Jâan 6 - Mbëtï Ndjapä: TÄFO MADƗ̈

Jezü kʉ̈ kɨ̈zɨ̂ sə̈ azü sâke mïndûu

¹ La tchêngbâ nə̈ Jezü zû dəkalâ gbölö kpakpa ngû ndə̂ Galilë ndə̂ ngâ rə̈ nə̈ wû pä Tïbërïyâde.

² Ngâ gbölö kpûlû azü zâ tchêngbâ yê, bëte andjë wün akpɨ̈ngbɨ̈ rə ndə̂ tche mbô rə̂ tə̂ a-earə̂ tə̂kömbô.

³ Jezü â atə̂lə̂ küma ngâ aga, kə̈ sə̂ tchâme la adjisîpili ndə̂ yê.

⁴ Dëkë Pâke ndə̂ âwâtə̂ kpülü ndə̂ ajuîfu ndô nə̂.

⁵ Jezü kênga la yê kə̈ wûn ngâ gbölö kpûlû azü ndə̂ andjë nə pu tchë. Tche tô rə̂ sə̈ Fïlîpe päkëdə̂: «Azə̈ âyo mâpa bhâ tchêbâ ânyë azü âtə gbo kɨ̈zɨ̂ ndə̂kə̂ zɨ rə̂?»

⁶ Jezü tö pö lâme käko ndə̂kə̂ dje pö ndə̂ âwâ bhâlə̂ su Fïlîpe, bëte tchetchë, tche wûnsə̂ rə ndə̂ tche nyîndə̂ kə̂ mbo rə̂ nə̂.

⁷ Fïlîpe tô rə̂ ndə̂nə̈ sə̈ tchë päkëdə̂: «Âdə azə̈ âwa ndjë la mîɛ̈-makətche ngbangbo bïchuû, âkʉ̂âbo sə̂kə̂ yo kɨ̈zɨ̂ ndə̂kə̂ pa akrə balë balë gbo kpîɛ̂kpîɛ̂ ndöma nə̈-a.»

⁸ Ngâ djisîpili ndə̂ yê balë ndə̂ rə̈ yê wû pä Anderë ndə̂ tche wâtə̂ yîngâ Chemôn-Pîêre tô rə̂ sə̈ tchë päkëdə̂:

⁹ «Ngâ bechë-ɛ̈köchë kä tchâtə ndə̂ tche wâ la agiangû bïchuû, la mâpa mïndûu ndə̂ a mbô rə̂ la zûwü ôreje. Praâbalë rə nə̈ lâme âmbo giamâ tə̂ angbängbä azü âtə?»

¹⁰ Käko Jezü tô rə̂ päkëdə̂: «Nyë tö rə̂ sə̈ andjê gbɛ̂ ndə̂kə̂ pa andjë sə bêche», tchâme andjë sə̂ gbɛ̂ ëbêche. Abë wä sə̂ tchô nə̈ lâme tə̂ gbölösə̂nə̈. Kə̂ ngba ndə̂ aköchë nə̈ gbɛ̂ wä ndola sâke mïndûu.

¹¹ Jezü kʉ̂ mâpa nə̈, kə̈ zâ ayîabâ sə̈ Ndjapä, kə̈ krʉ̂ tchə̂lə̂ nə̈ tə̂ azü nə̈, tche mbô ndjë tâ käko tə̂ agiangû nə̈. Tche krʉ̂ tchə̂lə̂ nə̈ tə̂ andjê batə̂ rə̂ ndə̂ su andjê nyîndə̂ nə̈.

¹² Ndə̂ tchə̂lə̂ andjê gbɛ̂ sɨ̂, Jezü tô rə̂ sə̈ adjisîpili ndə̂ yê päkëdə̂: «Nyë päla adɨ̂ andöma nə̈ gbɛ̂, ânyë ngânə̈ balë ndɨabô ndɨ̂-î.»

¹³ Adjisîpili pâla adɨ̂ andöma amâpa mïndûu ndə̂ a mbô rə̂ la zûwü ôreje lâme, ndə̂ azü nə̈ zɨ̂ rə̂ lâme, âsɨ̂ agbasa lə̂ könô gbɛ̂ tchêpâ nə̈ bïchuû.

¹⁴ Ndə̂ azü nə̈ wûn kpɨ̈ngbɨ̈ rə ndə̂ Jezü mbô rə̂ lâme, andjë tô rə̂ päkëdə̂: «Köchë âtə wätə̂ lëge earə̂ ndə̂ma Ndjapä, ndə̂ tche wâ ndə̂kə̂ nə atə̂ bêche âtə.»

