Jâan 2 - Mbëtï Ndjapä: TÄFO MADƗ̈

Kpülü ndə̂kə̂ totə̂ bhâlə̂ gö ndə̂ Kanä

¹ Lö bïchuû la tchêngbâ nə̈, ngâ kpülü ndə̂kə̂ totə̂ ndə̂ köchë la ɛ̈chë wä bhâ Kanä yɛ̈yɛ̈ gö ndə̂ Galilë. Anyï Jezü kä lə̂ kpülü nə̈ lâme.

² Andjë ê ndjë Jezü la adjisîpili ndə̂ yê ndə̂ kpülü ndə̂kə̂ totə̂ nə̈.

³ Ndə̂ vɛ̂n-ɛn nə̈ kâ, anyï Jezü tô rə̂ sə̈ tchë päkëdə̂: «Vɛ̂n-ɛn nə̈ kâ tə̂ azü nə̈ nə̂.»

⁴ Jezü tô rə̂ sə̈ tchë päkëdə̂: «Ɛ̈chë, giamâ âwûn azə̂ la mö lə̂ pö âtə? Dalo ndə̂ mê wûtuabô dämba nə̂-a.»

⁵ Anyï Jezü tô rə̂ sə̈ a-earə̂ kua nə̈ päkëdə̂: «Nyë mbö arə gbɛ̂ batə̂ rə̂ ndə̂ tchê toadje rə̂.»

⁶ Lə̂ kpülü nə̈ lâme, alüsû mïndûu manə̈ balë ndə̂ a sôâ rə̂ la täme kä tâ. Ajuîfu djütu tchê kʉ̂tê andjê lə̂nə̈, ânyë kə̂ to pö sə̈ Ndjapä. Lüsû balë kʉ̈ lîtere ngbangbo balë.

⁷ Jezü tô rə̂ sə̈ a-earə̂ kua nə̈ päkëdə̂: «Nyë tü ngû lə̂ alüsû nə̈.» A-earə̂ kua nə̈ tû ngû lə̂ alüsû nə̈ âsɨ̂ rə̂ gbûû.

⁸ Jezü tô rə̂ sə̈ andjê päkëdə̂: «Nyë tü ngâ ngû nə̈ kə̈ ê la rə̂ sə̈ earə̂ kpülü nə̈.» Andjë ê la rə̂ sə̈ tchë.

⁹ Earə̂ kpülü nə̈ djê tchö ngû nə̈, dëkë ngû nə̈ dôtə̂ yê nə̂ tə̂ vɛ̂n-ɛn. Tche wûn-abo sə̂ tchô ndə̂ vɛ̂n-ɛn nə̈ tô tâ-a, praâbalë kütû a-earə̂ kua nə̈ ndə̂ andjë tû ngû nə̈ kä ndə̂ âwûnsə̂ nə̈. Käko tche ê köchë ndə̂ tche nyîndə̂ kə̂ to ɛ̈chë nə̈ lâme,

¹⁰ kə̈ tô rə̂ sə̈ tchë päkëdə̂: «Azü gbɛ̂ zä tchê tchôtchô vɛ̂n-ɛn, a ndjo rə̂ dokʉ̈tchê, âdə ârə̂ âle azü nə̈ ânyë a za kpïkpï nə̈ sə̈ andjê dəngbânə̈. Praâbalë andə̂ zə nə̈, mo bäta tchôtchô nə̈ zoo ëtə̂ dalo âtə!»

¹¹ Käko kä ndə̂ Jezü jêtə̂ kə̂ mbo dokʉ̈ kpɨ̈ngbɨ̈ rə ndə̂ yê bhâ Kanä, lə̂ gö ndə̂ Galilë. Jezü nyïsə̂ gbölö gbôgbô ndə̂ yê ânyë adjisîpili zâ su andjê sə̈ tchë.

¹² La tchêngbâ nə̈ Jezü ê atə̂ Käpërënäyûmo; tchetchë la anyï nə̈ la ayîngâ yê, la adjisîpili ndə̂ yê. Andjë mbôâbo ngbängbä lö bhâye-a.

Jezü grö a-earə̂ waɛ̂che lə̂ gbölö nda Ndjapä

¹³ Ndə̂ kpülü ndə̂ ajuîfu ndə̂ rə̈ nə̈ wû pä Pâke âsə̈ ndo, Jezü ê atə̂ Jerûzalêmo.

