Lûke 22 - Mbëtï Ndjapä: TÄFO MADƗ̈

Amakündji ndə̂ ajuîfu pü köbo ndə̂kə̂ won Jezü

¹ Lo kpülü ndə̂ mâpa ndə̂ djëvö wâbô wâ lə̂nə̈, ndə̂ rə̈ nə̈ wü pä Pâke sə̂ lakə̂ ndo.

² Agbölö a-earə̂ kə̂ wa ngela sə̈ Ndjapä, la a-earə̂ kə̂ nyisə̂ ndïɛ̈ pû köbo ndə̂kə̂ won Jezü, praâbalë andjë mbö wawa azü gö nə̈.

Jüdâse nyïndə̂ kə̂ yosə̂ Jezü

³ Käko Satäa lî lə̂ Jüdâse ndə̂ a ê rə̂ tə̂ yê pä Ïsïkärïyôte ndə̂ tche wâ lə̂ gûtə̂ adjisîpili ndə̂ Jezü lə̂ könô gbɛ̂ tchêpâ nə̈ bïchuû.

⁴ Jüdâse ê kə̈ nyîkrə pö la agbölö a-earə̂ kə̂ wa ngela sə̈ Ndjapä, la agbölö azü ndə̂ aturûgu ndə̂ gbölö nda Ndjapä, ndə̂kə̂ nyisə̂ köbo ndə̂ tchê yosə̂ Jezü la rə̂ sə̈ andjê.

⁵ Pö nə̈ lâme fû tə̂ andjê tə̂ gbölösə̂nə̈, andjë zâma ndə̂kə̂ kʉ makətche sə̈ tchë.

⁶ Jüdâse gâmba rə̂, ânyë kə̈ sə̂ lakə̂ pu köbo ndə̂kə̂ za Jezü sə̈ andjê, ndə̂kə̂ pa kpûlû azü nə̈ wun-abô sə̂nə̈ wûn-î.

Jezü wän adjisîpili ndə̂ yê ndə̂kə̂ nyikrə kɨ̈zɨ̂ Pâke

⁷ Lə̂ alö kpülü ndə̂ mâpa ndə̂ djëvö wâbô wâ lə̂nə̈ lâme, lö nə̈ wûtu nə̂ ndə̂kə̂ pa a won angbavö ɛ̈bro-ngbaga bëte kɨ̈zɨ̂ ndə̂ Pâke.

⁸ Käko Jezü wân Pîêre la Jâan dokʉ̈tchê ânyë kə̈ tô rə̂ sə̈ andjê päkëdə̂: «Nyë êë kə̈ nyikrə kɨ̈zɨ̂ Pâke ndə̂kə̂ pa azə̈ zɨ rə̂.»

⁹ Andjë yû tchë päkëdə̂: «Mo nyïndə̂ nə̈ pä ârâ nyikrə kɨ̈zɨ̂ nə̈ bhâ tchêbâ?»

¹⁰ Jezü tô rə̂ ndə̂nə̈ sə̈ andjê päkëdə̂: «Nyë âsə̈ li atə̂lə̂ gö nə̈, nyê takpadje la ngâ köchë ndə̂ tche zâ lüsû-ngû ë küma yê ndə̂kə̂ gu la rə̂. Nyë zä tchêngbâ yê ndjoa bhâlə̂ nda ndə̂ tchê liadje lə̂nə̈.

¹¹ Nyë tö rə̂ sə̈ earə̂ nda nə̈ päkëdə̂: ‹Earə̂ kə̂ nyisə̂ rə yü mö päkëdə̂: Tchô nə̈bâ kä ndə̂ mê zɨ kɨ̈zɨ̂ Pâke tâ la adjisîpili ndə̂ mê?›

¹² Tchê nyiadje sə̂ ngâ gbölö tchə̂lə̂ darə də lafô ndə̂ a nyîkrə arə lə̂nə̈ nə̂ gbɛ̂, lə̂ tchô nə̈ lâme kä ndə̂ nyê nyikrə kɨ̈zɨ̂ nə̈ tâ.»

