tchë, kə̈ bhî tchë ânyë kə̈ grô tchë gutə̂ la wünwün tchânə̂ yê.

⁴ Tche kâ wân ngâ earə̂ kua ndə̂ yê ngbî sə̈ andjê, andjë bhî tchë tə̂ küma yê, kə̈ drô tchë.

⁵ Earə̂ kɨ̈ndɨ̈ nə̈ kâ wân ngâ earə̂ kua ndə̂ yê, andjë wôn tchë-ê. Pânə̈ andjë mbô tâ käko tə̂ angâ angbängbä a-earə̂ kua ndə̂ yê: Andjë bhî angânə̈ ânyë kə̈ wôn ndjë angânə̈.

⁶ Kütû modô ndə̂ earə̂ kɨ̈ndɨ̈ nə̈ balë ndə̂ tche nyîndə̂ yê tə̂ gbölösə̂nə̈ kä ndə̂ âsə̂ ngbânə̈. Tche wân tchë sə̈ andjê lakə̂ to rə̂ bhâtə̂ su yê päkëdə̂: ‹Andjê mboadje wa modô ndə̂ mê.›

⁷ Praâbalë a-earə̂ kə̂ djo kɨ̈ndɨ̈ vînye nə̈ tô rə̂ lə̂ gbâtə̂ andjê päkëdə̂: ‹Earə̂ kə̂ za kɨ̈ndɨ̈ nə̈ ngbâ bha nə̈ kä âtə! Nyë nə̈ azə̈ wôn tchë, ânyë kɨ̈ndɨ̈ nə̈ watə̂ andə̂ azə̈ nə̈!›

⁸ Andjë zâ tchë, kə̈ wôn tchë ânyë kə̈ yî krʉkrʉ yê tə̂ kɨ̈ndɨ̈ vînye nə̈ bhâchï.»

⁹ Jezü yû andjê päkëdə̂: «Earə̂ kɨ̈ndɨ̈ nə̈ âmbo atöko? Tchê kadje, kə̂ won-adje a-earə̂ kə̂ djo kɨ̈ndɨ̈ vînye nə̈ gbɛ̂ ânyë kə̂ gbotə̂ kɨ̈ndɨ̈ nə̈ ëtchânə̂ angâ azü ngbî.

¹⁰ Nyë dɨ̂âbo pö ndə̂ a mbô rə̂ lə̂ Mbëtï Ndjapä lâme? Pö nə̈ tö rə̂ päkëdə̂: ‹Täme ndə̂ a-earə̂ kə̂ mbo nda gbôtâ, ârə̂ kä ndə̂ âmbôtə̂ yê tə̂ gbôgbô täme da nda nə̈.

¹¹ Rə lâme tö bhândə̂ Gbölö Gbïɛ̈, rə nə̈ wätə̂ ngâ gbölö rə lə̂ la azə̂!›»

¹² Amakündji ndə̂ ajuîfu pû köbo ndə̂kə̂ za Jezü, bëte andjë wünsə̂ nə̈ pä tche tö ndoka lâme tə̂ anyê. Praâbalë andjë mbö wa kpûlû azü ânyë kə̈ gbôtə̂ yê tche rô etə̂.

Lapöo ndə̂ a yo rə̂ tchânə̂ Sezäre

¹³ Andjë wân angâ afarizïɛ̈n la angâ azü lə̂ kpûlû ndə̂ Hërôde sə̈ Jezü ndə̂kə̂ vu tchë lə̂ köbosə̂ pö ma yê.

¹⁴ Andjë nə̂ kə̈ tô rə̂ sə̈ tchë päkëdə̂: «Earə̂ kə̂ nyisə̂ rə, ârâ wûnsə̂ nə̈ nə̂ pä mo tö lëge pö, kə̈ mbôâbo wa ngâ akrə balë-a; mo wûn-âbo kə̂ ge ndə̂ azü-a, praâbalë mo nyïsə̂ lëge pö pâ kə̂ mbo rə ndə̂ âfû lə̂ la Ndjapä. Amö to rə̂ sə̈ ârâ: Ndïɛ̈ zä köbo ndə̂kə̂ pa a yo lapöo tchânə̂ Sezäre? Âdəndjë rə̂ a yoabô rə̂ yô tchânə̂ yê? Azə̈ wä ndə̂kə̂ yo rə̂? Ɛn-ɛn, âdəndjë ɛ̂n-ɛ̈n.»

