Jâan 12 - Mbëtï Ndjapä: TÄFO MADƗ̈

Malê sü yömbö pâ da Jezü

¹ Lö mïndûu manə̈ balë dokʉ̈tchê tə̂ lö kpülü ndə̂ Pâke, Jezü ê atə̂ Betanï, gö ndə̂ Lazäre ndə̂ tche jô tchë lə̂ kuzü alême.

² A mbô kɨ̈zɨ̂ bëte Jezü bhâye. Mârete kä ndə̂ âtô tchə̂lə̂ kɨ̈zɨ̂ nə̈ ânyë Lazäre sə̂ lə̂ gûtə̂ azü ndə̂ andjë sə̂ lakə̂ zɨ kɨ̈zɨ̂ la Jezü.

³ Malê zâ ngâ yömbö ndə̂ gbölö ngîrî, ndə̂ a mbô rə̂ la chëchë da yö ndə̂ a ê rə̂ tâ pä nâre, tche sû rə̂ pâ da Jezü ânyë kə̈ trô rə̂ la su küma yê. Tchâfo nə̈ zâ tchâalê nə̈ gbɛ̂.

⁴ Jüdâse Ïsïkärïyôte, ngâ djisîpili ndə̂ Jezü ndə̂ tche wâ ndə̂kə̂ yosə̂ Jezü tô rə̂ päkëdə̂:

⁵ «Bëte giamâ kä ndə̂ a kâbô yömbö âtə kâ ngbâ mîɛ̈-makətche ngbangbo vötaâ ndə̂kə̂ kʉ rə̂ sə̈ a-earə̂ yûkü?»

⁶ Pö ndə̂ tche tô rə̂ lâme, nyîâbo sə̂nə̈ pä tche wün nyonyo a-earə̂ yûkü-a, praâbalë tche wätə̂ earə̂ ngbä. Bëte a zä kədjâ-makətche ndə̂ azü gbɛ̂ sə̈ tchë ndə̂kə̂ wun tchô pânə̈. Tche zɨ̈ ngbä makətche ndə̂ a kʉ̂ rə̂ lə̂ kədjâ-makətche nə̈.

⁷ Praâbalë Jezü tô rə̂ päkëdə̂: «Nyë gbötə̂ Malê gii-ï! Tche mbö rə lâme käko ndə̂kə̂ sə bëte lö kə̂ chi mê!

⁸ Nyë kä la a-earə̂ yûkü lâme logbɛ̂, praâbalë më sə̂âbo lə̂ gûtə̂ nyê logbɛ̂-a.»

Agbölö a-earə̂ kə̂ wa ngela sə̈ Ndjapä nyïndə̂ kə̂ won Lazäre

⁹ Gbölö kpûlû ndə̂ ajuîfu djê rə̂ pä Jezü kä bhâ Betanï, kpûlû azü ê bhâye. Andjë êâbo bhâye ndə̂kə̂ wun kütû Jezü-a, praâbalë andjë ë ndjë ndə̂kə̂ wun Lazäre ndə̂ Jezü jô tchë lə̂ kuzü alême.

¹⁰ Käko agbölö a-earə̂ kə̂ wa ngela sə̈ Ndjapä nyîkrə rə̂ lə̂ gbâtə̂ andjê ndə̂kə̂ won ndjë Lazäre,

¹¹ bëte ajuîfu gbotə̂ kə̂ nə ngbâ andjê, ânyë kə̈ zâ su andjê sə̈ Jezü.

Jezü lï atə̂ Jerûzalêmo

¹² Lö balë pânə̈, angbängbä azü ndə̂ andjë nə̂ ndə̂ kpülü ndə̂ Pâke djê rə̂ pä Jezü ânə atə̂Jerûzalêmo;

¹³ andjë kʉ̂ akôlo-kâdâ kə̈ zâ köbo Jezü la rə̂ ndə̂kə̂ pö ndə̂ yê. Andjë tâ wârə̂ päkëdə̂: «A vöga gbölö ndə̂ Ndjapä! Äwäpä Ndjapä e tchôtchô pö pâ akrə ndə̂ tche nə̂ la rə̈ Gbölö Gbïɛ̈, akrə nə̈ lâme wätə̂ gbïɛ̈ ndə̂ Isarayële.»