¹³ Adjisîpili nə̈ ê kə̈ gbô rə nə̈ gbɛ̂ batə̂ rə̂ ndə̂ Jezü tô rə̂, ânyë andjë nyîkrə kɨ̈zɨ̂ Pâke nə̈.

Kɨ̈zɨ̂ ndə̂ Gbölö Gbïɛ̈

¹⁴ Ndə̂ dalo nə̈ âsə̈ wûtu, Jezü la abadjângele ndə̂ yê sə̂ tə̂ ma kɨ̈zɨ̂.

¹⁵ Jezü tô rə̂ sə̈ andjê päkëdə̂: «Më nyïndə̂ nə̈ tə̂ gbölösə̂nə̈ ndə̂kə̂ zɨ kɨ̈zɨ̂ Pâke âtə la nyê dokʉ̈tchê ndə̂kə̂ pa më wun yûkü!

¹⁶ Bëte më tö rə̂ sə̈ nyê, mê kä zɨ bata kɨ̈zɨ̂ âtə tee-a, zoo rə nə̈ mbo tə̂ lëge nə̈ lə̂ Gbölö gö-gbïɛ̈ ndə̂ Ndjapä.»

¹⁷ Pânə̈ Jezü zâ kangûtchi vɛ̂n-ɛn, kə̈ zâ ayîabâ sə̈ Ndjapä, ânyë kə̈ tô rə̂ päkëdə̂: «Nyë zä kangûtchi vɛ̂n-ɛn âtə kə̂ ndjo rə̂ lə̂ gbâtə̂ nyê.

¹⁸ Bëte më tö rə̂ sə̈ nyê, mê kä ndjo bata vɛ̂n-ɛn balë tee-a, ndjoa tə̂ lo kə̂ wutu ndə̂ Gbölö gö-gbïɛ̈ ndə̂ Ndjapä.»

¹⁹ Pânə̈ Jezü zâ mâpa kə̈ ê tchôtchô pö pânə̈, kə̂ tchô tchə̂lə̂ nə̈ ânyë kə̈ zâ rə̂ sə̈ andjê, lakə̂ to rə̂ päkëdə̂: «Mâpa âtə wätə̂ tə̂ mê ndə̂ a zâ rə̂ bëte nyê. Nyë mbö rə̂ logbɛ̂ ndə̂kə̂ pa sə̂ mê yuabô yû tə̂ nyê-ê.»

²⁰ Pânə̈ ndə̂ andjë zɨ kɨ̈zɨ̂ nə̈, tche zâ kangûtchi vɛ̂n-ɛn nə̈ kə̈ tô rə̂ sə̈ andjê päkëdə̂: «Kangûtchi vɛ̂n-ɛn âtə wätə̂ täfo madɨ̈ ndə̂ Ndjapä la azü, lə̂ köbosə̂ jï mê ndə̂ âtû bëte nyê.

²¹ «Praâbalë akrə ndə̂ tche yôsə̂ mê kä tchâtə lakə̂ zɨ rə la mê!

²² Tə̂ lëge nə̈, Modô ndə̂ Akrə âtchuadje lə̂ köbosə̂ rə ndə̂ Ndjapä nyîkrə rə̂, praâbalë nyonyo kä tə̂ akrə ndə̂ tche yôsə̂ yê.»

²³ Käko adjisîpili jêtə̂ kə̂ yutə̂ andjê lə̂ gûtə̂ andjê päkëdə̂: «Tchabâ lə̂ gûtə̂ ârâ âtə kä ndə̂ âwâ ndə̂kə̂ mbo rə nə̈ lâme?»

Tchabâ âwâ gbölö?

²⁴ Adjisîpili jêtə̂ kə̂ gama andjê lə̂ gbâtə̂ andjê, ndə̂kə̂ wunsə̂ akrə ndə̂ tche wâ gbölö lə̂ gûtə̂ andjê.