¹⁵ Praâbalë Jezü wûnsə̂ pö ma andjê ndə̂ âwâ ngbî tə̂kə̂ mbo rə ndə̂ andjê, kə̈ tô rə̂ sə̈ andjê päkëdə̂: «Bëte giamâ kä ndə̂ nyë nyîndə̂ kə̂ vu mê? Nyë nə̈ la ngâ makətche sə̈ mê më wûn rə̂.»

¹⁶ Andjë nə̂ la ngâ makətche balë sə̈ tchë, tche yû andjê päkëdə̂: «Nyîsɨ̂ la rə̈ tchabâ kä ndə̂ âwâ la makətche âtə?» Andjë tô rə̂ ndə̂nə̈ sə̈ tchë päkëdə̂: «Andə̂ Sezäre kä»

¹⁷ Käko Jezü tô rə̂ sə̈ andjê päkëdə̂: «Nyë kʉ̈ rə ndə̂ âwâtə̂ andə̂ Sezäre sə̈ Sezäre, kə̂ kʉ anə̈ ndə̂ âwâtə̂ andə̂ Ndjapä sə̈ Ndjapä.» Tchə̂lə̂ küma andjê gbɛ̂ djîngɨli tə̂ pö ndə̂ Jezü lâme-ê.

Pö ndə̂kə̂ jo ndə̂ azü lə̂ kuzü

¹⁸ Angâ asadusïɛ̈n nə̂ ndola Jezü. Asadusïɛ̈n nə̈ də̈ azü ndə̂ andjë tô rə̂ pâ kə̂ jo ndə̂ akuzü wâbo tâ-a. Andjë yû tchë päkëdə̂:

¹⁹ «Earə̂ kə̂ nyisə̂ rə, Möyîze mbö ndïɛ̈ âtə bëte ârâ alême lə̂ mbëtï päkëdə̂: ‹Âdə ngâ köchë âtchu ânyë kə̈ gbôtə̂ ɛ̈chë ndə̂ yê ndə̂ andjë zɨ̂âbô zɨ̂ la tchë, äwäpä yîngâ yê to ɛ̈chë nə̈ ngbâ yê kə̂ zɨ abechë la rə̈ tchanə̈ ndə̂ tche tchû lâme.›

²⁰ Dëkë, angâ ayîngâ mïndûu manə̈ bïchuû kä tâ. Dokʉ̈ nə̈ tô ɛ̈chë, kə̈ tchû tə̂ abechë ämbänə̈.

²¹ Bïchuû yîngâ yê tô ɛ̈chë nə̈ ngbâ yê, kə̈ tchû tə̂ abechë ämbänə̈. Ämbö ndjë käko tə̂ vötaâ yîngâ yê.

²² Ayîngâ mïndûu manə̈ bïchuû lâme zɨ̂âbo ngâ bechë balë la tchë-a, kə̈ tchû gbɛ̂. La tchêngbâ andjê gbɛ̂ ɛ̈chë nə̈ ngbâ andjê tchû ndjë.

²³ Lo nə̈ ndə̂ akuzü jo, ɛ̈chë nə̈ lâme âwatə̂ ɛ̈chë ndə̂ tchabâ lə̂ gûtə̂ andjê? Bëte andjê mïndûu manə̈ bïchuû gbɛ̂ tô tchë nə̂.»

²⁴ Jezü tô rə̂ sə̈ andjê päkëdə̂: «Nyë tchâ köbo nə̂! Nyë wûnsə̂ dju nə̈ nə̂? Bëte nyë wûn-âbo sə̂ Mbëtï Ndjapä-a, âdəndjë gbôgbô ndə̂ yê-a.

²⁵ Lo nə̈ ndə̂ akuzü jo, aköchë la aɛ̈chë tôâbo tə̂ andjê-a, praâbalë andjê âsə batə̂ aânje bhâ lafô.

