Jâke 2 - Mbëtï Ndjapä: TÄFO MADƗ̈

Nyë sə̈äbô sə̂ dəndə̂ ngâ akrə balë-ê

¹ Arə̂mâ ndə̂ mê, nyënyê ndə̂ nyë zâ su nyê sə̈ Gbölö Gbïɛ̈ ndə̂ azə̂ Jezü Krîsiti ndə̂ a lusə̂ yê, âwâbo pä nyë sə dəndə̂ ngâ akrə balë-a.

² Bëte âdə ngâ akrə ndə̂ tche yû ɛ̈ dage ndə̂ lôlo ëtə̂ ɛ̈ könô yê, kə̈ yû tchôtchô lə̂ba ânyë kə̈ lî lə̂ gbâtə̂ nyê; ânyë ngâ earə̂ yûkü ndə̂ tche yû gbägbä lə̂ba lî ndjë lə̂ gbâtə̂ nyê.

³ Âdə nyê âlusə̂ akrə ndə̂ tche yû tchôtchô lə̂ba lâme, ânyë kə̈ tô rə̂ sə̈ tchë päkëdə̂: «Momö, amö sə lə̂ tchôtchô ngendë âtə», praâbalë âdə nyë âto rə̂ sə̈ earə̂ yûkü lâme päkëdə̂: «Momö, amö krʉ lafô tchâtə, âdəndjë rə̂, amö sə ëbêche tə̂ ma mbätä da mê âtə.»

⁴ Käko nyënyê la tə̂ nyê, nyë lûâbo sə̂ ngâ akrə ârô ngâ yê kä lâme? Dju kə̂ wa ngbanga ndə̂ nyê lâme wâbo tə̂ ngbongbo nə̈ kä lâme?

⁵ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, nyë djë pö âtə: Ndjapä də̂âbo tchë ndə̂ tche dɨ̂ azü ndə̂ andjë wâtə̂ a-earə̂ yûkü lə̂ la azü tchêbêche âtə, ndə̂kə̂ mbo andjê tə̂ a-earə̂ rə lə̂ köbosə̂ kə̂ za su andjê sə̈ Ndjapä, ânyë andjë watə̂ azü ndə̂ Gbölö gö-gbïɛ̈ ndə̂ Ndjapä, ndə̂ tche zâ bâlâ ndə̂nə̈ sə̈ azü ndə̂ andjë nyîndə̂ yê lâme?

⁶ Praâbalë nyënyê ndə̂ nye nə̈! Nyë tälusə̂ earə̂ yûkü! Âdə̂âbô a-earə̂ rə kä ndə̂ âmbo nyê tə̂ gêgêe nə̈ lâme? Ânyë kə̂ e la nyê kulə̂ anda kə̂ wa ngbanga lâme?

⁷ Âdə̂âbô andjendjê kä ndə̂ âdɨ angbongbo apö tə̂ tchôtchô rə̈ ndə̂ Ndjapä zâ rə̂ pâ nyê lâme?

⁸ Tə̂ lëge nə̈, âdə nyë âkpe wa ndïɛ̈ ndə̂ Gbölö gö-gbïɛ̈, gundə̂sə̂ mbëtï ndə̂ yê ndə̂ âtô rə̂ päkëdə̂: «Amö nyində̂ ngâ zə̈ batə̂ tə̂ zə̈ la tə̂ zə̈», dëkë nyë mbô rə ndə̂ âdâka nə̂.

⁹ Praâbalë âdə nyë âsə dəndə̂ ngâ akrə balë, dëkë nyë mbô ngbongbo rə nə̂, ânyë ndïɛ̈ âwa ngbanga lə̂ küma nyê, bëte nyë kôsə̂ ma yê nə̂.

¹⁰ Âdə akrə âmbo rə gbɛ̂ gundə̂sə̂ andïɛ̈ gbɛ̂, ânyë kə̈ tê tə̂ ngânə̈ balë, dëkë tche tê tə̂ adɨ̂ nə̈ nə̂ gbɛ̂.

¹¹ Bëte tchanə̈ ndə̂ tche tô rə̂ päkëdə̂: «Amö puabô köchë âdəndjë ɛ̈chë ndə̂ akrə pû-î», tche tö ndjë rə̂ päkëdə̂: «Amö won-abô akrə wôn-ê». Praâbalë âdə mo âpuabô ɛ̈chë ndə̂ ngâ akrə pû-î, ânyë kə̈ wôn akrə, dëkë mo kôsə̂ ndïɛ̈ nə̂.

¹² Lə̂ pö gbɛ̂ ndə̂ nyê to rə̂, la rə gbɛ̂ ndə̂ nyê mbo rə̂, äwäpä nyë wunsə̂ nə̈ pä Ndjapä kä ndə̂ âwa ngbanga pâ nyê, lə̂ köbosə̂ ndïɛ̈ ndə̂ âji azü.

¹³ Bëte akrə ndə̂ tche wûn-âbô nyonyo angâ yê wûn-î, Ndjapä âsə̈ wa ngbanga lə̂ küma yê, kə̂ wun-abô ndjë nyonyo yê tee-a, bëte kə̂ wun nyonyo akrə kä ndə̂ âmbo rə̂ pä akrə wutu lə̂ ngbanga kênê ämbänə̈.

