Jâke 4 - Mbëtï Ndjapä: TÄFO MADƗ̈

Kə̂ nyində̂ arə tchêbêche

¹ Kə̂ mbo kʉ̈ʉ̈ lakə̂ po lə̂ gbâtə̂ nyê lâme tö bhâ tchêbâ? Âtôâbo tə̂ gʉ arə tchêbêche ndə̂ âmbo kʉ̈ʉ̈ la nyê lə̂ kpoto nyê lâme?

² Nyë mbö gʉ arə, kə̈ gbôâbo arə nə̈-a. Nyë won akrə, kə̈ wâ la gbölö su, kə̈ wâbo ndə̂kə̂ gbo rə ndə̂ nyë nyîndə̂ nə̈-a. Nyë bhï küma nyê, kə̂ mbo kʉ̈ʉ̈, kə̈ gbôâbo arə nə̈-a, bëte nyë yûâbo kû nə̈-a.

³ Âdə nyê âyukû nə̈ ânyë kə̈ gbôâbô rə̂ gbô-ê, bëte nyë yûâbo kû nə̈ la köbo nə̈-a, praâbalë nyë yükû nə̈ ndə̂kə̂ ndɨ rə̂ tə̂ pö ndə̂ arə ndə̂ âtcho tə̂ nyê.

⁴ Nyënyê ndə̂ nyë wâ batə̂ azü ndə̂ andjë pu aɛ̈chë âdəndjë aköchë ndə̂ angâ andjê âtə! Nyë wûn-âbo sə̂nə̈ pä akrə ndə̂ tche zâ agü la tchêbêche âtə, tche wätə̂ akrə ndə̂ tche kôsə̂ Ndjapä? Akrə ndə̂ tche nyîndə̂ kə̂ za agü la tchêbêche âtə, dëkë tche wâ nə̂ tə̂ akrə ndə̂ tche kôsə̂ Ndjapä.

⁵ Âdəndjë rə̂, nyë wûntî pä pö ndə̂ Mbëtï Ndjapä tô rə̂ lâme wätə̂ mbämbä pö? Ndə̂ âtô rə̂ päkëdə̂: «Yingö ndə̂ Ndjapä zâ rə̂ lə̂ azə̂ lâme, tche kï pânə̈ tə̂ gbölösə̂nə̈.»

⁶ Praâbalë Ndjapä kä mbô dâkâ tə̂ azü ârô masə̂nə̈, bëte rə̂ kä ndə̂ Mbëtï Ndjapä tô rə̂ päkëdə̂: «Ndjapä kösə̂ azü ndə̂ andjë nyisə̂ tə̂ andjê, praâbalë tche mbö tchôtchô su tə̂ azü ndə̂ andjë mbotə̂ andjê kpîɛ̂kpîɛ̂ rə̂.»

⁷ Käko äwäpä nyë dje ma Ndjapä, kə̂ dacho la Jâbolo ânyë tche kpe tə̂ nyê ngrɨ̈ bhâchï.

⁸ Nyë gïtə̂ nyê ndola Ndjapä, ânyë tche giadje ndjë tə̂ yê ndola nyê. Nyënyê ndə̂ a-earə̂ ngbongbo rə, nyë grʉ̈ bata ngbongbo rə grʉ̂-ê, nyënyê ndə̂ su nyê wâ bïbïchuû âtə! Nyë djütu tchə̂lə̂ su nyê.

⁹ Äwäpä nyë wunsə̂ nyonyo ndə̂ nyê, kə̂ dɨ tchə̂lə̂ ma nyê lakə̂ kɨ. Äwäpä mômô ndə̂ nyê mo rə̂ lâme, dotə̂ yê tə̂ kɨ̈, ânyë mômô ndə̂ nyê, dotə̂ yê tə̂ nyonyo.

¹⁰ Äwäpä nyë mbotə̂ nyê kpîɛ̂kpîɛ̂ rə̂ tchâtchu Gbölö Gbïɛ̈, ânyë tchê kengadje nyê.

Nyë wäbô ngbanga wâ lə̂ küma angâ nyê

¹¹ Arə̂mä, nyë jëndeabô angâ nyê jênde lə̂ gbâtə̂ nyê-ê. Akrə ndə̂ tche jênde ngâ yê, âdəndjë rə̂ ndə̂ tche wâ ngbanga lə̂ küma ngâ yê, dëkë tche jênde ndïɛ̈ nə̂, kə̈ wâ ndjë ngbanga lə̂ küma ndïɛ̈ nə̂. Âdə mo âwa ngbanga lə̂ küma ndïɛ̈, dëkë mo wâbo tə̂ akrə ndə̂ tche mbô rə gundə̂sə̂ ndïɛ̈-a, mo wätə̂ earə̂ kə̂ wa ngbanga lə̂ küma ndïɛ̈.

¹² Ndjapä balë kä ndə̂ âzâ ndïɛ̈, ânyë kə̈ wâtə̂ earə̂ kə̂ wa ngbanga. Tchetchë balë kä ndə̂ âwâ ndə̂kə̂ tcha azü lə̂ kuzü, âdəndjë ndə̂kə̂ mbo rə̂ pä akrə tchu. Momö ndə̂ mo wa ngbanga lə̂ küma angâ zə̈ âtə, mo də̈ tchabâ?

Nyë bhïäbô gogo nyê bhî-î

¹³ Käko nyënyê ndə̂ nyë tô rə̂ päkëdə̂: «Angêta, âdəndjë lâmbo, ârâ âe atə̂lə̂ gö təbhâ, kə̂ mboadje ngû balë bhâye, kə̂ mboadje waɛ̂che ânyë kə̂ gboadje makətche.»

¹⁴ Nyë wûn-âbo sə̂ rə ndə̂ âwutu lə̂ tchîsûwu ndə̂ nyê ndə̂ tchêlâmbo-a. Bëte nyë wä batə̂ ndrö ndə̂ âwutu la ngû ânyë kpro la tchêngbâ nə̈ âyu-ê.

¹⁵ Pö ndə̂ nyë wâ âme ndə̂kə̂ to rə̂ wä kâkë: «Âdə Gbölö Gbïɛ̈ ânyində̂ nə̈, ârâ səadje la tʉ̈rʉ̂ la ârâ, kə̂ mboadje rə kâkë âdəndjë anə̈ kâkë.»

¹⁶ Praâbalë angaâtə, tə̂ nyê krä lə̂ köbosə̂ kə̂ bhi gogo nyê. Käko ngoa kə̂ bhi gogo käko lâme wätə̂ ngbongbo rə.

¹⁷ Akrə ndə̂ tche wûnsə̂ kə̂ mbo tchôtchô rə, ânyë kə̈ mbôâbô rə̂ mbô-ê, dëkë tche mbô ngbongbo rə nə̂.