Jûde 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Jûde, earə̂ kua ndə̂ Jezü Krîsiti, ndə̂ më də̂ ndjë yîngâ Jâke. Më mbö mbëtï âtə sə̈ azü ndə̂ Bha mê Ndjapä ê andjê, tche nyïndə̂ andjê ânyë kə̈ bâta andjê bëte Jezü Krîsiti.

² Äfü pä Ndjapä wun nyonyo nyê, kə̂ za zɨtɨ su sə̈ nyê, kə̂ za ndjë kə̂ nyində̂ ngâ sə̈ nyê tə̂ gbölösə̂nə̈.

A-earə̂ kə̂ nyisə̂ rə ndə̂ yepa

³ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, më nyï âme ndə̂kə̂ mbo mbëtï sə̈ nyê tə̂ pö ndə̂nə̈ ndə̂ Ndjapä tchâ mê la nyê gbɛ̂ lə̂ kuzü lâme. Praâbalë su mê yükû nə̈ sə̈ mê la gbôgbô ndə̂kə̂ pa më mbo mbëtï âtə sə̈ nyê, ndə̂kə̂ za gbôgbô tə̂ su nyê ânyë nyê mbo kʉ̈ʉ̈ ndə̂ pö ndə̂kə̂ za su sə̈ Ndjapä, ndə̂ tche zâ rə̂ sə̈ azü sûsunə̈ balë tratralë.

⁴ Bëte angâ angbongbo azü lï lə̂ küwû nə̈ lə̂ gbâtə̂ nyê. Andjë sə̈ lakə̂ ndɨ tchə̂lə̂ pö ndə̂ tchôtchô su ndə̂ Ndjapä ndə̂ azə̂, ânyë kə̂ gbo köbo ndə̂kə̂ mbo arə ndə̂ su andjê nyîndə̂ nə̈. Andjë kösə̂ Jezü Krîsiti ndə̂ tche də̂ kêlä Earə̂ kə̂ nyisə̂ rə la Gbölö Gbïɛ̈ ndə̂ azə̂. Mbëtï Ndjapä tô pö ndə̂ ngbanga ndə̂ a wâ rə̂ lə̂ küma andjê gasa alême nə̂.

⁵ Nyë wûnsə̂ apö lâme nə̂ gbɛ̂, praâbalë âkîâbo tə̂ köbo tə̂ mê ndə̂kə̂ pa më ka tô tchêndə̂ nə̈ sə̈ nyê-a. Gbölö Gbïɛ̈ tchä Isarayële, azü ndə̂ yê alême tchânə̂ azü gö ndə̂ Ejîpiti, la tchêngbâ nə̈ tche mbô rə̂ pä andjanə̈ ndə̂ andjë kôsə̂ kə̂ za su andjê sə̈ tchë tchû-î.

⁶ Äwäpä sə̂ pö ndə̂ aânje alême te lə̂ nyê, ndə̂ andjë kôsə̂ kə̂ bata gbôgbô ndə̂ Ndjapä zâ rə̂ sə̈ andjê, kə̈ gbôtə̂ tchô ndə̂ Ndjapä zâ rə̂ sə̈ andjê ndə̂kə̂ sə tâ. Tche bäta andjê pïï etə̂ lə̂ djingîli, lə̂ tchô ndə̂ âbû biî ndə̂kə̂ sə bëte gbölö lo kə̂ wa ngbanga.

⁷ Äwäpä sə̂ pö ndə̂ gö ndə̂ Sodômo la Gomôro te lə̂ nyê, ndjë la agö ndə̂ âwâ ndrotə̂ nə̈, azü ndə̂ agö lâme mbö ndjë ngbongbo rə alême käko batə̂ aânje lakə̂ pu aɛ̈chë âdəndjë aköchë katchôgbɛ̂. Andjê wun-adje yûkü lə̂ wo ndə̂ âju pïï etə̂. Käko ânyë adɨ̂ azü mboabô rə̂ mbô batə̂ rə̂-ê.