¹⁴ Jezü gbö ngâ ɛ̈ kûndiɛ kə̈ sə̂ pâ yê batə̂ rə̂ ndə̂ a mbô rə̂ lə̂ Mbëtï Ndjapä päkëdə̂:

¹⁵ «Gö ndə̂ Siyön, wawa mboabô mö mbô-ê! Bëte gbïɛ̈ ndə̂ zə̈ kä lakə̂ nə. Tche sə̈ pâ ngâ ɛ̈nə̈ kûndiɛ.»

¹⁶ Lə̂ kêsâ nə̈, adjisîpili ndə̂ yê djêâbo tchə̂lə̂ nə̈-a. Praâbalë sə̂nə̈ ndə̂ a luadje sə̂ Jezü kä ndə̂, sə̂ pö ndə̂ Mbëtï Ndjapä tô rə̂ alême tə̂ pö ndə̂ yê tê lə̂ andjê, ânyë arə nə̈ mbô tə̂ yê gundə̂sə̂ nə̈.

¹⁷ Angbängbä azü ndə̂ andjë sə̂ ndrotə̂ yê, lo nə̈ ndə̂ tche ê Lazäre ndə̂kə̂ wutu lə̂ cho kuzü ësûwu, ânyë kə̈ jô tchë lə̂ kuzü, andjë tô pö ndə̂ rə ndə̂ andjë wûn rə̂.

¹⁸ Azü djê pö ndə̂ akpɨ̈ngbɨ̈ rə ndə̂ Jezü mbô rə̂, bëte rə̂ kä ndə̂ angbängbä azü zâ köbo Jezü.

¹⁹ Käko afarizïɛ̈n tô rə̂ lə̂ gbâtə̂ andjê päkëdə̂: «Nyë wûn rə̂ tchâme nə̂ pä ngâ rə ndə̂ nyê kä mbo rə̂ wâbo-a. Azü gbɛ̂ zä tchêngbâ yê.»

Angâ agerêke nyïndə̂ kə̂ wun Jezü

²⁰ Angâ agerêke kädje lə̂ gûtə̂ azü ndə̂ andjë ê ndə̂kə̂ voga Ndjapä lə̂ kpülü bhâ Jerûzalêmo.

²¹ Andjë ê kə̈ gbô Fïlîpe, tche wätə̂ akrə gö ndə̂ Betesayidä ndə̂ âwâ lə̂ agö ndə̂ Galilë, andjë yû tchë päkëdə̂: «Gbölö akrə, ârâ nyïndə̂ kə̂ wun Jezü.»

²² Fïlîpe ê kə̈ tô rə̂ sə̈ Anderë, andjë pâlatə̂ andjê kə̈ ê ndə̂kə̂ to rə̂ sə̈ Jezü.

²³ Jezü tô rə̂ ndə̂nə̈ sə̈ andjê päkëdə̂: «Dalo ndə̂kə̂ pa a lusə̂ Modô ndə̂ Akrə wûtu nə̂.

²⁴ Ɛn-ɛn, tə̂ lëge nə̈ më tö rə̂ sə̈ nyê: Âdə ngâ ndjî rəgʉ balë âte lə̂ cho ânyë kə̈ tchûâbô tchû-ê, ârə̂ âwa la kütû yê. Âdə ndjî rəgʉ lâme âtchu, ârə̂ âkä le alêlê nə̈ tə̂ gbölösə̂nə̈.

²⁵ Akrə ndə̂ tche nyîndə̂ tchîsûwu ndə̂ yê, âyuadje tə̂ yê. Praâbalë akrə ndə̂ tche kôsə̂ tchîsûwu ndə̂ yê pâ cho âtə, tchê batadje rə̂ bëte tchîsûwu ndə̂ logbɛ̂ logbɛ̂.

²⁶ Âdə ngâ akrə ânyində̂ kə̂ mbo kua ndə̂ mê, äwäpä tche za tchêngbâ mê, ndə̂kə̂ pa sə̂ tchô ndə̂ më sə̂ tâ, tche sə ndjë tâ. Âdə ngâ akrə âmbo kua ndə̂ mê, Bha mê luadje sə̂ yê.»

