Jâan 19 - Mbëtï Ndjapä: TÄFO MADƗ̈

¹ Käko Pïlâte zâma ndə̂kə̂ pa a e la Jezü kə̈ bhî tchë la djapra.

² Aturûgu djû ngâ kpoto ndə̂ âwâ la chi tâ batə̂ kpoto ndə̂ agbïɛ̈, kə̈ zâ rə̂ ëtə̂ küma yê. Andjë zâ gbölö ngbêngbê lə̂ba, kə̈ yû rə̂ ëtə̂ yê.

³ Andjë gîtə̂ andjê ndola tchê kə̈ tô rə̂ päkëdə̂: «Ârâ pô ndə̂ zə̈ nə̂ gbïɛ̈ ndə̂ ajuîfu!» Andjë sə̂ lakə̂ rʉa ngälâ yê.

⁴ Pïlâte kâ wûtu kə̈ tô rə̂ sə̈ ajuîfu päkëdə̂: «Më wütu la tchë ndə̂kə̂ pa nyë wunsə̂ nə̈ pä më gbôâbo ngâ pö balë lə̂ küma yê-a.»

⁵ Jezü wûtu la kpoto-gbïɛ̈ tə̂ küma yê ndə̂ âwâ la chi tâ lâme, la gbölö ngbêngbê lə̂ba tə̂ yê. Pïlâte tô rə̂ sə̈ andjê päkëdə̂: «Köchë âtə kä âtə!»

⁶ Ndə̂ agbölö a-earə̂ kə̂ wa ngela sə̈ Ndjapä, la aturûgu ndə̂ gbölö nda Ndjapä âsə̈ wun Jezü, kə̈ sə̂ lakə̂ ta wârə̂ päkëdə̂: «Amö won tchë pâ yö ndə̂ gba! Amö won tchë pâ yö ndə̂ gba!» Pïlâte tô rə̂ sə̈ andjê päkëdə̂: «Nyënyê la tə̂ nyë, nyë zä tchë kə̈ wôn tchë pâ yö ndə̂ gba nə̈. Më gbôâbo ngâ pö balë lə̂ küma yê-a.»

⁷ Ajuîfu tô rə̂ ndə̂nə̈ sə̈ tchë päkëdə̂: «Ngâ ndïɛ̈ ndə̂ azə̂ kä tâ, ânyë lə̂ köbosə̂ ndïɛ̈ nə̈ lâme, tche wä ndə̂kə̂ tchu, bëte tche mbötə̂ yê la tə̂ yê tə̂ Modô ndə̂ Ndjapä.»

⁸ Ndə̂ Pïlâte djê pö lâme, wawa kä mbô tchë tə̂ gbölösə̂nə̈.

⁹ Tche kâ lî bhâlə̂ gbadja nə̈ kə̈ yû Jezü päkëdə̂: «Mo tö bhâ tchêbâ?» Praâbalë Jezü ôn-âbo ma yê balë-a.

¹⁰ Käko Pïlâte tô rə̂ sə̈ tchë päkëdə̂: «Mëmê kä ndə̂ mo kôsə̂ kə̂ on ma zə̈ sə̈ mê lâme? Mo wûn-âbo sə̂nə̈ pä, më kä la gbôgbô ndə̂kə̂ ji mö, kə̈ wâ ndjë la gbôgbô ndə̂kə̂ won mö pâ yö ndə̂ gba?»

¹¹ Jezü tô rə̂ ndə̂nə̈ sə̈ tchë päkëdə̂: «Mo wâbo la gbôgbô pâ mê-a, kütû anə̈ ndə̂ Ndjapä zâ rə̂ sə̈ mö lâme. Bëte rə̂ kä ndə̂ akrə ndə̂ tche yôsə̂ mê sə̈ mö âtə, tche mbô gbölö ngbongbo rə nə̂.»