⁸ Azü ndə̂ andjë lî lə̂ gbâtə̂ nyê lâme, andjë mbö ndjë tâ käko: Angâ arə ndə̂ ânə lə̂ küma andjê wä ngbo. Andjë mbö ngbongbo rə tə̂ andjê la tə̂ andjê. Andjë wün gbôgbô ndə̂ Ndjapä batə̂ ngâ mbämbä rə, kə̈ sə̂ lakə̂ dro aânje ndə̂ tchêlafô.

⁹ Mïchêle ndə̂ tche də̂ kabïta ndə̂ aânje mbôâbo tə̂ ngâ rə käko nə̂-a. Ndə̂ tche sə̂ alême lakə̂ po la Jâbolo tə̂ pö ndə̂ krʉkrʉ Möyîze, tche drôâbo Jâbolo-a, âdəndjë ndə̂kə̂ wa ngbanga lə̂ küma yê-a. Tche tö kütû rə̂ päkëdə̂: «Äwäpä Gbölö Gbïɛ̈ wa ngbanga lə̂ küma zə̈!»

¹⁰ Praâbalë azü lâme, andjë drö arə ndə̂ andjë wûn-âbô sə̂nə̈ wûn-î. Anə̈ ndə̂ andjë wûnsə̂ nə̈, andjë wünsə̂ nə̈ batə̂ agia ndə̂ andjë wûn-âbô sə̂ rə wûn-î. Rə lâme ndjë gbɛ̂ wä kütû ndə̂kə̂ ndɨ andjê.

¹¹ Nyonyo kä tə̂ andjê! Bëte andjë zä köbo ngbâ Käyîne, bëte pö ndə̂ makətche, andjë tchä köbo batə̂ Bälâme, andjë tchü bëte andjë älafô la pö batə̂ azü ndə̂ Korë.

¹² Andjendjê kä ndə̂ âwâ batə̂ kâkpö lə̂ kɨ̈zɨ̂ ndə̂ nyê ngbotâ nyɛ̂ɛ̂ balë, ânyë kə̂ zɨ rə̂ lə̂ gbâtə̂ nyê. Andjë zɨ̂âbo rə lakə̂ ndjo rə la ganô-a. Andjë wün kütû gʉ tchə̂lə̂ andjê. Andjë wä batə̂ ndrö ndə̂ yi rô la rə̂ ânyë nyïvrö nyîâbô nyî. Andjë wä batə̂ angâ ayö ndə̂ lo kə̂ le ndə̂nə̈ âta nə̂, âlêâbo balë-a, âdə a âsu da nə̈ âtchu tratralë.

¹³ Andjë mbö arə ganô ndə̂ andjê batə̂ gbölö kpabe ndə̂ tchêla gbölö ngû ngbro, ndə̂ âwutu la frötchë atə̂ sûwu. Andjë wä batə̂ akêkêrə̂ ndə̂ ânə, kə̈ wûn-âbo sə̂ tchô ndə̂ andjë e tâ-a, Ndjapä bäta tchô ndə̂ andjê sə tâ logbɛ̂ lə̂ tchə̂lə̂ bütchî ndə̂ âbû biî.

¹⁴ Hënôke, ndə̂ tche də̂ akrə mïndûu manə̈ bïchuû lə̂ gbölö mawo la tchêngbâ Adâme tô ndə̂ma Ndjapä pâ azü lâme dokʉ̈tchê alême päkëdə̂: «Wunsaâ, Gbölö Gbïɛ̈ nəadje la angbängbä aânje ndə̂ andjë wâ ngbî ânyë kə̈ dâka gbɛ̂,

¹⁵ ndə̂kə̂ wa ngbanga pâ azü ndə̂ tchêbêche gbɛ̂. Azü ndə̂ andjë wâtə̂ a-earə̂ ngbongbo rə, tchê wadje ngbanga pâ andjê bëte angbongbo rə gbɛ̂ ndə̂ andjë mbô rə̂ tə̂ yê. Azü ndə̂ andjë to angbongbo apö pu tchë, tchê wadje ngbanga pâ andjê bëte angbongbo pö ndə̂ andjë tô rə̂ tə̂ yê.»