²⁵ Jezü tô rə̂ sə̈ andjê päkëdə̂: «Agbïɛ̈ ndə̂ azü ndə̂ andjë wâbô wâtə̂ ajuîfu mbö kümändëmä ndə̂ andjê batə̂ agbölö azü pâ azü gö ndə̂ andjê. Andjanə̈ ndə̂ andjë wâ gbölö pâ azü nə̈ nyïndə̂ nə̈ pä azü gö nə̈ e anyê pä a-earə̂ kə̂ mbo dâkâ.

²⁶ Praâbalë andə̂ nye nə̈, nyë mböäbô rə̂ mbô batə̂ andjê-ê! Akrə ndə̂ tche wâ gbölö lə̂ gûtə̂ nyê, äwäpä tche mbotə̂ yê tə̂ bechë. Akrə ndə̂ tche wâtə̂ gbölö akrə pâ nyê, äwäpä tche mbotə̂ yê tə̂ earə̂ kua.

²⁷ Lə̂ akrə ndə̂ tche sə lakə̂ zɨ kɨ̈zɨ̂ la akrə ndə̂ tche krʉ tchə̂lə̂ kɨ̈zɨ̂ nə̈, tchabâ âwâ gbölö? Akrə ndə̂ tche zɨ kɨ̈zɨ̂? Andə̂ me nə̈, më sə̈ lə̂ gûtə̂ nyê batə̂ earə̂ kua!

²⁸ Nyënyê, nyë də̈ azü ndə̂ nyê sə tchê ndrotə̂ mê lə̂ agbôgbô arə ndə̂ âgbô mê.

²⁹ Bëte rə̂ kä ndə̂ Bha mê zâ Gbölö gö-gbïɛ̈ sə̈ mê, mëmê ndjë gbɛ̂ më âza rə̂ sə̈ nyê:

³⁰ Nyê zɨadje rə, kə̂ ndjoadje rə la mê lə̂ Gbölö gö-gbïɛ̈ ndə̂ mê. Nyê səadje lə̂ angendë-gbïɛ̈ ndə̂kə̂ wa ngbanga pâ azü pâ amawo ndə̂ Isarayële lə̂ könô gbɛ̂ tchêpâ nə̈ bïchuû.»

Jezü tö rə̂ pä Chemôn-Pîêre âvuadje sə̂ anyê

³¹ Jezü tô rə̂ sə̈ Chemôn-Pîêre päkëdə̂: «Chemön, Chemön, amö dje mê! Satäa yükû nə̈ ndə̂kə̂ teke nyê batə̂ rə̂ ndə̂ a teke ndjî rəgʉ lə̂ ɛ̈ gbasa ndə̂kə̂ pa krətche nə̈ tu ngbî.

³² Praâbalë më yü Ndjapä tə̂ zə̈ ndə̂kə̂ pa mo gboabô gbôtə̂ kə̂ za su zə̈ sə̈ mê-ê. Âdə mo âka pu mê nə̂, äwäpä mo kpokpo arə̂mâ ndə̂ zə̈.»

³³ Pîêre tô rə̂ sə̈ Jezü päkëdə̂: «Gbölö Gbïɛ̈, âdə a âe la mö atə̂lə̂ nda kânga, azə̂ âe la mö, kə̂ tchu ndjë la mö.»

³⁴ Jezü tô rə̂ ndə̂nə̈ sə̈ tchë päkëdə̂: «Pîêre, më tö rə̂ sə̈ mö, angêta âtə, mô vuadje sə̂ mê sûsunə̈ vötaâ dokʉ̈tchê ndə̂kə̂ pa kö ngötö kɨ̈ angêta.»

Pö ndə̂ kədjâ-makətche, la kədjâ kɨ̈zɨ̂ la besala

³⁵ Pânə̈ Jezü kâ tô rə̂ sə̈ adjisîpili ndə̂ yê päkëdə̂: «Ndə̂ më wân nyê alême ânyë makətche wâbô wâ tchânə̂ nyê, âdəndjë kədjâ, âdəndjë dakpo, gʉ ngâ rə nyû nyê nə̂?» Andjë tô rə̂ ndə̂nə̈ päkëdə̂: «Gʉ ngâ rə balë nyûâbo ârâ-a.»

