Mâreke 10 - Mbëtï Ndjapä: TÄFO MADƗ̈

Pö pâ kə̂ totə̂ lakə̂ kosə̂ tə̂ ndə̂ köchë la ɛ̈chë

¹ La tchêngbâ nə̈ Jezü âlafô tchâme kə̈ ê atə̂pâ cho ndə̂ Judë, dəkalâ ngû ndə̂ Jurudɛ̈n. Akpûlû azü kâ pâlatə̂ andjê ndrotə̂ yê, ânyë tche sə̂ lakə̂ nyisə̂ rə sə̈ andjê batə̂ rə̂ ndə̂ tche mbo tchê rə̂.

² Afarizïɛ̈n nə̂ ndola tchë, andjë nyïndə̂ kə̂ vu tchë, kə̈ yû tchë päkëdə̂: «Ndïɛ̈ ndə̂ azə̂ zä köbo sə̈ köchë ndə̂kə̂ gro ɛ̈chë ndə̂ yê?»

³ Tche tô rə̂ ndə̂nə̈ sə̈ andjê päkëdə̂: «Ndïɛ̈ nə̈bâ kä ndə̂ Möyîze zâ rə̂ sə̈ nyê alême?»

⁴ Andjë tô rə̂ päkëdə̂: «Möyîze zä köbo sə̈ köchë ndə̂kə̂ mbo mbëtï ndə̂kə̂ kosə̂ tə̂ sə̈ ɛ̈chë ndə̂ yê ânyë kə̂ gro tchë.»

⁵ Käko Jezü tô rə̂ sə̈ andjê päkëdə̂: «Möyîze mbö ndïɛ̈ lâme sə̈ nyê bëte gbôgbô su nyê.

⁶ Praâbalë sə̂nə̈ ndə̂ Ndjapä jêtə̂ kə̂ mbo arə gbɛ̂, tche mbö köchë la ɛ̈chë.

⁷ ‹Bëte rə̂ kä ndə̂ köchë gboadje tchâtchâ bha la anyï nə̈, kə̂ sə la ɛ̈chë ndə̂ yê,

⁸ ânyë andjê gburə̂ gbɛ̂ wadje tə̂ akrə balë.› Käko andjë kä wâ bata tə̂ azü bïchuû-a, praâbalë andjë wâ nə̂ batə̂ akrə balë.

⁹ Âwâbo pä akrə krʉ tchə̂lə̂ rə ndə̂ Ndjapä ngbô rə̂ ëtâ-a.»

¹⁰ Ndə̂ andjë gû atə̂lə̂ manda, adjisîpili kâ yû tchë tə̂ pö lâme.

¹¹ Tche tô rə̂ sə̈ andjê päkëdə̂: «Âdə ngâ köchë âgro ɛ̈chë ndə̂ yê ânyë kə̈ tô ngânə̈ ngbî, dëkë tche zɨ̂ ngbä tə̂ dokʉ̈ ɛ̈chë ndə̂ yê nə̈ nə̂.

¹² Âdəndjë rə̂ ndə̂ ɛ̈chë nə̈ kôsə̂ köchë ndə̂ yê ânyë kə̈ tô ngâ köchë ngbî, dëkë tche zɨ̂ ngbä tə̂ dokʉ̈ köchë ndə̂ yê nə̈ nə̂.»

Jezü ë tchôtchô pö pâ abechë

¹³ Azü nə̂ la abechë sə̈ Jezü ndə̂kə̂ pa tche grʉ andjê, praâbalë adjisîpili hrô la andjê.

¹⁴ Ndə̂ Jezü wûn rə̂ käko, tchə̂lə̂ yê kʉ̂ tchë ânyë tche tô rə̂ sə̈ andjê päkëdə̂: «Nyë gbötə̂ abechë andjë nə̂ pu mê, nyë kïäbô kîtə̂ köbo tə̂ andjê-ê, bëte Gbölö gö-gbïɛ̈ ndə̂ Ndjapä wätə̂ andə̂ andjanə̈ ndə̂ andjë wâ batə̂ abechë lâme.

¹⁵ Ɛn-ɛn, tə̂ lëge nə̈ më tö rə̂ sə̈ nyê: Akrə ndə̂ tche mbôâbô mbô la sə̂ Gbölö gö-gbïɛ̈ ndə̂ Ndjapä batə̂ abechë âtə-ê, tchê liabô balë atə̂lə̂ nə̈ tee-a.»

¹⁶ La tchêngbâ nə̈ Jezü â ma abechë nə̈, kə̈ ê tchôtchô pö pâ andjê lakə̂ to könô yê pâ andjê.

