Jâan 9 - Mbëtï Ndjapä: TÄFO MADƗ̈

Jezü tchä ngâ earə̂ föla

¹ Ndə̂ Jezü âsə̈ ro pâ köbo, tche wûn ngâ earə̂ föla ndə̂ a zɨ̂ tchë zɨ̈ la rə̂.

² Adjisîpili ndə̂ yê yû tchë päkëdə̂: «Earə̂ kə̂ nyisə̂ rə, köchë ndə̂ a zɨ̂ tchë tə̂ earə̂ föla âtə, tchetchë kä ndə̂ âmbô ngbongbo rə? Âdəndjë bha nə̈ la anyï nə̈?»

³ Jezü tô rə̂ ndə̂nə̈ päkëdə̂: «Âdə̂âbô tchetchë âdəndjë bha nə̈ la anyï nə̈ kä ndə̂ âmbô ngbongbo rə-a. Praâbalë äwä ndə̂kə̂ pa a wun kua ndə̂ Ndjapä mbo rə̂ lə̂ yê.

⁴ Ârə̂ âsə̈ wa la tchêdalo, äwäpä azə̈ mbo kua ndə̂ tchanə̈ ndə̂ tche wân mê. Tchə̂lə̂ bütchî ndô nə̂, ânyë ngâ akrə balë wâbo ndə̂kə̂ mbo kua-a.

⁵ Ndə̂ gbô mê ndə̂po bêche âtə, më wätə̂ ngbänga ndə̂ tchêbêche âtə.»

⁶ La tchêngbâ nə̈ ndə̂ Jezü tô rə̂ käko, tche kû ngrʉ̂srö ëbêche kə̈ mbô rə̂ la kpata, pânə̈ tche nâna rə̂ ëpâ gaga la earə̂ föla lâme,

⁷ kə̈ tô rə̂ sə̈ tchë päkëdə̂: «Amö e kə̈ djûtu la zə̈ lə̂ kpakpa ngû ndə̂ Silowë.» Silowë nə̈ lâme nyïndə̂ kə̂ to rə̂ päkëdə̂: «Akrə ndə̂ a wân tchë». Tche ê kə̈ djûtu la yê, ndə̂ tche âsə̈ dotə̂ yê, kə̈ wûn tchô.

⁸ Azü ndə̂ andjë lô ndola nda ndə̂ yê la angâ azü ndə̂ andjë wûn tchë dokʉ̈tchê lakə̂ yukû rə tchânə̂ azü lâme, andjë tô rə̂ päkëdə̂: «Âdə̂âbô köchë ndə̂ tche sə̂ bêche alême lakə̂ yukû rə tchânə̂ azü lâme kä âtə?»

⁹ Angânə̈ tô rə̂ päkëdə̂: «Tchetchë kä.» Andjanə̈ me tô rə̂ päkëdə̂: «Ɛ̂n-ɛ̈n, akrə nə̈ kʉ̈ tchë kʉ̈.» Tchetchë la tə̂ yê tô rə̂ päkëdə̂: «Mëmê kä.»

¹⁰ Andjë tô rə̂ sə̈ tchë päkëdə̂: «La zə̈ jï atöko?»

¹¹ Tche tô rə̂ sə̈ andjê päkëdə̂: «Köchë ndə̂ rə̈ yê wû pä Jezü lâme mbö kpata, kə̈ nâna rə̂ ëpâ gaga la mê, ânyë kə̈ tô rə̂ sə̈ mê päkëdə̂: ‹Amö êë, kə̈ djûtu la zə̈ lə̂ kpakpa ngû ndə̂ Silowë.› Käko më ê kə̈ djûtu la mê, ânyë kə̈ kä wûn tchô ngrôô!»

¹² Andjë yû tchë päkëdə̂: «Köchë lâme sə̈ bhâ tchêbâ?» Tche tô rə̂ ndə̂nə̈ päkëdə̂: «Më wûn-âbo sə̂nə̈-a.»

Afarizïɛ̈n yü earə̂ föla ndə̂ la yê vrô

¹³ Andjë ê la tchanə̈ ndə̂ la yê fô alême pu afarizïɛ̈n.

¹⁴ Dëkë lə̂ ngâ lö sabäa alême kä ndə̂ Jezü mbô kpata, ânyë kə̈ vrô la yê la rə̂.

