Jâke 5 - Mbëtï Ndjapä: TÄFO MADƗ̈

Nyonyo kä tə̂ nyê a-earə̂ rə

¹ Käko nyënyê ndə̂ a-earə̂ rə! Angaâtə nyë kɨ̈, kə̂ ta wârə̂ tə̂ pö ndə̂ arə nyonyo ndə̂ âkrʉ̂ bëte nyê lâme!

² Arə ndə̂ nyê gbɛ̂ fô nə̂, ânyë ako zɨ̂ tchə̂lə̂ alə̂ba ndə̂ nyê nə̂ gbɛ̂.

³ Asökö zâ kʉ̂tê lôlo la mîɛ̈-makətche ndə̂ nyê nə̂ gbɛ̂. Asökö nə̈ lâme kä ndə̂ âyiadje pö lə̂ küma nyê, kə̂ zɨadje mbë nyê batə̂ wo. Tchêbêche ndô tə̂kə̂ krʉ nə̂, praâbalë gbô nyê kä lakə̂ pala arə ndə̂ nyê ëpâ ngânə̈ ëpâ ngânə̈.

⁴ Nyë wünsa köbo ndə̂ nyë kôsə̂ kə̂ kʉ makətche-kua sə̈ a-earə̂ kua ndə̂ andjë sôâ ndjî rəgʉ lə̂ akɨ̈ndɨ̈ ndə̂ nyê lâme, makətche-kua nə̈ kä lakə̂ ta wârə̂, ânyë kə̂ dɨ tchə̂lə̂ ma a-earə̂ kə̂ soa ndjî rəgʉ nə̈ tê nə̂ lə̂ tü Gbölö Gbïɛ̈ ndə̂ tche sə̂ pâ arə gbɛ̂.

⁵ Nyë sə̈ pâ cho âtə lə̂ atchôtchô arə, la arə ndə̂ âtcho tə̂ nyê tə̂ gbölösə̂nə̈, nyë zɨ̈ rə, kə̈ wâ la jrôâ tə̂ nyê batə̂ agia ndə̂ andjë krʉ̂ bëte lö kə̂ wa angrô andjê.

⁶ Nyë wä ngbanga lə̂ küma azü, kə̈ wôn adjîrə̂ azü, andjë dâbo cho la nyê-a.

Kə̂ rʉatə̂ su lakə̂ to pö sə̈ Ndjapä

⁷ Arə̂mä, nyë rʉ̈ätə̂ su nyê zoo ëtə̂ lo kə̂ ka ndə̂ Gbölö Gbïɛ̈. Nyë wünsa köbo ndə̂ earə̂ kə̂ djo kɨ̈ndɨ̈ rʉatə̂ su yê ndə̂kə̂ krʉ bëte tchôtchô lêlê rəgʉ tchə̂lə̂ kɨ̈ndɨ̈ ndə̂ yê. Tche rʉ̈ätə̂ su yê ndə̂kə̂ krʉ bëte kə̂ nyi ndə̂ adokʉ̈ anyïvrö, la adɨ̂ anyïvrö.

⁸ Nyënyê ndjë gbɛ̂, äwäpä nyë rʉatə̂ su nyê, kə̂ kpokpo tə̂ nyê, bëte lö kə̂ ka ndə̂ Gbölö Gbïɛ̈ ndô nə̂.

⁹ Arə̂mä, nyë dɨ̈äbô tchə̂lə̂ ma nyê dɨ̂ tə̂ angâ nyê lə̂ gbâtə̂ nyê, ânyë Ndjapä wabô ngbanga wâ lə̂ küma nyê-ê. Nyë wünsaâ! Earə̂ kə̂ wa ngbanga krʉ̂ nə̂ pâ adälä manda.

¹⁰ Arə̂mä, tə̂ pö ndə̂ nyonyo lakə̂ rʉatə̂ su lâme, nyë mbö rə̂ batə̂ rə̂ ndə̂ a-earə̂ ndə̂ma Ndjapä ndə̂ andjë tô pö alême la rə̈ Gbölö Gbïɛ̈.