³⁶ Käko Jezü tô rə̂ sə̈ andjê päkëdə̂: «Praâbalë angaâtə, akrə ndə̂ tche wâ la makətche, äwäpä tche za rə̂ potə̂ yê, akrə ndə̂ tche wâ la kədjâ, äwäpä tche za rə̂ potə̂ yê. Akrə ndə̂ tche wâbô wâ la besala, äwäpä tche ka krʉ lə̂ba ndə̂ yê, kə̂ yo rə̂.

³⁷ Bëte më tö rə̂ sə̈ nyê: Äwäpä rə lâme mbo kpôtə̂ mê gundə̂sə̂ nə̈ ndə̂ Mbëtï Ndjapä tô rə̂ la rə̈ më päkëdə̂: ‹A dɨ̈ tchë lə̂ ma a-earə̂ kə̂ won azü.› Äwäpä pö ndə̂ Mbëtï Ndjapä tô rə̂ la rə̈ mê mbo tə̂ lëge nə̈.»

³⁸ Adjisîpili nə̈ tô rə̂ sə̈ tchë päkëdə̂: «Gbölö Gbïɛ̈, wunsa besala bïchuû kä âtə.» Jezü tô rə̂ ndə̂nə̈ sə̈ andjê päkëdə̂: «Äwä käko.»

Jezü tö pö sə̈ Ndjapä bhâlə̂ küma aga ndə̂ a-Olivï

³⁹ Jezü wûtu, kə̈ ê atə̂lə̂ küma aga ndə̂ a-Olivï batə̂ rə̂ ndə̂ tche mbo tchê rə̂ logbɛ̂. Adjisîpili ndə̂ yê zâ tchêngbâ yê.

⁴⁰ Ndə̂ tche wûtu bhâlə̂ küma aga nə̈, tche tô rə̂ sə̈ andjê päkëdə̂: «Nyë tö pö sə̈ Ndjapä ânyë kə̂ teabô tê lə̂ rə ndə̂ âbolo azü-î.»

⁴¹ Pânə̈ tche gîtə̂ yê tʉ̂rʉ tə̂ andjê gundə̂sə̂ tchô ndə̂ akrə yi täme ânyë âte tâ. Tche gʉ̂te bêche, kə̈ tô pö sə̈ Ndjapä päkëdə̂:

⁴² «Bha mê, âdə mo ânyində̂ nə̈, äwäpä mo gi kangûtchi yûkü âtə tə̂ mê bhâchï. Praâbalë amö mboabô rə̂ mbô batə̂ su mê nyîndə̂ nə̈, mbo rə̂ batə̂ su zə̈ nyîndə̂ nə̈.» [

⁴³ Käko ngâ ânje ndə̂ Ndjapä tô bhâ lafô kə̈ wûtu ndə̂kə̂ mbo rə̂ pä Jezü kpokpo tə̂ yê.

⁴⁴ Wawa mbô tchë, su yê wâ ngbɨ̂ɨ̂, tche kâ jêtə̂ kə̂ to pö sə̈ Ndjapä tə̂ gbogbôsə̂nə̈. Hûɛ̈ dôtə̂ yê batə̂ jï ânyë kə̈ sə̂ lakə̂ garɨ tə̂ yê atə̂ bêche.]

⁴⁵ Ndə̂ tche tô pö sə̈ Ndjapä nə̈ âkâ, tche âlafô kə̈ dôtə̂ yê pu adjisîpili ndə̂ yê, kə̈ gbô andjê dëkë andjë kä lakə̂ lo la nyonyo ndə̂ ârôpâ andjê.

⁴⁶ Tche tô rə̂ sə̈ andjê päkëdə̂: «Bëte giamâ kä ndə̂ nyê lo kâkë? Nyë älafô kə̈ tô pö sə̈ Ndjapä, ânyë kə̂ teabô tê lə̂ rə ndə̂ âvu azü-î.»

