Jâan 7 - Mbëtï Ndjapä: TÄFO MADƗ̈

Arə̂mâ ndə̂ Jezü zâbo su andjê sə̈ tchë-a

¹ La tchêngbâ nə̈ Jezü sə̂ lakə̂ ro kulə̂ agö ndə̂ Galilë. Tche nyîâbo ndə̂kə̂ nə lə̂ agö ndə̂ Judë-a, bëte ajuîfu kä lakə̂ pu köbo ndə̂kə̂ won tchë.

² Dëkë kpülü ndə̂ andokʉ̈ ndə̂ ajuîfu ndô nə̂.

³ Arə̂mâ ndə̂ yê tô rə̂ sə̈ tchë päkëdə̂: «Amö alafô tchâtə kə̈ rô atə̂ Judë, käko adjisîpili ndə̂ zə̈ wun ndjë arə ndə̂ mo mbo rə̂.

⁴ Âdə ngâ akrə ânyində̂ nə̈ pä azü wunsə̂ yê, tchê mboabô rə lə̂ küwû nə̈ tee-a. Batə̂ rə̂ ndə̂ mo mbo arə kâkë âtə, amö nyisə̂ tə̂ zə̈ ndə̂kə̂ pa azü pâ cho wunsə̂ zə̈.»

⁵ Bëte arə̂mâ ndə̂ Jezü la tə̂ andjê zâbo su andjê sə̈ tchë-a.

⁶ Jezü tô rə̂ sə̈ andjê päkëdə̂: «Lö mê wûtuabô dämba nə̂-a, andə̂ nye nə̈, lö nyê kä tâ logbɛ̂.

⁷ Azü tchêbêche âtə wâbo ndə̂kə̂ kosə̂ nyê-a, andə̂ me nə̈, andjë kösə̂ mê, bëte më tö pö pâ andjê pä, akua ndə̂ andjë mbo rə̂ wätə̂ ngbongbo nə̈.

⁸ Nyë ë andə̂ nye nə̈ ndə̂ kpülü nə̈, mëmê ndə̂ me nə̈ më êâbo-a, bëte lö mê wûtuabô dämba-a.»

⁹ Pânə̈ ndə̂ tche tô rə̂ käko, tche sə̂ andə̂ ye nə̈ po bhâ Galilë.

Jezü ë ndə̂ kpülü ndə̂ andokʉ̈

¹⁰ Ndə̂ arə̂mâ ndə̂ yê ê ndə̂ kpülü nə̈, Jezü ê ndjë, praâbalë tche nyîâbo sə̂ tə̂ yê sə̈ azü-a, tche zätə̂ yê wü.

¹¹ Ajuîfu sə̂ lakə̂ pu tchë lə̂ kpülü nə̈ lakə̂ to rə̂ päkëdə̂: «Tche sə̈ bhâ tchêbâ?»

¹² Angbängbä azü lə̂ kpûlû nə̈ sə̂ lakə̂ po lə̂ ma andjê tə̂ pö ndə̂ Jezü tə̂ gbölösə̂nə̈. Angânə̈ tö rə̂ päkëdə̂: «Tche wätə̂ tchôtchô akrə.» Angânə̈ tô andə̂ andjë nə̈ päkëdə̂: «Tche kä lakə̂ mbo rə̂ pä köbo azü yu.»

¹³ Praâbalë ngâ akrə ndə̂ tche tô pö tə̂ yê kraâ lə̂ la azü sə̂âbo-a, bëte wawa ajuîfu kä lakə̂ mbo andjê.

¹⁴ Ndə̂ andjë mbô kpülü nə̈ âwûtu lə̂ gûgû nə̈, Jezü ê atə̂lə̂ gbölö nda Ndjapä, kə̈ sə̂ lakə̂ nyisə̂ rə sə̈ azü.

¹⁵ Ndə̂ ajuîfu djê pö lâme, tchə̂lə̂ küma andjê djîngɨli, andjë tô rə̂ päkëdə̂: «Köchë âtə wünsə̂ mbëtï atöko ndə̂ tche mândabô mbëtï mânda âtə?»

