Jâan 10 - Mbëtï Ndjapä: TÄFO MADƗ̈

Ndoka pâ earə̂ kə̂ bata aɛ̈bro-ngbaga

¹ Jezü tö rə̂ päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, akrə ndə̂ tche lîâbô lî lə̂ manda gbadja ndə̂ aɛ̈bro-ngbaga nə̈ ânyë kə̈ kû dəpâ mbiti lə̂ ngâ köbo ngbî, dëkë tche wätə̂ earə̂ ngbä, ânyë kə̈ wâ ndjë tə̂ earə̂ kə̂ ndɨ rə.

² Praâbalë akrə ndə̂ tche lî lə̂ manda nə̈, tche də̈ earə̂ kə̂ bata aɛ̈bro-ngbaga.

³ Earə̂ kə̂ bata manda gbadja nə̈ âkro manda tə̂ yê, aɛ̈bro-ngbaga nə̈ dje tchə̂lə̂ gɨ̈ yê. Tche âe aɛ̈bro-ngbaga ndə̂ yê la tə̂ yê la rə̈ andjê, kə̂ wutu la andjê atə̂ sûwu.

⁴ Âdə tche âwutu la andjê gbɛ̂ ësûwu, kə̂ nə tchâtchu andjê, ânyë andjë za tchêngbâ yê, bëte andjë wûnsə̂ tchə̂lə̂ gɨ̈ yê nə̂.

⁵ Andjê zabô tchêngbâ ngâ akrə ndə̂ ngâ gö ngbî balë tee-a, praâbalë andjê kpeadje tə̂ yê, bëte andjë wûn-âbo sə̂ tchə̂lə̂ gɨ̈ yê-a.»

⁶ Jezü tö ndoka lâme sə̈ andjê, praâbalë andjë djêâbo tchə̂lə̂ pö ndə̂ tche nyîndə̂ kə̂ to rə̂ sə̈ andjê lâme-a.

Jezü wätə̂ tchôtchô earə̂ kə̂ bata aɛ̈bro-ngbaga

⁷ Jezü tö rə̂ päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, mëmê kä ndə̂ âwâtə̂ manda gbadja ndə̂ aɛ̈bro-ngbaga.

⁸ Azü gbɛ̂ ndə̂ andjë nə̂ dokʉ̈tchê tə̂ mê, andjë wätə̂ a-earə̂ ngbä la a-earə̂ kə̂ ndɨ rə. Praâbalë aɛ̈bro-ngbaga nə̈ djêâbo andjê-a.

⁹ Mëmê kä ndə̂ âwâtə̂ manda gbadja nə̈. Âdə ngâ akrə âli dəndə̂ mê, tchê tchadje lə̂ kuzü. Tchê liadje, kə̂ wutuadje, ânyë kə̂ gboadje rə ndə̂kə̂ zɨ rə̂.

¹⁰ Earə̂ ngbä nə̈ kütû ndə̂kə̂ zɨ ngbä, kə̂ won akrə, kə̂ ndɨ rə. Mëmê, më nə̈ ndə̂kə̂ pa azü wa la tchîsûwu, kə̂ wa la rə̂ âro masə̂nə̈.

¹¹ Më wätə̂ tchôtchô earə̂ kə̂ bata aɛ̈bro-ngbaga. Tchôtchô earə̂ kə̂ bata aɛ̈bro-ngbaga gbötə̂ tchîsûwu ndə̂ yê bëte aɛ̈bro-ngbaga ndə̂ yê.

¹² Akrə ndə̂ tche wâbô wâtə̂ earə̂ kə̂ bata aɛ̈bro-ngbaga, ânyë aɛ̈bro-ngbaga nə̈ wâbô wâtə̂ andjandə̂ ye nə̈ la tə̂ yê, âdə tchetchë ndə̂ tche mbo kütû kua bëte makətche lâme, tche âwun zogbô ndə̂ tche nə, kə̂ gbotə̂ aɛ̈bro-ngbaga nə̈, kə̂ kpe-ê. Käko zogbô nə̈ ku pâ andjê, ânyë kə̂ wrʉrʉ tchə̂lə̂ andjê katchôgbɛ̂.

¹³ Tche mbö kua nə̈ kütû bëte makətche, kə̈ wûn-âbo nyonyo aɛ̈bro-ngbaga nə̈-a.