¹² Posə̂nə̈, Pïlâte sə̂ lakə̂ pu köbo ndə̂kə̂ ji Jezü. Praâbalë ajuîfu nə̈ kâ tâ wârə̂ päkëdə̂: «Âdə mo âji tchë, dëkë mo wâbo tə̂ agü Sezäre-a. Akrə ndə̂ tche nyîndə̂ kə̂ watə̂ gbïɛ̈, dëkë tche kôsə̂ Sezäre gbölö gbïɛ̈ ndə̂ Rômo nə̂!»

¹³ Ndə̂ Pïlâte djê pö lâme, tche tô rə̂ pä a wutu la Jezü. Pïlâte sə̂ lə̂ ngendë ngbanga ndə̂ yê, sə̂ tchô ndə̂ rə̈ nə̈ wû pä «Lïtöströtôse», ndə̂ a ê rə̂ la ma heborö päkëdə̂: «Gabatä.»

¹⁴ Dëkë lö nə̈ lâme wätə̂ lö kə̂ nyikrətə̂ bëte kpülü ndə̂ Pâke. Ndə̂ lo âsə̈ wa lə̂ gûgû tchə̂lə̂ɛtchô, Pïlâte tô rə̂ sə̈ ajuîfu päkëdə̂: «Nyë wünsa gbïɛ̈ ndə̂ nyê!»

¹⁵ Praâbalë andjë kâ tâ wârə̂ päkëdə̂: «Amö won tchë! Amö won tchë! Amö won tchë pâ yö ndə̂ gba!» Pïlâte yû andjê päkëdə̂: «Äwäpä më won gbïɛ̈ ndə̂ nyê pâ yö ndə̂ gba?» Agbölö a-earə̂ kə̂ wa ngela sə̈ Ndjapä tô rə̂ päkëdə̂: «Ârâ wâbo la ngâ gbïɛ̈ ngbî-a, kütû Sezäre balë!»

¹⁶ Käko Pïlâte gbôtə̂ Jezü tchânə̂ andjê ndə̂kə̂ pa a won tchë pâ yö ndə̂ gba. Andjë zâ Jezü kə̈ ê la tchë.

A bhï Jezü pâ yö ndə̂ gba

¹⁷ Tchetchë la tə̂ yê tche zâ yö ndə̂ gba ndə̂ yê, tche gbô lə̂ gö nə̈, kə̈ ê atə̂sə̂ tchô ndə̂ a ê rə̂ tâ päkëdə̂: «Tchô ndə̂ kpökrô küma», rə̈ nə̈ lâme la ma heborö wä päkëdə̂: «Gologotä».

¹⁸ Bhâye aturûgu bhî Jezü pâ yö ndə̂ gba, tchetchë la angâ aköchë bïchuû. A bhï ngânə̈ balë pâ yö ndə̂ gba də ndôkö, kə̈ bhî ngânə̈ pâ yö ndə̂ gba də gəle, ânyë Jezü wâ lə̂ gûtə̂ andjê.

¹⁹ Pïlâte mbô mbëtï, a bhî rə̂ tə̂ küma yö ndə̂ gba ndə̂ Jezü, pö lə̂ mbëtï nə̈ wä kâkë: «Jezü, akrə gö ndə̂ Näzärête, gbïɛ̈ ndə̂ ajuîfu.»

²⁰ Ädə̈ käko ânyë angbängbä ajuîfu dɨ̂ mbëtï lâme, bëte sə̂ tchô ndə̂ a wôn Jezü tâ pâ yö ndə̂ gba gûâbo la tchêlakpô-a. A mbö mbëtï nə̈ la ma heborö, ndjë la ma gerêke, ndjë la ma latɛ̈n.

²¹ Agbölö a-earə̂ kə̂ wa ngela sə̈ Ndjapä ndə̂ ajuîfu tô rə̂ sə̈ Pïlâte päkëdə̂: «Mboabô mbëtï nə̈ mbô päkëdə̂: ‹Gbïɛ̈ ndə̂ ajuîfu-î›, praâbalë amö mbo rə̂ päkëdə̂: ‹Köchë âtə tö rə̂ pä anyë wätə̂ gbïɛ̈ ndə̂ ajuîfu.›»

²² Pïlâte tô rə̂ ndə̂nə̈ päkëdə̂: «Rə ndə̂ më mbô rə̂ lə̂ mbëtï, më mbô rə̂ nə̂.»

