Jâan 3 - Mbëtï Ndjapä: TÄFO MADƗ̈

Jezü la Nîködême

¹ Ngâ köchë alême kä tâ ndə̂ rə̈ yê wü pä Nîködême. Tche wätə̂ ngâ gbölö akrə ndə̂ ajuîfu, kə̈ wâtə̂ farizïɛ̈n.

² Tche nə̂ ndə̂kə̂ wun Jezü lə̂ bütchî, kə̈ tô rə̂ sə̈ tchë päkëdə̂: «Earə̂ kə̂ nyisə̂ rə, ârâ wûnsə̂ nə̈ nə̂ pä Ndjapä kä ndə̂ âwân mö ndə̂kə̂ nyisə̂ rə sə̈ ârâ. Bëte âdə Ndjapä âwabô wâ la ngâ akrə-ê, tchê mboabô ngâ kpɨ̈ngbɨ̈ rə batə̂ rə̂ ndə̂ mo mbo rə̂ âtə tee-a.»

³ Jezü tô rə̂ sə̈ tchë päkëdə̂: «Ɛn-ɛn, tə̂ lëge nə̈ më tö rə̂ sə̈ mö, âdə a âkä zɨabô ngâ akrə zɨ̂ tə̂ täfo nə̈, tchê liabô lə̂ Gbölö gö-gbïɛ̈ ndə̂ Ndjapä tee-a.»

⁴ Nîködême yû Jezü päkëdə̂: «Atöko kä ndə̂ akrə ndə̂ tche kpô nə̂, ânyë a kä zɨ tchë tə̂ täfo nə̈? Tchê kä liadje bhâlə̂ anyï nə̈, ânyë anyï nə̈ ka zɨ tchë tə̂ bïchuû nə̈?»

⁵ Jezü tô rə̂ ndə̂nə̈ sə̈ tchë päkëdə̂: «Ɛn-ɛn, tə̂ lëge nə̈ më tö rə̂ sə̈ mö: Âdə a âzɨabô ngâ akrə zɨ̂ lə̂ köbosə̂ ngû, la Yingö-ê, tchê liabô lə̂ Gbölö gö-gbïɛ̈ ndə̂ Ndjapä tee-a.

⁶ Akrə wütu lə̂ ngâ yê akrə, ânyë Yingö wutu ndjë lə̂ yingö.

⁷ Tchə̂lə̂ küma zə̈ djïngɨliabô djîngɨli bëte rə̂ ndə̂ më tô rə̂ sə̈ mö pä: ‹Äwäpä a ka zɨ nyê tə̂ täfo nə̈ lâme.›

⁸ Yi mbö batə̂ su yê nyîndə̂ nə̈. Mo djë sɨ̈kɨ̈ nə̈ ndə̂ âmbo, praâbalë kə̈ wûn-âbo sə̂ tchô ndə̂ âtô tâ-a, âdəndjë sə̂ tchô ndə̂ âe tâ-a. Äwä ndjë käko tə̂ azü ndə̂ a zɨ̂ andjê lə̂ köbosə̂ Yingö.»

⁹ Nîködême tô rə̂ sə̈ Jezü päkëdə̂: «Rə âtə âwa tchïtchïnə̈ atöko?»

¹⁰ Jezü tô rə̂ sə̈ tchë päkëdə̂: «Mo də̈ earə̂ kə̂ nyisə̂ rə sə̈ azü ndə̂ Isarayële, mo wûn-âbo sə̂ arə lâme?

¹¹ Ɛn-ɛn, tə̂ lëge nə̈ më tö rə̂ sə̈ mö: Ârâ tö pö ndə̂ rə ndə̂ ârâ wûnsə̂ nə̈, kə̈ tô pö ndə̂ rə ndə̂ ârâ wûn rə̂ sə̈ azü, praâbalë nyënyê, nyë nyîâbo ndə̂kə̂ gamba pö ndə̂ ârâ tô rə̂ sə̈ nyê lâme-a.

¹² Më tö pö ndə̂ arə tchêbêche, nyë gâmbabô rə̂-a, âdə më âto pö ndə̂ arə tchêlafô, nyë âgamba rə̂ atöko?

¹³ Ngâ akrə balë kêngabô atə̂ lafô nə̂-a, kütû Modô ndə̂ Akrə kä ndə̂ âtô bhâ lafô ânyë kə̈ jrê atə̂ bêche.

¹⁴ Batə̂ rə̂ ndə̂ Möyîze î ɛ̈krʉ̂ bhâ lafô tə̂ yö bhâlə̂ kpaɛ̈gâ, käko äwäpä a i ndjë Modô ndə̂ akrə tə̂ yö bhâ lafô,

¹⁵ ânyë akrə balë balë ndə̂ tche zâ su yê sə̈ Modô ndə̂ Akrə, tche kä la tchîsûwu ndə̂ logbɛ̂ logbɛ̂.

¹⁶ Bëte Ndjapä nyïndə̂ azü tchêbêche âtə tə̂ gbölösə̂nə̈, ânyë kə̈ zâ gbokôngô Modô ndə̂ yê, ndə̂kə̂ pa akrə balë balë ndə̂ tche za su yê sə̈ tchë, tchê tchuabô tee-a, praâbalë tche kä la tchîsûwu ndə̂ logbɛ̂ logbɛ̂.

¹⁷ Ndjapä wân-âbo Modô ndə̂ yê atə̂ bêche âtə ndə̂kə̂ wa ngbanga lə̂ küma azü-a, praâbalë tche wän tchë ndə̂kə̂ pa azü tchêbêche tcha lə̂ köbosə̂ yê.

