Gälâte 4 - Mbëtï Ndjapä: TÄFO MADƗ̈

¹ Pö ndə̂ më nyîndə̂ kə̂ to rə̂ wä kâkë: Âdə akrə ndə̂ tche wâ ndə̂kə̂ gbo rə ngbâ bha nə̈ ândə̂po tə̂ bechë, tche wâbo ngbî tə̂ ngbâa-a, tchetchë ndə̂ rə gbɛ̂ wâtə̂ andə̂ ye nə̈ lâme.

² Praâbalë tche sə̈ tchâtchâ azü ndə̂ andjë wun tchô pâ yê la arə ndə̂ yê lâme, zoo âwutu tə̂ lo nə̈ ndə̂ bha nə̈ nyîsə̂ nə̈.

³ Azəzə̂ ndjë gbɛ̂, azə̈ wä alême tə̂ abechë. Azə̈ wä alême tə̂ angbâa tchâtchâ arə ndə̂ âwâ la gbôgbô pâ cho âtə.

⁴ Praâbalë lo nə̈ ndə̂ Ndjapä dɨ̂ rə̂ âsə̈ wutu, Ndjapä wân Modô ndə̂ yê. Ɛ̈chë kä ndə̂ âzɨ̂ tchë, ânyë tche sə̂ tchâtchâ ndïɛ̈,

⁵ ndə̂kə̂ ji andjanə̈ ndə̂ andjë sə̂ tchâtchâ ndïɛ̈, ânyë âza köbo sə̈ azə̂ ndə̂kə̂ watə̂ abechë ndə̂ Ndjapä.

⁶ Nyë wätə̂ abechë ndə̂ yê tə̂ lëge nə̈, Ndjapä wän Yingö ndə̂ Modô ndə̂ yê lə̂ su azə̂ ndə̂ âon päkëdə̂: «Aba!», ndə̂ ânyîndə̂ kə̂ to rə̂ päkëdə̂: «Bha!».

⁷ Käko mo kâ wâ bata tə̂ ngbâa-a, praâbalë mo wätə̂ bechë ndə̂ Ndjapä. Ndə̂ mo wâtə̂ bechë ndə̂ yê, tchê zadje tchôtchô rə ndə̂ tche bâta rə̂ pra abechë ndə̂ yê sə̈ mö.

Pôlo dɨ̈ su yê tə̂ azü ndə̂ Krîsiti lə̂ gö ndə̂ Gälâte

⁸ Dokʉ̈tchê alême nyë wûn-âbo sə̂ Ndjapä-a, kə̈ wâ alême tə̂ angbâa tchâtchâ andjapä ndə̂ andjë wâbô wâtə̂ alëge andjapä-ê.

⁹ Praâbalë angaâtə, nyë wûnsə̂ Ndjapä nə̂, âdəndjë rə̂ ndə̂ Ndjapä wûnsə̂ nyê, atöko kä ndə̂ nyë nyîndə̂ kə̂ kä dotə̂ nyê pu arə tchêbêche âtə ndə̂ âwâbô wâ la gbôgbô ânyë kə̈ wâbô wâtə̂ ngâ rə lâme-ê? Nyë nyïndə̂ kə̂ kä watə̂ angbâa ndə̂ arə lâme?

¹⁰ Nyë kä lakə̂ bata andïɛ̈ ndə̂ angâ alö, la andə̂ anyîpï, alö ndə̂ azʉ̈ngʉ̈ la angbɨ̂gɨ̂, la andə̂ angû batə̂ gbölö rə lə̂ la nyê!

¹¹ Wawa mbö mê bëte kua ndə̂ më mbô rə̂ bëte nyê lâme, tchêngbâ nə̈ âwa ämbänə̈?

¹² Arə̂mâ ndə̂ mê, më zä da nyê, nyë mbötə̂ nyê batə̂ mê, batə̂ rə̂ ndə̂ mëmê ndjë gbɛ̂ më wâ nə̂ batə̂ nyê. Nyë mbôâbo ngâ ngbongbo rə balë tə̂ mê-a.

¹³ Nyë wûnsə̂ nə̈ nə̂ gbɛ̂, bëte tə̂kömbô ndə̂ âmbô mê kä ndə̂ më gbô köbo ndə̂kə̂ mu Tchôtchô Pö sə̈ nyê tə̂ dokʉ̈ nə̈.

¹⁴ Ndə̂ më wâ la tə̂kömbô, ânyë tə̂ mê fûâbô fû-î lâme, nyë djêâbo tchêngbâ nyê tə̂ mê-a, kə̈ kôâbo ndjë sə̂ mê-a. Praâbalë nyë mbö rə̂ la mê bhândə̂ nyê batə̂ ngâ ânje ndə̂ Ndjapä, ndjë batə̂ Krîsiti Jezü.

¹⁵ Mômô ndə̂ nyë wâ la rə̂ alême wä tchêbâ? Tə̂ lëge nə̈, apö ndə̂ më wûnsə̂ nə̈ pâ nyê ânyë kə̈ nyîndə̂ kə̂ to rə̂ wä kâkë: Âdə ârə̂ âwa alême ndə̂kə̂ pa nyë niɛ andjîla nyê ndə̂kə̂ kʉ rə̂ sə̈ mê, dëkë nyë mbô rə̂ nə̂!

¹⁶ Bëte rə̂ ndə̂ më tô lëge pö sə̈ nyê kä ndə̂ më wâ angaâtə lə̂ la nyê batə̂ akrə ndə̂ nyë kôsə̂ yê?

