Lûke 24 - Mbëtï Ndjapä: TÄFO MADƗ̈

Kə̂ jo ndə̂ Jezü lə̂ kuzü

¹ Po mbatchâ lə̂ dɨmâche, aɛ̈chë kʉ̂ yömbö la kâdâ ndə̂ andjë nyikrə rə̂, kə̈ ê la rə̂ atə̂pâ cho Jezü.

² Andjë gbô täme ndə̂ a tchû manda cho kuzü Jezü la rə̂ lâme, dëkë a rô rə̂ nə̂ bhâchï.

³ Andjë lî bhâlə̂ nə̈, praâbalë kə̈ gbôâbo krʉkrʉ Gbölö Gbïɛ̈ Jezü-a.

⁴ Andjë wûn-âbo sə̂ pö ndə̂ andjë to rə̂-a, kpro kâkë, angâ aköchë bïchuû wûtu kpô tchâtchu andjê, lə̂ba ndə̂ andjê tä batə̂ lo.

⁵ Wawa mbô aɛ̈chë lâme, andjë chî la andjê tə̂ cho, aköchë lâme tô rə̂ sə̈ andjê päkëdə̂: «Bëte giamâ kä ndə̂ nyê pu akrə ndə̂ tche sə̂ la tʉ̈rʉ̂ la yê bhâlə̂ cho akuzü?

⁶ Tche sə̂âbo tchâtə-a, tche jô nə̂. Nyë rɨ̈ tchə̂lə̂ nyê tə̂ pö ndə̂ tche tô rə̂ sə̈ nyê alême, ndə̂ gbô tchë ndə̂po bhâ Galilë, tche tö rə̂ alême päkëdə̂:

⁷ ‹Äwäpä a gbotə̂ Modô ndə̂ Akrə tchânə̂ a-earə̂ ngbongbo rə, a âbhiadje tchë tə̂ yö ndə̂ gba, lə̂ vötaâ lö nə̈, tchê joadje lə̂ kuzü.›»

⁸ Sə̂ pö ndə̂ Jezü tô rə̂ alême tê lə̂ andjê.

⁹ Andjë tô bhâsə̂ ma cho nə̈ kə̈ gû gutə̂, kə̈ tô pö ndə̂ arə lâme gbɛ̂ sə̈ adjisîpili ndə̂ Jezü lə̂ könô gbɛ̂ tchêpâ nə̈ balë, la adɨ̂sə̂ azü nə̈ gbɛ̂.

¹⁰ Aɛ̈chë nə̈ lâme də̈: Malê akrə gö ndə̂ Magadalä la Jâne la Malê anyï Jâke, la angâ aɛ̈chë ndə̂ andjë sə̂ ëtə̂ kʉ̂tê andjê, andjë tô ndjë gbôgbô pö nə̈ lâme sə̈ abadjângele.

¹¹ Praâbalë abadjângele nə̈ wûntî pä pö lâme wätə̂ mbämbä pö, kə̈ kôsə̂ kə̂ gamba pö ndə̂ andjê lâme-ê.

¹² Käko Pîêre âlafô kə̈ kpë atə̂ ma cho nə̈, kə̈ tê kprôô atə̂lə̂ cho nə̈, kə̈ wûn kütû angrɨ̈ngrɨ̈ ma lə̂ba ndə̂ a gʉ̂â kuzü Jezü la rə̂; tche kâ atə̂ndə̂ yê, tchə̂lə̂ küma yê djîngɨli tə̂ rə ndə̂ âmbô lâme.

Jezü mätə̂ yê tə̂ adjisîpili bïchuû ndə̂ Ëmäyûse

¹³ Kpô lo nə̈ lâme, angâ adjisîpili ndə̂ Jezü bïchuû sə̂ lakə̂ e atə̂lə̂ ngâ yɛ̈yɛ̈ gö ndə̂ rə̈ nə̈ wü pä Ëmäyûse ndə̂ âgû la Jerûzalêmo kïlömɛ̂tere lə̂ könô gbɛ̂ tchêpâ nə̈ balë.