¹⁵ Jezü wûnsə̂ nə̈ pä azü nə̈ nyïndə̂ kə̂ za tchë la gbôgbô ndə̂kə̂ mbo tchë tə̂ gbïɛ̈, tche kâ wûtu lə̂ gûtə̂ andjê, kə̈ sə̂ la kütû yê bhâlə̂ küma aga.

Jezü nə̈ pâ gbölö kpakpa ngû

¹⁶ La tchêndə̂gölo, adjisîpili ndə̂ Jezü trô atə̂ maga gbölö kpakpa ngû.

¹⁷ Andjë â lə̂ ngâ külû ndə̂kə̂ zu atə̂ Käpërënäyûmo ndə̂ âwâ dəkalâ gbölö ngû nə̈. Dëkë tchô bû nə̂, praâbalë Jezü kâbo pu adjisîpili ndə̂ yê dämba nə̂-a.

¹⁸ Ngâ gbölö yi sə̂ lakə̂ mbo, ânyë tchêla gbölö ngû nə̈ lâme sə̂ lakə̂ tro.

¹⁹ Ndə̂ andjë tô külû nə̈ ngbâ kïlömɛ̂tere ndola mïndûu manə̈ balë, andjë wûn Jezü ndə̂ tche sə̂ lakə̂ gitə̂ yê pu külû nə̈ lakə̂ nə la gbölö ngû nə̈, tchâme wawa mbô andjê.

²⁰ Praâbalë Jezü tô rə̂ sə̈ andjê päkëdə̂: «Mëmê kä, nyë mböäbô wa mbô-ê!»

²¹ Andjë nyîndə̂ kə̂ za tchë lə̂ külû nə̈, djîrə̂, külû nə̈ wûtu ë maga gbölö ngû nə̈, sə̂ tchô ndə̂ andjë nyîndə̂ kə̂ e tâ lâme.

Kpûlû azü pü Jezü

²² Tchô krâ pânə̈, kpûlû azü ndə̂ gbô andjë sə̂ po dəkalâ gbölö kpakpa ngû nə̈ wûn rə̂ pä kütû külû balë kä âkə̈ wâ tâ, ânyë Jezü âbo âmaɛ lə̂ külû nə̈ la adjisîpili ndə̂ yê-a, kütû adjisîpili nə̈ kä âkə̈ â lə̂ külû nə̈ ânyë kə̈ rô etə̂.

²³ Praâbalë angâ azü nə̂ la angâ akülû, andjë tö bhâ Tïbërïyâde kə̈ wûtu ndola sə̂ tchô ndə̂ andjë zɨ̂ mâpa tâ alême, pânə̈ ndə̂ Gbölö Gbïɛ̈ zâ ayîabâ sə̈ Ndjapä lâme.

²⁴ Ndə̂ kpûlû azü nə̈ wûn rə̂ pä Jezü la adjisîpili ndə̂ yê sə̂âbo sə̂ tchô nə̈ lâme, andjë â lə̂ akülû nə̈ kə̈ ê atə̂ Käpërënäyûmo ndə̂kə̂ pu tchë.

Jezü wätə̂ mâpa ndə̂ âza tchîsûwu sə̈ akrə

²⁵ Ndə̂ andjë gbô Jezü dəkalâ gbölö kpakpa ngû nə̈, andjë yû tchë päkëdə̂: «Earə̂ kə̂ nyisə̂ rə, dalatchêbâ kä ndə̂ mo wûtu tchâtə?»

²⁶ Jezü tô rə̂ ndə̂nə̈ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, nyë pûâbo mê bëte akpɨ̈ngbɨ̈ arə ndə̂ nyë wûn rə̂ lâme-a, praâbalë nyë pü mê bëte mâpa ndə̂ nyë zɨ̂ rə̂ zoo ânyë tchə̂lə̂ nyê sɨ̂ lâme.

²⁷ Nyë mböäbô kua mbô bëte kɨ̈zɨ̂ ndə̂ âwâ ndə̂kə̂ ndɨ-ê, praâbalë äwäpä nyë mbo kua bëte kɨ̈zɨ̂ ndə̂ âza tchîsûwu ndə̂ logbɛ̂ logbɛ̂ sə̈ azü. Modô ndə̂ Akrə kä ndə̂ âzadje kɨ̈zɨ̂ nə̈ lâme sə̈ nyê, bëte tchetchë kä ndə̂ Ndjapä Bha mbô ngâ nyîsɨ̂ ndə̂ gbôgbô ëtə̂ yê.»

