Mâreke 1 - Mbëtï Ndjapä: TÄFO MADƗ̈

Jâan-Batîse mü pö Ndjapä

¹ Tchôtchô Pö ndə̂ Jezü Krîsiti Modô ndə̂ Ndjapä tö tchâtə.

² A mbö rə̂ lə̂ Mbëtï ndə̂ earə̂ ndə̂ma Ndjapä Ezayï päkëdə̂: Ndjapä tö rə̂ päkëdə̂: «Mê wan-adje ngâ earə̂ kua ndə̂ mê dokʉ̈tchê tə̂ zə̈ ndə̂kə̂ nyikrə köbo zə̈.

³ Tchə̂lə̂ gɨ̈ akrə lâme kä ndə̂ a djê rə̂ bhâlə̂ kpaɛ̈gâ päkëdə̂: Nyë nyïkrə köbo Gbölö Gbïɛ̈ Nyë nyïkrə köbo yê ngbêwôn!»

⁴ Käko Jâan-Batîse ê kə̈ wûtu bhâlə̂ kpaɛ̈gâ lakə̂ mu pö sə̈ azü päkëdə̂: «Nyë gbötə̂ bəndɨ kə̂ mbo rə ndə̂ nyê, kə̂ gbo batɛ̂me, Ndjapä ko pö lə̂ küma nyê!»

⁵ Azü lə̂ agö ndə̂ Judë gbɛ̂ la azü gö ndə̂ Jerûzalêmo gbɛ̂ nə̂ pu Jâan. Andjë tösə̂ angbongbo rə ndə̂ andjê ësûwu, ânyë Jâan zâ batɛ̂me sə̈ andjê lə̂ ngû ndə̂ Jurudɛ̈n.

⁶ Jâan yü lə̂ba ndə̂ a mbô rə̂ la su kʉ̂tê gia ndə̂ rə̈ yê wû pä chamö. Tche ï wû ndə̂ âwâ la kpoto gia pâ lə̂ba ndə̂ yê. Kɨ̈zɨ̂ ndə̂ yê də̈ kütû agölô la jrôâ awrʉ̂âtro.

⁷ Tche mü pö sə̈ azü päkëdə̂: «Ngâ akrə ndə̂ tche wâ la gbôgbô kə̈ rô mê ânəadje la tchêngbâ mê, më ndôâbo la sə̂ yê ndə̂kə̂ ndra ânyë kə̂ zu wû dakpo tə̂ da yê-a.

⁸ Mëmê, më zä batɛ̂me ndə̂ ngû sə̈ nyê, praâbalë tchetchë, tchê zadje batɛ̂me ndə̂ Kpɨ̂ki Yingö sə̈ nyê.»

Jezü gbö batɛ̂me

⁹ Käko Jezü tô bhâ Näzärête ngâ gö ndə̂ Galilë, ânyë Jâan zâ batɛ̂me sə̈ tchë lə̂ ngû ndə̂ Jurudɛ̈n.

¹⁰ Ndə̂ tche âsə̈ wutu lə̂ ngû nə̈, kə̈ wûn tchêlafô ndə̂ âvrôtə̂ yê, Kpɨ̂ki Yingö jrê pâ yê batə̂ grôgrô puli.

¹¹ A djê tchə̂lə̂ ngâ gɨ̈ bhâ lafô päkëdə̂: «Mo də̈ Modô ndə̂ mê ndə̂ më nyîndə̂ zə̈ tə̂ gbölösə̂nə̈, su mê fü la mö gbɛ̂.»

Jâbolo bölo Jezü bhâlə̂ kpaɛ̈gâ

¹² Kpro kâkë, Kpɨ̂ki Yingö tôngo Jezü kə̈ ê la tchë atə̂lə̂ kpaɛ̈gâ.

¹³ Jezü sə̂ bhâye lə̂ lö tə̂ azü bïchuû. Satäa vû tchë lə̂ alö nə̈ lâme, tche sə̂ la agia sə̂nə̈ balë ânyë aânje nə̂ kə̈ mbô rə̂ la tchë.

Jezü mü Tchôtchô Pö bhâ Galilë

¹⁴ La tchêngbâ nə̈ ndə̂ a yî Jâan bhâlə̂ nda kânga, Jezü ê atə̂ Galilë kə̈ mû Tchôtchô Pö ndə̂ Ndjapä sə̈ azü.

¹⁵ Tche tö rə̂ päkëdə̂: «Lo nə̈ tâ tâ nə̂, Gbölö gö-gbïɛ̈ ndə̂ Ndjapä ndô nə̂. Nyë gbötə̂ bəndɨ kə̂ mbo rə ndə̂ nyê kə̈ gamba Tchôtchô Pö ndə̂ Ndjapä!»