¹⁵ Âdə andə̂ afarizïɛ̈n nə̈, andjë yû tchë tə̂ köbo ndə̂ la yê vrô la rə̂. Tche tô rə̂ sə̈ andjê päkëdə̂: «Tche mbö kpata ëpâ gaga la mê, më djûtu la mê ânyë kə̈ wûn tchô.»

¹⁶ Angâ afarizïɛ̈n nə̈ tô rə̂ päkëdə̂: «Köchë ndə̂ tche mbô rə lâme tôâbo bhândə̂ Ndjapä-a, bëte tche kpêâbo wa ndïɛ̈ ndə̂ lö sabäa-a.» Angânə̈ tô rə̂ päkëdə̂: «Atöko kä ndə̂ ngâ earə̂ ngbongbo rə wâ ndə̂kə̂ mbo akpɨ̈ngbɨ̈ rə kâkë âtə?» Tchâme tchə̂lə̂ andjê krʉ̂-ê.

¹⁷ Afarizïɛ̈n kâ yû earə̂ föla lâme päkëdə̂: «Momö, âbatə̂ tche vrô la zə̈ lâme, mo tö rə̂ tə̂ yê atöko?» Tche tô rə̂ ndə̂nə̈ päkëdə̂: «Tche də̈ earə̂ ndə̂ma Ndjapä.»

¹⁸ Dokʉ̈tchê ndə̂kə̂ pa andjë wan tchô ndə̂kə̂ e bha nə̈ la anyï nə̈, ajuîfu gâmbabô rə̂ pä tche wä alême tə̂ earə̂ föla ânyë kə̈ kâ wûn tchô lâme-a.

¹⁹ Andjë yû bha nə̈ la anyï nə̈ päkëdə̂: «Bechë ndə̂ nyê kä âtə? Ndə̂ nyë tö rə̂ pä nyë zɨ̈ tchë zɨ̈ tə̂ earə̂ föla âtə? Tïtïsə̂nə̈ atöko kä ndə̂ tche wûn tchô angaâtə?»

²⁰ Bha nə̈ la anyï nə̈ tô rə̂ ndə̂nə̈ päkëdə̂: «Ârâ wûnsə̂ nə̈ nə̂ pä modô ndə̂ ârâ kä, ânyë a zɨ̈ tchë tə̂ earə̂ föla.

²¹ Praâbalë atöko kä ndə̂ tche wûn tchô angaâtə, ârâ wûn-âbo sə̂nə̈-a. Tchabâ kä ndə̂ âvrô la yê, ârâ wûn-âbo ndjë sə̂nə̈-a. Nyë yü tchë, tche mbôtə̂ yê tə̂ köchë nə̂ ndə̂kə̂ to pö la tə̂ yê pâ pö ndə̂ âwûn tchë!»

²² Bha nə̈ la anyï nə̈ tö rə̂ käko bëte andjë mbö wawa ajuîfu. Bëte ajuîfu djëtə̂ andjê pä, âdə ngâ akrə âwun tchë batə̂ Krîsiti, a gro tchë lə̂ nda kə̂ voga Ndjapä ndə̂ andjê.

²³ Bëte rə̂ kä ndə̂ bha nə̈ la anyï nə̈ tô rə̂ päkëdə̂: «Tche mbôtə̂ yê tə̂ köchë nə̂, nyë yü tchë.»

²⁴ Afarizïɛ̈n kâ ê köchë ndə̂ la yê vrô lâme tə̂ bïchuû nə̈, kə̈ tô rə̂ sə̈ tchë päkëdə̂: «Amö za ayîabâ sə̈ Ndjapä. Ârâ wünsə̂ nə̈ pä köchë lâme wätə̂ earə̂ ngbongbo rə.»

²⁵ Tche tô rə̂ ndə̂nə̈ päkëdə̂: «Âdə tche âwatə̂ earə̂ ngbongbo rə, më wûn-âbo sə̂nə̈-a. Më wünsə̂ rə balë, më wä alême tə̂ earə̂ föla, praâbalë angaâtə më wûn tchô nə̂.»

²⁶ Andjë tô rə̂ päkëdə̂: «Tche mbö giamâ tə̂ zə̈? Tche vrö la zə̈ nə̈ atöko?»

²⁷ Tche tô rə̂ ndə̂nə̈ sə̈ andjê päkëdə̂: «Më tô rə̂ sə̈ nyê dokʉ̈tchê nə̂, praâbalë nyë djêâbo rə̂-a. Bëte giamâ kä ndə̂ nyë kä nyîndə̂ kə̂ dje rə̂ tə̂ täfo nə̈? Nyënyê ndjë gbɛ̂, nyë nyïndə̂ kə̂ watə̂ adjisîpili ndə̂ yê?»

