Jâan 17 - Mbëtï Ndjapä: TÄFO MADƗ̈

Jezü tö pö sə̈ Ndjapä bëte adjisîpili ndə̂ yê

¹ Pânə̈ ndə̂ tche tô pö lâme, Jezü kênga la yê atə̂ lafô kə̈ tô rə̂ päkëdə̂: «Bha mê, dalo nə̈ wûtu nə̂. Amö lusə̂ Modô ndə̂ zə̈, ânyë Modô ndə̂ zə̈ lusə̂ zə̈.

² Mo zä gbôgbô sə̈ tchë pâ azü tchêbêche gbɛ̂, ndə̂kə̂ pa tche za tchîsûwu ndə̂ logbɛ̂ logbɛ̂ sə̈ azü ndə̂ mo kʉ̂ andjê sə̈ tchë.

³ Dëkë tchîsûwu ndə̂ logbɛ̂ logbɛ̂ nə̈ wä ndə̂kə̂ pa azü wunsə̂ zə̈, momö ndə̂ mo wâtə̂ lëge Ndjapä balë, ndjë la Jezü Krîsiti tchanə̈ ndə̂ mo wân tchë.

⁴ Më lûsə̂ zə̈ pâ cho âtə nə̂, ânyë kua ndə̂ mo zâ rə̂ sə̈ mê ndə̂kə̂ mbo rə̂ lâme, më kâ rə̂ nə̂ gbɛ̂.

⁵ Angaâtə, Bha mê, amö lusə̂ mê bhâ ndrotə̂ zə̈, batə̂ golowäre ndə̂ më wâ la rə̂ alême bhâ ndrotə̂ zə̈, dokʉ̈tchê ndə̂kə̂ pa a mbo tchîsûwu.

⁶ Azü ndə̂ mo gbɨ̂tɨ andjê lə̂ azü pâ cho âtə ânyë kə̈ kʉ̂ andjê sə̈ mê lâme, më nyîsə̂ zə̈ sə̈ andjê nə̂. Andjë wä alême tə̂ andjandə̂ zə nə̈, ânyë mo kʉ̂ andjê sə̈ mê. Andjë bâta apö ndə̂ zə̈ nə̂.

⁷ Angaâtə andjë wûnsə̂ nə̈ nə̂ pä arə gbɛ̂ ndə̂ mo kʉ̂ rə̂ sə̈ mê tö bhândə̂ zə̈.

⁸ Bëte apö gbɛ̂ ndə̂ mo kʉ̂ rə̂ sə̈ mê lâme, më kʉ̂ rə̂ sə̈ andjê nə̂, andjë gbô rə̂ nə̂. Andjë wûnsə̂ nə̈ tə̂ lëge nə̈ nə̂ pä më tö bhândə̂ zə̈, ânyë andjë gâmba rə̂ nə̂ pä momö kä ndə̂ âwân mê.

⁹ «Më tö pö sə̈ mö bëte andjê. Më tôâbo pö sə̈ mö bëte azü ndə̂ tchêbêche âtə-a, praâbalë bëte andjanə̈ ndə̂ mo kʉ̂ andjê sə̈ mê, bëte andjë wätə̂ andjandə̂ zə nə̈.

¹⁰ Arə ndə̂ mê gbɛ̂ wätə̂ andə̂ zə nə̈, ânyë arə ndə̂ zə̈ gbɛ̂ wä ndjë tə̂ andə̂ me nə̈. Käko a luadje sə̂ mê lə̂ köbosə̂ nə̈ ndə̂ ârâ wâ balë la andjê.

¹¹ Më kä sə̂âbo bêche âtə-a, bëte mê âgu atə̂ndə̂ zə̈, praâbalë andə̂ andjë nə̈, gbô andjê kä bêche âtə. Bha mê ndə̂ mo dâka gbɛ̂, amö bata andjê lə̂ köbosə̂ gbôgbô ndə̂ rə̈ zə̈ ndə̂ mo zâ rə̂ sə̈ mê lâme, ndə̂kə̂ pa andjë wa balë batə̂ rə̂ ndə̂ më wâ balë la mö.

¹² Sə̂nə̈ ndə̂ gbô mê ndə̂po lə̂ gbâtə̂ andjê, më bäta andjê lə̂ köbosə̂ gbôgbô ndə̂ rə̈ zə̈ ndə̂ mo zâ rə̂ sə̈ mê. Më bâta andjê ânyë ngânə̈ balë lə̂ gûtə̂ andjê yûâbo yû-î. Praâbalë kütû tchanə̈ ndə̂ tche wâ ndə̂kə̂ yu kä ndə̂ âyû, ânyë pö ndə̂ Mbëtï Ndjapä tô rə̂ mbô gundə̂sə̂ nə̈.