¹⁴ Mëmê kä ndə̂ âwâtə̂ tchôtchô earə̂ kə̂ bata aɛ̈bro-ngbaga. Më wünsə̂ aɛ̈bro-ngbaga ndə̂ mê, ânyë aɛ̈bro-ngbaga ndə̂ mê wûnsə̂ mê,

¹⁵ batə̂ rə̂ ndə̂ Bha mê wûnsə̂ mê, ânyë më wûn ndjë sə̂ Bha mê. Më gbötə̂ tchîsûwu ndə̂ mê bëte aɛ̈bro-ngbaga ndə̂ mê.

¹⁶ Më kä la angâ aɛ̈bro-ngbaga, praâbalë andjë sə̂âbo lə̂ gbadja âtə dämba nə̂-a. Andjanə̈ lâme, äwäpä më ka ndjë la andjê. Andjê djeadje tchə̂lə̂ gɨ̈ mê, käko andjê wadje kütû tə̂ kpûlû aɛ̈bro-ngbaga balë, ânyë earə̂ kə̂ bata andjê wa kütû balë.

¹⁷ Bha mê nyində̂ mê bëte rə̂ ndə̂ më gbôtə̂ tchîsûwu ndə̂ mê, ânyë kə̈ kä zâ rə̂.

¹⁸ Ngâ akrə balë jiabô tchîsûwu ndə̂ mê tə̂ mê tee-a, praâbalë mëmê kä ndə̂ âgbotâ la tə̂ mê. Më kä la gbôgbô ndə̂kə̂ gbotə̂ tchîsûwu ndə̂ mê, kə̈ wâ ndjë la gbôgbô ndə̂kə̂ kä za rə̂. Kə̂ zama ndə̂ Bha mê zâ rə̂ sə̈ mê kä lâme.»

¹⁹ Tchə̂lə̂ ajuîfu kä krʉ̂ tchə̂lə̂ tə̂ yê bëte pö ndə̂ Jezü tô rə̂ lâme.

²⁰ Angbängbä angânə̈ lə̂ gûtə̂ andjê tô rə̂ päkëdə̂: «Ngbongbo tchozö kä lə̂ yê, nyî âmbo tchë, bëte giamâ nyê dje tchë?»

²¹ Angânə̈ tö andə̂ andjë nə̈ päkëdə̂: «Apö lâme də̂âbo apö ndə̂ ngbongbo tchozö-a. Ngâ ngbongbo tchozö kʉ̈sə̂ kə̂ vro la a-earə̂ föla?»

Azü kösə̂ Jezü

²² Losə̂ zɨ ndə̂ âmbo tə̂ gbölösə̂nə̈ wûtu nə̂. Azü sə̂ lakə̂ mbo kpülü ndə̂kə̂ gbotə̂ gbölö nda Ndjapä ngbî bëte Ndjapä bhâ Jerûzalêmo.

²³ Jezü sə̂ lakə̂ nə tchâmbrönda ndə̂ gbölö nda Ndjapä ndə̂ a ê rə̂ tâ pä tchâmbrönda ndə̂ Salomön.

²⁴ Ajuîfu tâkpa ndə̂ Jezü kə̈ tô rə̂ sə̈ tchë päkëdə̂: «Ârâ âkrʉ bëte mö zoo dalatchêbâ ânyë mo to lëge pö sə̈ ârâ? Âdə momö kä ndə̂ âwâtə̂ Krîsiti nə̈, amö to rə̂ sə̈ ârâ kraâ!»

²⁵ Jezü tô rə̂ ndə̂nə̈ sə̈ andjê päkëdə̂: «Më tô rə̂ sə̈ nyê nə̂, praâbalë nyë zâbo su nyê sə̈ mê-a. Arə ndə̂ âto pö pâ mê, ädə̈ akua ndə̂ mê mbo rə̂ la rə̈ Bha mê.

²⁶ Praâbalë nyë zâbo su nyê sə̈ mê-a, bëte nyë wâbo tə̂ aɛ̈bro-ngbaga ndə̂ mê-a.

²⁷ Aɛ̈bro-ngbaga ndə̂ mê djë tchə̂lə̂ gɨ̈ mê, më wünsə̂ andjê ânyë andjë zä tchêngbâ mê.