¹⁷ Azü nə̈ zätə̂ andjê sə̈ nyê, praâbalë pö tə̂ su andjê wä ngbo-ë. Andjë nyï kütû ndə̂kə̂ krʉ tchə̂lə̂ nyê la mê, ânyë nyê zatə̂ nyê gbɛ̂ sə̈ andjê.

¹⁸ Ädäka ndə̂kə̂ pa akrə zatə̂ yê gbɛ̂ ndə̂kə̂ mbo ngâ rə, praâbalë äwäpä dju rə nə̈ watə̂ tchôtchô rə logbɛ̂. Âwâbo pä tche mbo rə̂ kütû sə̂nə̈ ndə̂ më sə̂ lə̂ gbâtə̂ nyê-a.

¹⁹ Abechë ndə̂ mê, më kä lakə̂ wun yûkü nyê tə̂ täfo nə̈ batə̂ rə̂ ndə̂ tchə̂lə̂ ɛ̈chë ka tchë la güzu tə̂ lo kə̂ zɨ ndə̂ yê, zoo Krîsiti ge lə̂ nyê.

²⁰ Më nyï âme ndə̂kə̂ sə bhâ ndrotə̂ nyê ndə̂ tchô angêta, ânyë kə̂ gbo köbo ndə̂kə̂ to angâ apö sə̈ nyê lə̂ ngâ känyï ngbî. Bëte më wûn-âbo sə̂ rə ndə̂ mê mbo rə̂ tə̂ nyê-a.

Agäre la Sarä

²¹ Nyë tö rə̂ sə̈ mê, nyënyê ndə̂ nyë nyîndə̂ kə̂ mbo rə gundə̂sə̂ ndïɛ̈, nyë djêâbo pö ndə̂ ndïɛ̈ nə̈ tô rə̂?

²² A mbö rə̂ lə̂ Mbëtï ndə̂ ndïɛ̈ nə̈ päkëdə̂, Abrahâmo zɨ̈ amodô bïchuû, tche zɨ balë tə̂ Agäre ndə̂ tche də̂ ɛ̈chë ngbâa, kə̈ zɨ̂ ngânə̈ balë tə̂ Sarä, Sarä nə̈ wâbo tə̂ ɛ̈chë ngbâa-a.

²³ Praâbalë a zɨ̈ modô ndə̂ ɛ̈chë ngbâa lâme lə̂ köbosə̂ nə̈ ndə̂ azü gbɛ̂ zɨ tchê abechë la rə̂, kə̈ zɨ̂ tchanə̈ ndə̂ ɛ̈chë ndə̂ tche wâbô wâtə̂ ngbâa lâme lə̂ köbosə̂ bâlâ.

²⁴ Pö ndə̂ aɛ̈chë bïchuû lâme nyïndə̂ kə̂ nyisə̂ ngâ rə: Aɛ̈chë bïchuû lâme wä batə̂ amadɨ̈ bïchuû. Dokʉ̈ madɨ̈ nə̈ tö bhâlə̂ küma aga ndə̂ Sinayï, tche zɨ̈ abechë ndə̂ andjë wâtə̂ angbâa, Agäre kä.

²⁵ Agäre wä batə̂ aga ndə̂ Sinayï ndə̂ âwâ lə̂ agö ndə̂ Arabï. Tche wä batə̂ Jerûzalêmo ndə̂ tchô angêta, bëte tchetchë la abechë ndə̂ yê gbɛ̂ wätə̂ angbâa.

²⁶ Praâbalë Jerûzalêmo ndə̂ tchêlafô wâbo tchâtchâ ngbâa, tchetchë kä ndə̂ âwâtə̂ anyï azə̂.

²⁷ Bëte Mbëtï Ndjapä tö rə̂ päkëdə̂: «Amö wa la mômô, momö ndə̂ ɛ̈chë ndə̂ mo zɨ̂âbô zɨ̂-î! Amö on la mômô, momö ndə̂ tchə̂lə̂ zə̈ kâbô mö kâ lo balë la güzu-î! Bëte ɛ̈chë ndə̂ köchë gbôtə̂ yê, tche gbö abechë tə̂ gbölösə̂nə̈, ârô ɛ̈chë ndə̂ tche wâ la köchë.»

²⁸ Âdə andə̂ nye nə̈ arə̂mâ ndə̂ mê, nyë wätə̂ abechë ndə̂ a zɨ̂ nyê lə̂ köbosə̂ bâlâ batə̂ Izâke.

²⁹ Praâbalë bechë ndə̂ a zɨ̂ tchë batə̂ rə̂ ndə̂ a zɨ̂ azü gbɛ̂, tche mbö gbôgbô alême pâ tchanə̈ ndə̂ a zɨ̂ tchë lə̂ köbosə̂ Yingö, rə nə̈ wä ndjë käko angêta.

³⁰ Käko Mbëtï Ndjapä tö rə̂ atöko? «Amö gro ɛ̈chë ngbâa lâme la modô ndə̂ yê, bëte âwâbo pä modô ndə̂ ɛ̈chë ngbâa lâme gbo arə ngbâ bha andjê lə̂ köbo nə̈ balë la modô ndə̂ tchanə̈ ndə̂ tche wâbô wâtə̂ ngbâa lâme-a!»

³¹ Käko arə̂mâ ndə̂ mê, azə̈ wâbo tə̂ abechë ndə̂ ɛ̈chë ngbâa lâme-a, praâbalë azə̈ wätə̂ abechë ndə̂ ɛ̈chë ndə̂ tche wâbô wâtə̂ ngbâa lâme.