Lûke 23 - Mbëtï Ndjapä: TÄFO MADƗ̈

A ë la Jezü atə̂ tchâtchu Pïlâte

¹ Azü nə̈ gbɛ̂ âlafô, kə̈ ê la Jezü atə̂ tchâtchu Pïlâte.

² Bhâye, andjë jêtə̂ kə̂ yi apö lə̂ küma yê päkëdə̂: «Ârâ gbö köchë âtə ndə̂ tche sə̂ lakə̂ mbo rə̂ pä azü alafô la pö tə̂ agbölö azü gö ndə̂ azə̂. Tche kïtə̂ köbo tə̂ azü ndə̂kə̂ pa andjë kʉ makətche-lapöo ndə̂ andjê sə̈ gbölö gbïɛ̈ Sezäre, ânyë kə̈ tô rə̂ pä anyë də̈ Krîsiti, ndə̂ anyë wâtə̂ gbïɛ̈.»

³ Pïlâte yû Jezü päkëdə̂: «Momö, mo wätə̂ gbïɛ̈ ndə̂ ajuîfu?» Jezü tô rə̂ ndə̂nə̈ sə̈ tchë päkëdə̂: «Momö la tə̂ zə̈ kä ndə̂ âtô rə̂.»

⁴ Käko Pïlâte tô rə̂ sə̈ agbölö a-earə̂ kə̂ wa ngela sə̈ Ndjapä, ndjë la kpûlû azü nə̈ päkëdə̂: «Më gbôâbo ngâ pö lə̂ küma köchë âtə balë ndə̂ âkʉ̂sə̂ nə̈ pä më wa ngbanga kuzü lə̂ küma yê-a.»

⁵ Praâbalë gbô azü nə̈ ndə̂po lakə̂ yi pö lə̂ küma yê päkëdə̂: «Tche sə̈ lakə̂ mbo rə̂ pä azü alafô la pö lə̂ köbosə̂ kə̂ nyisə̂ rə ndə̂ yê. Tche jëtâ bhâ Galilë, kə̈ ê la rə̂ lə̂ agö ndə̂ Judë gbɛ̂ zoo, kə̈ wûtu la rə̂ tchâtə.»

A ë la Jezü atə̂ tchâtchu Hërôde

⁶ Ndə̂ Pïlâte djê pö lâme, tche yûkû nə̈ päkëdə̂: «Köchë âtə də̈ akrə gö ndə̂ Galilë?»

⁷ Ndə̂ Pïlâte djê rə̂ pä Jezü də̈ akrə pâ cho ndə̂ Hërôde wâtə̂ goverenëre pânə̈, Pïlâte wân Jezü sə̈ Hërôde ndə̂ tche sə̂ ndjë bhâ Jerûzalêmo lə̂ alö nə̈ lâme.

⁸ Ndə̂ Hërôde wûn Jezü, su yê wâ la mômô; bëte gasa alême kä ndə̂ tche djê pö ndə̂ Jezü, kə̈ nyîndə̂ kə̂ wun tchë la lala yê. Hërôde nyïndə̂ nə̈ pä Jezü mbo ngâ kpɨ̈ngbɨ̈ rə anyë wûn rə̂.

⁹ Tche yû Jezü la angbängbä apö, praâbalë Jezü tôâbo ngâ pö balë ndə̂nə̈ sə̈ tchë-a.

¹⁰ Agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ kä ndjë tâ, andjë sə̂ lakə̂ yi agbôgbô apö lə̂ küma Jezü.

¹¹ Käko Hërôde la aturûgu ndə̂ yê mbô rə ganô tə̂ yê, kə̈ mô tchë. Pânə̈ andjë yû ngâ tchôtchô lə̂ba ëtə̂ yê, kə̈ wân tchë pu Pïlâte.

¹² Tə̂ lo nə̈ lâme, Hërôde la Pïlâte ndə̂ andjë kôsə̂ angâ andjê dokʉ̈tchê alême, andjë mbôtə̂ andjê tə̂ araagü-î.

A wä ngbanga kuzü pâ Jezü

¹³ Pïlâte pâla agbölö a-earə̂ kə̂ wa ngela sə̈ Ndjapä, la amakündji la azü gö nə̈,

¹⁴ ânyë kə̈ tô rə̂ sə̈ andjê päkëdə̂: «Nyë nə̈ la köchë âtə sə̈ mê, kə̈ tô rə̂ pä tche kä lakə̂ mbo rə̂ pä azü alafô la pö. Nyë wün rə̂! Më yü tchë kpô tchâtchu nyê, kə̈ gbôâbo ngâ pö balë ndə̂ âkʉ̂sə̂ nə̈ pä më wa ngbanga kuzü lə̂ küma yê-a.