²⁸ Käko andjë yû tchë päkëdə̂: «Giamâ kä ndə̂ ârâ mbo rə̂ ndə̂kə̂ mbo akua ndə̂ Ndjapä nyîndə̂ nə̈?»

²⁹ Jezü tô rə̂ ndə̂nə̈ sə̈ andjê päkëdə̂: «Kua ndə̂ Ndjapä yûkû nə̈ sə̈ nyê wä ndə̂kə̂ pa nyë za su nyê sə̈ tchanə̈ ndə̂ Ndjapä la tə̂ yê wân tchë.»

³⁰ Andjë tô rə̂ sə̈ tchë päkëdə̂: «Kpɨ̈ngbɨ̈ rə giamâ kä ndə̂ momö, mo mbo rə̂ ndə̂kə̂ pa ârâ wun rə̂ ânyë kə̂ za su ârâ sə̈ mö? Kua nə̈bâ kä ndə̂ mô mboadje rə̂?

³¹ Araâta ârâ zɨ̈ mâne alême bhâlə̂ kpaɛ̈gâ batə̂ rə̂ ndə̂ Mbëtï Ndjapä tô rə̂ päkëdə̂: ‹Tche zä mâpa ndə̂ âtô bhâ lafô sə̈ andjê ânyë andjë zɨ̂ rə̂.›»

³² Jezü tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Âdə̂âbô Möyîze kä ndə̂ âzâ mâpa ndə̂ âtô bhâ lafô lâme sə̈ nyê-a, Bha mê kä ndə̂ âza lëge mâpa ndə̂ âtô bhâ lafô sə̈ nyê.

³³ Bëte mâpa ndə̂ Ndjapä də̈ anə̈ ndə̂ âtô bhâ lafô ânyë kə̈ jrê ndə̂kə̂ za tchîsûwu sə̈ azü tchêbêche âtə.»

³⁴ Käko andjë tô rə̂ sə̈ tchë päkëdə̂: «Gbölö Gbïɛ̈, za mâpa nə̈ lâme sə̈ ârâ logbɛ̂.»

³⁵ Jezü tô rə̂ sə̈ andjê päkëdə̂: «Mëmê kä ndə̂ âwâtə̂ mâpa ndə̂ âza tchîsûwu sə̈ azü nə̈; akrə ndə̂ tche nə̂ pu mê, gʉ kɨ̈zɨ̂ nyuabô tchë balë tee-a, akrə ndə̂ tche zâ su yê sə̈ mê, gʉ ngû nyuabô tchë balë tee-a.

³⁶ Më tô rə̂ sə̈ nyê nə̂; nyë wûn mê nə̂, praâbalë nyë zâbo su nyê sə̈ mê-a.

³⁷ Azü gbɛ̂ ndə̂ Bha kʉ̂ andjê sə̈ mê, andjë ânə pu mê. Ânyë akrə ndə̂ tche nə̂ pu mê, mê groabô tchë atə̂ sûwu balë tee-a.

³⁸ Bëte më tôâbo bhâ lafô kə̈ jrê ndə̂kə̂ mbo rə ndə̂ su mê nyîndə̂ nə̈-a, praâbalë më jrë ndə̂kə̂ mbo rə ndə̂ tchanə̈ ndə̂ tche wân mê nyîndə̂ nə̈.

³⁹ Kə̂ mbo rə ndə̂ su tchanə̈ ndə̂ tche wân mê wä ndə̂kə̂ pa azü gbɛ̂ ndə̂ tche kʉ̂ andjê sə̈ mê lâme, âwâbo pä ngânə̈ balë yu-a, praâbalë äwä ndə̂kə̂ pa më jo andjê lə̂ kuzü lə̂ adɨ̂ alö.

⁴⁰ Bëte rə ndə̂ su Bha mê nyîndə̂ nə̈ wä ndə̂kə̂ pa akrə balë balë gbɛ̂ ndə̂ tche wûn Modô ndə̂ yê, ânyë kə̈ zâ su yê sə̈ tchë, tche wa la tchîsûwu ndə̂ logbɛ̂ logbɛ̂. Käko mê joadje tchë lə̂ kuzü lə̂ adɨ̂ alö.»

⁴¹ Ajuîfu jêtə̂ kə̂ jende Jezü bëte rə̂ ndə̂ tche tô rə̂ päkëdə̂: «Më də̈ mâpa ndə̂ âtô bhâ lafô.»

⁴² Andjë sə̂ lakə̂ to rə̂ päkëdə̂: «Âdə̂âbo Jezü modô ndə̂ Jozêfu, ndə̂ ârâ wûnsə̂ bha nə̈ la anyï nə̈ lâme kä âtə? Tchïtchïnə̈ atöko kä ndə̂ tche tô rə̂ angêta päkëdə̂: Anyë tö bhâ lafô ânyë kə̈ jrê?»

