Kölôse 3 - Mbëtï Ndjapä: TÄFO MADƗ̈

¹ Ndə̂ nyënyê la Krîsiti jô lə̂ kuzü lâme, nyë pü köbo ndə̂kə̂ gbo arə ndə̂ tchêlafô, sə̂ tchô ndə̂ Krîsiti sə̂ tâ də ndôkö könô Ndjapä.

² Nyë zä su nyê tə̂ arə tchêlafô, praâbalë nyë zäbô su nyê zâ tə̂ arə tchêbêche-ê.

³ Bëte nyë tchû nə̂ ânyë tchîsûwu ndə̂ nyê wâ nə̂ wü balë la andə̂ Krîsiti ndrotə̂ Ndjapä.

⁴ Krîsiti wätə̂ tchîsûwu ndə̂ nyê. Tə̂ lo nə̈ ndə̂ tche ka, nyê wutuadje la tchë balë ndə̂kə̂ sə la tchë lə̂kə̂ wa gbölö ndə̂ yê.

Kə̂ sə ndə̂ akrə ndə̂ âwâ balë la Krîsiti

⁵ Käko nyë jï agʉ tə̂ su nyê ndə̂ âmbo rə̂ pä nyë mbo angbongbo rə ndə̂ tchêbêche âtə batə̂: Kə̂ pu aɛ̈chë âdəndjë aköchë katchôgbɛ̂, kə̂ mbo arə kâkpö, gʉ tə̂ su akrə, gʉ ndə̂kə̂ mbo angbongbo rə la gbölö gʉ ndə̂kə̂ gbo rə ndə̂ âwâtə̂ ngâ köbo ndə̂kə̂ voga angakʉ̈lä.

⁶ Angbongbo arə lâme kä ndə̂ âmbo rə̂ pä su Ndjapä kʉ tchë.

⁷ Nyë də̈ arə̂mâ ndə̂ mê, nyë mbö ndjë arə alême käko, sə̂nə̈ ndə̂ ngbongbo rə wâ lə̂ nyê.

⁸ Praâbalë angaâtə, nyënyê ndjë, äwäpä nyë gbotə̂ arə lâme gbɛ̂, ndə̂ âdə̂: Mêrâ, su ndə̂ âhro, ngbongbo su, kə̂ dro tchô, angbongbo pö wutuabô wûtu lə̂ ma nyê-ê.

⁹ Nyë möäbô yepa mô lə̂ gbâtə̂ nyê, bëte nyë gbôtə̂ bəndɨ kə̂ sə ndə̂ nyê ndə̂ akrə lakə̂ mbotə̂ yê nə̂, batə̂ rə̂ ndə̂ akrə ji bəndɨ lə̂ba tə̂ yê.

¹⁰ Nyë yû täfo kə̂ sə ndə̂ akrə nə̂, batə̂ akrə ndə̂ tche yu täfo lə̂ba. Ndjapä ndə̂ tche mbô nyê tə̂ atäfo azü, tchê mboadje rə̂ ndə̂kə̂ pa nyë wa logbɛ̂ batə̂ nyîsɨ̂ yê, käko ânyë nyê wünsə̂ yê djîrə̂.

¹¹ Käko gerêke âdəndjë juîfu wâ bata-a, akrə ndə̂ tche wâ gasa âdəndjë akrə ndə̂ tche wâbô gasa wâ sə̂âbo-a. Akrə ndə̂ mawo ngbî, âdəndjë ngbɨ̈lə̈ akrə wâbo-a, ngbâa âdəndjë akrə ndə̂ tche wâbô wâtə̂ ngbâa kä wâ bata-a, praâbalë gbölö rə nə̈ də̈ rə̂ ndə̂ Krîsiti wâtə̂ rə gbɛ̂ ânyë kə̈ wâ bhâlə̂ su azü ndə̂ yê gbɛ̂.

¹² Ndjapä dɨ̂ nyê nə̂, nyë də̈ azü ndə̂ yê ndə̂ tche nyîndə̂ andjê. Käko nyë wün nyonyo azü, kə̂ mbo dâkâ tə̂ azü, kə̂ mbotə̂ nyê kpîɛ̂kpîɛ̂ rə̂, nyë mbö rə tə̂ azü nyima-ë, kə̂ rʉatə̂ su nyê ndə̂kə̂ sə bëte tchë.