¹⁶ Ndə̂ tche âsə̈ ro tə̂ maga gbölö kpakpa ngû ndə̂ Galilë, tche wûn Chemön la yîngâ yê Anderë ndə̂ andjë sə̂ lakə̂ yi gbânda ndə̂ andjê, bëte andjë də̈ a-earə̂ kə̂ pu agiangû.

¹⁷ Jezü tô rə̂ sə̈ andjê päkëdə̂: «Nyë nə̈ ngbâ mê, mê mboadje rə̂ pä nyë watə̂ a-earə̂ kə̂ pu azü.»

¹⁸ Kpro la tchêngbâ nə̈, andjë gbôtə̂ gbânda ndə̂ andjê kə̈ zâ tchêngbâ yê.

¹⁹ Jezü ê atə̂ tchâtchu nə̈ kpîɛ̂kpîɛ̂ rə̂, kə̈ wûn Jâke modô ndə̂ Zebede la yîngâ yê Jâan ndə̂ andjë sə̂ lə̂ külû lakə̂ sɨ sə̂ gbânda ndə̂ andjê.

²⁰ Kpro la tchêngbâ nə̈, tche ê andjê. Andjë gbôtə̂ bha andjê Zebede la a-earə̂ kua ndə̂ andjê lə̂ külû nə̈, ânyë kə̈ zâ tchêngbâ yê.

Jezü nyïsə̂ gbôgbô ndə̂ yê bhâ Käpërënäyûmo

²¹ Jezü la adjisîpili ndə̂ yê ê atə̂lə̂ gö ndə̂ Käpërënäyûmo. Lə̂ lö sabäa, Jezü lî bhâlə̂ nda kə̂ voga Ndjapä ndə̂ ajuîfu kə̈ sə̂ lakə̂ nyisə̂ rə.

²² Tchə̂lə̂ küma azü nə̈ gbɛ̂ djîngɨli lə̂ köbosə̂ kə̂ nyisə̂ rə ndə̂ yê, bëte tche nyîâbo sə̂ rə batə̂ a-earə̂ kə̂ nyisə̂ ndïɛ̈-a, tche nyïsə̂ rə la gbôgbô.

²³ Sə̂nə̈ lâme, ngâ köchë ndə̂ tche wâ la ngbongbo tchozö lî lə̂ nda kə̂ voga Ndjapä ndə̂ ajuîfu nə̈, kə̈ sə̂ lakə̂ ta wârə̂ päkëdə̂:

²⁴ «Giamâ mo nyîndə̂ nə̈ tə̂ ârâ, Jezü akrə gö ndə̂ Näzärête, mo nə̈ ndə̂kə̂ won ârâ wön? Më wûnsə̂ zə̈ nə̂ gbɛ̂: Mo wä ngbî kə̈ dâka gbɛ̂, ndə̂ Ndjapä wân mö.»

²⁵ Jezü hrô la tchë la gbôgbô, kə̈ tô rə̂ sə̈ tchë päkëdə̂: «Ngbo ma zə̈ tâ! Kə̈ wûtu lə̂ köchë âtə-ê!»

²⁶ Ngbongbo tchozö lâme tâ wârə̂, kə̈ nyôânyoa köchë nə̈ la gbôgbô, ânyë kə̈ wûtu lə̂ yê-ê.

²⁷ Tchə̂lə̂ küma azü nə̈ gbɛ̂ djîngɨli, andjë sə̂ lakə̂ yutə̂ andjê lə̂ gbâtə̂ andjê päkëdə̂: «Rə âtə wä atöko? Ngâ täfo kə̂ nyisə̂ rə la gbôgbô ndə̂ Ndjapä! Köchë âtə tö pö la gbôgbô sə̈ angbongbo atchozö, andjë djê tchë-o!»

²⁸ La tchêngbâ nə̈, pö ndə̂ Jezü zâ tchə̂lə̂ agö ndə̂ Galilë gbɛ̂.

Jezü tchä a-earə̂ tə̂kömbô kə̂ grô angbongbo atchozö

²⁹ Ndə̂ andjê âsə̈ wutu lə̂ nda kə̂ voga Ndjapä ndə̂ ajuîfu nə̈, Jezü la Jâke la Jâan ê atə̂ tchâalê ndə̂ Chemön la Anderë.

³⁰ Dëkë ɛ̈chë-mbïɛ̈ Chemön lô nə̂ ëbêche, tche wä la tə̂kömbô ndə̂ zɨ, kpro la tchêngbâ nə̈ a tô pö ndə̂ yê sə̈ Jezü.