¹⁵ Hërôde ndjë gbɛ̂ gbôâbo ngâ pö lə̂ küma yê-a. Ârə̂ kä ndə̂ Hërôde wân tchë sə̈ azə̂ ëngbânə̈ âtə. Käko köchë âtə wâbo la ngâ pö balë lə̂ küma yê ndə̂ âkʉ̂sə̂ nə̈ pä a won tchë-a.

¹⁶ Më âyukû nə̈ ndə̂kə̂ pa a bhi kütû tchë la goto, pânə̈ mê gbotə̂ yê.» [

¹⁷ Logbɛ̂ ndə̂ a mbo kpülü ndə̂ Pâke, Pïlâte jï ngâ earə̂ kânga balë sə̈ azü gö nə̈.]

¹⁸ Azü nə̈ gbɛ̂ ôn ngbôô päkëdə̂: «Won köchë âtə! Kə̂ ji Bäräbâse sə̈ ârâ!»

¹⁹ A zä Bäräbâse alême kə̈ yî tchë lə̂ nda kânga, bëte rə̂ ndə̂ tche zrô azü ânyë gbölö pö âlafô lə̂ gö, ânyë tche wôn akrə lə̂nə̈.

²⁰ Batə̂ rə̂ ndə̂ Pïlâte nyîndə̂ kə̂ ji Jezü, tche kä yû azü nə̈,

²¹ andjë kä ôn ngbôô päkëdə̂: «Bhi tchë tə̂ yö ndə̂ gba! Bhi tchë tə̂ yö ndə̂ gba!»

²² Tə̂ vötaâ nə̈, Pïlâte zâ pö kə̈ tô rə̂ sə̈ andjê päkëdə̂: «Ngbongbo rə giamâ kä ndə̂ tche mbô rə̂? Më gbôâbo ngâ ngbongbo pö balë lə̂ küma yê ndə̂ âkʉ̂sə̂ nə̈ pä a won tchë-a. Më âyukû nə̈ ndə̂kə̂ pa a bhi kütû tchë la göto, kə̂ gbotə̂ yê.»

²³ Praâbalë gbô andjê ndə̂po lakə̂ on ngbôô pä a bhi kütû Jezü tə̂ yö ndə̂ gba. Ôn ndə̂ andjê nə̈ rô masə̂nə̈-ê.

²⁴ Käko Pïlâte zâma ndə̂kə̂ pa a mbo rə ndə̂ su andjê nyîndə̂ nə̈ tə̂ yê.

²⁵ Tche jî köchë ndə̂ a yî tchë lə̂ nda kânga bëte rə̂ ndə̂ tche zrô azü ânyë pö âlafô lə̂ gö, ânyë tche wôn akrə lə̂nə̈ lâme, ndə̂ azü nə̈ yûkû nə̈ pä a ji tchë lâme. Âdə andə̂ Jezü, Pïlâte gbôtə̂ yê sə̈ andjê ndə̂kə̂ pa andjë mbo rə ndə̂ su andjê nyîndə̂ nə̈ tə̂ yê.

A bhï Jezü tə̂ yö ndə̂ gba

²⁶ Ndə̂ andjë zâ Jezü kə̈ âsə̈ e la tchë, andjë tâkpa la ngâ köchë ndə̂ rə̈ yê wû pä Chemön, akrə gö ndə̂ Sïrêne, ndə̂ tche tô bhâlə̂ kɨ̈ndɨ̈ ndə̂kə̂ kangbâ yê. Andjë zâ tchë, kə̈ zâ yö ndə̂ gba nə̈ pâ kängä yê ndə̂kə̂ pa tche nə la rə̂ ngbâ Jezü.

²⁷ Ngâ gbölö kpûlû azü gö nə̈ zâ tchêngbâ Jezü, la angâ aɛ̈chë ndə̂ andjë sə̂ lakə̂ kɨ lakə̂ dɨ̈ tchə̂lə̂ ma andjê tə̂ pö ndə̂ yê.

²⁸ Jezü djêtə̂ yê pu aɛ̈chë lâme kə̈ tô rə̂ sə̈ andjê päkëdə̂: «Aɛ̈chë gö ndə̂ Jerûzalêmo, nyë kɨ̈äbô kɨ̂ tə̂ mê, nyë kɨ̈ tə̂ nyê la abechë ndə̂ nyê!