²⁶ Âdə andə̂ azü ndə̂ andjê joadje lə̂ kuzü, nyë dɨ̂âbo rə̂ lə̂ Mbëtï ndə̂ Möyîze? Ndə̂ Ndjapä tô rə̂ sə̈ tchë lə̂ wo ndə̂ âtcho lə̂ gbâkü dɨgbɨ ndöndö yö lâme päkëdə̂: ‹Më də̈ Ndjapä ndə̂ Abrahâmo, Ndjapä ndə̂ Izâke la Ndjapä ndə̂ Jakôbo.›

²⁷ Tche də̂âbo Ndjapä ndə̂ azü ndə̂ andjë tchû-a, praâbalë tche də̈ Ndjapä ndə̂ azü ndə̂ andjë wâ la tʉ̈rʉ̂ la andjê. Tchâme kä ndə̂ nyë tchâ köbo tratralë.»

Ndïɛ̈ ndə̂ ârô adɨ̂ nə̈ gbɛ̂

²⁸ Ngâ earə̂ kə̂ nyisə̂ ndïɛ̈ djê pö ndə̂ asadusïɛ̈n sə̂ lakə̂ gama andjê la Jezü, kə̈ wûn rə̂ pä tche tô lëge pö sə̈ andjê nə̂, tche gîtə̂ yê ndola Jezü ânyë kə̈ yû tchë päkëdə̂: «Ndïɛ̈ nə̈bâ kä âkə̈ rôpâ adɨ̂ nə̈ gbɛ̂?»

²⁹ Jezü tô rə̂ ndə̂nə̈ sə̈ tchë päkëdə̂: «Gbölö ndïɛ̈ ndə̂ ârôpâ adɨ̂ nə̈ gbɛ̂ kä âtə: ‹Azü gö ndə̂ Isarayële, nyë djë pö âtə, Gbölö Gbïɛ̈ Ndjapä ndə̂ azə̂ balë kä âkə̈ wâtə̂ Gbölö Gbïɛ̈.

³⁰ Äwäpä mo nyində̂ Gbölö Gbïɛ̈ Ndjapä ndə̂ zə̈ la su zə̈ gbɛ̂, la yingö ndə̂ zə̈ gbɛ̂, la pö tə̂ su zə̈ gbɛ̂, la gbôgbô ndə̂ zə̈ gbɛ̂.›

³¹ Bïchuû gbölö ndïɛ̈ nə̈: ‹Äwäpä mo nyində̂ ngâ zə̈ batə̂ tə̂ zə̈.› Ngâ gbölö ndïɛ̈ ndə̂ ârô rə̂ wâbo-a.»

³² Earə̂ kə̂ nyisə̂ ndïɛ̈ lâme tô rə̂ sə̈ Jezü päkëdə̂: «Earə̂ kə̂ nyisə̂ rə, ädäka tə̂ gbölösə̂nə̈! Pö ndə̂ mo tô rə̂ lâme wätə̂ lëge pö: Gbölö Gbïɛ̈ wätə̂ Ndjapä balë, ngâ Ndjapä dəkêlê yê sə̂âbo-a.

³³ Äwäpä akrə nyində̂ Ndjapä la su yê gbɛ̂, lakə̂ wunsə̂ rə ndə̂ yê gbɛ̂, la gbôgbô ndə̂ yê gbɛ̂. Äwäpä tche nyində̂ ngâ yê akrə batə̂ tə̂ yê. Kə̂ mbo tə̂ rə käko kä âkə̈ dâka, kə̈ rô kə̂ wa ngela sə̈ Ndjapä la agia ndə̂ a cho andjê gbɛ̂, la angâ arə ngbî ngbî ndə̂ azü kʉ rə̂ bëte kua ndə̂ Ndjapä.»

³⁴ Jezü wûn rə̂ ndə̂ tche tô tchêngbâ pö nə̈ lə̂ köbosə̂ küma yê ndə̂ âwâ lanə̈, kə̈ tô rə̂ sə̈ tchë päkëdə̂: «Mo wâbo ngrɨ̈ tə̂ Gbölö gö-gbïɛ̈ ndə̂ Ndjapä-a.» La tchêngbâ nə̈ ngâ akrə balë kä wâbo ndjë ndə̂kə̂ on ma yê ânyë kə̂ yu tchë la ngâ pö-a.