⁴³ Jezü tô rə̂ ndə̂nə̈ sə̈ andjê päkëdə̂: «Nyë gbötə̂ kə̂ jende tchô lə̂ gbâtə̂ nyê.

⁴⁴ Ngâ akrə balë nəabô pu mê tee-a, ndə̂ Bha mê ndə̂ tche wân mê mbôâbô tchë mbô pu mê, ânyë mê joadje tchë lə̂ kuzü lə̂ adɨ̂ alö.

⁴⁵ A-earə̂ ndə̂ma Ndjapä mbö rə̂ lə̂ mbëtï päkëdə̂: ‹Ndjapä ânyiadje sə̂ rə sə̈ azü gbɛ̂.› Akrə balë balë gbɛ̂ ndə̂ tche djê Bha mê ânyë kə̈ gâmba apö ndə̂ tche nyîsə̂ nə̈ sə̈ tchë, tchê nəadje pu mê.

⁴⁶ Pö lâme nyîâbo ndə̂kə̂ to rə̂ pä ngâ akrə wûn Bha mê nə̂-a, kütû akrə ndə̂ tche tô bhândə̂ Ndjapä kä ndə̂ âwûn Bha mê.

⁴⁷ Ɛn-ɛn, tə̂ lëge nə̈ më tö rə̂ sə̈ nyê: Akrə ndə̂ tche zâ su yê sə̈ mê, tche kä la tchîsûwu ndə̂ logbɛ̂ logbɛ̂.

⁴⁸ Mëmê kä ndə̂ âwâtə̂ mâpa ndə̂ âza tchîsûwu sə̈ azü.

⁴⁹ Araâta nyê zɨ̈ mâne alême lə̂ kpaɛ̈gâ, praâbalë andjë tchû-î.

⁵⁰ Mâpa ndə̂ nyê wun rə̂ âtə, ädə̈ tchanə̈ ndə̂ tche tô bhâ lafô ânyë kə̈ jrê, ndə̂kə̂ pa akrə ndə̂ tche zɨ̂ rə̂, tchê tchuabô tee-a.

⁵¹ Mëmê kä ndə̂ âwâtə̂ mâpa ndə̂ âza tchîsûwu sə̈ azü, ndə̂ âtô bhâ lafô ânyë kə̈ jrê. Akrə ndə̂ tche zɨ̂ mâpa lâme, tche âwa la tchîsûwu ndə̂ logbɛ̂ logbɛ̂. Mëmê, mâpa ndə̂ mê zadje rə̂ wätə̂ mbë mê ndə̂ âmbo rə̂ pä azü tchêbêche wa la tchîsûwu.»

⁵² Ajuîfu sə̂ lakə̂ gama andjê lə̂ gbâtə̂ andjê pâ pö nə̈ lâme lakə̂ to rə̂ päkëdə̂: «Tchïtchïnə̈ atöko kä ndə̂ köchë âtə za mbë yê sə̈ azə̂ ndə̂kə̂ pa azə̈ zɨ rə̂?»

⁵³ Jezü tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Âdə nyë âzɨabô mbë Modô ndə̂ Akrə zɨ̂-î, ânyë kə̈ ndjôâbô jï yê ndjô-ê, nyë wâbo la tchîsûwu lə̂ nyê-a.

⁵⁴ Akrə ndə̂ tche zɨ̂ mbë mê ânyë kə̈ ndjô jï mê, tche âwa la tchîsûwu ndə̂ logbɛ̂ logbɛ̂. Käko mëmê, mê joadje tchë lə̂ kuzü lə̂ adɨ̂ alö.

⁵⁵ Bëte mbë mê wätə̂ lëge kɨ̈zɨ̂, ânyë jï mê wâtə̂ lëge rə ndə̂kə̂ ndjo rə̂.

⁵⁶ Akrə ndə̂ tche zɨ̂ mbë mê ânyë kə̈ ndjô jï mê, akrə nə̈ lâme kä balë la mê ânyë më kä ndjë balë la tchë.

⁵⁷ Bha mê ndə̂ tche wân mê kä la tchîsûwu, ânyë më kä la tchîsûwu lə̂ köbosə̂ yê. Käko ndjë, akrə ndə̂ tche zɨ̂ mbë mê, tche kä la tchîsûwu lə̂ köbosə̂ mê.