¹³ Nyë rʉ̈ätə̂ su nyê la angâ nyê lə̂ gbâtə̂ nyê. Âdə ngâ akrə âwa la pö la ngâ yê, nyë kö pö lə̂ küma angâ nyê lə̂ gbâtə̂ nyê, batə̂ rə̂ ndə̂ Krîsiti kô pö lə̂ küma nyê, nyënyê ndjë gbɛ̂, nyë mbö tâ käko-ë!

¹⁴ Rə ndə̂ ârô adɨ̂ arə nə̈ də̈ kə̂ nyində̂ ngâ, ndə̂ âdə̂ rə ndə̂ âpala azü ëtâ djîrə̂.

¹⁵ Äwäpä zɨtɨ su ndə̂ âtô bhândə̂ Krîsiti nyisə̂ köbo sə̈ nyê lə̂ apö tə̂ su nyê! Tə̂ pö ndə̂ zɨtɨ su lâme kä ndə̂ Ndjapä ê nyê ndə̂kə̂ watə̂ tə̂ akrə balë. Nyë zä ayîabâ sə̈ Ndjapä.

¹⁶ Äwäpä Tchôtchô Pö ndə̂ Krîsiti ndə̂ atchôtchô arə sɨ̂sɨ̈ lə̂nə̈ wa lə̂ tchîsûwu ndə̂ nyê. Nyë nyisə̂ rə, kə̂ to tchôtchô pö sə̈ angâ nyê lə̂ gbâtə̂ nyê, lə̂ köbosə̂ küma ndə̂ âwâ lanə̈ gbɛ̂. Nyë pä düwü sə̈ Ndjapä la su nyê gbɛ̂ ndə̂kə̂ za ayîabâ sə̈ tchë, nyë pä adüwü ndə̂ Mbëtï Ndjapä, adüwü ndə̂kə̂ dɨ tchə̂lə̂ ma sə̈ Ndjapä, ndə̂ Yingö kʉ rə̂ sə̈ nyê.

¹⁷ Apö gbɛ̂ ndə̂ nyê to rə̂, âdəndjë arə gbɛ̂ ndə̂ nyê mbo rə̂, nyë mbö rə̂ la rə̈ Gbölö Gbïɛ̈ Jezü, kə̂ za ayîabâ sə̈ Ndjapä Bha lə̂ köbosə̂ yê.

Kə̂ sə ndə̂ azü ndə̂ Krîsiti

¹⁸ Aɛ̈chë, nyë djë ma aköchë ndə̂ nyê, rə ndə̂ azü ndə̂ Gbölö Gbïɛ̈ wâ ndə̂kə̂ mbo rə̂ kä lâme.

¹⁹ Aköchë, nyë nyïndə̂ aɛ̈chë ndə̂ nyê, kə̂ mboabô rə mbô la ngbongbo su tə̂ andjê.

²⁰ Abechë, nyë djë ma arabha la araanyï nyê lə̂ arə gbɛ̂, rə ndə̂ âdâka tə̂ su Gbölö Gbïɛ̈ kä lâme.

²¹ Arabha, nyë mböäbô rə mbô la ngbongbo su tə̂ abechë ndə̂ nyê ânyë su andjê zogoabô zôgo-ê.

²² Angbâa, nyë djë ma a-earə̂ nyê bêche âtə lə̂ arə gbɛ̂. Nyë mböäbô kua nə̈ mbô gundə̂sə̂ la andjê âwûntî pä nyë nyïndə̂ kə̂ daka lə̂ la azü-î, praâbalë nyë mbö kua la su nyê balë, bëte nyë kpë wa Gbölö Gbïɛ̈.

²³ Âdə kua nə̈ âwa atöko, nyë mbö rə̂ la su nyê gbɛ̂ bëte kua nə̈ wâbo tə̂ andə̂ akrə-a, praâbalë ädə̈ andə̂ Gbölö Gbïɛ̈.

²⁴ Äwäpä nyë wunsə̂ nə̈ pä, Gbölö Gbïɛ̈ âkʉadje atchôtchô arə sə̈ nyê ngbâ rə ndə̂ nyë mbô rə̂, ndə̂ tche bâta rə̂ pra azü ndə̂ yê. Lëge Gbïɛ̈ ndə̂ nyê mbo kua sə̈ tchë də̈ Krîsiti.

²⁵ Akrə ndə̂ tche mbô ngbongbo rə, tchê gboadje ngbongbo rə ngbânə̈. Ndjapä sə̂âbo dəndə̂ ngâ akrə balë-a.