¹⁶ Azü lâme, tə̂ andjê krâbo lo balë-a, andjë gbôâbo tə̂kə̂ dɨ tchə̂lə̂ ma andjê-a. Andjë nə̈ gundə̂sə̂ ngbongbo gʉ su andjê. Andjë tö tchê apö lakə̂ bolo azü, kə̂ gamba azü bëte kə̂ gbo rə.

Kə̂ za wängö sə̈ azü ndə̂ Krîsiti

¹⁷ Âdə andə̂ nye nə̈, arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, äwäpä pö ndə̂ abadjângele ndə̂ Gbölö Gbïɛ̈ ndə̂ azə̂ Jezü Krîsiti tô rə̂ dokʉ̈tchê alême te lə̂ nyê.

¹⁸ Andjë tö rə̂ sə̈ nyê alême päkëdə̂: «Lə̂ adɨ̂ alö ndə̂kə̂ ka ndə̂ tchîsûwu, azü âwadje tə̂ a-earə̂ kə̂ mo tchô, ânyë kə̂ nəadje gundə̂sə̂ ngbongbo gʉ su andjê.»

¹⁹ Andjendjê kä âkə̂ krʉ tchə̂lə̂ azü ndə̂ Krîsiti, apö lə̂ su andjê də̈ andə̂ azü tchêbêche, andjë wâbo la Kpɨ̂ki Yingö-a.

²⁰ Praâbalë nyënyê, arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, nyë krʉ̈ pâ kə̂ za su nyê ndə̂ nyë zâ rə̂ sə̈ Krîsiti ndə̂ âwâ ngbî ânyë kə̈ dâka gbɛ̂. Nyë tö pö sə̈ Ndjapä lə̂ köbosə̂ Kpɨ̂ki Yingö.

²¹ Nyë ndə̈po lə̂kə̂ nyində̂ nyê ndə̂ Ndjapä nyîndə̂ nyê lâme. Nyë sə̈ bëte tchîsûwu ndə̂ logbɛ̂ logbɛ̂ ndə̂ Gbölö Gbïɛ̈ ndə̂ azə̂ Jezü Krîsiti zadje rə̂ sə̈ nyê lə̂ köbosə̂ dâkâ ndə̂ yê.

²² Nyë wün nyonyo azü ndə̂ su andjê wa bïbïchuû.

²³ Nyë tchä andjê lə̂ köbosə̂ kə̂ gbɨ andjê lə̂ wo, kə̂ wun nyonyo angânə̈. Praâbalë nyë mbö rə la wawa. Nyë grʉ̈äbô andjê grʉ̂-ê, âdəndjë lə̂ba ndə̂ andjê-ê, bëte angbongbo rə tə̂ azü nə̈ zä kʉ̂tê nə̈ gbɛ̂.

Kə̂ voga Ndjapä

²⁴ Ndjapä ndə̂ tche wâ ndə̂kə̂ bata nyê ânyë nyê teabô tê-ê, tchetchë kä ndə̂ âmbo rə̂ pä nyë daka gbɛ̂ ânyë kə̂ wutu tchâtchâ golowäre ndə̂ yê la gbölö mômô.

²⁵ Ndjapä balë kä ndə̂ âdə̂ Earə̂ kə̂ tcha azə̂ lə̂ köbosə̂ Jezü Krîsiti Gbölö Gbïɛ̈ ndə̂ azə̂. Voga la gbölö la gbôgbô la kümändëmä gbɛ̂ də̈ andə̂ ye nə̈, dokʉ̈tchê, angaâtə, ânyë tə̂ logbɛ̂ logbɛ̂! Amin.