Jezü tö pö ndə̂ kuzü yê

²⁷ «Angaâtə su mê wâ nə̂ ngbɨ̂ɨ̂, mê âto rə̂ atöko: ‹Bha mê, tcha mê lə̂ arə ndə̂ ânə âtə!› Praâbalë kütû bëte dalo nə̈ lâme kä ndə̂ më nə̂.

²⁸ Bha mê, amö lusə̂ rə̈ zə̈.» A djê tchə̂lə̂ ngâ gɨ̈ bhâ lafô päkëdə̂: «Më lûsə̂ rə̈ zə̈ nə̂, mê âkä lusə̂ nə̈ tə̂ täfo nə̈.»

²⁹ Kpûlû azü ndə̂ andjë sə̂ tâ ânyë kə̈ djê tchə̂lə̂ gɨ̈ nə̈ lâme, andjë tô rə̂ päkëdə̂: «Nyïvrö kä ndə̂ âsoa.» Angânə̈ tô rə̂ päkëdə̂: «Ngâ ânje kä ndə̂ âto pö sə̈ tchë!»

³⁰ Jezü tô rə̂ ndə̂nə̈ sə̈ andjê päkëdə̂: «Tchə̂lə̂ gɨ̈ ndə̂ âkɨ̂ lâme âkɨ̂âbo bëte mê-a, praâbalë äkɨ̈ bëte nyê.

³¹ Angaâtə kä ndə̂ a wa ngbanga ndə̂ azü tchêbêche. Angaâtə kä ndə̂ a za makündji ndə̂ tchêbêche âtə kə̂ yi tchë atə̂ sûwu.

³² Andə̂ me nə̈, âdə a âkenga la mê bhâ lafô nə̂, mê djeadje la azü gbɛ̂ pu mê.»

³³ Jezü tö pö lâme käko ndə̂kə̂ nyisə̂ köbo kuzü ndə̂ tche wâ ndə̂kə̂ tchuadje la rə̂.

³⁴ Kpûlû azü lâme tô rə̂ sə̈ tchë päkëdə̂: «Lə̂ Mbëtï-ndïɛ̈ ârâ wünsə̂ nə̈ pä Krîsiti âsəadje pïï etə̂. Tchïtchï sə̂nə̈ atöko kä ndə̂ mo tô rə̂ pä a âkenga la Modô ndə̂ Akrə atə̂ lafô? Modô ndə̂ Akrə nə̈ də̈ tchabâ?»

³⁵ Jezü tô rə̂ ndə̂nə̈ sə̈ andjê päkëdə̂: «Gbô ngbänga kä lə̂ gbâtə̂ nyê ndə̂ kpîɛ̂kpîɛ̂ lö. Äwäpä nyë nə ndə̂sə̂ nə̈, ndə̂ gbô rə̂ wâ ndrotə̂ nyê lâme, ndə̂kə̂ pa bübü tchô troabô nyê trô-ê. Bëte akrə ndə̂ tche nə lə̂ bübü tchô, tche wûn-âbo sə̂ tchô ndə̂ tche e tâ-a.

³⁶ Ndə̂ gbô ngbänga nə̈ ndə̂po ndrotə̂ nyê lâme, äwäpä nyë za su nyê sə̈ tchë ndə̂kə̂ pa nyë watə̂ abechë ndə̂ ngbänga.» Pânə̈ ndə̂ Jezü tô rə̂ sə̈ andjê käko, tche ê kə̈ zâtə̂ yê wü tə̂ andjê.

Ajuîfu kösə̂ kə̂ za su andjê sə̈ Jezü

³⁷ Ndə̂ Jezü mbô akpɨ̈ngbɨ̈ arə tchâtchu andjê lâme käko, praâbalë andjë zâbo su andjê sə̈ tchë-a.

³⁸ Käko pö ndə̂ Ezayï earə̂ ndə̂ma Ndjapä tô rə̂ alême mbô gundə̂sə̂ nə̈; tche tö rə̂ päkëdə̂: «Gbölö Gbïɛ̈, tchabâ âgamba pö ndə̂ ârâ? Gbölö Gbïɛ̈ nyïsə̂ gbôgbô ndə̂ yê sə̈ tchabâ?»