²⁹ Bëte angâ alö âwutuadje ndə̂ a toadje rə̂ päkëdə̂: ‹Mômô kä tə̂ agbâkü aɛ̈chë, la andjanə̈ ndə̂ andjë zɨ̂âbô zɨ̂ lo balë-ê, la andjanə̈ ndə̂ andjë zâbô ngo zâ ma bechë lo balë-ê.›

³⁰ Lə̂ alö nə̈ lâme, azü âtoadje rə̂ sə̈ aga päkëdə̂: ‹Te pâ ârâ!› Andjê toadje rə̂ sə̈ akoto päkëdə̂: ‹Nyë gʉ̈ä sə̂ ârâ!›

³¹ Âdə a âmbo tâ käko tə̂ bhiɛbhiɛ yö, andə̂ gbâkü yö âwa lɛ̂ɛ atöko?»

³² A kʉ̈ ndjë angâ aköchë bïchuû ndə̂ andjë wâtə̂ a-earə̂ ngbongbo rə ëtə̂ kʉ̂tê Jezü, kə̂ rô la andjê ndə̂kə̂ won andjê la tchë.

³³ Ndə̂ andjë wûtu bhâsə̂ tchô ndə̂ a ê rə̂ tâ päkëdə̂: «Sə̂ kpökrô küma», aturûgu bhî Jezü tə̂ yö ndə̂ gba, tchetchë la a-earə̂ ngbongbo rə bïchuû lâme gbɛ̂. A bhï ngânə̈ pâ ngâ yö ndə̂ gba də ndôkö, kə̈ bhî ngânə̈ balë pâ yö ndə̂ gba də gəle.

³⁴ Jezü tô rə̂ päkëdə̂: «Bha mê, amö ko pö lə̂ küma andjê-ê, bëte andjë wûn-âbo sə̂ rə ndə̂ andjë mbô rə̂ âtə-a.» Andjë tâ kʉ̂kâ ndə̂kə̂ pa änyisə̂ akrə ndə̂ tchê kʉadje alə̂ba ndə̂ Jezü, pânə̈ andjë krʉ̂ tchə̂lə̂ nə̈ tə̂ andjê.

³⁵ Azü gö nə̈ krʉ̂ ndjë tchâme lakə̂ wun rə ndə̂ âmbo. Amakündji gö ndə̂ ajuîfu sə̂ lakə̂ mo tchë lakə̂ to rə̂ päkëdə̂: «Tche tchä angâ azü lə̂ kuzü, âdə tche âwâtə̂ Krîsiti, tchanə̈ ndə̂ Ndjapä dɨ̂ tchë, äwäpä tche tcha tə̂ yê la tə̂ yê!»

³⁶ Aturûgu nə̈ ndjë gbɛ̂ sə̂ lakə̂ mo tchë, andjë nə̂ ndola tchë, kə̈ zâ kpïkpï vɛ̂n-ɛn sə̈ tchë,

³⁷ ânyë kə̈ tô rə̂ päkëdə̂: «Âdə mo âwatə̂ gbïɛ̈ ndə̂ ajuîfu, amö tcha tə̂ zə̈ la tə̂ zə̈.»

³⁸ Andjë mbö ngâ mbëtï kə̈ bhî rə̂ dəpâ küma yê päkëdə̂: «Tchanə̈ âtə də̈ gbïɛ̈ ndə̂ ajuîfu.»

³⁹ Ngâ earə̂ ngbongbo rə nə̈ balë ndə̂ a bhî tchë tə̂ yö ndə̂ gba ndrotə̂ Jezü tô rə̂ päkëdə̂: «Mo də̂âbo Krîsiti? Amö tcha tə̂ zə̈ la tə̂ zə̈, kə̂ tcha ndjë ârâ!»

⁴⁰ Praâbalë ngânə̈ lâme hrô la agü nə̈ päkëdə̂: «Mo kpêâbo wa Ndjapä? Momö ndə̂ a wâ ngbanga kuzü pâ zə̈ batə̂ tchë âtə?

⁴¹ Andə̂ azə̂ ngbanga nə̈ wä djîrə̂, bëte azə̈ wün yûkü ngbâ kə̂ mbo ngbongbo rə ndə̂ azə̂; praâbalë tchetchë ndə̂ yê nə̈, tche mbôâbo ngâ ngbongbo rə balë-a.»