²⁸ Më zä tchîsûwu ndə̂ logbɛ̂ logbɛ̂ sə̈ andjê, andjê tchuabô balë tee-a, ânyë ngâ akrə balë krʉabô andjê tchânə̂ mê tee-a.

²⁹ Rə ndə̂ Bha mê zâ rə̂ sə̈ mê wä gbölö kə̈ rô arə gbɛ̂, ânyë ngâ akrə balë kʉ̂âbo sə̂kə̂ krʉa rə̂ tchânə̂ Bha mê-a.

³⁰ Mëmê la Bha mê, ârâ wä balë.»

³¹ Ajuîfu kâ kʉ̂ täme tə̂ täfo nə̈ ndə̂kə̂ nye Jezü la rə̂.

³² Jezü tô rə̂ sə̈ andjê päkëdə̂: «Më nyïsə̂ atchôtchô kua tə̂ gbölösə̂nə̈ ndə̂ âtô dəndə̂ Bha mê. Anə̈bâ lə̂ gbâtə̂ akua nə̈ lâme kä ndə̂ nyë nyîndə̂ kə̂ nye mê la täme tə̂ pö ndə̂nə̈?»

³³ Ajuîfu tô rə̂ ndə̂nə̈ sə̈ tchë päkëdə̂: «Âdə̂âbo bëte tchôtchô kua kä ndə̂ ârâ nyîndə̂ kə̂ nye mö la täme tə̂ pö ndə̂nə̈-a, praâbalë äwätə̂ pö ndə̂nə̈ ndə̂ mo drô Ndjapä. Bëte momö ndə̂ mo wâtə̂ akrə, mo mbôtə̂ zə̈ tə̂ Ndjapä.»

³⁴ Jezü tô rə̂ ndə̂nə̈ sə̈ andjê päkëdə̂: «A mbôâbo rə̂ lə̂ Mbëtï-ndïɛ̈ ndə̂ nyê päkëdə̂: ‹Mëmê, më tö rə̂ päkëdə̂: Nyë wätə̂ andjapä.›

³⁵ Käko azü ndə̂ a tô pö Ndjapä sə̈ andjê lâme, ndïɛ̈ ë rə̂ tə̂ andjê pä andjapä, tchâme, Pö ndə̂ Mbëtï Ndjapä tô rə̂ wâbo ndə̂kə̂ rʉ-a.

³⁶ Mëmê, Ndjapä dɨ̈ mê ngbî ânyë kə̈ wân mê atə̂ bêche âtə. Nyë tô andə̂ nye nə̈ pä më drö Ndjapä tə̂ pö ndə̂nə̈ ndə̂ më tô rə̂ pä më wätə̂ Modô ndə̂ Ndjapä?

³⁷ Âdə mê âmboabô akua ndə̂ Bha mê mbô-ê, nyë gämbabô pö ndə̂ mê gâmba-ê.

³⁸ Praâbalë âdə mê âmbo rə̂, ânyë nyê gâmbabô pö ndə̂ mê gâmba, äwäpä nyë gamba pö ndə̂ akua ndə̂ më mbô rə̂. Äwäpä nyë wunsə̂ nə̈, kə̂ dje tchə̂lə̂ nə̈ pä Bha mê kä balë la mê, batə̂ rə̂ ndə̂ më wâ ndjë balë la tchë.»

³⁹ Käko andjë kä pû köbo ndə̂kə̂ za tchë, praâbalë tche rô tə̂ andjê.

⁴⁰ Jezü dôtə̂ yê atə̂ kalâ ngû ndə̂ Jurudɛ̈n, sə̂ tchô ndə̂ Jâan zâ batɛ̂me tâ sə̈ azü dokʉ̈tchê lâme, kə̈ sə̂ tchâme.

⁴¹ Angbängbä azü nə̂ pu tchë. Andjë tö rə̂ päkëdə̂: «Jâan mbôâbo ngâ kpɨ̈ngbɨ̈ rə balë-a, praâbalë apö gbɛ̂ ndə̂ tche tô rə̂ pâ köchë âtə wätə̂ lëge nə̈.»

⁴² Tchâme, angbängbä azü zâ su andjê sə̈ Jezü.