¹⁶ Jezü tô rə̂ ndə̂nə̈ sə̈ andjê päkëdə̂: «Rə ndə̂ mê nyisə̂ nə̈ tôâbo bhândə̂ mê-a, praâbalë ätö bhândə̂ akrə ndə̂ tche wân mê.

¹⁷ Akrə ndə̂ tche nyîndə̂ kə̂ mbo rə ndə̂ su Ndjapä nyîndə̂ nə̈, tchê wun-adje sə̂nə̈ pä rə ndə̂ mê nyisə̂ nə̈, tö bhândə̂ Ndjapä, âdəndjë rə̂ ndə̂ mëmê kä ndə̂ âto pö ndə̂ mê la tə̂ mê.

¹⁸ Akrə ndə̂ tche tô pö ndə̂ yê la tə̂ yê, tche pü köbo ndə̂kə̂ pa azü lusə̂ yê. Praâbalë akrə ndə̂ tche nyîndə̂ nə̈ pä azü lusə̂ akrə ndə̂ tche wân tchë, tche tö lëge pö, ânyë mbə̈lï wâbo lə̂ yê-a.

¹⁹ Möyîze zâbo ndïɛ̈ alême sə̈ nyê? Praâbalë ngâ akrə balë lə̂ gûtə̂ nyê mbôâbo rə gundə̂sə̂ ndïɛ̈ nə̈-a. Bëte giamâ kä ndə̂ nyê pu köbo ndə̂kə̂ won mê?»

²⁰ Kpûlû azü nə̈ tô rə̂ ndə̂nə̈ sə̈ tchë päkëdə̂: «Ngbongbo tchozö kä lə̂ zə̈. Tchabâ kä ndə̂ âpû köbo ndə̂kə̂ won mö?»

²¹ Jezü tô rə̂ ndə̂nə̈ sə̈ andjê päkëdə̂: «Më mbö kütû ngâ kua balë, ânyë tchə̂lə̂ küma nyê gbɛ̂ djîngɨli âtə!

²² Möyîze zä köbo sə̈ nyê alême ndə̂kə̂ wa gasa. Âtôâbo bhândə̂ Möyîze-a, praâbalë ätö tə̂ araâta nyê, ânyë nyë kä lakə̂ wa aköchë la gasa lə̂ lö sabäa.

²³ Âdə nyê âwa ngâ köchë la gasa lə̂ lö sabäa, ndə̂kə̂ pa nyë ndɨabô tchə̂lə̂ ndïɛ̈ ndə̂ Möyîze ndɨ̂-î, ndə̂ âdə̂ käko lâme, bëte giamâ kä ndə̂ su nyê kʉ̂ nyê tə̂ mê bëte rə̂ ndə̂ më tchâ ngâ earə̂ tə̂kömbô la ndundu tə̂ yê gbɛ̂ lə̂ lö sabäa?

²⁴ Âwâbo pä nyë wa ngbanga tə̂ pö ndə̂ la akrə-a, äwäpä nyë wa djîrə̂ ngbanga.»

Jezü wätə̂ Krîsiti?

²⁵ Angâ azü gö ndə̂ Jerûzalêmo tö rə̂ päkëdə̂: «Âdə̂âbo köchë ndə̂ a pu tchë ndə̂kə̂ won tchë lâme kä âtə?

²⁶ Tche kä sa âtə, ndə̂ tche to pö kraâ lə̂ la azü gbɛ̂ âtə, ânyë andjë tôâbo ngâ pö balë sə̈ tchë-a! Agbölö azü ndə̂ azə̂ wûn-âdje sə̂nə̈ nə̂ pä tche wätə̂ Krîsiti?

²⁷ Praâbalë tchanə̈ âtə, azə̈ wûnsə̂ tchô ndə̂ tche tô tâ nə̂, praâbalë âdə Krîsiti ânə, ngâ akrə balë ndə̂ tche wunsə̂ tchô ndə̂ tche tô tâ səabô tee-a.»

