Jâke 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Jâke, më wâtə̂ earə̂ kua ndə̂ Ndjapä la Gbölö Gbïɛ̈ Jezü Krîsiti. Mëmê kä ndə̂ âmbô mbëtï âtə sə̈ nyê; më pô ndə̂ azü ndə̂ Ndjapä ndə̂ andjë krʉ̂ tchə̂lə̂ tə̂ andjê katchôgbɛ̂ pâ cho âtə nə̂.

Kə̂ to pö sə̈ Ndjapä lə̂ köbosə̂ kə̂ za su sə̈ Krîsiti

² Arə̂mâ ndə̂ mê, äwäpä su nyê wa la mômô lə̂ arə gbôgbô gbɛ̂ ndə̂ âgbo nyê.

³ Bëte nyë wûnsə̂ nə̈ nə̂ pä, kə̂ za su sə̈ Krîsiti ndə̂ âro lə̂ arə gbôgbô, mbö rə̂ pä akrə rʉatə̂ su yê.

⁴ Praâbalë äwäpä kə̂ rʉatə̂ su nyê nə̈ mbo kua ndə̂ yê nə̈ lə̂ köbo nə̈ lə̂ arə gbɛ̂, ânyë nyê daka gbɛ̂, kə̂ wa la arə gbɛ̂, ndjë ngâ ngbongbo rə balë wabô lə̂ nyê tee-a.

⁵ Âdə ngâ akrə ndə̂ küma yê wâbô wâ lanə̈ âwa lə̂ gbâtə̂ nyê, äwäpä tche yukû nə̈ tchânə̂ Ndjapä, ndə̂ tche kʉ rə sə̈ azü gbɛ̂ la tchôtchô su, tchê zadje rə̂ sə̈ tchë, kə̂ yuabô ma akrə nə̈ pânə̈ tee-a.

⁶ Praâbalë äwäpä tche yukû nə̈ la su yê ndə̂ tche zâ rə̂ sə̈ Krîsiti, kə̂ dɨabô su yê dɨ̂ bïbïchuû pânə̈-ê, bëte akrə ndə̂ tche dɨ̂ su yê bïbïchuû, tche wä batə̂ kpabe tchêla gbölö ngû ngbro ndə̂ yi ro la rə̂ dəkalâ dəkalâ.

⁷ Äwäpä akrə käko lâme zabô rə̂ zâ lə̂ küma yê pä, tchê gboadje ngâ rə tchânə̂ Gbölö Gbïɛ̈-ê.

⁸ Bëte tche wätə̂ akrə ndə̂ tche dɨ su yê bïbïchuû, kə̈ wûn-âbo sə̂ rə ndə̂ tche nyîndə̂ kə̂ mbo rə̂-a.

Earə̂ yûkü la earə̂ rə

⁹ Äwäpä ngâ azə̂ ndə̂ tche wâtə̂ earə̂ yûkü wa la mômô bëte Ndjapä kênga tchë nə̂.

¹⁰ Praâbalë ngâ azə̂ ndə̂ tche wâ la arə, äwäpä tche bhi gogo yê, bëte Ndjapä tâlusə̂ yê nə̂, ânyë tchê roadje batə̂ nyînyî güsü.

¹¹ Lo wütu, tchô wo tə̂ gbölösə̂nə̈, kə̂ hro güsü, ânyë nyînyî nə̈ hro kə̂ tu atə̂ bêche, tchâme, kə̂ fu ndə̂nə̈ yu-î. Ârə̂ âwa ndjë me käko tə̂ earə̂ rə, tchê tchuadje lə̂ akua ndə̂ yê gbɛ̂.

Arə gbôgbô la arə ndə̂ âbolo azü

¹² Mômô kä tə̂ akrə ndə̂ tche rʉ̂âtə̂ su yê lə̂ arə gbôgbô, bëte âdə tche ârʉatə̂ su yê lə̂ arə gbôgbô nə̈ lâme nə̂, kə̂ gboadje kurône ndə̂ tchîsûwu, ndə̂ Ndjapä zâ bâlâ nə̈ sə̈ azü ndə̂ andjë nyîndə̂ yê.

¹³ Âdə ngâ akrə âro lə̂ arə ndə̂ âvu azü, âwâbo pä tche to rə̂ päkëdə̂: «Ndjapä kä ndə̂ âvû anyê-a.» Bëte ngâ rə ndə̂ âvu Ndjapä ndə̂kə̂ mbo ngbongbo rə balë wâbo-a, bëte tchetchë la tə̂ yê tche vûabô ngâ akrə balë-a.

