Gälâte 3 - Mbëtï Ndjapä: TÄFO MADƗ̈

Pö ndə̂ ndïɛ̈ la pö ndə̂kə̂ za su sə̈ Krîsiti

¹ Nyënyê azü gö ndə̂ Gälâte, küma nyê wâbo lanə̈-a! Giamâ kä âmbô nyê ânyë köbo nyê yû kâkë? Bëte kpôlə̂ la nyê kä ndə̂ a nyîsə̂ pö kraâ pâ Jezü Krîsiti ndə̂ a wôn tchë pâ yö ndə̂ gba!

² Më nyïndə̂ nə̈ pä nyë to pö pâ pö ndə̂ mê yu nyê la rə̂ âtə: Nyë gbö Yingö bëte rə̂ ndə̂ nyë mbô rə gundə̂sə̂ ndïɛ̈? Âdəndjë bëte rə̂ ndə̂ nyë djê Tchôtchô Pö ânyë kə̈ zâ su nyê pânə̈?

³ Atöko kä ndə̂ küma nyê wâbô wâ lanə̈ kâkë? Tə̂ dokʉ̈ nə̈, nyë jëtə̂ kə̂ mbo arə lə̂ köbosə̂ gbôgbô ndə̂ Yingö, angaâtə nyë nyïndə̂ kə̂ wutu ëtə̂ manə̈ la gbôgbô ndə̂ nyê la tə̂ nyê?

⁴ Arə gbɛ̂ ndə̂ âgbô nyê lə̂ köbosə̂ Yingö alême, ägbö nyê ämbänə̈? Më wûn-âbo andə̂ me nə̈ pä äwä ämbänə̈-a!

⁵ Ndjapä zä Yingö sə̈ nyê ânyë kə̈ mbô akpɨ̈ngbɨ̈ rə lə̂ gbâtə̂ nyê. Tche mbö arə nə̈ lâme bëte rə̂ ndə̂ nyë mbô rə gundə̂sə̂ ndïɛ̈ âdəndjë bëte rə̂ ndə̂ nyë djê Tchôtchô Pö ânyë kə̈ zâ su nyê pânə̈?

⁶ Ädə̈ käko ânyë a tô rə̂ pâ Abrahâmo päkëdə̂: «Abrahâmo zä su yê sə̈ Ndjapä ânyë Ndjapä wûn tchë batə̂ djîrə̂ akrə bëte rə̂ ndə̂ tche zâ su yê sə̈ Ndjapä.»

⁷ Äwäpä nyë dje tchə̂lə̂ pö nə̈ kâkë: Azü ndə̂ andjë zâ su andjê sə̈ Ndjapä kä ndə̂ âwâtə̂ amodô ndə̂ Abrahâmo.

⁸ Mbëtï Ndjapä tô pö ndə̂ rə nə̈ lâme dokʉ̈tchê nə̂ pä Ndjapä âmbo rə̂ ânyë azü ndə̂ andjë wâbô wâtə̂ ajuîfu wa djîrə̂ lə̂ la yê lə̂ köbosə̂ kə̂ za su andjê sə̈ tchë. Mbëtï nə̈ tö ndjë tchôtchô pö sə̈ Abrahâmo dokʉ̈tchê päkëdə̂: «Lə̂ köbosə̂ zə̈, Ndjapä eadje tchôtchô pö pâ azü tchêbêche gbɛ̂.»

⁹ Käko azü gbɛ̂ ndə̂ andjë zâ su andjê sə̈ Ndjapä, Ndjapä eadje tchôtchô pö pâ andjê batə̂ rə̂ ndə̂ tche ê tchôtchô pö pâ Abrahâmo ndə̂ tche zâ su yê sə̈ Ndjapä.

¹⁰ Bëte azü ndə̂ andjë zâ su andjê pâ kə̂ mbo rə gundə̂sə̂ ndïɛ̈, Ndjapä drâ ndə̂ andjê nə̂. Bëte Mbëtï Ndjapä tö rə̂ päkëdə̂: «Ndjapä drä ndə̂ akrə ndə̂ tche mbôâbô rə mbô gundə̂sə̂ rə gbɛ̂ ndə̂ a mbô rə̂ lə̂ Mbëtï-ndïɛ̈.»