Agbölö azü ndə̂ ajuîfu zä Jezü

⁴⁷ Ndə̂ gbô Jezü âsə̈ to pö käko, ngâ kpûlû azü wûtu. Ngâ akrə lə̂ gûtə̂ adjisîpili ndə̂ Jezü lə̂ könô gbɛ̂ tchêpâ nə̈ bïchuû ndə̂ rə̈ yê wû pä Jüdâse, tche kä ndə̂ âsə̂ tə̂ küma kpûlû azü nə̈ lâme. Tche gîtə̂ yê ndola Jezü ndə̂kə̂ a ma yê.

⁴⁸ Jezü tô rə̂ sə̈ tchë päkëdə̂: «Jüdâse, lə̂ köbosə̂ kə̂ a ma Modô ndə̂ Akrə kä ndə̂ mo yosə̂ yê?»

⁴⁹ Adjisîpili ndə̂ Jezü wûn rə ndə̂ âmbô lâme, kə̈ yû tchë päkëdə̂: «Gbölö Gbïɛ̈, mo nyïndə̂ nə̈ pä ârâ bhi andjê la besala ndə̂ ârâ âtə?»

⁵⁰ Ngânə̈ balë lə̂ gûtə̂ andjê bhî earə̂ kua ndə̂ gbölö earə̂ kə̂ wa ngela sə̈ Ndjapä, kə̈ ngâla tü yê də ndôkö.

⁵¹ Praâbalë Jezü tô rə̂ päkëdə̂: «Nyë gbötâ, äwä käko.» Jezü grʉ̂ tü köchë lâme, tü yê dâka ëngbânə̈.

⁵² La tchêngbâ nə̈ Jezü tô rə̂ sə̈ agbölö a-earə̂ kə̂ wa ngela sə̈ Ndjapä, la agbölö azü ndə̂ aturûgu ndə̂ gbölö nda Ndjapä, la akpôkpô azü ndə̂ andjë nə̂ ndə̂kə̂ za tchë lâme päkëdə̂: «Nyë nə̈ la abesala, la agoto ndə̂kə̂ za mê batə̂ earə̂ ngbä?

⁵³ Logbɛ̂, më kä lə̂ gbâtə̂ nyê lə̂ gbölö nda Ndjapä, nyë pûâbo köbo ndə̂kə̂ za mê-a. Praâbalë lo nə̈ angêta wätə̂ andə̂ nye nə̈. Lo nə̈ tâ tâ nə̂ ndə̂kə̂ pa gbôgbô ndə̂ tchə̂lə̂ bütchî mbo kua ndə̂ yê.»

Pîêre vüsə̂ Jezü

⁵⁴ Käko andjë zâ Jezü kə̈ rô la tchë, kə̈ lî la tchë bhâ tchâalê ndə̂ gbölö earə̂ kə̂ wa ngela sə̈ Ndjapä. Pîêre sə̂ bhâchï lakə̂ nə ngbâ andjê.

⁵⁵ A ngbô wo lə̂ gûgû tchêlakpô nə̈, Pîêre sə̂ lə̂ gbâtə̂ azü ndə̂ andjë sə̂ ndro wo nə̈.

⁵⁶ Ngâ ɛ̈chë ndə̂ tche mbo kua bhâye wûn Pîêre ndə̂ tche sə̂ ndro wo nə̈. Ɛ̈chë lâme chêko tchë gbôô, kə̈ tô rə̂ päkëdə̂: «Köchë âtə wä ndjë alême tə̂ ngâ akrə ndə̂ Jezü!»

⁵⁷ Praâbalë Pîêre tô rə̂ sə̈ ɛ̈chë lâme päkëdə̂: «Yepa kä, më wûn-âbo sə̂ yê-a.»