Jezü la earə̂ rə

¹⁷ Ndə̂ Jezü zâ köbo ndə̂kə̂ ro etə̂, ngâ köchë kpê kə̈ gʉ̂te tchâtchâ yê ânyë kə̈ yû tchë päkëdə̂: «Tchôtchô earə̂ kə̂ nyisə̂ rə, më âmbo atöko ânyë kə̈ gbo tchîsûwu ndə̂ logbɛ̂ logbɛ̂?»

¹⁸ Jezü tô rə̂ sə̈ tchë päkëdə̂: «Bëte giamâ mo ê rə̂ tə̂ mê pä tchôtchô akrə? Ngâ tchôtchô akrə balë wâbo-a, kütû Ndjapä balë.

¹⁹ Mo wûnsə̂ andïɛ̈ nə̂: Âwâbo pä mo won akrə-a, kə̂ puabô ɛ̈chë âdəndjë köchë ndə̂ akrə pû-î, kə̂ zɨabô ngbä zɨ̂-î, kə̂ moabô yepa mô tə̂ ngâ akrə-ê, kə̂ boloabô akrə bôlo ndə̂kə̂ za rə ndə̂ yê-ê, amö lusə̂ bha la anyï zə̈.»

²⁰ Köchë nə̈ tô rə̂ sə̈ tchë päkëdə̂: «Earə̂ kə̂ nyisə̂ rə, më mbô arə gundə̂sə̂ andïɛ̈ lâme nə̂ gbɛ̂ po la bechë tə̂ mê ndjoa ëtə̂ tchô angêta.»

²¹ Jezü chêko tchë kə̂ nyïndə̂ yê ânyë kə̈ tô rə̂ sə̈ tchë päkëdə̂: «Gbô ngâ rə balë kä po ngbânə̈ ndə̂kə̂ pa mo mbo rə̂: Amö gu, kə̂ ka arə gbɛ̂ ndə̂ mo wâ la rə̂, kə̂ kʉ makətche nə̈ sə̈ a-earə̂ yûkü, ânyë kə̂ gboadje gbölö rə bhâ lafô. La tchêngbâ nə̈ mo nə ngbâ mê.»

²² Praâbalë ndə̂ köchë lâme âsə̈ dje pö nə̈ käko, tə̂ yê gbɛ̂ zɨ̂-î, tche gû la nyonyo bëte tche wä la arə tə̂ gbölösə̂nə̈.

²³ Jezü wûn tchə̂lə̂ la azü ndrotə̂ yê, ânyë kə̈ tô rə̂ sə̈ adjisîpili ndə̂ yê päkëdə̂: «Sə̂nə̈ kâkä tə̂ a-earə̂ rə ndə̂kə̂ li lə̂ Gbölö gö-gbïɛ̈ ndə̂ Ndjapä!»

²⁴ Tchə̂lə̂ küma adjisîpili nə̈ gbɛ̂ djîngɨli tə̂ pö lâme. Praâbalë Jezü kâ tô rə̂ sə̈ andjê päkëdə̂: «Abechë ndə̂ mê, sə̂nə̈ kâkä ndə̂kə̂ li atə̂lə̂ Gbölö gö-gbïɛ̈ ndə̂ Ndjapä!

²⁵ Sə̂nə̈ kä tə̂ earə̂ rə ndə̂kə̂ li atə̂lə̂ Gbölö gö-gbïɛ̈ ndə̂ Ndjapä, kə̈ rô kə̂ li ndə̂ gia ndə̂ rə̈ yê wû pä chamö lə̂ grʉ̈ masângê.»

²⁶ Tchə̂lə̂ küma adjisîpili nə̈ kä djîngɨli ânyë andjë sə̂ lakə̂ to rə̂ lə̂ gbâtə̂ andjê päkëdə̂: «Käko tchabâ lɛ̂ɛ kä âkə̂ tcha?»

²⁷ Jezü chêko andjê ânyë kə̈ tô rə̂ sə̈ andjê päkëdə̂: «Sə̂nə̈ kä tə̂ azü, praâbalë sə̂nə̈ kâbo tə̂ Ndjapä-a, bëte Ndjapä wä ndə̂kə̂ mbo rə gbɛ̂.»

²⁸ Käko Pîêre sə̂ lakə̂ to rə̂ sə̈ tchë päkëdə̂: «Ârâ gbötə̂ arə ndə̂ ârâ gbɛ̂ ânyë kə̈ zâ tchêngbâ zə̈.»

