Gälâte 2 - Mbëtï Ndjapä: TÄFO MADƗ̈

Kə̂ djetə̂ abadjângele bhâ Jerûzalêmo

¹ La tchêngbâ ngû lə̂ könô gbɛ̂ tchêpâ nə̈ voanə̈, më kâ dôtə̂ mê atə̂ Jerûzalêmo, mëmê la Bärnäbâse. Më ë ndjë la Tîte potə̂ mê.

² Më ë bhâye bëte Ndjapä nyïsə̂ nə̈ sə̈ mê ndə̂kə̂ e, ânyë Tchôtchô Pö ndə̂ më nyîsə̂ nə̈ sə̈ azü ndə̂ andjë wâbô wâtə̂ ajuîfu, më nyîsə̂ nə̈ sə̈ andjê. Më nyï ndjë sə̂nə̈ lə̂ ngâ kpûlû ndə̂ azü tə̂ küma Egilîze. Më mbö rə̂ käko ndə̂kə̂ pa kua ndə̂ më mbô rə̂ alême la anə̈ angêta wabô wâ ämbämbänə̈-ê.

³ Praâbalë Tîte ndə̂ tche wâtə̂ gerêke, ndə̂ mëmê la tchë ê lâme, a zâbo tchë zä la gbôgbô ndə̂kə̂ pa tche wa gasa-a.

⁴ Angâ arə̂mâ ndə̂ yepa ndə̂ andjë lî lə̂ gbâtə̂ ârâ batə̂ a-earə̂ ngbä, nyïndə̂ kə̂ wa tchë la gasa. Andjë nə̈ ndə̂kə̂ wunsə̂ köbo kə̂ sə ndə̂ ârâ pânə̈ ndə̂ ârâ wûtu tchâtchâ ngbâa ânyë kə̈ wâ balë la Jezü Krîsiti, ânyë kə̂ kä mbo ârâ la ngbâa.

⁵ Ârâ mbôâbo tə̂ ârâ gundə̂sə̂ pö ndə̂ andjê lâme balë-a, âdəndjë lə̂ ngâ kpîɛ̂kpîɛ̂ dalo balë-a. Bëte ârâ nyïndə̂ kə̂ bata Tchôtchô Pö ndə̂ âwâtə̂ lëge pö bëte nyê.

⁶ Angâ azü kä tâ ndə̂ a wûn andjê batə̂ agbölö azü, âdə andjê âwa alême tə̂ agbölö azü âdəndjë rə̂ ndə̂ andjë wâbô wâtə̂ agbölö azü, âwûn-âbo mê balë-a. Ndjapä lûâbo sə̂ akrə tə̂ pö ndə̂ la yê-a. Agbölö azü lâme zâbo mê la gbôgbô ndə̂kə̂ pa më mbo ngâ rə ngbî-a.

⁷ Praâbalë andjë wünsə̂ nə̈ pä Ndjapä zä rə̂ sə̈ mê ndə̂kə̂ mu Tchôtchô Pö sə̈ azü ndə̂ andjë wâbô gasa wâ, batə̂ rə̂ ndə̂ tche zâ rə̂ sə̈ Pîêre ndə̂kə̂ mu rə̂ sə̈ azü ndə̂ andjë wâ gasa.

⁸ Bëte Ndjapä ndə̂ tche zâ gbôgbô sə̈ Pîêre ndə̂kə̂ watə̂ badjângele ndə̂ azü ndə̂ andjë wâ gasa, tche zä ndjë gbôgbô sə̈ mê ndə̂kə̂ watə̂ badjângele ndə̂ azü ndə̂ andjë wâbô wâtə̂ ajuîfu.

⁹ Jâke la Pîêre la Jâan ndə̂ a wûn andjê batə̂ agbölö azü tə̂ küma Egilîze wünsə̂ nə̈ pä tə̂ lëge nə̈, Ndjapä zâ kua nə̈ lâme sə̈ mê nə̂. Käko andjë pö ndə̂ mê la Bärnäbâse la könô andjê ndə̂kə̂ nyisə̂ nə̈ pä ârâ la andjê wä balë. Käko andə̂ ârâ, ârâ ë pu azü ndə̂ andjê wâbô wâtə̂ ajuîfu, ânyë andjë ê andə̂ andjë nə̈ pu azü ndə̂ andjë wâ gasa.

¹⁰ Rə balë ndə̂ andjë yûkû nə̈ sə̈ ârâ də̈ rə̂ ndə̂kə̂ pa sə̂ a-earə̂ yûkü te lə̂ ârâ. Më mbö rə nə̈ lâme la su mê gbɛ̂.

Pôlo kosə̂ ngbongbo kə̂ mbotə̂ Pîêre

¹¹ Praâbalë sə̂nə̈ ndə̂ Pîêre wûtu bhâ Äntïyôche, më kösə̂ pö kraâ sə̈ tchë lə̂ la azü gbɛ̂, bëte tche mbö ngâ rə ndə̂ âwâbo lə̂ köbo nə̈-a.