¹⁴ Gʉ su akrə la tə̂ yê balë balë gbɛ̂ kä ndə̂ âvu tchë, kə̂ e la tchë ânyë tche te lə̂ ngbongbo rə.

¹⁵ Pânə̈ âdə gʉ su yê nə̈ âza güzu nə̂, kə̂ zɨ ngbongbo rə ësûwu, ânyë ngbongbo rə nə̈ âge nə̂, kə̂ zɨ kuzü.

¹⁶ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, nyë böloabô tə̂ nyê bôlo-ê.

¹⁷ Arə gbɛ̂ ndə̂ sə̂nə̈ lû, la akʉbala ndə̂ âdâka gbɛ̂ tö bhâ lafô, bhândə̂ Ndjapä, ndə̂ tche mbô arə ndə̂ âwâ la ngbänga yê tâ. Tche djêâbo tchə̂lə̂ tə̂ yê-a, kə̈ wâbo la tchâkrʉzrö yê tâ ndə̂ âtro-a.

¹⁸ Tchetchë la tə̂ yê, tche zä tchîsûwu sə̈ azə̂ lə̂ köbosə̂ pö ndə̂ yê ndə̂ âwâtə̂ lëge pö, ndə̂kə̂ pa azə̈ watə̂ adokʉ̈ arə gbɛ̂ ndə̂ tche mbô rə̂.

Nyë djë pö, kə̂ mbo rə gundə̂sə̂ nə̈

¹⁹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, äwäpä nyë wunsə̂ pö ndə̂ mê tö rə̂ âtə: Äwäpä akrə balë balë deka tü yê gasa kə̂ dje pö, kə̂ toabô pö tô gagasa-ê, kə̂ mboabô mêrâ mbô wândâ-wändä-ê.

²⁰ Bëte mêrâ ndə̂ akrə mboabô djîrə̂ rə tchâtchu Ndjapä-a.

²¹ Ndjë, äwäpä nyë gbotə̂ arə kâkpö gbɛ̂, la angbongbo su gbɛ̂ ndə̂ ârô masə̂nə̈-ê. Nyë gämba pö ndə̂ a chî rə̂ lə̂ su nyê lâme, la su ndə̂ âwâ nyima-ë. Bëte pö nə̈ lâme kä la gbôgbô ndə̂kə̂ tcha nyê lə̂ kuzü.

²² Âwâbo pä nyë deka tü nyê kütû ndə̂kə̂ dje pö nə̈-a, ndə̂kə̂ bolotə̂ nyê la tə̂ nyê-a, praâbalë äwäpä nyë mbo rə gundə̂sə̂ pö ndə̂ nyë djê rə̂ lâme.

²³ Âdə ngâ akrə âdje pö nə̈ ânyë kə̈ mbôâbô rə mbô gundə̂sə̂ nə̈, tche wä batə̂ akrə ndə̂ tche wûn tchâtchu yê ndə̂ a zɨ̂ tchë la rə̂ lə̂ wunla.

²⁴ Pânə̈ ndə̂ tche wûn tchâtchu yê nə̈ käko, kə̂ ro etə̂, sə̂ tchâtchu yê ndə̂ tche wûn rə̂ lâme yu lə̂ la yê-ê.

²⁵ Praâbalë akrə ndə̂ tche chî pâ ndïɛ̈ ndə̂ âdâka gbɛ̂, ndə̂ âji azə̂ tchâtchâ ngbâa, ânyë kə̈ zâtə̂ yê gbɛ̂ tâ, tchê dêkabô tü yê kütû ndə̂kə̂ dje pö ânyë âropâ tü yê tee-a, praâbalë tche âmbo rə ndə̂ ndïɛ̈ nə̈ tô pö ndə̂nə̈, akrə nə̈ lâme wadje la mômô lə̂ arə gbɛ̂ ndə̂ tchê mboadje rə̂.

²⁶ Âdə ngâ akrə âto rə̂ pä anyë kä lakə̂ voga Ndjapä, ânyë kə̈ bâtabô ma yê bâta-ê, dëkë akrə lâme bölotə̂ yê la tə̂ yê, kə̂ voga Ndjapä ndə̂ yê nə̈ lâme wä kütû bhuu-ë.

²⁷ Tchôtchô kə̂ voga Ndjapä, ndə̂ âwâbô wâ la kâkpö ndə̂ Ndjapä Bha nyîndə̂ nə̈ wä kâkë: Kə̂ wun tchô pâ awüntə̂wün la aɛ̈chë lə̂ ndavrö lə̂ yûkü ndə̂ andjê, kə̂ bata tə̂ yê tə̂ arə tchêbêche âtə, ânyë kə̂ teabô tê lə̂ ngbongbo rə-ê.