³¹ Jezü gîtə̂ yê ndola tchë, kə̈ zâ könô yê ânyë kə̈ kênga tchë ëlafô. Tə̂kömbô nə̈ gbôtə̂ yê ânyë tche sə̂ lakə̂ mbo kɨ̈zɨ̂ sə̈ andjê.

³² La tchêndə̂gölo, ndə̂ tchô jêtə̂ kə̂ bu, azü kʉ̂ a-earə̂ tə̂kömbô gbɛ̂, la andjanə̈ ndə̂ andjë wâ la angbongbo atchozö, kə̈ nə̂ la andjê pu Jezü.

³³ Azü lə̂ gö nə̈ gbɛ̂ pâlatə̂ andjê tchâtchu nda nə̈.

³⁴ Jezü tchâ a-earə̂ tə̂kömbô ngbî ngbî lâme tə̂ gbölösə̂nə̈, kə̈ grô ndjë angbängbä angbongbo atchozö. Tche gbôâbo tə̂ angbongbo atchozö nə̈ pä andjë po-a, bëte andjë wûnsə̂ yê nə̂.

Jezü mü pö bhâ Galilë

³⁵ Po mbatchâ, ndə̂ gbô tchô ndə̂po lakə̂ bu, Jezü âlafô kə̈ wûtu tchâalê nə̈, kə̈ ê bhâlə̂ kpaɛ̈gâ, ânyë kə̈ sə̂ lakə̂ to pö sə̈ Ndjapä bhâye.

³⁶ Chemön la araagü nə̈ ê ndə̂kə̂ pu tchë.

³⁷ Ndə̂ andjë âsə̈ gbo tchë, kə̈ tô rə̂ sə̈ tchë päkëdə̂: «Azü gbɛ̂ kä lakə̂ pu mö.»

³⁸ Jezü tô rə̂ sə̈ andjê päkëdə̂: «Azə̈ êë atə̂lə̂ angâ ayɛ̈yɛ̈ gö ndə̂ âwâ po ndrotə̂ azə̂, ndə̂kə̂ pa më mu ndjë Tchôtchô Pö ndə̂ Ndjapä bhâye. Bëte rə lâme kä ndə̂ më nə̂ ndə̂nə̈.»

³⁹ Käko Jezü ê kulə̂ anda kə̂ voga Ndjapä ndə̂ ajuîfu ndə̂ âwâ lə̂ agö ndə̂ Galilë gbɛ̂, kə̈ mû Tchôtchô Pö ndə̂ Ndjapä, kə̈ grô angbongbo atchozö.

Jezü tchä ngâ earə̂ broma

⁴⁰ Ngâ earə̂ broma nə̂ ndola Jezü, kə̈ gʉ̂te tchâtchâ yê kə̈ dɨ̂ tchə̂lə̂ ma yê sə̈ tchë päkëdə̂: «Âdə mo ânyində̂ nə̈ kə̂ mbo rə̂ pä tə̂ mê daka.»

⁴¹ Nyonyo yê mbô Jezü, tche yî könô yê kə̈ grʉ̂ tchë, kə̈ tô rə̂ sə̈ tchë päkëdə̂: «Më nyîndə̂ nə̈ nə̂, äwäpä tə̂ zə̈ daka-ê.»

⁴² Posə̂nə̈, broma nə̈ gbôtə̂ yê ânyë tə̂ yê dâka-ê.

⁴³ Pânə̈ Jezü hrô la tchë tə̂ kïkï nə̈ ânyë kə̈ grô tchë.

⁴⁴ Tche tô rə̂ sə̈ tchë päkëdə̂: «Amö toabô rə̂ tô sə̈ ngâ akrə balë-ê, praâbalë amö e kə̂ matə̂ zə̈ sə̈ earə̂ kə̂ wa ngela sə̈ Ndjapä, kə̂ kʉ arə ngela ndə̂ Möyîze tô pö ndə̂nə̈ alême, käko mo nyisə̂ nə̈ lə̂ la azü gbɛ̂ pä tə̂ zə̈ dâka nə̂.»

⁴⁵ Praâbalë köchë lâme gîtə̂ yê kpro kâkë, kə̈ sə̂ lakə̂ on la pö nə̈, kə̈ tô pö ndə̂nə̈ sə̈ azü gbɛ̂. Ädə̈ käko ânyë Jezü kä wâbo ndə̂kə̂ li lə̂ angâ agö lə̂ la azü-a, praâbalë tche ê atə̂lə̂ kpaɛ̈gâ. Azü nə̂ pu tchë kulə̂ atchô gbɛ̂.