Gälâte 5 - Mbëtï Ndjapä: TÄFO MADƗ̈

Krîsiti jï azə̂ tchâtchâ ngbâa

¹ Krîsiti jï azə̂ tchâtchâ ngbâa ndə̂kə̂ pa azə̈ sə ämbänə̈. Käko nyë kpökpo tə̂ nyê! Nyë kä nyî bata nyîndə̂ nə̈ pä a ka la nyê tchâtchâ ngbâa-ê.

² Mëmê Pôlo, më tö rə̂ sə̈ nyê päkëdə̂: Âdə nyë ânyində̂ nə̈ pä a wa nyê la gasa, dëkë rə ndə̂ Krîsiti mbô rə̂ tə̂ nyê wä ämbänə̈.

³ Më kä tô rə̂ sə̈ azü gbɛ̂ ndə̂ a wâ andjê la gasa päkëdə̂: Äwäpä andjë mbo arə ndə̂ ndïɛ̈ tə̂ manə̈ balë balë gbɛ̂.

⁴ Âdə nyë âpu köbo ndə̂kə̂ wa djîrə̂ lə̂ la Ndjapä lə̂ köbosə̂ kə̂ mbo arə gbɛ̂ ndə̂ ndïɛ̈, dëkë tchə̂lə̂ gbâtə̂ nyê la Krîsiti krʉ̂ nə̂, köbo ndə̂kə̂ pa nyë gbo tchôtchô su ndə̂ Ndjapä wâbo-a.

⁵ Âdə andə̂ azə̈ nə̈, azə̈ zä su azə̂ pâ Ndjapä ndə̂kə̂ pa tche mbo rə̂ ânyë azə̈ wa djîrə̂ lə̂ la yê. Kpɨ̂ki Yingö kä ndə̂ âmbo rə̂ pä azə̈ krʉ bëte rə̂, lə̂ köbosə̂ kə̂ za su azə̂ sə̈ Krîsiti.

⁶ Bëte âdə ngâ akrə âwa balë la Jezü Krîsiti, ânyë a wâ tchë la gasa, âdəndjë rə̂ ndə̂ a wâbô tchë wâ la gasa, tchôtchô rə nə̈ də̂âbo rə̂ lâme-a! Tchôtchô rə nə̈ wä ndə̂kə̂ pa akrə za su yê sə̈ Krîsiti. Kə̂ za su sə̈ Krîsiti nə̈ lâme kä ndə̂ âmbo rə̂ pä azü nyində̂ angâ andjê.

⁷ Nyë mbö rə alême la köbo nə̈! Tchabâ kä ndə̂ âkîtə̂ köbo tə̂ nyê ânyë nyë kâ mbôâbô rə mbô gundə̂sə̂ lëge pö-ê?

⁸ Kə̂ mboabô rə mbô gundə̂sə̂ lëge pö lâme, tôâbo bhândə̂ tchanə̈ ndə̂ tche ê nyê lâme-a.

⁹ A tö rə̂ päkëdə̂: «Kütû kpîɛ̂kpîɛ̂ djëvö ndə̂ âwâ lə̂ zûwü farîni kä ndə̂ âmbo rə̂ pä farîni nə̈ gbɛ̂ on-ma.»

¹⁰ Âdə andə̂ me nə̈, më zä su mê sə̈ Gbölö Gbïɛ̈ tə̂ pö ndə̂ nyê: Âwâbo pä nyë za ngâ köbo ngbî-a. Praâbalë akrə ndə̂ tche ndɨ̂ tchə̂lə̂ küma nyê lâme, tche âwa ndjë tə̂ tchabâ gbɛ̂, a âwadje ngbanga lə̂ küma yê.

¹¹ Âdə andə̂ me nə̈, arə̂mä, âdə më ândəpo lakə̂ mu pö pä a wa azü la gasa, bëte giamâ kä ndə̂ gbô azü ndə̂po lakə̂ mbo mê tə̂ gêgêe nə̈? Âdə më âmu pö ndə̂nə̈, käko pö ndə̂ yö ndə̂ gba ndə̂ Krîsiti kä kʉ bata su ngâ akrə balë tee-a.

¹² Azü ndə̂ andjë djîngɨli tchə̂lə̂ küma nyê lâme, âwâbo pä a wa kütû andjê la gasa-a, praâbalë äfü pä a ndɨ tchâtchâ andjê tratralë-ê.

