Kölôse 4 - Mbëtï Ndjapä: TÄFO MADƗ̈

¹ A-earə̂ angbâa, nyë mbö djîrə̂ rə tə̂ angbâa ndə̂ nyê la rə ndə̂ âwâ lə̂ köbo nə̈. Äwäpä nyë wunsə̂ nə̈ pä nyë kä ndjë la earə̂ nyê tâ bhâ lafô.

Adɨ̂ apö

² Nyë tö pö sə̈ Ndjapä logbɛ̂. La nyê gbö lə̂ köbosə̂ kə̂ to pö sə̈ Ndjapä lakə̂ za ayîabâ sə̈ tchë.

³ Kə̂ to pö tə̂ gbölösə̂nə̈ sə̈ Ndjapä bëte ârâ, käko kä ndə̂ Ndjapä za köbo sə̈ ârâ ndə̂kə̂ mu pö ndə̂ yê, kə̂ nyisə̂ pö Ndjapä pâ Krîsiti ndə̂ gbô rə̂ wâ lə̂ küwû nə̈. Bëte pö lâme kä ndə̂ më sə̂ lə̂ nda kânga.

⁴ Nyë tö pö sə̈ Ndjapä ânyë mê mu pö nə̈ kraâ lə̂ köbo nə̈.

⁵ Nyë sə̈ lə̂ gbâtə̂ azü ndə̂ andjë wûn-âbô sə̂ Ndjapä wûn lə̂ köbosə̂ küma ndə̂ âwâ lanə̈, nyë gböäbô gbôtə̂ lö âro ämbänə̈-ê.

⁶ Äwäpä pö ma nyê tcho batə̂ ngbro, kə̂ mbo dâkâ tə̂ azü, kə̂ wunsə̂ kə̂ to tchêngbâ pö sə̈ akrə lə̂ köbo nə̈.

Adɨ̂ kə̂ po ndə̂ azü

⁷ Tïchîke ngâ ârâ earə̂ kua ndə̂ më nyîndə̂ yê tə̂ gbölösə̂nə̈ toadje apö gbɛ̂ pâ kə̂ sə̈ ndə̂ mê sə̈ nyê. Tche mbö kua ndrotə̂ mê batə̂ lëge earə̂ kua ndə̂ Gbölö Gbïɛ̈.

⁸ Më wän tchë sə̈ nyê ndə̂kə̂ to apö pâ ârâ sə̈ nyê, kə̂ za gbôgbô tə̂ su nyê.

⁹ Më wän tchë la Önëzîme, lëge ngâ ârâ ndə̂ më nyîndə̂ yê tə̂ gbölösə̂nə̈ tche də̈ ngâ akrə ndə̂ nyê. Arə̂mâ bïchuû lâme nyiadje sə̂ arə gbɛ̂ ndə̂ ârâ sə̂ lakə̂ mbo rə̂ bhâtə sə̈ nyê.

¹⁰ Ärïstâreke ndə̂ më sə̂ la tchë bhâlə̂ nda kânga pô ndə̂ nyê nə̂. Mâreke kôya ndə̂ Bärnäbâse pô ndjë ndə̂ nyê nə̂. Nyë djê kə̂ zama tə̂ pö ndə̂ yê alême nə̂, âdə tche âwutu bhândə̂ nyê, nyë zä tchë bhândə̂ nyê tə̂ tchôtchô nə̈.

¹¹ Jezü, ndə̂ a ê rə̂ tə̂ yê pä Yüsütûsu, pö ndjë ndə̂ nyê. Kütû ajuîfu vötaâ ndə̂ ârâ la andjê mbo kua bëte Gbölö gö-gbïɛ̈ ndə̂ Ndjapä lâme kä. Arə̂mâ lâme zä gbôgbô tə̂ su mê tə̂ gbölösə̂nə̈.

¹² Ëpäfrâse, ngâ akrə ndə̂ nyê, pô ndə̂ nyê nə̂, tche də̈ earə̂ kua ndə̂ Jezü Krîsiti, gbô tche kä lakə̂ mbo kʉ̈ʉ̈ tə̂ pö ndə̂ nyê. Tche kä lakə̂ yukû nə̈ sə̈ Ndjapä ndə̂kə̂ pa nyë krʉ ndjii-ï, kə̂ kpökpo tə̂ nyê, kə̂ daka gbɛ̂ lə̂ köbosə̂ Yingö ânyë kə̂ sə tchêtchêtchê logbɛ̂, ndə̂kə̂ mbo rə ndə̂ su Ndjapä nyîndə̂ nə̈.

¹³ Tə̂ lëge nə̈, më kä lakə̂ to tchôtchô pö ndə̂ yê, më tö rə̂ päkëdə̂: Tche kä lakə̂ mbo kua la gbôgbô bëte nyê, bëte azü ndə̂ Laodisë la Ïräpölîse.

¹⁴ Lûke, earə̂ kə̂ tcha tə̂kömbô, ndə̂ ârâ nyïndə̂ yê tə̂ gbölösə̂nə̈, tchetchë la Dëmâse pô ndə̂ nyê nə̂.

¹⁵ Nyë pö ndə̂ arə̂mâ ndə̂ ârâ gbɛ̂ bhâ Laodisë sə̈ ârâ. Nyë pö ndjë ndə̂ Nɛnfä la azü ndə̂ Egilîze ndə̂ andjë palatə̂ andjê bhâ tchâalê ndə̂ yê.

¹⁶ Âdə nyë âdɨ mbëtï âtə nə̂, nyë wän rə̂ sə̈ Egilîze ndə̂ Laodisë ndə̂kə̂ pa azü bhâye dɨ ndjë rə̂. Âdə̂ andə̂ nye nə̈ azü ndə̂ Kölôse, nyë dɨ̈ mbëtï ndə̂ âtô bhâ Laodisë lâme.

¹⁷ Ndə̂kə̂ ka pö ndə̂ mê, nyë tö rə̂ sə̈ Ärchîpe päkëdə̂: «La zə̈ gbö tə̂ kua ndə̂ Gbölö Gbïɛ̈ zâ rə̂ sə̈ mö! Amö mbo rə̂ lə̂ köbo nə̈.»

¹⁸ Mëmê Pôlo, mëmê la tə̂ mê kä ndə̂ âmbô mbëtï âtə, më pô ndə̂ nyê nə̂. Sə̂nə̈ yüäbô yû tə̂ nyê pä më kä bhâlə̂ nda kânga-ê! Äfü pä Ndjapä mbo tchôtchô su tə̂ nyê!