Jâke 3 - Mbëtï Ndjapä: TÄFO MADƗ̈

Pö pâ tïmï

¹ Arə̂mâ ndə̂ mê, âwâbo pä angbängbä azü watə̂ a-earə̂ kə̂ nyisə̂ rə-a. Bëte nyë wûnsə̂ nə̈ nə̂ pä azəzə̂ ndə̂ a-earə̂ kə̂ nyisə̂ rə, ngbanga ndə̂ Ndjapä wadje rə̂ pâ azə̂ ârə̂ âwatə̂ ngbongbo nə̈ kə̂ ro masə̂nə̈.

² Bëte azə̈ gbɛ̂ mbö ngbongbo rə tə̂ gbölösə̂nə̈. Âdə ngâ akrə âtchabô ma yê tchâ lakə̂ to pö-ê, dëkë tche wätə̂ akrə ndə̂ tche dâka gbɛ̂, tche də̈ akrə ndə̂ tche kʉ̂sə̂ kə̂ bata tə̂ yê gbɛ̂.

³ Âdə azə̂ âi ma ambâlâtâ la wû ndə̂kə̂ pa andjë dje azə̂, dëkë azə̈ nyïsə̂ köbo sə̈ ndundu tə̂ andjê gbɛ̂.

⁴ Nyë wünsa abatöo: Kə̂ ge ndə̂ andjë gê lâme, âdə gbölö yi âmbo andjê, ngâ kpîɛ̂kpîɛ̂ guverenäye kä tâ, ndə̂ âmbo rə̂ pä batöo nə̈ nə batə̂ rə̂ ndə̂ su earə̂ kə̂ kpe la rə̂ nyîndə̂ nə̈.

⁵ Käko ndjë tïmï akrə wätə̂ ngâ kpîɛ̂kpîɛ̂ tchâme-tə̂ akrə, praâbalë tche bhï gogo yê, bëte tche kʉ̈sə̂ kə̂ mbo ngâ gbölö rə. Nyë wün köbo ndə̂ wo ndə̂ âwa kütû kpîɛ̂kpîɛ̂ rə̂, ânyë kə̂ ju gbölö krabudji lâme!

⁶ Tïmï wä ndjë tə̂ ngâ wo, kə̈ wâtə̂ tchô ndə̂ ngbongbo rə. Tïmï sə̈ lə̂ gûtə̂ atchâme-tə̂ azə̂, ânyë kə̂ mbo rə̂ pä ndundu tə̂ akrə gbɛ̂ wa la kâkpö. Lə̂ alö gbɛ̂ ndə̂ akrə mbo rə̂ pâ cho, tïmï yê wä batə̂ wo ndə̂ ândɨ tchîsûwu ndə̂ yê gbɛ̂, wo nə̈ lâme la tə̂ yê tö bhâsə̂ tchô ndə̂ gbölö wo ju tâ pïï etə̂.

⁷ Akrə kä la gbôgbô ndə̂kə̂ mbo rə̂ pä ngoa agia balë balë gbɛ̂ dje tchë: Agia batə̂ agia güsü, anyïɛ̈nə̈, agia ndə̂ andjë hro ku bêche, la agiangû. Dëkë tche mbô andjê, andjë djê tchë nə̂.

⁸ Praâbalë andə̂ tïmï, ngâ akrə balë kʉ̂âbo sə̂kə̂ mbo rə̂ pä tïmï yê dje tchë-a. Tïmï wätə̂ ngâ ngbongbo rə ndə̂ âsə̂âbo gii lo balë-ê, ndôngâ ndə̂kə̂ won tchô kä lə̂nə̈.

⁹ Azə̈ vöga Gbölö Gbïɛ̈ ndə̂ tche wâtə̂ Bha azə̂ la tïmï lâme, praâbalë kütû tïmï balë lâme kä ndə̂ azə̈ dra ndə̂ azü la rə̂ ndə̂ Ndjapä mbô andjê batə̂ tchë.

¹⁰ Kə̂ e tchôtchô pö pâ azü, lakə̂ dra ndə̂ azü wütu kütû lə̂ ma balë lâme. Arə̂mâ ndə̂ mê, âwâbo pä rə nə̈ wa käko-a.

¹¹ Tchôtchô ngû la chüchü ngû wütu lə̂ küma ngû balë?

¹² Arə̂mâ ndə̂ mê, yö kâfe leadje lêlê jîdolo? Âdəndjë yö mângo leadje alêlê kâfe? Tchôtchô ngû wutuabô lə̂ küma ngû ngbro tee-a.

Küma akrə ndə̂ âwâ lanə̈ tô bhâ lafô

¹³ Ngâ akrə ndə̂ küma yê wâ lanə̈ ânyë kə̈ wûnsə̂ rə kädje lə̂ gbâtə̂ nyê? Äwäpä tche nyisə̂ nə̈ lə̂ köbosə̂ tchôtchô kə̂ mbo rə ndə̂ yê, lə̂ köbosə̂ akua ndə̂ yê ndə̂ tche mbo rə̂ nyima-ë, ndjë lə̂ köbosə̂ küma yê ndə̂ âwâ lanə̈.

¹⁴ Praâbalë âdə nyê âwa la kïkï gbölö su, ndjë la gʉ ndə̂kə̂ wa gbölö tə̂ angâ nyê, nyë bhïäbô gogo nyê bhî ämbänə̈-ê, lakə̂ mo yepa ndə̂kə̂ ndɨ köbo lëge pö-ê.

¹⁵ Ngoa küma ndə̂ âwa lanə̈ käko lâme tôâbo bhâ lafô-a, ätö kpô bêche âtə, ätö lə̂ köbosə̂ akrə, ätö bhândə̂ Jâbolo.

¹⁶ Bëte sə̂nə̈ ndə̂ gbölö su wâ tâ, la gʉ ndə̂kə̂ wa gbölö tə̂ angâ andjê, sə̂nə̈ lâme, arə wâbo lə̂ kpâlâ nə̈-a, ânyë angbongbo kə̂ mbo arə ngbî ngbî kä ndjë tâ.

¹⁷ Küma ndə̂ âwa lanə̈, ndə̂ âtô bhâ lafô mbö rə̂ pä akrə wa tə̂ dokʉ̈ nə̈ la grôgrô su, pânə̈ âmbo rə̂ pä azü sə la zɨtɨ su, kə̂ mbo rə nyima-ë, kə̂ djetə̂ andjê lə̂ gbâtə̂ andjê, kə̂ sɨ̂sɨ̈ lakə̂ wun nyonyo azü, lakə̂ mbo tchôtchô rə tə̂ andjê. Akrə ndə̂ küma yê wâ lanə̈, tche sə̂âbo dəndə̂ ngâ akrə balë-a, kə̂ mbôâbo rə ngbî tə̂ pö ma yê-a.

¹⁸ Azü ndə̂ andjë nyîndə̂ zɨtɨ su, andjë mbö rə̂ pa azü ndrotə̂ andjê sə la zɨtɨ su. Äwä batə̂ kə̂ lu andjî rəgʉ, ânyë ndjî rəgʉ nə̈ ndə̂ andjë soa rə̂ də̈ kə̈ mbo djîrə̂ rə.