Mesï la Davîdi

³⁵ Ndə̂ Jezü sə̂ lakə̂ nyisə̂ rə lə̂ gbölö nda Ndjapä, tche yûkû ngâ pö päkëdə̂: «Atöko kä ndə̂ a-earə̂ kə̂ nyisə̂ ndïɛ̈ tô rə̂ pä Krîsiti də̈ modô ndə̂ Davîdi?

³⁶ Davîdi la tə̂ yê tö rə̂ lə̂ köbosə̂ Kpɨ̂ki Yingö päkëdə̂: ‹Gbölö Gbïɛ̈ Ndjapä tö rə̂ sə̈ Gbölö Gbïɛ̈ ndə̂ mê päkëdə̂: Amö sə də ndôkö könô mê zoo mê kʉ azü ndə̂ andjë kôsə̂ zə̈ ëtchâtchâ da zə̈.›

³⁷ Davîdi la tə̂ yê ë rə̂ tə̂ yê pä ‹Gbölö Gbïɛ̈›, tïtïsə̂nə̈ atöko kä ndə̂ Mesï nə̈ kä watə̂ modô ndə̂ Davîdi?» Akpûlû azü sə̂ lakə̂ dje Jezü la mômô.

Jezü wä ngbanga lə̂ küma a-earə̂ kə̂ nyisə̂ ndïɛ̈

³⁸ Tche tô rə̂ lə̂kə̂ nyisə̂ rə ndə̂ yê päkëdə̂: «La nyê gbö-ê! Nyë mböäbô rə mbô batə̂ a-earə̂ kə̂ nyisə̂ ndïɛ̈ ndə̂ andjë nyîndə̂ kə̂ rʉ kütû la agbölö lə̂ba, kə̂ nyində̂ nə̈ pä azü po ndə̂ anyê sə̂nə̈ ndə̂ azü pala tchê tə̂ andjê tâ.

³⁹ Andjë nyïndə̂ kə̂ sə lə̂ adokʉ̈ ngendë lə̂ anda kə̂ voga Ndjapä ndə̂ ajuîfu, la agbölö tchô tə̂ ma kɨ̈zɨ̂ ndə̂ kpülü.

⁴⁰ Andjë kʉ̈ arə gbɛ̂ tə̂ aɛ̈chë lə̂ ndavrö, kə̂ to pö sə̈ Ndjapä âgu tə̂ gbölösə̂nə̈ ndə̂kə̂ pa azü wun andjê. Ndjapä âwadje ngbanga lə̂ küma andjê tə̂ kïkï nə̈.»

Kə̂ kʉ rə ndə̂ ngâ ɛ̈chë lə̂ ndavrö

⁴¹ Pânə̈ Jezü sə̂ bhâlə̂ gbölö nda Ndjapä tə̂ ma sandûgu-makətche ndə̂kə̂ wun köbo ndə̂kə̂ kʉ rə sə̈ Ndjapä ndə̂ angbängbä azü kʉ rə̂ lə̂ sandûgu-makətche nə̈. Angbängbä a-earə̂ rə kʉ̈ makətche lə̂nə̈ tə̂ gbölösə̂nə̈.

⁴² Ngâ ɛ̈chë lə̂ ndavrö ndə̂ tche wâtə̂ earə̂ yûkü nə̂, kə̈ kʉ̂ mîɛ̈ bïchuû ëlə̂nə̈.

⁴³ Jezü ê adjisîpili ndə̂ yê kə̈ tô rə̂ sə̈ andjê päkëdə̂: «Ɛn-ɛn, tə̂ lëge nə̈, më tô rə̂ sə̈ nyê: Ɛ̈chë yûkü lə̂ ndavrö âtə kʉ̈ makətche ndə̂ yê ârô adɨ̂ azü gbɛ̂ ndə̂ andjë kʉ̂ rə lə̂ sandûgu ndə̂ Ndjapä.

⁴⁴ Bëte adɨ̂ azü gbɛ̂ kʉ̈ makətche ndə̂ âwâ lə̂ la andjê tə̂ mbämbä rə, praâbalë tchetchë, lə̂ yûkü ndə̂ yê, tche kʉ̈ adɨ̂ makətche kɨ̈zɨ̂ ndə̂ yê gbɛ̂.»