¹⁸ Akrə ndə̂ tche zâ su yê sə̈ Modô nə̈, ngbanga wâbo lə̂ küma yê-a. Praâbalë akrə ndə̂ tche zâbô su yê zâ sə̈ tchë, a wâ ngbanga lə̂ küma yê nə̂, bëte tche zâbo su yê sə̈ gbokôngô Modô ndə̂ Ndjapä-a.

¹⁹ Kə̂ wa ngbanga lə̂ küma azü nə̈ wä kâkë: Ngbänga nə̈ atə̂pâ cho âtə, praâbalë azü nyîâbo ndə̂ ngbänga nə̈-a. Andjë nyï kütû ndə̂ tchə̂lə̂ bütchî, bëte andjë mbö angbongbo rə.

²⁰ Bëte akrə ndə̂ tche mbô ngbongbo rə, tche kösə̂ ngbänga. Tche nə̂âbo pu ngbänga nə̂-a, bëte tche wä la wawa ndə̂kə̂ pa angbongbo rə ndə̂ yê wutuabô wûtu kraâ lə̂ la azü-î.

²¹ Praâbalë akrə ndə̂ tche mbô rə lə̂ köbosə̂ lëge pö, tche nə̈ pu ngbänga, ânyë akua ndə̂ yê ndə̂ tche mbô rə̂ lâme, azü wun rə̂ kraâ, bëte äwä gundə̂sə̂ kə̂ dje ma Ndjapä.»

Jezü la Jâan-Batîse

²² Pânə̈ Jezü la adjisîpili ndə̂ yê ê atə̂lə̂ agö ndə̂ Judë, kə̈ sə̂ la andjê tchâme ngbâ ngâ lö, ânyë tche sə̂ lakə̂ za batɛ̂me sə̈ azü.

²³ Jâan sə̂ ndjë lakə̂ za batɛ̂me sə̈ azü bhâ Enön ndola Sälîme, bëte sə̂ tchô nə̈ lâme, ngû ngbä tâ tə̂ gbölösə̂nə̈. Azü nə̂ pu tchë, ânyë tche zâ batɛ̂me sə̈ andjê.

²⁴ Lo nə̈ lâme, a yîâbo Jâan lə̂ nda kânga dämba nə̂-a.

²⁵ Angâ adjisîpili ndə̂ Jâan sə̂ lakə̂ gama andjê la ngâ Juîfu pâ pö ndə̂kə̂ djutu kâkpö tə̂ kʉ̂tê azü.

²⁶ Andjë kâ kə̈ gbô Jâan, kə̈ tô rə̂ sə̈ tchë päkëdə̂: «Earə̂ kə̂ nyisə̂ rə, köchë ndə̂ nyë sə̂ la tchë dəkalâ ngû ndə̂ Jurudɛ̈n ndə̂ mo tô pö ndə̂ yê alême, tche kä ndjë lakə̂ za batɛ̂me ndə̂ ngû sə̈ azü, angbängbä azü kä lakə̂ e pu tchë.»

²⁷ Jâan tô rə̂ sə̈ andjê päkëdə̂: «Âdə Ndjapä âzabô ngâ rə zâ sə̈ ngâ akrə-ê, akrə nə̈ gboabô ndjë rə̂ tee-a.

²⁸ Nyënyê la tə̂ nyê, nyë alême kä tâ sə̂nə̈ ndə̂ më tô rə̂ päkëdə̂: ‹Më də̂âbo Krîsiti-a, praâbalë më də̈ akrə ndə̂ a wân tchë dokʉ̈tchê tə̂ yê.›

²⁹ Akrə ndə̂ tche wâ la ɛ̈chë, tche də̈ köchë ndə̂ ɛ̈chë nə̈. Praâbalë agü köchë ndə̂ ɛ̈chë nə̈ âkrʉ ndrotə̂ köchë nə̈, kə̂ wa la gbölö mômô lakə̂ dje tchə̂lə̂ gɨ̈ köchë ndə̂ ɛ̈chë nə̈. Dju mômô ndə̂ mê nə̈ kä lâme, mômô nə̈ dâka gbɛ̂.

³⁰ Äwäpä tche wa gbölö, ânyë mëmê ndə̂ me nə̈, mê wa kpîɛ̂kpîɛ̂ rə̂.»

Akrə ndə̂ tche tô bhâ lafô

³¹ Akrə ndə̂ tche tô bhâ lafô ânyë kə̈ jrê, tche sə̈ pâ arə gbɛ̂. Akrə tchêbêche wätə̂ akrə tchêbêche, tche tö pö ndə̂ arə tchêbêche. [Akrə ndə̂ tche tô bhâ lafô, tche sə̈ pâ arə gbɛ̂].

³² Tche tö pö ndə̂ arə ndə̂ tche wûn rə̂ ânyë kə̈ djê rə̂. Akrə balë gambabô pö ndə̂ tche to rə̂ tee-a.

³³ Akrə ndə̂ tche gâmba pö ndə̂ yê, tche nyïndə̂ nə̈ la su yê gbɛ̂ pä Ndjapä tö lëge pö.

³⁴ Akrə ndə̂ Ndjapä wân tchë, tche tö kütû apö ndə̂ Ndjapä, bëte Ndjapä zä Yingö ndə̂ yê gbɛ̂ sə̈ tchë.

³⁵ Bha nyïndə̂ Modô ndə̂ yê, ânyë kə̈ gbôtə̂ rə gbɛ̂ ëtchânə̂ yê.

³⁶ Akrə ndə̂ tche zâ su yê sə̈ Modô nə̈, tche kä la tchîsûwu ndə̂ logbɛ̂ logbɛ̂. Akrə ndə̂ tche kôsə̂ kə̂ za su yê sə̈ Modô nə̈, tchê wabô la tchîsûwu nə̈ lâme tee-a, praâbalë gbô mêrâ ndə̂ Ndjapä kä pâ yê.