¹⁴ Andjë sə̂ lakə̂ to pö ndə̂ rə ndə̂ âmbô lâme lə̂ gbâtə̂ andjê.

¹⁵ Ndə̂ andjë sə̂ lakə̂ to pö lə̂ gbâtə̂ andjê lakə̂ yutə̂ andjê, Jezü la tə̂ yê nə̂ ndola andjê kə̈ pâla la andjê balë pâ köbo nə̈.

¹⁶ Andjë kä lakə̂ wun tchë, mo wüntî pä ngâ rə kä ndə̂ âgʉ̂â la andjê ndə̂kə̂ pa andjë wun-abô sə̂ yê wûn-î.

¹⁷ Jezü yû andjê päkëdə̂: «Pö giamâ kä ndə̂ nyê to rə̂ lə̂ gbâtə̂ nyê lakə̂ nə la rə̂ âtə?» Andjë krʉ̂-ê, nyonyo zâ andjê gbɛ̂.

¹⁸ Ngânə̈ balë lə̂ gûtə̂ andjê ndə̂ rə̈ yê wü pä Këlëwöpâse tô rə̂ sə̈ tchë päkëdə̂: «Kütû momö balë lə̂ Jerûzalêmo kä ndə̂ âwûn-âbô sə̂ arə ndə̂ âmbô lə̂ alö âtə wûn-î?»

¹⁹ Jezü yû andjê päkëdə̂: «Rə giamâ kä ndə̂ âmbô?» Andjë tô rə̂ sə̈ tchë päkëdə̂: «Rə ndə̂ âmbô tə̂ Jezü, akrə gö ndə̂ Näzärête, earə̂ ndə̂ma Ndjapä ndə̂ tche mbô gbôgbô rə kə̈ tô gbôgbô pö tchâtchu Ndjapä la azü gö gbɛ̂.

²⁰ Agbölö a-earə̂ kə̂ wa ngela sə̈ Ndjapä la amakündji gö ndə̂ azə̂ zâ tchë pä a wa ngbanga kuzü pâ yê, kə̈ bhî tchë tə̂ yö ndə̂ gba.

²¹ Ârâ wüntî pä tche kä ndə̂ Ndjapä wân tchë ndə̂kə̂ ji azü ndə̂ Isarayële lə̂ ngbâa. Praâbalë lə̂ rə lâme gbɛ̂, âmbô rə̂ nə̂ lö vötaâ angêta âtə ndə̂ arə nə̈ mbô.

²² Angâ aɛ̈chë lə̂ gbâtə̂ ârâ tö ngâ pö ndə̂ tchə̂lə̂ küma ârâ djîngɨli tâ. Po mbatchâ âtə, andjë ê bhâ ma cho nə̈,

²³ kə̈ gbôâbo krʉkrʉ Jezü nə̈-a. Andjë kângbâ andjê kə̈ tô rə̂ sə̈ ârâ pä, aânje wütu kpô tchâtchu anyê, kə̈ tô rə̂ sə̈ anyê pä Jezü kä la tʉ̈rʉ̂ la yê.

²⁴ Angâ araagü ârâ ê bhâ ma cho nə̈, kə̈ wûn ndjë rə nə̈ batə̂ rə̂ ndə̂ aɛ̈chë lâme tô rə̂, praâbalë andjë wûn-âbo Jezü nə̈-a!»

²⁵ Käko Jezü tô rə̂ sə̈ andjê päkëdə̂: «Nyënyê ndə̂ azü ndə̂ küma nyê wâbô wâ lanə̈ âtə, pö gbɛ̂ ndə̂ a-earə̂ ndə̂ma Ndjapä tô rə̂ alême, nyë gâmbabô rə̂ gasa-a!

²⁶ Âwâbo la köbo nə̈ pä Krîsiti wun yûkü dokʉ̈tchê ânyë kə̂ gbo voga ndə̂ yê?»

