Kölôse 2 - Mbëtï Ndjapä: TÄFO MADƗ̈

¹ Bëte më nyïndə̂ nə̈ pä nyë wunsə̂ pö ndə̂ gbôgbô kʉ̈ʉ̈ ndə̂ më sə̂ lakə̂ mbo rə̂ bëte nyê, bëte azü ndə̂ Laodisë, ndjë bëte azü gbɛ̂ ndə̂ andjë wûn-âbô la mê wûn lo balë-ê.

² Më nyïndə̂ nə̈ pä su andjê wa la gbôgbô, äwäpä andjë wa balë lə̂ köbosə̂ kə̂ nyində̂ ngâ, kə̂ gbo atchôtchô arə lə̂ köbosə̂ kə̂ wunsə̂ rə. Käko ânyë andjê wun-adje sə̂ apö ndə̂ Ndjapä nyîkrə rə̂, ndə̂ gbô rə̂ wâ lə̂ küwû nə̈: Pö nə̈ lâme də̈ Krîsiti.

³ Atchôtchô arə gbɛ̂ ndə̂ küma ndə̂ âwa lanə̈, lakə̂ wunsə̂ rə, Ndjapä kʉ̈ rə̂ wü lə̂ Krîsiti.

⁴ Më tö apö âtə sə̈ nyê ndə̂kə̂ pa akrə balë boloabô nyê bôlo la ngâ tchôtchô pö-ê.

⁵ Bëte më sə̂âbo lə̂ gbâtə̂ nyê-a, praâbalë më kä la nyê sə̂nə̈ balë lə̂ yingö. Më wä la mômô ndə̂kə̂ wun rə̂ pä gbô nyê kä lakə̂ mbo rə la köbo nə̈ ânyë gbô su nyê ndə̂ nyë zâ rə̂ sə̈ Krîsiti lâme kä pâ yê.

Azə̈ gbö arə gbɛ̂ lə̂ Krîsiti

⁶ Ndə̂ nyë nyîndə̂ nə̈ pä Jezü Krîsiti wa Gbölö Gbïɛ̈ ndə̂ nyê lâme, äwäpä nyë mbo rə batə̂ azü ndə̂ andjë wâ balë la tchë.

⁷ Äwäpä nyë krʉ la gbôgbô pâ Krîsiti batə̂ chëchë da yö ndə̂ âlî cho, ânyë kə̈ wâ ndjë batə̂ nda ndə̂ âkrʉ̂ la gbôgbô pâ da yê. Nyë kpökpo tə̂ nyê lə̂ köbosə̂ kə̂ za su nyê sə̈ Krîsiti batə̂ rə̂ ndə̂ a nyîsə̂ nə̈ sə̈ nyê, nyë zä ayîabâ tə̂ gbölösə̂nə̈ sə̈ Ndjapä.

⁸ La nyê gbö-ê, ânyë ngâ akrə boloabô nyê bôlo la apö ndə̂ küma ndə̂ âwa lanə̈, ndə̂ âwâtə̂ andə̂ azü-î! Apö lâme də̈ ambämbä pö ndə̂kə̂ mbo rə ndə̂ azü la angbongbo atchozö ndə̂ andjë wâ la gbôgbô pâ cho âtə, praâbalë âtôâbo dəndə̂ Krîsiti balë-a.

⁹ Bëte Ndjapä sə̈ gbɛ̂ lə̂ Krîsiti ndə̂ tche mbôtə̂ yê tə̂ akrə.

¹⁰ Nyë wâ la tchîsûwu ndə̂ âsɨ̂sɨ̈ gbɛ̂ lə̂ köbosə̂ Krîsiti ndə̂ tche wâtə̂ küma angbongbo atchozö ndə̂ andjë wâ la gbôgbô.

¹¹ Ndə̂ nyë wâ balë la Krîsiti, nyë wâ gasa nə̂. Gasa ndə̂ nyê nə̈, âdə̂âbo azü kä ndə̂ âwâ nyê la rə̂-a, ârə̂ kä ndə̂ âjî nyê lə̂ ngbongbo rə ndə̂ âwâ lə̂ tə̂ nyê ndə̂ akrə. Kə̂ wa gasa ndə̂ Krîsiti nə̈ kä lâme.

¹² Lə̂ köbosə̂ batɛ̂me ndə̂ nyë gbô rə̂, a chî nyê la Krîsiti nə̂, ânyë nyë jô lə̂ kuzü balë la tchë nə̂, bëte rə̂ ndə̂ nyë zâ su nyê pâ gbôgbô ndə̂ Ndjapä ndə̂ tche jô Krîsiti lə̂ kuzü.