¹³ Angaâtə, mê âgu atə̂ndə̂ zə̈. Më tö pö lâme sə̂nə̈ ndə̂ gbô mê ndə̂po bêche âtə, ndə̂kə̂ pa mômô ndə̂ mê watə̂ su andjê, mômô ndə̂ âsɨ̂sɨ̈.

¹⁴ Më zä pö ndə̂ zə̈ sə̈ andjê ânyë azü tchêbêche kôsə̂ andjê, bëte andjë wâbo tə̂ azü tchêbêche âtə-a, batə̂ rə̂ ndə̂ mëmê ndjë gbɛ̂ më wâbô wâtə̂ akrə tchêbêche âtə-ê.

¹⁵ Më yûâbo kû nə̈ sə̈ mö ndə̂kə̂ pa mo ji andjê pâ cho âtə-a, praâbalë ndə̂kə̂ pa mo bata andjê tə̂ Ngbongbo akrə.

¹⁶ Andjë wâbo tə̂ azü tchêbêche âtə-a, batə̂ rə̂ ndə̂ mëmê ndjë gbɛ̂ më wâbô wâtə̂ akrə tchêbêche âtə-ê.

¹⁷ Amö bata andjê ngbî bëte mö lə̂ köbosə̂ lëge pö. Pö ndə̂ zə̈ wätə̂ lëge pö.

¹⁸ Batə̂ rə̂ ndə̂ mo wân mê atə̂pâ cho âtə, mê âwan ndjë andjê kupâ cho âtə.

¹⁹ Më zätə̂ mê la tə̂ mê ngbî sə̈ mö bëte andjê, ndə̂kə̂ pa andjë za ndjë tə̂ andjê ngbî sə̈ mö lə̂ köbosə̂ lëge pö.

²⁰ «Më yûâbo mö kütû bëte adjisîpili ndə̂ mê âtə-a, praâbalë më yü ndjë mö bëte andjanə̈ ndə̂ andjê zadje su andjê sə̈ mê lə̂ köbosə̂ pö ndə̂ andjê.

²¹ Më tö pö sə̈ mö ndə̂kə̂ pa andjë wa balë. Bha mê, mo kä balë la mê, më wâ ndjë balë la mö. Äwäpä andjë wa balë la azə̂, ndə̂kə̂ pa azü tchêbêche gamba rə̂ pä momö kä ndə̂ âwân mê.

²² Kə̂ lusə̂ mê ndə̂ mo lusə̂ mê lâme, më lûsə̂ andjê nə̂, ndə̂kə̂ pa andjë wa balë, batə̂ rə̂ ndə̂ momö la mê wâ balë lâme.

²³ Mëmê la andjê, ârâ wä balë batə̂ rə̂ ndə̂ mö wâ balë la mê, käko ânyë andjë wa balë tə̂ lëge nə̈. Tchâme, azü tchêbêche wunsə̂ nə̈ pä momö kä ndə̂ âwân mê, ânyë mo nyïndə̂ andjê batə̂ rə̂ ndə̂ mo nyîndə̂ mê.

²⁴ Bha mê, më nyïndə̂ nə̈ pä tchô ndə̂ më sə̂ tâ, andjanə̈ ndə̂ mo kʉ̂ andjê sə̈ mê, andjë sə ndjë tâ, ndə̂kə̂ pa andjë cheko golowäre ndə̂ mê ndə̂ mo zâ rə̂ sə̈ mê, bëte mo nyïndə̂ mê dokʉ̈tchê ndə̂kə̂ pa a mbo tchîsûwu.

²⁵ Bha mê ndə̂ mo wâ djîrə̂, azü tchêbêche âtə wûn-âbo sə̂ zə̈ balë-a, praâbalë më wünsə̂ zə̈, ânyë adjisîpili ndə̂ mê wûnsə̂ nə̈ nə̂ pä momö kä ndə̂ âwân mê.

²⁶ Më mbô rə̂ nə̂ pä andjë wunsə̂ rə̈ zə̈. Mê kä mboadje rə̂ pä andjë wunsə̂ rə̈ zə̈, käko ânyë kə̂ nyində̂ ngâ ndə̂ mo nyîndə̂ mê la rə̂ lâme, äwa lə̂ andjê, käko ânyë mê wa balë la andjê.»