²³ Ndə̂ aturûgu wôn Jezü pâ yö ndə̂ gba, andjë kʉ̂ alə̂ba ndə̂ yê, kə̈ krʉ̂ tchə̂lə̂ nə̈ voanə̈, akrə balë balë la andə̂ ye nə̈. Andjë zâ ndjë gbölö lə̂ba ndə̂ yê ndə̂ a sɨ̂âbô rə̂ sɨ̂, ndə̂ âwâ batə̂ ngâ kʉ̈kʉ̂-lə̂ba balë də lafô ndjoa atə̂ bêche.

²⁴ Aturûgu nə̈ tô rə̂ lə̂ gbâtə̂ andjê päkëdə̂: «Azə̈ sröäbô tchə̂lə̂ nə̈ srô-ê, azə̈ tä rə̂ la kʉ̂kâ ndə̂kə̂ wunsə̂ akrə ndə̂ lə̂ba nə̈ watə̂ andə̂ ye nə̈.» Rə lâme wütu ndə̂kə̂ pa pö lə̂ Mbëtï Ndjapä mbo gundə̂sə̂ nə̈; pö lə̂ mbëtï nə̈ tö rə̂ päkëdə̂: «Andjë krʉ̈ tchə̂lə̂ lə̂ba ndə̂ mê tə̂ andjê, Andjë tä gbölö lə̂ba ndə̂ mê la kʉ̂kâ.» Rə ndə̂ aturûgu mbô rə̂ kä lâme.

²⁵ Anyï Jezü la yûngâ anyï Jezü, la Malê ɛ̈chë ndə̂ Kölöpâse la Malê yû gö ndə̂ Magadalä, andjë krʉ̈ ndrotə̂ yö ndə̂ gba ndə̂ Jezü.

²⁶ Jezü wûn anyï nə̈ ndə̂ andjë krʉ̂ la djisîpili ndə̂ tche nyïndə̂ yê tə̂ gbölösə̂nə̈, Jezü tô rə̂ sə̈ anyï nə̈ päkëdə̂: «Amâ, wunsa modô ndə̂ zə̈.»

²⁷ Pânə̈ tche tô rə̂ sə̈ djisîpili nə̈ päkëdə̂: «Wunsa anyï zə̈.» Ätö tə̂ lö nə̈ lâme, djisîpili nə̈ zâ anyï nə̈ lâme bhândə̂ yê.

Kə̂ tchu ndə̂ Jezü

²⁸ La tchêngbâ nə̈ Jezü wûnsə̂ nə̈ pä rə gbɛ̂ kâ nə̂. Ndə̂kə̂ pa pö ndə̂ Mbëtï Ndjapä mbo gundə̂sə̂ nə̈, tche tô rə̂ päkëdə̂: «Tchə̂lə̂ gɨ̈ mê hrô nə̂!»

²⁹ Ngâ lüsû kä bhâye ndə̂ kpïkpï vɛ̂n-ɛn wâ lə̂nə̈. Andjë zâ ndakôro, kə̈ ndrô rə̂ lə̂nə̈, kə̈ î rə̂ tə̂ küma ngâ matö yö ndə̂ ïzôpe, kə̈ yî rə̂ lə̂ ma yê.

³⁰ Ndə̂ Jezü djê tchö kpïkpï vɛ̂n-ɛn lâme, tche tô rə̂ päkëdə̂: «Rə gbɛ̂ kâ nə̂!» Tche chî küma yê atə̂ bêche, kə̈ tchû-î.

Ngâ turûgu trö krabadja Jezü la dɨ̈

³¹ Lö nə̈ lâme wätə̂ lö kə̂ nyikrətə̂ bëte lö sabäa. Ajuîfu nyîâbo ndə̂nə̈ pä lə̂ lö sabäa, gbô kuzü akrə wa po tə̂ yö ndə̂ gba-a. Lö sabäa âtə wätə̂ ngâ gbölö lö. Käko andjë ê kə̈ yû Pïlâte ndə̂kə̂ pa tche zama ânyë a koa tchə̂lə̂ ada azü ndə̂ andjë wâtə̂ yö ndə̂ gba lâme; ndə̂kə̂ pa a zu krʉkrʉ andjê tə̂ yö ndə̂ gba nə̈.