Pö ndə̂kə̂ za su sə̈ Krîsiti lakə̂ mbo kua nə̈

¹⁴ Arə̂mä ndə̂ mê, âdə ngâ akrə âto rə̂ päkëdə̂: «Anyë zâ su anyê sə̈ Krîsiti nə̂», ânyë kə̈ nyîâbô sə̂nə̈ nyî lə̂ kua nə̈-ê, kə̂ za su yê sə̈ Krîsiti nə̈ lâme âmboadje ngâ rə tə̂ yê? Kə̂ za su yê sə̈ Krîsiti nə̈ lâme tchadje tchë lə̂ kuzü?

¹⁵ Âdə ngâ nyê tə̂ köchë âdəndjë tə̂ ɛ̈chë âwabô wâ la lə̂ba ndə̂kə̂ yu rə̂, âdəndjë kɨ̈zɨ̂ ndə̂kə̂ zɨ rə̂ ndə̂ lo balë balë,

¹⁶ ânyë ngâ akrə lə̂ gbâtə̂ nyê tô rə̂ sə̈ tchë päkëdə̂: «Amö gu la zɨtɨ su, kə̂ sə ndro wo tə̂ zə̈ wo, mo zɨ kɨ̈zɨ̂ tchə̂lə̂ zə̈ sɨ», ânyë rə ndə̂ âwâ ndə̂kə̂ mbo dâkâ tə̂ yê âme, nyë zâbô rə̂ zâ sə̈ tchë-ê, kə̂ mbotə̂ rə käko lâme âmbotə̂ nyê atöko?

¹⁷ Äwä ndjë käko tə̂ pö ndə̂kə̂ za su sə̈ Ndjapä ndə̂ âwâbô wâ la kua ndə̂ yê tâ, dëkë kə̂ za su nə̈ lâme tchû nə̂.

¹⁸ Praâbalë ngâ akrə toadje rə̂ päkëdə̂: «Mo zâ su zə̈ sə̈ Krîsiti nə̂, mëmê ndjë gbɛ̂, më kä lakə̂ mbo kua nə̈». Mê toadje rə̂ ndə̂nə̈ päkëdə̂: «Amö nyisə̂ kə̂ za su zə̈ sə̈ Krîsiti ndə̂ âwâbô wâ la kua nə̈ lâme sə̈ mê, ânyë mëmê ndə̂ me nə̈, mê ânyisə̂ kua ndə̂ mê lə̂ köbosə̂ su mê ndə̂ më zâ rə̂ sə̈ Krîsiti lâme.»

¹⁹ Mo gâmba rə̂ nə̂ pä Ndjapä wä balë? Sə̂nə̈ kä. Angbongbo atchozö gämba ndjë rə̂ pä tche wä balë, ânyë kə̈ sə̂ lakə̂ gugu la wawa.

²⁰ Momö ndə̂ küma zə̈ wâbô wâ lanə̈ âtə, mo nyïndə̂ nə̈ pä më nyisə̂ nə̈ sə̈ mö pä kə̂ za su zə̈ sə̈ Krîsiti ndə̂ âwâbô wâ la kua ndə̂ yê tâ lâme wä kütû bhuu-ë?

²¹ Âdə̂âbo lə̂ köbosə̂ kua kä ndə̂ a dɨ̂ âta azə̂ Abrahâmo alême tə̂ djîrə̂ akrə lə̂ la Ndjapä? Äwä lə̂ köbosə̂ modô ndə̂ yê Izâke, ndə̂ tche zâ tchë la ngela sə̈ Ndjapä pâ gbalâka-ngela.

²² Mo wün rə̂ tchâme pä kə̂ za su Abrahâmo sə̈ Ndjapä wä balë la kua nə̈, ânyë su yê ndə̂ tche zâ rə̂ sə̈ Ndjapä däka gbɛ̂ lə̂ köbosə̂ kua ndə̂ tche mbô rə̂.

²³ Käko kä ndə̂ pö ndə̂ Mbëtï Ndjapä tô rə̂ mbô gundə̂sə̂ nə̈: «Abrahâmo zä su yê sə̈ Ndjapä ânyë Ndjapä wûn tchë batə̂ djîrə̂ akrə.» Käkö Ndjapä ê rə̂ tə̂ yê pä tche wätə̂ agü anyê.

²⁴ Nyë wûn rə̂ tchâme nə̂ pä akrə wätə̂ djîrə̂ akrə lə̂ la Ndjapä lə̂ köbosə̂ kə̂ mbo kua, âdə̂âbô kütû bëte kə̂ za su yê sə̈ Ndjapä-a.

²⁵ Pö âtə wä batə̂ andə̂ ɛ̈chë ndə̂ kua ndə̂ yê wâ ndə̂kə̂ pu aköchë, ndə̂ rə̈ yê wû pä Rahâbo lâme. Tche wä alême tə̂ djîrə̂ akrə lə̂ la Ndjapä bëte akua ndə̂ tche mbô rə̂. Bëte azü ndə̂ Isarayële ndə̂ a wân andjê alême, tche kʉ̈ andjê bhândə̂ yê, ânyë kə̈ mbô rə̂ pä andjë gu lə̂ ngâ köbo ngbî.

²⁶ Käko äwä ndjë batə̂ rə̂ ndə̂ akrə âwabô wâ la yi lə̂ yê, dëkë tche tchû nə̂. Käko ndjë, kə̂ za su sə̈ Ndjapä ndə̂ âwâbô wâ la akua ndə̂ yê tâ, dëkë kə̂ za su nə̈ lâme tchû nə̂.