¹¹ Pö âtə wätə̂ lëge nə̈: Akrə balë wâbo ndə̂kə̂ wa djîrə̂ lə̂ la Ndjapä lə̂ köbosə̂ ndïɛ̈-a, bëte Mbëtï Ndjapä tö rə̂ päkëdə̂: «Djîrə̂ akrə wadje la tchîsûwu lə̂ köbosə̂ kə̂ za su yê sə̈ Gbölö Gbïɛ̈.»

¹² Dëkë pö ndə̂ ndïɛ̈ wâbo lə̂ pö ndə̂kə̂ za su sə̈ Krîsiti-a. Bëte Mbëtï Ndjapä tö rə̂ päkëdə̂: «Akrə ndə̂ tche mbô rə gundə̂sə̂ ndïɛ̈, tchê wadje la tchîsûwu lə̂ köbosə̂ nə̈.»

¹³ Krîsiti yösə̂ azə̂ ndə̂kə̂ ji azə̂ tchâtchâ ngbongbo pö ndə̂ ndïɛ̈, lə̂ köbosə̂ nə̈ ndə̂ tche zâ ngbongbo pö nə̈ ëpâ yê bëte azə̂. Mbëtï Ndjapä tö rə̂ päkëdə̂: «Ngbongbo pö kä lə̂ küma akrə ndə̂ a î tchë tə̂ yö lafô.»

¹⁴ Rə nə̈ wä käko ndə̂kə̂ pa azü ndə̂ andjë wâbô wâtə̂ ajuîfu gbo tchôtchô pö ndə̂ Ndjapä zâ bâlâ tə̂ Abrahâmo lə̂ köbosə̂ Jezü Krîsiti. Käko lə̂ köbosə̂ kə̂ za su sə̈ Krîsiti, azə̈ gbö Yingö ndə̂ Ndjapä zâ bâlâ tə̂ pö ndə̂nə̈ alême.

Pö ndə̂ ndïɛ̈ la pö ndə̂kə̂ za bâlâ

¹⁵ Arə̂mä, më nyïndə̂ kə̂ to rə̂ kâkë pâ kə̂ mbo rə ndə̂ azü: Âdə ngâ akrə âdro madɨ̈ lə̂ köbosə̂ ndïɛ̈, ngâ akrə balë ndə̂ tche kosə̂ nə̈ âdəndjë rə̂ ndə̂ tche zâ ngâ pö ëpânə̈ wâbo balë-a.

¹⁶ Tə̂ lëge nə̈, Ndjapä zä bâlâ tə̂ Abrahâmo la akrə pâ mawo ndə̂ yê. Mbëtï Ndjapä tôâbo rə̂ päkëdə̂: «La azü pâ mawo ndə̂ yê-a», âwûntî pä a to pö ndə̂ angbängbä azü-a. Praâbalë a tö pö ndə̂ akrə kütû balë: «La akrə pâ mawo ndə̂ yê», ndə̂ ânyîndə̂ kə̂ to rə̂ pä Krîsiti.

¹⁷ Pö ndə̂ më nyîndə̂ kə̂ to rə̂ wä kâkë: Ndïɛ̈ ndə̂ âwûtu ngû ngbangbo voanə̈ la tchêpâ nə̈ tə̂ akrə gbɛ̂ la lə̂ könô gbɛ̂ (430) dəngbânə̈, wâbo la gbôgbô ndə̂kə̂ wrʉ madɨ̈ ndə̂ Ndjapä drô rə̂ dokʉ̈tchê alême-a. Âdə ârə̂ âwrʉ rə̂, dëkë bâlâ ndə̂ Ndjapä zâ rə̂ lə̂ madɨ̈ nə̈ lâme âwâ nə̂ ämbänə̈.

¹⁸ Bëte âdə lə̂ köbosə̂ ndïɛ̈ kä ndə̂ Ndjapä za rə sə̈ akrə, käko âwâbo lə̂ köbosə̂ bâlâ ndə̂ Ndjapä zâ rə̂-a. Dëkë lə̂ köbosə̂ bâlâ kä ndə̂ Ndjapä nyîsə̂ tchôtchô su yê sə̈ Abrahâmo.

