Gälâte 6 - Mbëtï Ndjapä: TÄFO MADƗ̈

Azə̈ kʉ̈ arə ndə̂ âlû lə̂ su angâ azə̂ lə̂ gbâtə̂ azə̂

¹ Arə̂mä, âdə nyë âgbo ngâ akrə lakə̂ mbo ngbongbo rə, nyënyê ndə̂ Kpɨ̂ki Yingö wâ lə̂ nyê, äwäpä nyë ka la tchë pâ tchôtchô köbo tə̂ nyima nə̈. La zə̈ gbö-ê! Ânyë momö ndjë gbɛ̂ ngâ rə vuabô mö vû ndə̂kə̂ pa mo te lə̂ ngbongbo rə-ê.

² Nyë kʉ̈ arə ndə̂ âlû lə̂ su angâ nyê lə̂ gbâtə̂ nyê: Käko ânyë, nyê mboadje rə gundə̂sə̂ ndïɛ̈ ndə̂ Krîsiti.

³ Âdə ngâ akrə âwatə̂ mbämbä akrə, ânyë kə̈ wûntə̂ yê batə̂ gbölö akrə, dëkë tche bölotə̂ yê la tə̂ yê.

⁴ Praâbalë äwäpä akrə balë balë rɨ tchə̂lə̂ yê pâ kə̂ mbo rə ndə̂ yê. Âdə tche âgbo ngâ rə ndə̂ tə̂ yê krâ tâ, äwäpä tə̂ yê nə̈ kra kpôtə̂ yê la tə̂ yê, âwâbo pä tche za la yê tə̂ ngâ yê-a.

⁵ Bëte akrə balë balë kä ndə̂ âza kʉ̂ngbô ndə̂ yê la tə̂ yê.

⁶ Äwäpä akrə ndə̂ a nyisə̂ pö Ndjapä sə̈ tchë, tche krʉ tchə̂lə̂ arə ndə̂ yê gbɛ̂, kə̂ kʉ ngâ tchâkâla nə̈ sə̈ akrə ndə̂ tche nyîsə̂ rə nə̈ sə̈ tchë.

⁷ Nyë böloabô tə̂ nyê bôlo-ê: Akrə wâbo ndə̂kə̂ mo Ndjapä-a, bëte rə ndə̂ akrə lû rə̂, tchê soadje ndjî nə̈.

⁸ Âdə ngâ akrə âlu angbongbo arə ndə̂ gʉ su yê la tə̂ yê, ndjî rəgʉ ndə̂ tchê soadje rə̂ ngbânə̈, ädə̈ arə ndə̂ ngbongbo gʉ su yê mbô rə̂, ndə̂ ânyîndə̂ kə̂ to rə̂ pä kuzü. Praâbalë âdə tche âlu arə ndə̂ Yingö, ndjî rəgʉ ndə̂ tche soadje rə̂ ngbânə̈ ädə̈ ndjî rəgʉ ndə̂ Yingö, ndə̂ ânyîndə̂ kə̂ to rə̂ päkëdə̂: Tchîsûwu ndə̂ logbɛ̂ logbɛ̂.

⁹ Azə̈ zogoabô zôgo lakə̂ mbo dâkâ-ê, bëte lo nə̈ âtadje tâ ndə̂ azə̈ gboadje rə ngbânə̈, ndə̂ azə̈ gbôâbô gbôtâ-ê.

¹⁰ Käko âdə azə̈ âgbo köbo ndə̂kə̂ mbo dâkâ, äwäpä azə̈ mbo rə̂ tə̂ azü gbɛ̂, kə̂ mbo rə̂ tə̂ gbogbôsə̂nə̈ tə̂ andjanə̈ ndə̂ azə̈ wâ la andjê balë lə̂kə̂ za su sə̈ Jezü.

Adɨ̂ apö lakə̂ po ndə̂ azü

¹¹ Nyë wün adjâdjagba ada-mbëtï âtə, mëmê la tə̂ mê kä ndə̂ âmbô rə̂ la könô mê sə̈ nyê.

¹² Azü ndə̂ andjë kʉ̂ nyê la gbôgbô ndə̂kə̂ pa a wa nyê la gasa lâme, andjë mbö rə̂ ndə̂kə̂ pa azü wun andjê batə̂ atchôtchô azü. Andjë nyî kütû ndə̂nə̈ pä a mboabô anyê mbô tə̂ gêgêe-e nə̈, tə̂ pö ndə̂kə̂ mu pö ndə̂ yö ndə̂ gba ndə̂ Krîsiti-î.

¹³ Bëte andjanə̈ ndə̂ a wâ andjê la gasa lâme, andjë mbôâbo ndjë rə gundə̂sə̂ ndïɛ̈ la tə̂ andjê-a. Praâbalë andjë nyïndə̂ nə̈ pä a wa nyê la gasa, ânyë andjë bhi gogo andjê pâ nyê.

¹⁴ Âdə andə̂ me nə̈, tə̂ mê krâbo tə̂ ngâ rə ngbî-a, tə̂ më krä kütû tə̂ pö ndə̂ yö ndə̂ gba ndə̂ Gbölö Gbïɛ̈ ndə̂ azə̂ Jezü Krîsiti. Lə̂ köbosə̂ yö ndə̂ gba nə̈, arə tchêbêche âtə tchû lə̂ mê nə̂, ânyë më tchû ndjë tə̂ pö ndə̂ arə tchêbêche nə̂.

¹⁵ Bëte kə̂ wa gasa, âdəndjë ndə̂kə̂ wabô gasa wâ, âwâbo tə̂ ngâ rə-a. Praâbalë tchôtchô rə nə̈ də̈ rə̂ ndə̂ a kâ mbô azə̂ tə̂ täfo nə̈ nə̂.

¹⁶ Azü gbɛ̂ ndə̂ andjë mbo rə gundə̂sə̂ apö lâme, më tö rə̂ päkëdə̂: Äfü pä Ndjapä za zɨtɨ su sə̈ andjê, kə̂ wun nyonyo andjê gbɛ̂, ndjë la azü gbɛ̂ ndə̂ andjë wâtə̂ alëge azü ndə̂ Ndjapä.

¹⁷ Ätö ndə̂ tchô angaâtə, âwâbo pä ngâ akrə ka kâ küma mê-a! Bëte tchêngbâ aku ndə̂ âwâtə̂ kpoto mê lâme, ädə̈ nyîsɨ̂ ndə̂ ânyîsə̂ nə̈ pä më wâtə̂ akrə ndə̂ Jezü nə̂.

¹⁸ Arə̂mâ ndə̂ mê, äfü pä tchôtchô su ndə̂ Gbölö Gbïɛ̈ ndə̂ azə̂ Jezü Krîsiti wa pâ nyê gbɛ̂! Amin.