⁵⁸ Kpro pânə̈, ngâ köchë lə̂ gûtə̂ azü lâme wûn tchë, kə̈ tô rə̂ päkëdə̂: «Momö ndjë gbɛ̂ mo də̈ ngâ akrə lə̂ gûtə̂ andjê!» Praâbalë Pîêre tô rə̂ ndə̂nə̈ sə̈ köchë lâme päkëdə̂: «Ɛ̂n-ɛ̈n! Më sə̂âbo lə̂ gûtə̂ andjê-a.»

⁵⁹ Dalo balë la tchêngbâ nə̈, ngâ köchë ngbî kä tô rə̂ päkëdə̂: «Tə̂ lëge nə̈, köchë âtə də̈ ndjë ngâ akrə ndə̂ yê, bëte tche wätə̂ akrə gö ndə̂ Galilë.»

⁶⁰ Praâbalë Pîêre tô rə̂ ndə̂nə̈ päkëdə̂: «Köchë, më wûn-âbo sə̂ pö ndə̂ mo nyîndə̂ kə̂ to rə̂ âtə-a.» Ndə̂ tche âsə̈ to pö nə̈ käko, kö ngötö kɨ̂.

⁶¹ Gbölö Gbïɛ̈ djêtə̂ yê kə̈ wûn tchə̂lə̂ la Pîêre. Käko su Pîêre tê pâ pö ndə̂ Gbölö Gbïɛ̈ tô rə̂ alême sə̈ tchë päkëdə̂: «Mô vuadje sə̂ mê sûsunə̈ vötaâ dokʉ̈tchê ndə̂kə̂ pa kö ngötö kɨ̈ angêta.»

⁶² Pîêre wûtu kə̈ kɨ̂ tə̂ gbölösə̂nə̈.

A drö Jezü, kə̈ bhî tchë

⁶³ Azü ndə̂ andjë bâta Jezü sə̂ lakə̂ mo tchë, lakə̂ bhi ndjë tchë.

⁶⁴ Andjë gʉ̈ä la yê la lə̂ba, lakə̂ yu tchë päkëdə̂: «Amö to ndə̂ma Ndjapä, tchabâ kä ndə̂ âbhî mö?»

⁶⁵ Andjë kä tô angâ apö tə̂ gbölösə̂nə̈ ndə̂kə̂ dro tchë.

A ë la Jezü atə̂ tchâtchu agbölö azü ndə̂ ngbanga

⁶⁶ Ndə̂ tchô krâ, akpôkpô azü ndə̂ azü gö ndə̂ ajuîfu, la agbölö a-earə̂ kə̂ wa ngela sə̈ Ndjapä, la a-earə̂ kə̂ nyisə̂ ndïɛ̈ pâlatə̂ andjê, ânyë kə̈ mbô rə̂ pä a ka la Jezü bhâ tchâtchu andjê,

⁶⁷ ânyë andjë yû tchë päkëdə̂: «Amö to rə̂ sə̈ ârâ, mo də̈ Krîsiti?» Jezü tô rə̂ ndə̂nə̈ sə̈ andjê päkëdə̂: «Âdə më âto rə̂ sə̈ nyê, nyê gambabô rə̂ tee-a.

⁶⁸ Âdə më âyu nyê la ngâ pö, nyê toabô pö ndə̂nə̈ sə̈ mê tee-a.

⁶⁹ Praâbalë ätö tə̂ tchô angêta, Modô ndə̂ Akrə âsəadje də ndôkö könô Ndjapä ndə̂ tche wâ la gbôgbô gbɛ̂.»

⁷⁰ Andjë gbɛ̂ yû tchë päkëdə̂: «Mo də̈ Modô ndə̂ Ndjapä?» Tche tô rə̂ ndə̂nə̈ sə̈ andjê päkëdə̂: «Nyënyê la tə̂ nyê, nyë tô rə̂ nə̂, mëmê kä.»

⁷¹ Käko andjë kä tô rə̂ päkëdə̂: «Âwâbo pä azə̈ ka krʉ̂ bëte pö lə̂ ma ngâ akrə-a. Azəzə̂ la tə̂ azə̂, azə̈ djê pö nə̈ lə̂ ma yê nə̂.»