¹³ Arə̂mâ ndə̂ mê, Ndjapä ë nyê ndə̂kə̂ pa nyë wutu tchâtchâ ngbâa. Âwâbo pä kə̂ wutu ndə̂ nyê tchâtchâ ngbâa nə̈ lâme watə̂ ngâ köbo ndə̂kə̂ mbo angbongbo arə ndə̂ gʉ su nyê-a. Praâbalë lə̂ köbosə̂ kə̂ nyïndə̂ ngâ, nyë mbö kua sə̈ angâ nyê lə̂ gbâtə̂ nyê.

¹⁴ Bëte apö ndə̂ ndïɛ̈ gbɛ̂ krʉ̈ kütû pâ ndïɛ̈ balë: «Äwäpä mo nyində̂ ngâ zə̈ batə̂ tə̂ zə̈ la tə̂ zə̈.»

¹⁵ Praâbalë âdə nyë âsə lakə̂ mbo rə batə̂ agia güsü, lakə̂ to ku tə̂ angâ nyê, lakə̂ lolotə̂ nyê lə̂ gbâtə̂ nyê, la nyë gbö-ê! Ârə̂ âdəabô də̂ käko, nyê won-adje tə̂ nyê lə̂ gbâtə̂ nyê gbɛ̂.

Rə ndə̂ Yingö mbo rə̂ la rə ndə̂ gʉ tə̂ su akrə mbo rə̂

¹⁶ Nyë djë mê: Nyë gbötə̂ köbo sə̈ Yingö tche nyisə̂ köbo sə̈ nyê, käko nyê kä mbo bata rə lə̂ köbosə̂ ngbongbo gʉ su nyê tee-a.

¹⁷ Bëte angbongbo gʉ tə̂ su akrə mbö kʉ̈ʉ̈ la Yingö, ânyë Yingö mbo kʉ̈ʉ̈ la angbongbo gʉ su akrə. Andjë djêâbo tə̂ andjê lə̂ gbâtə̂ andjê-a, käko rə ndə̂ nyë nyîndə̂ kə̂ mbo rə̂, nyê mboabô rə̂ tee-a.

¹⁸ Praâbalë âdə Yingö ânyisə̂ köbo sə̈ nyê, nyë sə̂âbo tchâtchâ ndïɛ̈-a.

¹⁹ Arə ndə̂ angbongbo gʉ su akrə mbo rə̂ wä lə̂ arə batə̂: Kə̂ pu aɛ̈chë âdəndjë aköchë katchôgbɛ̂, kə̂ mbo arə kâkpö, kə̂ mbo arə ganô,

²⁰ kə̂ voga angakʉ̈lä, kə̂ mbo yëwä, kə̂ kosə̂ ngâ, kə̂ po, kə̂ mbo gbölö su, kə̂ mbo mêrâ, kə̂ pu köbo ndə̂kə̂ wa batə̂ ngâ yê, kə̂ sə ngbî ngbî tə̂ angâ andjê, kə̂ krʉ tchə̂lə̂ tə̂,

²¹ kə̂ mbo gʉ rə ndə̂ akrə, kə̂ ndjo rə lakə̂ zɨ rə âro masə̂nə̈ lə̂ akpülü, la angâ arə ndə̂ âwâ batə̂ rə̂. Më tô pö lâme sə̈ nyê dokʉ̈tchê nə̂, ânyë kə̂ kä to rə̂ âtə: Azü ndə̂ andjë mbo tə̂ arə käko, andjê gboabô tchô lə̂ Gbölö gö-gbïɛ̈ ndə̂ Ndjapä tee-a.

²² Praâbalë arə ndə̂ Kpɨ̂ki Yingö mbo rə̂ wä kâkë: Kə̂ nyində̂ ngâ, mômô, zɨtɨ su, kə̂ rʉatə̂ su, kə̂ mbo tchôtchô rə, kə̂ mbo dâkâ tə̂ azü, kə̂ za su sə̈ Ndjapä,

²³ kə̂ mbo rə nyima-ë, ndjë lakə̂ kitə̂ gʉ tə̂ su akrə la tə̂ yê. Ndïɛ̈ kôâbo sə̂ arə käko lâme-a.

²⁴ Andjanə̈ ndə̂ andjë wâ balë la Krîsiti, andjë wôn ngbongbo gʉ su andjê la kua nə̈ pâ yö ndə̂ gba nə̂.

²⁵ Âdə azə̈ âwa la tchîsûwu lə̂ köbosə̂ Yingö, äwäpä azə̈ gbotə̂ köbo sə̈ Yingö tche nyîsə̂ köbo sə̈ azə̂.

²⁶ Azə̈ mböäbô rə mbô lakə̂ bhi gogo azə̂-ê, azə̈ püäbô angâ azə̂ pû la pö-ê, kə̂ mboabô gʉ rə ndə̂ angâ azə̂ mbô lə̂ gbâtə̂ azə̂-ê.