¹² Bëte dokʉ̈tchê ndə̂kə̂ pa angâ azü ndə̂ Jâke wân andjê wutu, tche kä lakə̂ zɨ kɨ̈zɨ̂ la azü ndə̂ andjê wâbô wâtə̂ ajuîfu. Praâbalë ndə̂ andjë wûtu, tche mbrôtə̂ yê tə̂ andjê chï, kə̈ kä zɨ̂âbo rə la andjê-a, bëte wawa azü ndə̂ andjë wâ gasa mbö tchë.

¹³ Angâ ajuîfu tê ngbâ yê lakə̂ mbo rə ndə̂ yê ndə̂ âwâ ngbî tə̂ pö ma yê. Bärnäbâse ndjë gbɛ̂ tê ngbâ andjê lə̂kə̂ mbo rə nə̈ lâme.

¹⁴ Praâbalë ndə̂ më wûn rə̂ pä andjë mbôâbo rə djîrə̂ gundə̂sə̂ lëge pö ndə̂ Tchôtchô Pö nə la rə̂-a, më tô rə̂ sə̈ Pîêre lə̂ la azü gbɛ̂ päkëdə̂: «Momö ndə̂ mo də̂ juîfu, mo mbö rə batə̂ azü ndə̂ andjê wâbô wâtə̂ ajuîfu. Mo mbôâbo rə batə̂ ajuîfu balë-a. Ämbö atöko ânyë mo kʉ azü ndə̂ andjë wâbô wâtə̂ ajuîfu la gbôgbô ndə̂kə̂ pa andjë mbo rə batə̂ ajuîfu?»

Kə̂ tcha lə̂ kuzü lə̂ köbosə̂ kə̂ za su sə̂ Krîsiti

¹⁵ Âdə andə̂ ârâ, a zɨ̈ ârâ zɨ̈ tə̂ ajuîfu. Ârâ wâbo tə̂ azü ndə̂ andjë wâbô wâtə̂ ajuîfu ndə̂ andjë wätə̂ a-earə̂ ngbongbo rə lâme-a.

¹⁶ Azə̈ wûnsə̂ nə̈ nə̂ pä akrə wâbo tə̂ djîrə̂ akrə lə̂ la Ndjapä lə̂ köbosə̂ kə̂ mbo rə gundə̂sə̂ ndïɛ̈-a, praâbalë kütû lə̂ köbosə̂ kə̂ za su sə̈ Jezü Krîsiti. Bëte rə̂ kä ndə̂, ârâ ndjë gbɛ̂ zâ su ârâ sə̈ Krîsiti Jezü ndə̂kə̂ pa ârâ watə̂ adjîrə̂ azü lə̂ la Ndjapä. Âdə̂âbo lə̂ köbosə̂ kə̂ mbo rə gundə̂sə̂ ndïɛ̈-a. Bëte akrə balë wâbo tə̂ djîrə̂ akrə lə̂ la Ndjapä lə̂ köbosə̂ kə̂ mbo rə gundə̂sə̂ ndïɛ̈-a.

¹⁷ Praâbalë âdə ârâ âpu köbo ndə̂kə̂ wa djîrə̂ lə̂ la Ndjapä lə̂ köbosə̂ Krîsiti, ânyë a wûn ndjë ârâ batə̂ a-earə̂ ngbongbo rə, änyïndə̂ kə̂ to rə̂ pä Krîsiti ë la ârâ ndə̂kə̂ mbo ngbongbo rə? Âdə̂âbo käko-a.

¹⁸ Bëte âdə mê ânyikrə tchêndə̂ ndïɛ̈ ndə̂ më ndɨ̂ tchə̂lə̂ nə̈, dëkë mëmê la tə̂ mê kä ndə̂ âmbô rə̂ pä më watə̂ akrə ndə̂ më kôsə̂ ndïɛ̈.

¹⁹ Bëte mëmê, më tchû tə̂ pö ndə̂ ndïɛ̈ alême nə̂, bëte arə ndə̂ âwûn ndïɛ̈, ndə̂kə̂ pa tchîsûwu ndə̂ më wâ la rə̂ äwa bëte Ndjapä. Mëmê la Krîsiti kä ndə̂ âtchû pâ yö ndə̂ gba.

²⁰ Praâbalë âdə̂âbo mëmê kä ndə̂ âwâ la tchîsûwu-a, Krîsiti kä ndə̂ âwâ la tchîsûwu lə̂ mê. Bëte kə̂ sə ndə̂ mê ndə̂ akrə, më wä la tchîsûwu angaâtə kütû lə̂ köbosə̂ kə̂ za su mê sə̈ Modô ndə̂ Ndjapä ndə̂ tche nyîndə̂ mê ânyë kə̈ yôsə̂ tə̂ yê la kuzü bëte mê.

²¹ Më nyîâbo ndə̂nə̈ pä tchôtchô su ndə̂ Ndjapä wa ämbänə̈-a. Bëte âdə ngâ akrə âwa djîrə̂ lə̂ la Ndjapä lə̂ köbosə̂ ndïɛ̈, dëkë Krîsiti tchü ämbämbänə̈.