¹⁴ Bhâlə̂ gbölö nda Ndjapä, Jezü gbô a-earə̂ waɛ̂che ndə̂ abâgala, la aɛ̈bro-ngbaga la apuli. Tche gbô a-earə̂ kə̂ chandje makətche ndə̂ andjë sə̂ tə̂ ma gbalâka-makətche ndə̂ andjê nə̈.

¹⁵ Tchâme, Jezü zâ djapra ndə̂ tche nyîkrə rə̂ la wû, kə̈ jêtə̂ kə̂ gro azü lə̂ gbölö nda Ndjapä nə̈, la aɛ̈bro-ngbaga ndə̂ andjê, la abâgala ndə̂ andjê. Tche gôâ agbalâka ndə̂ a-earə̂ kə̂ chandje makətche la amakətche nə̈ gbɛ̂ ëbêche.

¹⁶ Tche tô rə̂ sə̈ a-earə̂ kə̂ ka apuli nə̈ päkëdə̂: «Nyë kʉ̈ arə ndə̂ nyê lâme gbɛ̂ kə̈ gbô la rə̂ tchâtə-ê, nyë gbötə̂ kə̂ mbo rə̂ tə̂ nda ndə̂ Bha mê batə̂ nda waɛ̂che ndə̂ nyê-ê!»

¹⁷ Adjisîpili ndə̂ Jezü rɨ̂ su andjê pâ pö ndə̂ Mbëtï Ndjapä tô rə̂ päkëdə̂: «Ôo Ndjapä, gʉ nda ndə̂ zə̈ nyü mê, âwûntî pä wo kä ndə̂ âju mê.»

¹⁸ Käko agbölö azü ndə̂ ajuîfu yû Jezü päkëdə̂: «Ngâ kpɨ̈ngbɨ̈ rə giamâ kä ndə̂ mo wâ ndə̂kə̂ mbo rə̂ sə̈ ârâ ndə̂kə̂ nyisə̂ nə̈ pä Ndjapä kä ndə̂ âzâ köbo sə̈ mö ndə̂kə̂ mbo rə âtə?»

¹⁹ Jezü tô rə̂ ndə̂nə̈ sə̈ andjê päkëdə̂: «Nyë ndjö tchə̂lə̂ gbölö nda Ndjapä âtə ëbêche, lə̂ lö vötaâ më âkenga rə̂ lafô.»

²⁰ Ajuîfu tô rə̂ sə̈ tchë päkëdə̂: «Gbölö nda Ndjapä âtə, a mbö rə̂ lə̂ ngû tə̂ azü bïchuû tchêpâ nə̈ mïndûu manə̈ balë. Praâbalë mo tô andə̂ zə nə̈ pä mo ânyikrə rə̂ lə̂ lö vötaâ?»

²¹ Dëkë gbölö nda Ndjapä ndə̂ Jezü tô pö ndə̂nə̈ nə̂ lâme, wätə̂ tə̂ yê la tə̂ yê.

²² Lo nə̈ ndə̂ Jezü jô lə̂ kuzü, adjisîpili ndə̂ yê rɨ̂ su andjê tə̂ pö ndə̂ tche tô rə̂ sə̈ andjê alême, kə̈ gâmba pö ndə̂ Mbëtï Ndjapä tô rə̂ la su andjê gbɛ̂, ndjë la apö ndə̂ Jezü tô rə̂ sə̈ andjê alême.

Jezü wünsə̂ rə ndə̂ âwâ lə̂ su azü gbɛ̂

²³ Ndə̂ Jezü sə̂ bhâ Jerûzalêmo lə̂ kpülü ndə̂ Pâke, angbängbä azü ndə̂ andjë wûn kpɨ̈ngbɨ̈ rə ndə̂ Jezü mbô rə̂, andjë zâ su andjê sə̈ tchë.

²⁴ Jezü zâbo su yê pâ andjê-a, bëte tche wûnsə̂ andjê nə̂ gbɛ̂.

²⁵ A wâbo ndə̂kə̂ nyisə̂ pö pâ ngâ akrə balë sə̈ Jezü-a, bëte tchetchë la tə̂ yê, tche wünsə̂ rə ndə̂ âwâ bhâlə̂ su azü.