²⁷ Pânə̈ Jezü jêtə̂ kə̂ nyisə̂ pö ndə̂ a mbô rə̂ lə̂ Mbëtï ndə̂ Ndjapä gbɛ̂ la rə̈ yê, ätö tə̂ a-Mbëtï ndə̂ Möyîze ndjoa ëtə̂ a-Mbëtï ndə̂ a-earə̂ ndə̂ma Ndjapä gbɛ̂.

²⁸ Ndə̂ andjë wûtu ndola yɛ̈yɛ̈ gö nə̈ ndə̂ andjë nyîndə̂ kə̂ e atə̂lə̂ nə̈, Jezü mbô rə̂ âwûntî pä tche ârô rö etə̂.

²⁹ Praâbalë andjë kîtə̂ yê, kə̈ tô rə̂ päkëdə̂: «Azə̈ sə̈ la mö tchâtə, bëte lo zɨ̂ nə̂, tchô kä lakə̂ bu.» Tche lî kə̈ sə̂ bhândə̂ andjê.

³⁰ Ndə̂ andjë sə̂ lakə̂ zɨ kɨ̈zɨ̂, Jezü zâ mâpa, kə̈ ê tchôtchô pö pânə̈, kə̈ tchô tchə̂lə̂ nə̈, kə̂ krʉ̂ tchə̂lə̂ nə̈ tə̂ andjê.

³¹ Posə̂nə̈, la andjê vrô-ê, andjë wûnsə̂ yê, praâbalë Jezü yû lə̂ la andjê.

³² Andjë tô rə̂ lə̂ gbâtə̂ andjê päkëdə̂: «Ndə̂ tche sə̂ âme lakə̂ to pö sə̈ azə̂ pâ köbo, ânyë kə̈ nyîsə̂ pö Ndjapä lâme, su azə̂ sə̂âbo âme lakə̂ ta lə̂ azə̂?»

³³ Po pânə̈, andjë âlafô kə̈ dôtə̂ andjê atə̂ Jerûzalêmo. Andjë gbô adjisîpili ndə̂ Jezü lə̂ könô gbɛ̂ tchêpâ nə̈ balë la angâ andjê ndə̂ andjë pâlatə̂ andjê la andjê.

³⁴ Andjë tô rə̂ sə̈ adjisîpili bïchuû ndə̂ Ëmäyûse lâme päkëdə̂: «Gbölö Gbïɛ̈ jô nə̂ tə̂ lëge nə̈. Chemön wûn tchë nə̂.»

³⁵ Adjisîpili ndə̂ Jezü bïchuû lâme tô pö ndə̂ rə ndə̂ andjë wûn rə̂ pâ köbo, la köbo ndə̂ andjë wûnsə̂ Jezü ndə̂ tche tchô tchə̂lə̂ mâpa tə̂ andjê.

Jezü mätə̂ yê tə̂ adjisîpili ndə̂ yê

³⁶ Ndə̂ andjë sə̂ lakə̂ to pö nə̈ käko, Jezü wûtu kə̈ krʉ̂ lə̂ gûtə̂ andjê, kə̈ tô rə̂ sə̈ andjê päkëdə̂: «Nyë sə̈ la zɨtɨ su!»

³⁷ Wawa mbô andjê, ânyë andjë sə̂ lakə̂ gugu, bëte andjë wüntî pä anyë wûn ngâ tchozö nə̂.

³⁸ Praâbalë Jezü yû andjê päkëdə̂: «Bëte giamâ kä ndə̂ wawa mbo nyê? Bëte giamâ kä ndə̂ nyê dɨ su nyê?

³⁹ Nyë wünsa tchânə̂ mê la ada mê. Mëmê kä tə̂ lëge nə̈! Nyë grʉ̈ kpoto mê kə̈ wûn rə̂, ngâ tchozö wâbo la mbë yê tâ âdəndjë gbäbï batə̂ andə̂ me nə̈ âtə-a.»