⁵⁸ Mâpa ndə̂ âtô bhâ lafô ânyë kə̈ jrê kä âtə. Âwâbo batə̂ anə̈ ndə̂ araâta nyê zɨ̂ rə̂ alême ânyë kə̈ tchû lâme-a. Akrə ndə̂ tche zɨ̂ mâpa âtə, tche âwa la tchîsûwu ndə̂ logbɛ̂ logbɛ̂.»

⁵⁹ Jezü tö apö lâme sə̂nə̈ ndə̂ tche sə̂ lakə̂ nyisə̂ rə lə̂ nda kə̂ voga Ndjapä ndə̂ ajuîfu bhâ Käpërënäyûmo.

Apö ndə̂ tchîsûwu ndə̂ logbɛ̂ logbɛ̂

⁶⁰ Pânə̈ ndə̂ adjisîpili ndə̂ Jezü djê pö nə̈ lâme, angâ angbängbä adjisîpili nə̈ tô rə̂ päkëdə̂: «Pö âtə kpö tə̂ gbölösə̂nə̈. Tchabâ lɛ̂ɛ kä ndə̂ âdje rə̂?»

⁶¹ Jezü wûnsə̂ nə̈ pä adjisîpili ndə̂ yê kä lakə̂ jende tchë bëte pö nə̈ lâme, tche tô rə̂ sə̈ andjê päkëdə̂: «Pö nə̈ lâme chö nyê chö?

⁶² Käko âdə Modô ndə̂ akrə âkenga atə̂sə̂ tchô ndə̂ tche sə̂ tâ dokʉ̈tchê lâme, nyë âto rə̂ atöko?

⁶³ Yingö kä ndə̂ âmbo rə̂ pä akrə wa la tchîsûwu. Mbë akrə wâbo ndə̂kə̂ mbo ngâ rə-a. Apö ndə̂ më tô rə̂ sə̈ nyê lâme wätə̂ apö ndə̂ Yingö la apö ndə̂ âza tchîsûwu.

⁶⁴ Praâbalë angânə̈ lə̂ gbâtə̂ nyê zâbo su andjê sə̈ mê-a.» Bëte lə̂ kêsâ nə̈, Jezü wûnsə̂ azü ndə̂ andjë wâbô wâ ndə̂kə̂ za su andjê sə̈ tchë nə̂, la akrə ndə̂ tche wâ ndə̂kə̂ yosə̂ yê.

⁶⁵ Jezü kä tô rə̂ päkëdə̂: «Bëte rə̂ kä ndə̂ më tô rə̂ sə̈ nyë päkëdə̂: Ngâ akrə balë wâbo ndə̂kə̂ nə pu mê-a, ndə̂ Bha mê də̂âbô tchë də̂ ndə̂ âzâ köbo sə̈ tchë-ê.»

⁶⁶ Pâ pö nə̈ lâme, angâ angbängbä adjisîpili ndə̂ yê dôtə̂ andjê, kə̈ kä zâbo tchêngbâ yê-a.

⁶⁷ Käko Jezü yûkû nə̈ sə̈ andjê lə̂ könô gbɛ̂ tchêpâ nə̈ bïchuû lâme päkëdə̂: «Nyënyê ndjë gbɛ̂ nyë nyïndə̂ kə̂ ka etə̂?»

⁶⁸ Chemôn-Pîêre tô rə̂ ndə̂nə̈ sə̈ tchë päkëdə̂: «Gbölö Gbïɛ̈, ârâ âe pu tchabâ? Apö ndə̂ âza tchîsûwu ndə̂ logbɛ̂ logbɛ̂ kä lə̂ ma zə̈.

⁶⁹ Ârâ gâmba rə̂ nə̂, kə̈ wûnsə̂ nə̈ nə̂ pä mo də̈ Akrə ndə̂ tche dâka gbɛ̂ ndə̂ Ndjapä wân tchë.»

⁷⁰ Jezü tô rə̂ ndə̂nə̈ sə̈ andjê päkëdə̂: «Âdə̂âbo mëmê kä ndə̂ adɨ̂ nyê lə̂ könô gbɛ̂ tchêpâ nə̈ bïchuû âtə? Dëkë ngânə̈ balë lə̂ gbâtə̂ nyê wätə̂ Jâbolo.»

⁷¹ Jüdâse modô ndə̂ Chemön Ïsïkärïyôte kä ndə̂ Jezü tô pö ndə̂ yê lâme, bëte tchetchë kä ndə̂ âwâ ndə̂kə̂ yosə̂ Jezü, tchetchë ndə̂ tche də̂ ngânə̈ balë lə̂ gûtə̂ andjê lə̂ könô gbɛ̂ tchêpâ nə̈ bïchuû lâme.