²⁸ Käko Jezü sə̂ lakə̂ nyisə̂ rə sə̈ andjê bhâlə̂ gbölö nda Ndjapä, kə̈ tô pö ngbôô päkëdə̂: «Nyë wûnsə̂ mê nə̂! Kə̈ wûnsə̂ tchô ndə̂ më tô tâ nə̂! Praâbalë më nə̂âbo pâ küma mê-a. Akrə ndə̂ tche wân mê, tche də̈ akrə ndə̂ tche to lëge pö, ânyë nyë wûn-âbo sə̂ yê-a.

²⁹ Më wûnsə̂ yê nə̂, bëte më tö bhândə̂ yê, tchetchë kä ndə̂ âwân mê.»

³⁰ Käkö, andjë pû köbo ndə̂kə̂ za tchë, praâbalë ngâ akrə balë grʉ̂âbo tchë-a, bëte dalo ndə̂ yê wûtuabô dämba-a.

³¹ Lə̂ gûtə̂ kpûlû azü nə̈ lâme, angbängbä angânə̈ zâ su andjê sə̈ tchë. Andjë tö rə̂ päkëdə̂: «Âdə Krîsiti ânə, tchê mboadje akpɨ̈ngbɨ̈ arə âro anə̈ ndə̂ tchanə̈ âtə mbô rə̂ âtə?»

Afarizïɛ̈n wän aturûgu ndə̂ gbölö nda Ndjapä ndə̂kə̂ za Jezü

³² Ndə̂ afarizïɛ̈n djê kpûlû azü nə̈ ndə̂ andjë sə̂ lakə̂ po lə̂ ma andjê tə̂ pö ndə̂ Jezü, agbölö a-earə̂ kə̂ wa ngela sə̈ Ndjapä la afarizïɛ̈n wân aturûgu ndə̂ gbölö nda Ndjapä ndə̂kə̂ za tchë.

³³ Jezü tô rə̂ päkëdə̂: «Gbô mê kä lə̂ gûtə̂ nyê ngbâ kpîɛ̂kpîɛ̂ lö, la tchêngbâ nə̈, më âka atə̂ndə̂ tchanə̈ ndə̂ tche wân mê.

³⁴ Nyê puadje mê, praâbalë kə̂ gboabô mê tee-a, bëte sə̂nə̈ ndə̂ mê sə tâ, nyë wâbo ndə̂kə̂ wutu bhâsə̂ tchô nə̈ lâme-a.»

³⁵ Ajuîfu tô rə̂ lə̂ gbâtə̂ andjê päkëdə̂: «Tche âe bhâ tchêbâ ânyë azə̂ gboabô tchë gbô-ê? Tche âe bhândə̂ ajuîfu ndə̂ andjë krʉ̂ tchə̂lə̂ tə̂ andjê lə̂ gbâtə̂ agerêke lâme ndə̂kə̂ nyisə̂ rə sə̈ agerêke nə̈?

³⁶ Pö ndə̂ tche tô rə̂ âtə nyïndə̂ kə̂ to rə̂ atöko? Nyê puadje mê, praâbalë kə̂ gboabô mê tee-a, bëte sə̂nə̈ ndə̂ mê sə tâ, nyë wâbo ndə̂kə̂ wutu bhâsə̂ tchô nə̈ lâme-a.»

Pö ndə̂ ngû ndə̂ âza tchîsûwu sə̈ azü

³⁷ Ndə̂ adɨ̂ balë lö kpülü nə̈ âsə̈ wûtu, ndə̂ âwâtə̂ gbölö lö, Jezü krʉ̂ lafô kə̈ tô rə̂ ngbôô päkëdə̂: «Âdə gʉ ngû ânyu ngâ akrə, äwäpä tche nə pu mê, kə̂ ndjo ngû nə̈.

³⁸ ‹Akrə ndə̂ tche zâ su yê sə̈ mê, ngû ndə̂ âza tchîsûwu sə̈ akrə toadje bhâtə̂ su yê ânyë kə̂ bro› batə̂ rə̂ ndə̂ Mbëtï Ndjapä tô rə̂.»

³⁹ Pö ndə̂ Jezü tô rə̂ lâme, tche nyïndə̂ kə̂ to rə̂ pä, azü ndə̂ andjê zadje su andjê sə̈ tchë, andjê gboadje Yingö ndə̂ Ndjapä. Bëte tə̂ lö nə̈ lâme, Yingö wâbo tâ dämba-a, bëte Ndjapä lûâbo sə̂ Jezü dämba-a.