⁴² Pânə̈ tche tô rə̂ sə̈ Jezü päkëdə̂: «Âdə mo âsə̈ ka ndə̂kə̂ watə̂ gbïɛ̈ pâ azü, sə̂ mê yüäbô yû tə̂ zə̈-ê!»

⁴³ Jezü tô rə̂ sə̈ tchë päkëdə̂: «Ɛn-ɛn, tə̂ lëge nə̈ më tö rə̂ sə̈ mö: Angêta âtə, mëmê la mö, azə̈ kä lə̂ paradï.»

Kə̂ tchu ndə̂ Jezü

^44-45 Ndə̂ lo wûtu lə̂ gûgû tchə̂lə̂ɛtchô, lo zâtə̂ yê wü, tchô bû pâ cho nə̈ gbɛ̂ ndjoa ëtə̂ dalo vötaâ ndə̂ tchêndə̂gölo. Lə̂ba ndə̂ a wâ tchə̂lə̂ gbölö nda Ndjapä la rə̂, tchə̂lə̂ nə̈ srô kpôlə̂ gûgû nə̈ bïchuû.

⁴⁶ Jezü ôn ngbôô päkëdə̂: «Bha mê, më zä yingö ndə̂ mê ëtchânə̂ zə̈ ngbânə̈.» La tchêngbâ pö lâme, Jezü tchû-î.

⁴⁷ Gbölö akrə ndə̂ aturûgu ndə̂ Rômo wûn arə ndə̂ âmbô lâme, tche vôga Ndjapä kə̈ tô rə̂ päkëdə̂: «Ndə̂kə̂ wun rə̂ djîrə̂, köchë âtə wätə̂ djîrə̂ akrə.»

⁴⁸ Akpûlû azü ndə̂ andjë pâlatə̂ andjê ndə̂kə̂ wun rə lâme, pânə̈ ndə̂ andjë wûn rə ndə̂ âmbô käko, andjë kʉ̂ könô andjê ë djagɨ̈ andjê lakə̂ gu ëtə̂.

⁴⁹ Araagü Jezü gbɛ̂, ndjë la angâ aɛ̈chë ndə̂ andjë tô bhâ Galilë ânyë kə̈ tê ngbâ yê, sə̂ andə̂ andjë nə̈ bhâchï ndə̂kə̂ wun rə ndə̂ âmbo.

Jozêfu chï krʉkrʉ Jezü

⁵⁰ Ngâ köchë kä tâ ndə̂ rə̈ yê wû pä Jozêfu, tche kä ndjë lə̂ gbâtə̂ agbölö azü gö nə̈. Tche däka, kə̈ wâtə̂ djîrə̂ akrə.

⁵¹ Tche wâbo lə̂ pö ndə̂ angâ yê nyîkrə rə̂, ânyë kə̈ mbô rə̂ lâme-a. Tche də̈ akrə gö ndə̂ Arimatë ndə̂ âwâtə̂ ngâ gö ndə̂ ajuîfu. Tche zä su yê pâ lo kə̂ nə ndə̂ Gbölö gö-gbïɛ̈ ndə̂ Ndjapä.

⁵² Jozêfu ê bhândə̂ Pïlâte, kə̈ yû tchë ndə̂kə̂ za krʉkrʉ Jezü.

⁵³ Tche zû tchë tə̂ yö ndə̂ gba nə̈, kə̈ gʉ̂â tchë la lə̂ba. Tche zâ tchë bhâlə̂ cho akuzü ndə̂ a djî rə̂ lə̂ täme ndə̂ a chîâbô ngâ akrə chî lə̂nə̈ dokʉ̈tchê-ê.

⁵⁴ Lö nə̈ lâme wätə̂ lö ndə̂ azü nyikrətə̂ andjê ndə̂kə̂ sə bëte lö sabäa.

⁵⁵ Aɛ̈chë ndə̂ andjë tô bhâ Galilë, ânyë kə̈ tê ngbâ Jezü lâme, andjë pâla la Jozêfu balë. Andjë ê kə̈ wûn cho kuzü nə̈, kə̈ wûn ndjë krʉkrʉ Jezü ndə̂ a nyikrə rə̂.

⁵⁶ Pânə̈ andjë kâ atə̂ndə̂ andjê kə̈ nyîkrə kâdâ la yömbö ndə̂kə̂ mbo rə̂ tə̂ krʉkrʉ Jezü. Lə̂ lö sabäa, andjë yâtə̂ andjê batə̂ rə̂ ndə̂ ndïɛ̈ nyîsə̂ nə̈.