¹⁹ Käko bëte giamâ kä ndə̂ Ndjapä zâ ndïɛ̈? Ndjapä zä ndïɛ̈ nə̈ ëpâ kə̂ za bâlâ ndə̂ tche zâ rə̂. Tche zä rə̂ ndə̂kə̂ nyisə̂ bəndɨ kə̂ mbo rə ndə̂ azü zoo ëtə̂ kə̂ wutu ndə̂ akrə pâ mawo ndə̂ Abrahâmo, ndə̂ tche zâ bâlâ tə̂ pö ndə̂ yê. Ndjapä zä ndjë ndïɛ̈ ndə̂ yê lə̂ köbosə̂ aânje sə̈ ngâ akrə ndə̂ tche wâtə̂ earə̂ kə̂ sə lə̂ gbâtə̂ Ndjapä la azü.

²⁰ Praâbalë earə̂ kə̂ nyikrə tchôtchô kə̂ sə lə̂ gbâtə̂ azü nə̈ la Ndjapä wâbo tə̂ earə̂ kə̂ nyikrə tchôtchô kə̂ sə lə̂ gbâtə̂ akrə balë-a. Dëkë Ndjapä wä kütû balë.

²¹ Käko änyïndə̂ kə̂ to rə̂ päkëdə̂ ndïɛ̈ wä ngbî tə̂kə̂ za bâlâ ndə̂ Ndjapä? Âdə̂âbo käko-a! Âdə a âza ngâ ndïɛ̈ alême ndə̂ âwâ ndə̂kə̂ za tchîsûwu sə̈ azü, dëkë akrə wä ndə̂kə̂ wa djîrə̂ lə̂ la Ndjapä lə̂ köbosə̂ ndïɛ̈ nə̈.

²² Praâbalë Mbëtï Ndjapä tö rə̂ pä azü pâ cho gbɛ̂, andjë wätə̂ ngbâa ndə̂ ngbongbo rə, ânyë lə̂ köbosə̂ kə̂ za su sə̈ Jezü Krîsiti, andjë gbö tchôtchô rə ndə̂ Ndjapä zâ bâlâ tə̂ pö ndə̂nə̈.

²³ Dokʉ̈tchê ndə̂kə̂ pa kə̂ za su sə̈ Krîsiti wutu, azə̈ wätə̂ angbâa tchâtchâ ndïɛ̈ ndə̂kə̂ sə bëte lo nə̈ ndə̂ Ndjapä mbo rə̂ ânyë azə̈ wunsə̂ kə̂ za su nə̈ lâme.

²⁴ Käko ndïɛ̈ wä batə̂ ngâ akrə ndə̂ tche wun tchô pâ azə̂ dokʉ̈tchê, zoo ëtə̂ lo kə̂ ka ndə̂ Krîsiti, ânyë azə̈ wa djîrə̂ lə̂ la Ndjapä lə̂ köbosə̂ kə̂ za su sə̈ Krîsiti.

²⁵ Praâbalë angaâtə, ndə̂ lo kə̂ za su sə̈ Krîsiti wûtu âtə, azə̈ kä wâbo tchâtchâ earə̂ kə̂ wun tchô pâ azə̂ nə̈ lâme-a.

²⁶ Bëte nyënyê gbɛ̂ nyë wätə̂ abechë ndə̂ Ndjapä lə̂ köbosə̂ kə̂ za su nyê sə̈ Jezü Krîsiti.

²⁷ Tə̂ lëge nə̈, nyënyê gbɛ̂ ndə̂ nyë gbô batɛ̂me lə̂kə̂ wa balë la Jezü Krîsiti lâme, nyë wâ nə̂ batə̂ Krîsiti.

²⁸ Angaâtə, ngâ juîfu wâ bata-a, âdəndjë gerêke-a. Ngâ ngbâa wâ bata-a, âdəndjë akrə ndə̂ tche sə̂âbô sə̂ tchâtchâ ngbâa-a. Ngâ köchë wâ bata-a, âdəndjë ɛ̈chë-a. Bëte nyënyê gbɛ̂, nyë wä balë la Krîsiti Jezü.

²⁹ Âdə nyë âwatə̂ azü ndə̂ Krîsiti, dëkë nyë wätə̂ azü pâ mawo ndə̂ Abrahâmo. Nyë âgbo arə ndə̂ Ndjapä bâta rə̂ pra nyê gundə̂sə̂ kə̂ zâ bâlâ ndə̂ yê.