Tchə̂lə̂ kpûlû azü krʉ̈ tchə̂lə̂ tə̂ yê tə̂ pö ndə̂ Jezü

⁴⁰ La tchêngbâ nə̈ ndə̂ azü nə̈ djê apö ndə̂ Jezü lâme, angânə̈ lə̂ kpûlû nə̈ tô rə̂ päkëdə̂: «Tə̂ lëge nə̈, tchetchë kä ndə̂ âdə̂ earə̂ ndə̂ma Ndjapä!»

⁴¹ Angânə̈ tô rə̂ päkëdə̂: «Tche wätə̂ Krîsiti!» Praâbalë angânə̈ tô ndjë rə̂ päkëdə̂: «Krîsiti nə̈ âto bhâ Galilë ânyë kə̂ nə?

⁴² Mbëtï Ndjapä tôâbo rə̂ pä Krîsiti nə̈ ânə pâ mawo ndə̂ Davîdi, ndə̂ tche də̂ akrə gö ndə̂ Bêtelehêmo, ndə̂ âwâtə̂ yɛ̈yɛ̈ gö ndə̂ Davîdi lâme?»

⁴³ Tchə̂lə̂ kpûlû azü nə̈ krʉ̂ tchə̂lə̂ tə̂ yê tə̂ pö ndə̂ Jezü.

⁴⁴ Angânə̈ lə̂ gûtə̂ andjê nyîndə̂ kə̂ za Jezü, praâbalë ngâ akrə balë grʉ̂âbo tchë-a.

Gbôgbô su ndə̂ agbölö azü ndə̂ ajuîfu

⁴⁵ Aturûgu ndə̂ gbölö nda Ndjapä nə̈ dôtə̂ andjê pu agbölö a-earə̂ kə̂ wa ngela sə̈ Ndjapä la afarizïɛ̈n. Andjë yû aturûgu nə̈ päkëdə̂: «Bëte giamâ nyë kâbô kâ la tchë-ê?»

⁴⁶ Andjë tô rə̂ ndə̂nə̈ sə̈ andjê päkëdə̂: «Ngâ akrə balë tôâbo pö batə̂ köchë lâme-a.»

⁴⁷ Afarizïɛ̈n yû andjê päkëdə̂: «Nyënyê ndjë gbɛ̂, tche yû köbo nyê nə̂?

⁴⁸ Ngâ akrə lə̂ gbâtə̂ amakündji ndə̂ ajuîfu, âdəndjë ngâ farizïɛ̈n kä tâ ndə̂ tche zâ su yê sə̈ tchë?

⁴⁹ Praâbalë kpûlû azü nə̈ lâme ndə̂ andjë wûn-âbo sə̂ ndïɛ̈ ndə̂ Möyîze wûn lâme, ngbongbo pö kä pâ andjê!»

⁵⁰ Nîködême ndə̂ tche wâtə̂ farizïɛ̈n, ndə̂ tche ê alême dokʉ̈tchê kə̈ gbô Jezü, tche tô rə̂ sə̈ andjê päkëdə̂:

⁵¹ «Ndïɛ̈ ndə̂ azə̂ wä ngbanga lə̂ küma ngâ akrə dokʉ̈tchê ndə̂kə̂ pa a dje tchë, kə̂ wunsə̂ rə ndə̂ tche mbô rə̂?»

⁵² Andjë tô rə̂ ndə̂nə̈ sə̈ tchë päkëdə̂: «Mo də̈ ndjë ngâ akrə gö ndə̂ Galilë? Amö pu rə̂ lə̂ Mbëtï Ndjapä, kə̂ wun-adje rə̂ pä ngâ earə̂ ndə̂ma Ndjapä balë tôâbo bhâ Galilë-a.» [

Jezü la ɛ̈chë ndə̂ tche pû köchë ndə̂ ngâ akrə

⁵³ La tchêngbâ nə̈ akrə balë balë gû atə̂ndə̂ yê.