³² Aturûgu nə̈ ê, kə̈ kôâ tchə̂lə̂ ada dokʉ̈ akrə nə̈, pânə̈, andjë kôâ tchə̂lə̂ ada bïchuû akrə nə̈ ndə̂ a bhî andjê pâ yö ndə̂ gba balë la Jezü lâme.

³³ Ndə̂ andjë wûtu ëtə̂ Jezü, kə̈ wûn rə̂ pä tche tchû nə̂, käko andjë kôâbo tchə̂lə̂ ada yê-a.

³⁴ Praâbalë ngâ turûgu nə̈ balë trô Jezü la dɨ̈ tə̂ krabadja yê, posə̂nə̈ jï la ngû sə̂ lakə̂ wutu lə̂nə̈.

³⁵ Akrə ndə̂ tche wûn rə nə̈ la lala yê, tchetchë kä ndə̂ ânyîsə̂ tchêngbâ pö nə̈, pö ndə̂ tche tô rə̂ wätə̂ lëge pö, tche wûnsə̂ nə̈ nə̂ pä ânyë tö lëge pö. Käko ânyë nyënyê ndjë gbɛ̂, nyê za su nyê sə̈ Jezü.

³⁶ Rə lâme gbɛ̂ wütu ndə̂kə̂ pa pö ndə̂ Mbëtï Ndjapä mbo gundə̂sə̂ nə̈. Mbëtï nə̈ tö rə̂ päkëdə̂: «Ngâ gbäbï yê balë koabô tee-a.»

³⁷ Ngâ pö lə̂ Mbëtï Ndjapä nə̈ wä kâkë: «Tchanə̈ ndə̂ andjë trô krabadja yê la dɨ̈ lâme, andjê wun-adje tchô pu tchë.»

A chï krʉkrʉ Jezü

³⁸ Pânə̈ Jozêfu akrə gö ndə̂ Arimatë ê kə̈ yû Pïlâte ndə̂kə̂ za krʉkrʉ Jezü. Jozêfu wätə̂ ngâ djisîpili ndə̂ tche zâ tchêngbâ Jezü lə̂ küwû nə̈, bëte tche mbö wawa ajuîfu. Pïlâte gâmba rə̂. Käko Jozêfu ê kə̈ zû krʉkrʉ Jezü nə̈.

³⁹ Nîködême nə̂ ndjë, tchetchë ndə̂ tche ê alême lə̂ bütchî ndə̂kə̂ wun Jezü. Tche nə̈ la ndütü ndə̂ mîre ngbangbo balë ndə̂ a rɨ̂nyi tchə̂lə̂ nə̈ la angâ ayömbö ngbâ kelö tə̂ akrə gbɛ̂ la lə̂ könô gbɛ̂.

⁴⁰ Aköchë bïchuû lâme zâ krʉkrʉ Jezü, kə̈ gʉ̂â rə̂ la ngrɨ̈ngrɨ̈ mawû lə̂ba, andjë sû yömbö nə̈ ëtâ, batə̂ rə̂ ndə̂ ajuîfu mbo tchê rə̂ ânyë kə̂ chi akuzü ndə̂ andjê.

⁴¹ Ngâ kɨ̈ndɨ̈ kä ndola sə̂nə̈ ndə̂ a wôn Jezü pâ yö ndə̂ gba tâ lâme, ngâ cho akuzü kä bhâye ndə̂ a chîâbô ngâ kuzü chî lə̂nə̈ dämba-ê.

⁴² Tchâme kä ndə̂ andjë chî Jezü lə̂ cho kuzü nə̈, bëte sə̂ cho kuzü nə̈ gûâbo-a, bëte lö sabäa ndô nə̂.