⁴⁰ Tche tö pö lâme kə̈ mâ tchânə̂ yê la da yê tə̂ andjê.

⁴¹ Ndə̂ andjë wâ la gbölö mômô, andjë gâmbabô rə ndə̂ âmbô lâme-a, ânyë tchə̂lə̂ küma andjê gbɛ̂ djîngɨli. Jezü tô rə̂ sə̈ andjê päkëdə̂: «Nyë kä la ngâ rə ndə̂kə̂ zɨ rə̂ tchâtə?»

⁴² Andjë zâ ngâ ndöma giangû ndə̂ a zô rə̂ sə̈ tchë.

⁴³ Tche zâ rə̂ kə̈ zɨ̂ rə̂ tchâtchu andjê gbɛ̂.

⁴⁴ Pânə̈ Jezü tô rə̂ sə̈ andjê päkëdə̂: «Ndə̂ gbô mê ndə̂po lə̂ gûtə̂ nyê alême, më tö rə̂ sə̈ nyê päkëdə̂: Pö gbɛ̂ ndə̂ a tô rə̂ la rə̈ mê lə̂ Mbëtï ndə̂ Möyîze, lə̂ Mbëtï ndə̂ a-earə̂ ndə̂ma Ndjapä ndjë lə̂ Apösômo, äwäpä arə nə̈ mbo gundə̂sə̂ nə̈.»

⁴⁵ Käko tche jî köbo kə̂ wunsə̂ rə sə̈ andjê ndə̂kə̂ pa andjë dje tchə̂lə̂ pö lə̂ Mbëtï Ndjapä.

⁴⁶ Tche tô rə̂ sə̈ andjê päkëdə̂: «A mbö rə̂ lə̂ Mbëtï Ndjapä alême päkëdə̂: Äwäpä Krîsiti wun yûkü ânyë kə̂ jo lə̂ kuzü lə̂ lö vötaâ nə̈.

⁴⁷ Äwäpä a mu pö la rə̈ yê katchôgbɛ̂, ätö bhâ Jerûzalêmo ndjoa ëtə̂ azü tchêbêche gbɛ̂, ndə̂kə̂ pa andjë gbotə̂ bəndɨ kə̂ mbo rə ndə̂ andjê, ânyë Ndjapä ko pö lə̂ küma andjê.

⁴⁸ Nyë wätə̂ azü ndə̂ nyë wûn arə nə̈ lâme la lala nyê, ânyë kə̈ djê rə̂ la tü nyê.

⁴⁹ Andə̂ me nə̈, më âwan rə ndə̂ Bha mê zâ bâlâ nə̈ tə̂ nyê lâme. Käko äwäpä nyë sə lə̂ gö nə̈ tchâtə zoo ëtə̂ lo nə̈ ndə̂ nyê gbo gbôgbô ndə̂ âtô bhâ lafô.»

Jezü kënga atə̂ lafô

⁵⁰ Pânə̈ Jezü kʉ̂ andjê, kə̈ wûtu la andjê lə̂ gö nə̈, kə̈ rô la andjê lə̂ köbo atə̂ Betanï. Tchâme, tche kênga könô yê atə̂ lafô, ânyë kə̈ ê tchôtchô pö pâ andjê.

⁵¹ Ndə̂ tche âsə̈ e tchôtchô pö pâ andjê, tche krʉ̂ tchə̂lə̂ tə̂ yê la andjê, ânyë a kênga la tchë atə̂ lafô.

⁵² Andə̂ andjë nə̈, andjë gʉ̂te tchâtchâ yê lakə̂ voga tchë, ânyë kə̈ gû atə̂ Jerûzalêmo la gbölö mômô tə̂ su andjê.

⁵³ Andjë sə̈ tchê logbɛ̂ bhâlə̂ gbölö nda Ndjapä, lakə̂ vöga Ndjapä.