³⁹ Andjë wâbo ndə̂kə̂ za su andjê sə̈ Jezü-a, ârə̂ kä ndə̂ Ezayï kâ tô ndjë rə̂ päkëdə̂:

⁴⁰ «Ndjapä mbö andjê tə̂ a-earə̂ föla, kə̈ gʉ̂â kə̂ wunsə̂ rə ndə̂ andjê, ndə̂kə̂ pa andjë wûn-âbo rə wûn la lala andjê-ê, ndə̂kə̂ pa andjë djeabô tchə̂lə̂ nə̈ djê lə̂ köbosə̂ kə̂ wunsə̂ rə ndə̂ andjê-ê, kə̂ djeabô tə̂ andjê djê pu tchë-ê, ânyë tche tcha andjê lə̂ tə̂kömbô ndə̂ andjê.»

⁴¹ Ezayï tö pö lâme alême bëte tche wün köbo ndə̂ Jezü wâ gbölö ânyë kə̈ tô pö ndə̂ yê.

⁴² Dëkë, lə̂ gûtə̂ amakündji ndə̂ ajuîfu, angbängbä angânə̈ zä su andjê sə̈ Jezü, praâbalë andjë nyîâbo sə̂nə̈ kraâ lə̂ la azü-a, bëte andjë mbö wawa afarizïɛ̈n ndə̂kə̂ pa andjë groabô andjê grô lə̂ anda kə̂ voga Ndjapä-ê.

⁴³ Bëte andjë nyïndə̂ kə̂ lusə̂tə̂ andjê, ndə̂ âtô dəndə̂ azü kə̈ rôpâ anə̈ ndə̂ âtô bhândə̂ Ndjapä.

Pö ma Jezü kä ndə̂ âwa ngbanga

⁴⁴ Jezü tô rə̂ ngbôô päkëdə̂: «Âdə ngâ akrə âza su yê sə̈ mê, âdə̂âbo mëmê la kütû mê kä ndə̂ tche zâ su yê sə̈ mê-a. Praâbalë tche zä ndjë rə̂ sə̈ tchanə̈ ndə̂ tche wân mê.

⁴⁵ Akrə ndə̂ tche wûn mê, tche wûn ndjë tchanə̈ ndə̂ tche wân mê nə̂.

⁴⁶ Më wätə̂ ngbänga, më nə̈ atə̂ bêche ndə̂kə̂ pa akrə ndə̂ tche zâ su yê sə̈ mê, səabô sə̂ lə̂ bübü tchô-ê.

⁴⁷ Âdə ngâ akrə âdje pö ndə̂ mê, ânyë kə̈ mbôâbô rə mbô gundə̂sə̂ nə̈-ê, âdə̂âbo mëmê kä ndə̂ âwadje ngbanga lə̂ küma yê-a. Bëte më nə̂âbo ndə̂kə̂ wa ngbanga lə̂ küma azü tchêbêche âtə-a, praâbalë më nə̈ ndə̂kə̂ tcha andjê lə̂ kuzü.

⁴⁸ Akrə ndə̂ tche kôsə̂ mê ânyë kə̈ mbôâbô rə mbô gundə̂sə̂ apö ndə̂ mê, tche kä la earə̂ kə̂ wa ngbanga ndə̂ yê tâ. Pö ndə̂ më tô rə̂ alême kä, pö nə̈ lâme kä ndə̂ âwadje ngbanga lə̂ küma yê tə̂ lö nə̈ ndə̂ tchêbêche krʉ.

⁴⁹ Bëte më tôâbo pö ndə̂ âtô bhândə̂ mê la tə̂ mê-a, Bha mê ndə̂ tche wân mê kä ndə̂ âzâma sə̈ mê ndə̂kə̂ to pö ndə̂ më wâ ndə̂kə̂ to rə̂, la apö ndə̂ më wâ ndə̂kə̂ nyisə̂ nə̈.

⁵⁰ Më wûnsə̂ nə̈ nə̂ pä kə̂ zama ndə̂ yê zä tchîsûwu ndə̂ logbɛ̂ logbɛ̂. Käko pö ndə̂ mê to rə̂, më tö rə̂ ndjë tiî batə̂ rə̂ ndə̂ Bha mê tô rə̂ sə̈ mê.»