¹¹ Nyë wünsaâ! Azə̈ gämba azü ndə̂ andjë kpôkpo tə̂ andjê lə̂ agbôgbô arə lâme. Nyë djê ndə̂ma pö pâ Jôbo ndə̂ tche rʉ̂âtə̂ su yê lâme nə̂, ânyë nyë wûnsə̂ rə ndə̂ Gbölö Gbïɛ̈ kʉ̂ rə̂ sə̈ tchë la tchêngbâ nə̈ nə̂. Bëte Gbölö Gbïɛ̈ wä la tchôtchô su tə̂ gbölösə̂nə̈, lakə̂ wun nyonyo azü.

¹² Praâbalë arə̂mâ ndə̂ mê, tə̂ dokʉ̈ nə̈, âwâbo pä nyë deba la rə̈ tchêlafô, âdəndjë tchêbêche, âdəndjë la ngâ känyï ngbî-a. Âdə nyë âto rə̂ pä: «Ɛn-ɛn» kə̂ krʉ kütû pâ ɛn-ɛn. Ânyë nyë âto rə̂ pä: «Ɛ̂n-ɛ̈n» kə̂ krʉ kütû pâ ɛ̂n-ɛ̈n, käko ânyë nyê teabô tê tchâtchâ ngbanga ndə̂ Ndjapä-ê.

¹³ Ngâ akrə lə̂ gbâtə̂ nyê kä lə̂ nyonyo? Äwäpä tche to pö sə̈ Ndjapä. Ngâ akrə kä la mômô? Äwäpä tche pa düwü ndə̂kə̂ voga Ndjapä.

¹⁴ Ngâ akrə lə̂ gbâtə̂ nyê kä la tə̂kömbô? Äwäpä tche e akpôkpô azü ndə̂ Egilîze, andjë to pö sə̈ Ndjapä tə̂ pö ndə̂ yê, kə̂ mbo kâdâ tə̂ yê la rə̈ Gbölö Gbïɛ̈.

¹⁵ Kə̂ to pö sə̈ Ndjapä lakə̂ za su sə̈ tchë mbö rə̂ pä earə̂ tə̂kömbô nə̈ tcha, ânyë Gbölö gbïɛ̈ kengadje tchë. Âdə tche âmbo ngbongbo rə alêe, Ndjapä âko pö lə̂ küma yê gbɛ̂.

¹⁶ Äwäpä nyë tosə̂ angbongbo rə ndə̂ nyê lə̂ gbâtə̂ nyê la angâ nyê, kə̂ to pö sə̈ Ndjapä bëte angâ nyê lə̂ gbâtə̂ nyê, ânyë Ndjapä tcha nyê lə̂ tə̂kömbô ndə̂ nyê. Akrə ndə̂ tche wâ djîrə̂ lə̂ la Ndjapä, ânyë kə̈ tô pö sə̈ tchë, pö nə̈ ndə̂ tche to rə̂ sə̈ Ndjapä nə̈ lâme âwa la gbôgbô ndə̂kə̂ mbo rə tə̂ gbölösə̂nə̈.

¹⁷ Elïe wä ndjë alême tə̂ akrə batə̂ azə̂, tche tô pö sə̈ Ndjapä la su yê gbɛ̂ ndə̂kə̂ pa nyïvrö nyiabô nyî, käko lə̂ ngû vötaâ la nyîpï mïndûu manə̈ balë, nyïvrö nyîâbo pâ cho-a.

¹⁸ Pânə̈ tche kâ tô pö sə̈ Ndjapä; käko tchêlafô mbô rə̂ pä nyïvrö nyi, ânyë cho mbô rə̂ pä arəgʉ le.

¹⁹ Arə̂mâ ndə̂ mê, âdə ngâ akrə lə̂ gbâtə̂ nyê âe tʉ̂rʉ tə̂ lëge pö, ânyë ngâ akrə kâ la tchë lə̂ köbo nə̈,

²⁰ äwäpä nyë wunsə̂ nə̈ päkëdə̂: Akrə ndə̂ tche kâ la ngâ earə̂ ngbongbo rə ëpâ köbo ndə̂ tche tchâ rə̂ lâme, dëkë tche mbö rə̂ pä earə̂ ngbongbo rə tcha lə̂ kuzü, kə̈ mbô ndjë rə̂ pä Ndjapä ko angbängbä apö lə̂ küma yê.