²⁹ Jezü tô rə̂ ndə̂nə̈ sə̈ tchë päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Akrə ndə̂ tche gbôtə̂ nda ndə̂ yê la ayîngâ yê la anyînə̂ nə̈ la bha nə̈ la anyï nə̈ la abechë âdəndjë akɨ̈ndɨ̈ ndə̂ yê bëte mê, ndjë bëte Tchôtchô Pö,

³⁰ tchê gboadje anda la ayîngâ la anyînə̂ la araanyï la abechë la akɨ̈ndɨ̈, sûsunə̈ ngbangbo balë lə̂ tchîsûwu ndə̂ azə̈ sə̂ tâ angêta. Azü mboadje gbôgbô tə̂ yê, ânyë lə̂ tchîsûwu ndə̂ ânə, tchê gboadje tchîsûwu ndə̂ logbɛ̂ logbɛ̂.

³¹ Angbängbä azü ndə̂ andjë wâtə̂ küma nə̈, andjê kadje atə̂ ngbânə̈, ânyë angbängbä azü ndə̂ andjë sə̂ atə̂ ngbânə̈, andjê wadje tə̂ azü tə̂ küma nə̈.»

Tə̂ vötaâ nə̈ Jezü kä tô pö ndə̂kə̂ tchu lakə̂ jo ndə̂ yê lə̂ kuzü

³² Jezü la adjisîpili ndə̂ yê sə̂ pâ köbo lakə̂ kenga atə̂ Jerûzalêmo, tche sə̂ lakə̂ nə tchâtchu andjê. Andjë wâ la nyonyo, ânyë andjanə̈ ndə̂ andjë zâ tchêngbâ yê wâ la wawa. Jezü kä kʉ̂ adjisîpili lə̂ könô gbɛ̂ tchêpâ nə̈ bïchuû ndrotə̂ yê, kə̈ gîtə̂ yê la andjê bhâchï, ânyë kə̈ sə̂ lakə̂ to pö ndə̂ rə ndə̂ âwâ ndə̂kə̂ gbo tchë sə̈ andjê.

³³ «Azə̈ âkenga atə̂ Jerûzalêmo, a âgboadje tə̂ Modô ndə̂ Akrə ëtchânə̂ agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈. Andjê wadje ngbanga kuzü lə̂ küma yê. Andjê gboadje tə̂ yê ëtchânə̂ azü ndə̂ andjë wâbô wâtə̂ ajuîfu.

³⁴ Andjê moadje tchë, kə̂ kuadje ngʉ̂srö tə̂ yê, kə̂ bhiadje tchë, ânyë kə̂ won-adje tchë, lö vötaâ la tchêngbâ nə̈ tchê joadje lə̂ kuzü.»

Kə̂ yukû rə ndə̂ Jâke la Jâan

³⁵ Käko Jâke la Jâan, amodô ndə̂ Zebede nə̂ ndola Jezü ânyë kə̈ yû tchë päkëdə̂: «Earə̂ kə̂ nyisə̂ rə, ârâ nyïndə̂ nə̈ pä mo mbo rə ndə̂ ârâ yuadje mö tâ âtə tə̂ ârâ.»

³⁶ Jezü yû andjê päkëdə̂: «Giamâ kä ndə̂ nyë nyîndə̂ nə̈ pä më mbo rə̂ tə̂ nyê?»

³⁷ Andjë tô rə̂ ndə̂nə̈ sə̈ tchë päkëdə̂: «Lo nə̈ ndə̂ mô səadje lə̂ ngendë-gbïɛ̈ ndə̂ zə̈, amö za köbo sə̈ ârâ ndə̂kə̂ sə ndrotə̂ zə̈ ngânə̈ balë də ndôkö ânyë balë nə̈ də gele.»

³⁸ Jezü tô rə̂ sə̈ andjê päkëdə̂: «Nyë wûn-âbo sə̂ rə ndə̂ nyê yukû nə̈ âtə-a. Nyê wadje ndə̂kə̂ ndjo kangûchi yûkü ndə̂ mê ndjoadje rə̂ lâme? Âdəndjë ndə̂kə̂ gbo batɛ̂me nyonyo ndə̂ mê gboadje rə̂ lâme?»

³⁹ Andjë tô rə̂ ndə̂nə̈ sə̈ tchë päkëdə̂: «Ârâ wä ndə̂kə̂ ndjo rə̂.» Jezü tô rə̂ sə̈ andjê päkëdə̂: «Nyê ndjoadje kangûchi yûkü ndə̂ mê ndjo rə̂, kə̂ gboadje batɛ̂me nyonyo ndə̂ mê gbo rə̂.