²⁸ Andjë drô tchë, kə̈ tô rə̂ päkëdə̂: «Momö kä ndə̂ âwâtə̂ djisîpili ndə̂ akrə lâme, ârâ wätə̂ adjisîpili ndə̂ Möyîze.

²⁹ Ârâ wünsə̂ nə̈ pä Ndjapä tö pö alême sə̈ Möyîze, praâbalë tchanə̈ âtə, ârâ wûn-âbo sə̂ tchô ndə̂ tche tô tâ-a.»

³⁰ Köchë lâme tô rə̂ ndə̂nə̈ sə̈ andjê päkëdə̂: «Wunsa rə ndə̂ âmbo rə̂ pä tchə̂lə̂ küma azü djingɨli tâ kä lâme: Nyë wûn-âbo sə̂ tchô ndə̂ tche tô tâ-a, dëkë tchetchë kä ndə̂ âvrô la mê!

³¹ Ârâ wünsə̂ nə̈ pä Ndjapä djêâbo a-earə̂ ngbongbo rə-a. Praâbalë âdə ngâ akrə âlusə̂ Ndjapä, ânyë kə̈ mbô rə ndə̂ su yê nyîndə̂ nə̈, tchanə̈ lâme, Ndjapä dje tchë.

³² A djêâbo rə̂ lo balë pä ngâ akrə vrô la ngâ earə̂ föla ndə̂ a zɨ̂ tchë zɨ̈ la rə̂ nə̂-a.

³³ Âdə köchë lâme âtoabô tô bhândə̂ Ndjapä-ê, tche wâbo ndə̂kə̂ mbo ngâ rə balë-a.»

³⁴ Andjë tô rə̂ ndə̂nə̈ sə̈ tchë päkëdə̂: «Momö, a zɨ̈ mö la ndundu tə̂ zə̈ gbɛ̂ lə̂ ngbongbo rə, ânyë momö kä ndə̂ ânyisə̂ rə sə̈ ârâ?» Tchâme, andjë grô tchë atə̂ sûwu.

Alëge a-earə̂ föla

³⁵ Ndə̂ Jezü djê rə̂ pä afarizïɛ̈n grô köchë lâme nə̂ atə̂ sûwu, Jezü ê kə̈ gbô tchë ânyë kə̈ yû tchë päkëdə̂: «Momö, mo zâ su zə̈ sə̈ Modô ndə̂ Akrə nə̂?»

³⁶ Tche tô rə̂ ndə̂nə̈ sə̈ tchë päkëdə̂: «Gbölö Gbïɛ̈, Modô ndə̂ Akrə nə̈ də̈ tchabâ ndə̂kə̂ pa më za su mê sə̈ tchë?»

³⁷ Jezü tô rə̂ sə̈ tchë päkëdə̂: «Mo wûn tchë nə̂, akrə ndə̂ mo to pö la tchë âtə, tchetchë kä.»

³⁸ Käko tche tô rə̂ päkëdə̂: «Gbölö Gbïɛ̈, më zâ su mê sə̈ mö nə̂.» Tche gʉ̂te tchâtchâ yê.

³⁹ Pânə̈ Jezü tô rə̂ päkëdə̂: «Më nə̈ atə̂ bêche âtə ndə̂kə̂ wa ngbanga, ndə̂kə̂ pa a-earə̂ föla wun tchô, ânyë azü ndə̂ andjë wun tchô dotə̂ andjê tə̂ a-earə̂ föla.»

⁴⁰ Pânə̈ ndə̂ angâ afarizïɛ̈n ndə̂ andjë sə̂ ndola Jezü djê apö lâme, andjë yû tchë päkëdə̂: «Ârâ ndjë gbɛ̂, ârâ wätə̂ a-earə̂ föla?»

⁴¹ Jezü tô rə̂ ndə̂nə̈ sə̈ andjê päkëdə̂: «Âdə nyë âwa alême tə̂ a-earə̂ föla, kə̂ mboabô ngbongbo rə tee-a. Praâbalë angaâtə nyë tö rə̂ päkëdə̂: ‹Ârâ wün tchô›, dëkë gbô ngbongbo rə kä lə̂ nyê.»