¹³ Dokʉ̈tchê nyë də̈ azü ndə̂ nyë tchû bëte angbongbo arə ndə̂ nyë mbô rə̂, ndjë la gasa ndə̂ kpoto nyê ndə̂ nyë wâbô rə̂ wâ-ê. Praâbalë angaâtə, Ndjapä zä tchîsûwu sə̈ nyê lə̂ Krîsiti. Tche kö pö lə̂ küma azə̂ gbɛ̂.

¹⁴ Mbëtï-ndïɛ̈ ndə̂ âzâ pö lə̂ küma azə̂, Ndjapä wrʉ̂ gbôgbô ndə̂nə̈ nə̂, kə̈ î rə̂ bhâtə̂ yö ndə̂ gba.

¹⁵ Ndjapä jï ndjë gbôgbô ndə̂ angbongbo atchozö ndə̂ kümändëmä, kə̈ nyîsə̂ andjê kraâ lə̂ la azü, kə̂ gbɨ̂tɨ andjê batə̂ a-earə̂ kânga lə̂ kpûlû azü ndə̂ andjë zâ tchêngbâ Modô ndə̂ yê, ndə̂ tche mbô kʉ̈ʉ̈ ânyë kə̈ rô la gbôgbô.

¹⁶ Käko âwâbo pä ngâ akrə wa ngbanga lə̂ küma nyê tə̂ pö ndə̂ kɨ̈zɨ̂-a, âdəndjë kə̂ ndjo rə, âdəndjë alö ndə̂ akpülü, alö kpülü ndə̂ täfo nyîpï, la alö sabäa-a.

¹⁷ Arə lâme gbɛ̂ wätə̂ tchâkrʉzrö rə ndə̂ ânəadje, praâbalë lëge rə nə̈ də̈ tə̂ Krîsiti.

¹⁸ Âwâbo pä nyë gbotə̂ köbo sə̈ azü ndə̂ andjë mbötə̂ andjê lə̂ la azü batə̂ akpîɛ̂kpîɛ̂ azü ânyë kə̂ voga aânje lâme-a. Andjë wäbô ngbanga wâ lə̂ küma nyê-ê. Andjë zä su andjê tə̂ angâ arə ndə̂ andjë wûn rə̂ batə̂ lü. Kə̂ wunsə̂ rə ndə̂ andjê wä batə̂ mbämbä kə̂ za küma azü, âmbô rə̂ pä andjë wüntə̂ andjê gbölö kə̈ rô azü gbɛ̂.

¹⁹ Azü käko wâbo ndə̂kə̂ pi ëtə̂ Krîsiti-a, ndə̂ tche wâ batə̂ küma akrə. Bëte küma akrə kä ndə̂ tə̂ akrə gbo rə gbɛ̂ ndə̂ tche nyîndə̂ nə̈, bëte tchë kä ndə̂ atâtäkpa sə̂ agbäbï la ambë palatə̂ andjê kə̂ wa balë, kə̂ kʉche batə̂ rə̂ ndə̂ Ndjapä nyîndə̂ nə̈.

Kə̂ tchu lakə̂ jo lə̂ kuzü balë la Krîsiti

²⁰ Ndə̂ nyë wâ balë la Krîsiti, a jî nyê tchâtchâ gbôgbô ndə̂ angbongbo atchozö ndə̂ tchîsûwu âtə nə̂. Bëte giamâ kä ndə̂ gbô nyê sə̂ lakə̂ mbo rə batə̂ azü tchêbêche âtə? Bëte giamâ kä ndə̂ nyë nyîndə̂ nə̈ ndə̂kə̂ pa ngâ akrə za nyê la gbôgbô ndə̂kə̂ gamba ngâ ndïɛ̈ kâkë-ê?

²¹ «Zabô rə âtə zâ-ê!», «Djeabô tchö anə̈ âtə djê!», «Grʉabô rə̂ grʉ̂-ê!»

²² Arə lâme gbɛ̂ də̈ andïɛ̈ ndə̂ a nyîkrə rə̂ bëte arə ndə̂ ârôrö la tchêngbâ nə̈ ndə̂ a mbo kua la rə̂. Kütû andïɛ̈ lakə̂ nyisə̂ rə ndə̂ azü kä.

²³ Lə̂ la azü, andïɛ̈ lâme kʉ̈tə̂ yê la küma ndə̂ âwâ lanə̈, bëte ätö pö ndə̂kə̂ voga Ndjapä pâ küma akrə la tə̂ yê, kə̂ mbotə̂ batə̂ kpîɛ̂kpîɛ̂ akrə, kə̂ mbotə̂ la nyonyo, praâbalë arə lâme gbɛ̂ wätə̂ mbämbä rə bëte âmbôâbo rə̂ pä akrə kitə̂ gʉ tə̂ su yê-a.