⁴⁰ Praâbalë ndə̂kə̂ sə də ndôkö âdəndjë də gele, âdə̂âbo mëmê kä ndə̂ âkʉ rə̂ sə̈ azü-a. Tchô lâme wä bëte andjanə̈ ndə̂ Ndjapä nyîkrə rə̂ bëte andjê.»

⁴¹ Ndə̂ adɨ̂ adjisîpili lə̂ könô gbɛ̂ âsə̈ dje pö nə̈ lâme käko, su andjê kʉ̂ andjê tə̂ Jâke la Jâan.

⁴² Jezü ê andjê gbɛ̂ ndrotə̂ yê ânyë kə̈ tô rə̂ sə̈ andjê päkëdə̂: «Nyë wûnsə̂ nə̈ nə̂ pä andjanə̈ ndə̂ andjë tô rə̂ pä anyë wätə̂ agbïɛ̈ pâ azü ndə̂ andjë wâbô wâtə̂ ajuîfu, andjë mbö kümändëmä la gbôgbô pâ azü gö nə̈. Agbölö azü nə̈ mbö rə̂ ndə̂kə̂ pa azü gö wunsə̂ gbôgbô ndə̂ andjê.

⁴³ Rə nə̈ wâbo käko lə̂ gbâtə̂ nyê-a. Praâbalë âdə ngâ akrə lə̂ gbâtə̂ nyê ânyində̂ kə̂ wa gbölö, äwäpä tche watə̂ earə̂ kua ndə̂ nyê.

⁴⁴ Âdə ngâ akrə lə̂ gbâtə̂ nyê ânyində̂ kə̂ sə tə̂ küma nyê, äwäpä tche watə̂ ngbâa ndə̂ nyê gbɛ̂.

⁴⁵ Bëte Modô ndə̂ Akrə nə̂âbo ndə̂kə̂ pa azü mbo kua sə̈ tchë-a, praâbalë tche nə̈ ndə̂kə̂ mbo kua sə̈ azü lakə̂ zatə̂ yê sə̈ kuzü ndə̂kə̂ ji angbängbä azü lə̂ ngbongbo rə ndə̂ andjê.»

Jezü tchä earə̂ föla Bartimë

⁴⁶ Andjë wûtu bhâ Jerikö. Ndə̂ Jezü la adjisîpili ndə̂ yê âsə̈ wutu la ngâ gbölö kpûlû azü lə̂ gö nə̈ lâme, Bartimë, modô ndə̂ Timë, ndə̂ la yê fô, sə̂ bêche tə̂ ma köbo lakə̂ yukû rə tchânə̂ azü.

⁴⁷ Tche âsə̈ dje rə̂ pä Jezü ndə̂ Näzärête kä âkə̂ ro âtə, tche sə̂ lakə̂ ta wârə̂ päkëdə̂: «Jezü, Modô ndə̂ Davîdi, wun nyonyo mê!»

⁴⁸ Angbängbä azü hrô la tchë ndə̂kə̂ pa tche ngbo ma yê tâ, praâbalë tche kä tâ wârə̂ ngbôô päkëdə̂: «Modô ndə̂ Davîdi, wun nyonyo mê!»

⁴⁹ Jezü krʉ̂-ê, kə̈ tô rə̂ päkëdə̂: «Nyë ë tchë.» Andjë ê earə̂ föla nə̈ kə̈ tô rə̂ sə̈ tchë päkëdə̂: «Su zə̈ zɨ̈-î, alafô-ê! Tche kä lakə̂ e mö.»

⁵⁰ Tche yî gbölö lə̂ba zɨ ndə̂ yê ëbêche, kə̈ kû, kə̈ krʉ̂ lafô ânyë kə̈ ê pu Jezü.

⁵¹ Jezü yû tchë päkëdə̂: «Mo nyïndə̂ nə̈ pä më mbo giamâ tə̂ zə̈?» Earə̂ föla nə̈ tô rə̂ sə̈ tchë päkëdə̂: «Earə̂ kə̂ nyisə̂ rə, amö mbo rə̂ ânyë mê kä wun tchô.»

⁵² Jezü tô rə̂ sə̈ tchë päkëdə̂: «Gûgü! Kə̂ za su zə̈ sə̈ mê tchâ mö nə̂.» Posə̂nə̈ earə̂ föla nə̈ kä wûn tchô ânyë kə̈ sə̂ lakə̂ za tchêngbâ Jezü pâ köbo.